Ang Dakong Bigaon Napadayag

ANG presenteng sistema sa kalibotan ubos 5,sa paggahom ni Satanas dunay tulo ka pangunang elemento nga gimaneobra sa “diyos niining kalibotana.” Kini mao ang politikanhong pagmando, paggahom ug impluwensiya sa dakong negosyo, ug relihiyon. Latas sa libolibong katuigan nga kasaysayan, kining tulo ka elemento presente kanunay sa halos tanang sistema sa pagmando. Hain niining gamhanang mga puwersa ang gisimbolohan sa “inahan sa mga bigaon”?​—2 Corinto 4:3, 4, The Jerusalem Bible; Pinadayag 12:9; 17:5.

Sumala sa panan-awon ni Juan nga gihisgotan dinhi, ang mga magmamando, “ang mga hari sa yuta,” kinabubut-ong mianha sa iyang higdaanan sa pakighilawas. (Pinadayag 18:3) (Ang makasaysayanhong ebidensiya niini ipresentar sa sunod nga mga panid.) Busa, ang Dakong Babilonya dili makasimbolo sa politikanhong pagmandong elemento sa sistema sa kalibotan.

Komosta ang dakong negosyong seksiyon nga nagadulag bililhong bahin sa kahikayan sa tawo karong adlawa? Tinong kini usa ka gamhanang impluwensiya diha sa daghang kanasoran ug, sa pagkamatuod, nagahukom kon kinsay mahimong dato ug kinsay mahimong kabos. Kini kaha mao ang Dakong Babilonya? Ang usa ka manulonda mihatag ug bililhong ilhanan kang Juan nga nagatubag niining pangutanaha. Gipahibalo niya ang makapakurat nga hitabo​—ang pagkawala sa kahimuot diha sa Babilonya! Nawad-an siya sa iyang mga parokyano ug mga hinigugma, nga kalit giluod kaniya. Kinsa pa, gawas sa “mga hari sa yuta,” ang nahiapil sa iyang regular nga mga dumuduaw? Ang manulonda miingon: “Tungod sa bino sa kasuko sa iyang pakighilawas ang tanang nasod nabiktima, ug ang mga hari sa yuta nakighilawas kaniya, ug ang nagpanaw nga mga magpapatigayon sa yuta nahimong bahandianon tungod sa gahom sa iyang makauulaw nga kaluhoan.” Oo, ang mga magpapatigayon sa kalibotan nakapahimulos pinaagi sa pakignegosyo ug pakigduyog kaniya ug nagpasamot sa iyang “makauulaw nga kaluhoan.” Busa, dili siya makasimbolo sa dakong patigayon sa tibuok-kalibotang gidak-on.​—Pinadayag 18:3.

Busa, sa pamaagi sa paghiklin, ang politikanhong pagmando ug paggahom ug impluwensiya sa dakong patigayon mahigawas na. Unsa may nabilin kanato? Kini mao gayod ang bahin nga gamhanan nga motumbas usab sa hukom, “tungod kay pinaagi sa imong buhat sa espiritismo ang tanang nasod nalimbongan.” Kini mao ang sa nangagi gamhanan apan karon nagkaawop nga elemento nga dulot nakaimpluwensiya sa panghunahuna ug mga aksiyon sa kanasoran sukad gayod sa mga adlaw sa karaang Babilonya. Siya mao ang usa nga may “usa ka gingharian ibabaw sa mga hari sa yuta”​—nga mao, ang bakak nga relihiyon!​—Pinadayag 17:18; 18:23.

Oo, bisan tuod daw makapakurat sa pila ka sinserong relihiyosong tawo, ang Dakong Babilonya, ang inahan sa mga bigaon, maoy usa ka simbolo sa tibuok-kalibotang imperyo sa bakak nga relihiyon ni Satanas. Siya maoy usa ka simbolo sa mga relihiyon sa kalibotan nga sa usa o laing paagi nakigkompromiso sa politikanhon ug pinansiyal nagmandong mga elemento latas sa kasaysayan.

Babilonya nga Tighulhog sa Gubat

Nahiuyon sa matagnaong panan-awon, ang Dakong Babilonya mao ang dakong bigaon nga nag-agak sa mga nasod, mga katawhan, ug mga tribo ngadto sa dugoon nga mga gubat, mga krusada, ug mga panimalos, nga nagbendisyon kanila pinaagi sa mga pangyamyam, agwa bendeta, mga pangadye, ug mainitong mga pakigpulong patriotikanhon.a​—Pinadayag 18:24.

Ang iyang klero, ilabina iyang ang mga tsaplin, maoy masinugtanong mga instrumento sa mga magmamando sa pagpatapok sa mga masa ingong bala sa kanyon paingon sa pagpinatyanay sa duha ka gubat sa kalibotan ug sa ubang dagkong mga away. Ang Katoliko nagpatay sa Katoliko, ug ang Protestante matinumanon nga nagpatay sa Protestante uban sa kapildihan sa mga 50 ngadto 60 milyong kinabuhi sa duha lang ka gubat sa kalibotan.

Niining nalamdagang ika-20ng siglo, ang kabilin sa relihiyon nagapadayon sa pagpasanay sa dinumtanay ug kamatayon​—dili lamang sa dominyo sa Kakristiyanohan uban sa iyang Katoliko batok Protestante nga pagharongay kondili diha usab sa dili-Kristohanong kalibotan uban sa iyang Islam batok sa Hudaismo, Hinduismo batok Islam, Budhismo batok Hinduismo, Sikhismo batok Hinduismo, ug uban pa.

Dugang pa, sa kanunay ang relihiyon buot moimpluwensiyag maayo sa “mga hari sa yuta,” nga naningkamot sa paghukom sa ilang mga dulnganan ug ilang mga sumusunod. Hisgotan nato sa daklit ang pila ka panig-ingnan.

[Mga Footnote]

[Hulagway sa panid 4]

Hain niini—politika, dakong patigayon, o relihiyon—ang gihawasan sa “Dakong Babilonya”?