Kapitulo 16

Ang Matuod nga Diyos ug ang Imong Kaugmaon

“Niining kahibudnganang uniberso, dunay usa ka butang diin ang Tawo mahimong makaseguro. Piho nga ang Tawo mismo dili ang kinadak-an espirituwal nga presensiya sa Uniberso. . . . Dunay usa ka presensiya sa Uniberso nga labaw nga espirituwal kay sa Tawo mismo. . . . Ang tumong sa tawo mao ang pagpangitag komunyon uban sa presensiya luyo sa talagsaong hitabo, ug sa pagpangita niini uban sa tumong sa pagdala sa iyang kaugalingon harmonya uban niining absoluto espirituwal nga katinuoran.”​—An Historian’s Approach to Religion, ni Arnold Toynbee.

 1. (Ilakip ang introduksiyon.) (a) Unsa ang giila ni historyador Toynbee mahitungod sa tawo ug sa uniberso? (b) Sa unsang paagi gipaila sa Bibliya ang “absoluto espirituwal nga katinuoran”?

SULOD sa kadaghanan sa miaging unom ka libo ka tuig, ang katawhan nangita, uban sa mas dako o mas menos nga kadasig, sa pagkaplag nianang “absoluto espirituwal nga katinuoran.” Ang matag dakong relihiyon naghatag nianang katinuoran sa nagkalahing ngalan. Depende kon unsa ang imong relihiyon​—Hindu, Muslim, Budista, Shinto, Confuciano, Taoista, Hudiyo, Kristohanon, o unsa pa​—duna kay ngalan alang sa “absoluto espirituwal nga katinuoran.” Apan ang Bibliya naghatag niining katinuoran sa ngalan, henero, ug personalidad​—si Jehova, ang buhi nga Diyos. Kanang unikong Diyos miingon kang Ciro nga Bantogan sa Persiya: “Ako mao si Jehova, ug wala nay lain. Gawas kanako wala nay Diyos. . . . Ako mismo naghimo sa yuta ug naglalang bisan sa tawo ibabaw niini.”​—Isaias 45:​5, 12, 18; Salmo 68:​19, 20.

Jehova​—Diyos sa Kasaligang Tagna

 2. Kon buot kitang makabaton sa kasaligang impormasyon mahitungod sa kaugmaon, kang kinsa kita moliso, ug ngano?

² Si Jehova mao ang matuod nga sangkoanan sa pagpangita sa katawhan sa Diyos. Si Jehova nagbutyag sa iyang kaugalingon isip Diyos sa tagna kinsa makatug-an sa kataposan gikan sa sinugdanan. Nagkanayon siya pinaagi kang Isaias nga manalagna: “Hinumdomi ang unang mga butang sa karaan na nga panahon kanhi, nga ako mao ang Diyos ug wala nay laing Diyos, ni bisan kinsa nga sama kanako; ang Usa nga nagtug-an gikan sa sinugdanan sa kataposan, ug gikan sa karaang panahon sa mga butang wala pa mahimo; ang Usa nga nag-ingon, ‘Ang akong kaugalingong tambag magapadayon, ug ang tanang butang akong gikahimut-an akong pagabuhaton’; . . . Ako na nganing kini gisulti; ako usab kini pagapahinaboon. Ako nakaporma niini, ako usab kining pagahimoon.”​—Isaias 46:​9-11; 55:​10, 11.

 3. (a) Unsang mga hitabo ang atong makitang daan pinaagi sa tagna sa Bibliya? (b) Unsa ang gihimo ni Satanas sa mga dili magtotoo, ug ngano?

³ Uban sa maong kasaligang Diyos sa tagna, mahimong mahibalo kita kon unsa ang mahitabo sa sistema sa kalibotan sa nabahinbahing mga relihiyon. Makatagna usab kita kon unsa ang mahitabo sa gamhanan politikal nga mga organisasyon nga daw nagkontrol sa dulnganan sa kalibotan. Dugang pa, makatag-an kita kon unsang dadangatan ang naghulat sa “diyos niining sistema sa mga butang,” si Satanas, kinsa “nagbuta sa mga hunahuna sa mga dili magtotoo” pinaagi sa panon sa bakak nga mga relihiyon nga nakaagak sa katawhan pahilayo sa matuod nga Diyos, si Jehova. Ug nganong si Satanas nagbuhat niining nagbuta nga bulohaton? Aron “nga ang kahayag sa mahimayaon maayong balita mahitungod kang Kristo, kinsa mao ang dagway sa Diyos, dili makasidlak.”​—2 Corinto 4:​3, 4; 1 Juan 5:19.

 4. Unsang mga pangutana mahitungod sa yuta ug sa umaabot sa tawo ang nanginahanglan tubagon?

⁴ Mahimo usab kitang mahibalo kon unsa ang anaa luyo niining gitagnang mga hitabo. Sa unsang kahimtang ang yuta sa kaulahian makaplagan? Hugaw? Guba? Upaw? O kaha dunay pagbag-o sa yuta ug sa tawhanong rasa? Sama sa atong makita, ang Bibliya nagtubag niining tanang pangutana. Apan pasagdi nga dad-on nato ang atong pagtagad sa mga hitabo sa haduol nga umaabot.

“Bantogang Babilonya” Giila

 5. Unsa ang nakita ni Juan sa panan-awon?

⁵ Ang basahon sa Pinadayag sa Bibliya gibutyag kang apostol Juan sa pulo sa Patmos sa tuig 96 K.P. Kini nagpintal sa buhi nga hulagway sa dagkong hitabo nga mahitabo sa panahon sa kataposan, ang panahon diin, sumala sa ebidensiya sa Bibliya, ang katawhan nagkinabuhi na sukad sa 1914.a Lakip niadtong simbolikong mga hulagway nga nakita ni Juan sa panan-awon, mao ang barot, bagag-nawong nga bigaon, nga ginganlan “Bantogang Babilonya, ang inahan sa mga bigaon ug sa dulumtanang mga butang sa yuta.” Sa unsang kahimtang siya? “Nakita ko nga ang babaye hubog uban sa dugo sa mga balaan ug sa dugo sa mga saksi ni Jesus.”​—Pinadayag 17:​5, 6.

 6. Nganong ang Bantogang Babilonya wala magrepresentar sa nagmando politikal nga mga elemento sa kalibotan?

⁶ Kinsa ang girepresentahan niining babaye? Wala kita biyai sa pagtaghap kon kinsa siya. Pinaagi sa palakaw sa pagpapha, mahimong matukas ang iyang maskara. Nianang samang panan-awon, nadunggan ni Juan ang usa ka manolonda nga nag-ingon: “Umari ka, ipakita ko kanimo ang paghukom sa dakong bigaon kinsa naglingkod sa daghang mga tubig, uban kang kinsa ang mga hari sa yuta nakighilawas, samtang kadtong kinsa nagpuyo sa yuta gihubog uban sa bino sa iyang pagpakighilawas.” Kon ang mga hari, o mga magmamando, sa yuta nakighilawas uban kaniya, nan kini nagkahulogan nga ang bigaon dili makarepresentar sa nagmando politikal nga mga elemento sa kalibotan.​—Pinadayag 17:​1, 2, 18.

 7. (a) Nganong ang Bantogang Babilonya wala magrepresentar sa komersiyal nga mga elemento? (b) Unsa ang girepresentahan sa Bantogang Babilonya?

⁷ Ang samang talaan nagtug-an kanato nga “ang nagpanaw nga mga magpapatigayon sa yuta nahimong dato tungod sa gahom sa iyang makauulaw nga pagpatuyang.” Busa ang Bantogang Babilonya dili makarepresentar sa mga elemento sa negosyo, o sa “patigayon,” sa kalibotan. Apan, ang inspiradong teksto nagpadayon: “Ang mga tubig nga imong nakita, diin ang bigaon naglingkod, nagkahulogan sa mga tawo ug mga panon ug mga nasod ug mga sinultihan.” Unsang laing prinsipal nga elemento niining sistema sa kalibotan ang nahibilin nga haom sa hubit sa simbolikong bigaon nga nakighilawas uban sa politikal nga mga magmamando, nga namatigayon uban sa intereses sa negosyo, ug naglingkod sa himaya ibabaw sa mga tawo, mga panon, mga nasod, ug mga sinultihan? Mao kini ang bakak nga relihiyon sa tanan nagkalahing takuban niini!​—Pinadayag 17:​15; 18:​2, 3.

 8. Unsang dugang kamatuoran ang naglig-on sa pag-ila sa Bantogang Babilonya?

⁸ Kining pag-ila sa Bantogang Babilonya gilig-on sa pagkondenar kaniya sa manolonda tungod sa iyang “espiritistikanhong buhat [pinaagi diin] ang tanang mga nasod nahisalaag.” (Pinadayag 18:23) Ang tanang porma sa espiritismo relihiyoso ug inspirado-demonyo. (Deuteronomio 18:​10-12) Busa, ang Bantogang Babilonya kinahanglan magsimbolo sa relihiyosong binuhat. Ang Biblikanhong ebidensiya nagpakita nga siya ang entiro kalibotan nga imperyo sa bakak nga relihiyon ni Satanas, nga gipaluyohan niya diha sa mga hunahuna sa mga tawo aron sa pagpatipas sa katawhan gikan sa matuod nga Diyos, si Jehova.​—Juan 8:​44-47; 2 Corinto 11:​13-15; Pinadayag 21:​8; 22:15.

 9. Unsang kumong mga tuhog ang makaplagan sa daghang relihiyon?

⁹ Sama sa atong nakita latas niining basahon, dunay kumong mga tuhog latas sa makapalibog nga tabil sa mga relihiyon sa kalibotan. Daghan sa mga relihiyon duna sa ilang mga gamot sa mitolohiya. Halos ang tanan nabugkot pagtingob pinaagi sa pipila ka porma sa pagtuo sa giingon imortal tawhanong kalag nga mopabiling buhi sa kamatayon ug moadto sa laing-kinabuhi o molalin ngadto sa laing linalang. Daghan ang duna sa kumon nga tinubdan sa pagtuo sa usa ka makalilisang dapit sa pagsakit ug pag-antos sa impiyerno. Ang uban konektado sa karaan paganong mga pagtuo sa triada, trinidad, ug inahang mga diyosa. Busa, haom lamang nga tanan sila pundokon pagtingob ubos sa usa ka hugpong simbolo sa bigaon “Bantogang Babilonya.”​—Pinadayag 17:5.

Panahon Na sa Pagkalagiw Gikan sa Bakak nga Relihiyon

10. Unsang dadangatan ang gitagna alang sa relihiyosong bigaon?

¹⁰ Unsa ang gitagna sa Bibliya nga mao ang kataposang dadangatan niining likos-globong bigaon? Sa simbolikong pinulongan, ang basahon sa Pinadayag naghubit sa iyang kalaglagan sa mga kamot sa politikal nga mga elemento. Kini gisimbolohan sa “napulo ka sungay” nga nagsuportar sa Hiniusang Kanasoran, “usa ka kolor-eskarlata mapintas nga mananap” nga mao ang larawan sa namantsahag-dugo politikal nga sistema ni Satanas.​—Pinadayag 16:​2; 17:​3-16.b

11. (a) Ngano ang bakak nga relihiyon gikondenar sa Diyos? (b) Unsa ang mahitabo sa Bantogang Babilonya?

¹¹ Kining kalaglagan sa imperyo sa kalibotan sa bakak nga relihiyon ni Satanas mao ang resulta sa kontra-hukom sa Diyos niining mga relihiyon. Sila makaplagang sad-an sa espirituwal nga pagpakighilawas tungod sa kalangkitan sa ilang madaogdaogon politikal nga mga kerido ug sa ilang pagsuporta kanila. Ang bakak nga relihiyon nakamantsa sa mga palda niini uban sa inosente nga dugo samtang kini patriyotikanhong nakigdula uban sa hamili nagamandong matang sa matag nasod sa mga gubat niini. Busa, si Jehova nagbutang sa mga kasingkasing sa politikal nga mga elemento niini sa pagbuhat sa iyang kabubut-on batok sa Bantogang Babilonya ug sa paglaglag kaniya.​—Pinadayag 17:​16-18.

12. (a) Unsa ang imong buhaton karon aron maluwas sa dihang ang Babilonya laglagon? (b) Unsang pagtulon-an ang nagpaila sa matuod nga relihiyon?

¹² Uban sa maong kaugmaon nga naglurat sa nawong sa mga relihiyon sa kalibotan, unsa ang imong buhaton? Ang tubag anaa sa nadunggan nga tingog ni Juan gikan sa langit nga nag-ingon: “Gula kamo kaniya, katawhan ko, kon dili kamo buot makaapil uban sa iyang mga sala, ug kon dili kamo buot makaambit sa iyang mga hampak. Kay ang iyang mga sala nagtipun-og sungko sa langit, ug ang Diyos nahinumdom sa iyang mga buhat sa inhustisya.” Busa, karon na ang panahon sa pagsugot sa mando sa manolonda sa paggula sa imperyo sa bakak nga relihiyon ni Satanas ug sa pagduyog sa matuod nga pagsimba kang Jehova. (Tan-awa ang kahon, panid 377.)​—Pinadayag 17:​17; 18:​4, 5; itandi ang Jeremias 2:​34; 51:​12, 13.

Armagedon Haduol Na

13. Unsang mga hitabo ang mahitabo sa dili madugay?

¹³ Ang Pinadayag nagpahayag nga “sa usa ka adlaw ang iyang mga hampak magaabot, ang kamatayon ug kasubo ug kagutom, ug siya sa bug-os pagasunogon uban sa kalayo.” Pinaagi sa tanan matagnaong ilhanan sa Bibliya, kanang “usa ka adlaw,” o mubong panahon sa tuling paglaglag, karon haduol na. Sa pagkamatuod, ang kalaglagan sa Bantogang Babilonya magapasulod sa hugna sa panahon sa “dakong kasakitan” nga mosangko sa “gubat sa dakong adlaw sa Diyos nga Labing Gamhanan . . . Har-Magedon.” Kanang gubat, o away, sa Armagedon motultol sa kapildihan sa politikal nga sistema ni Satanas ug sa pagtambog kaniya sa bung-aw. Ang usa ka matarong bag-ong kalibotan mamanagbanag na!​—Pinadayag 16:​14-16; 18:​7, 8; 21:​1-4; Mateo 24:​20-22.

14, 15. Unsang tagna ang dayag nagkaduol sa katumanan?

¹⁴ Karon, ang lain talagsaong tagna sa Bibliya nagkaduol sa katumanan sa atubangan sa atong mga mata. Ang apostol Pablo nagtagna ug nagpasidaan: “Karon mahitungod sa mga panahon ug mga petsa, mga igsoon, kamo wala na magkinahanglan nga pagasulatan pa. Kay kamo sa inyong kaugalingon nasayod pag-ayo nga ang adlaw ni Jehova moabot ra sama sa usa ka kawatan sa kagabhion. Sa dihang sila magkanayon: ‘Kalinaw ug kasigurohan!’ unya ang kalit nga kalaglagan dihadiha magaabot kanila sama sa pagbati sa kasakit sa babaye nga talianak; ug sila sa bisan unsang paagi dili makaikyas.”​—1 Tesalonica 5:​1-3.

¹⁵ Mopadayag kini nga ang mga nasod nga kanhi naggubat ug nagsuspetsa sa usa ug usa karon mapanagan-ong nagduol nganha sa situwasyon diin sila makaarang sa pagdeklarar sa kalinaw ug kasigurohan sa kalibotan. Busa, gikan sa lain pang anggulo, atong nahibaloan nga ang adlaw sa paghukom ni Jehova sa bakak nga relihiyon, sa mga nasod, ug sa ilang magmamando si Satanas, haduol na.​—Sofonias 2:​3; 3:​8, 9; Pinadayag 20:​1-3.

16. Ngano ang tambag ni Juan hinongdanon kaayo karon?

¹⁶ Minilyon karon ang nagkinabuhi sa ilang mga kinabuhi nga daw sa ang materyal nga mga bili lamang ang malungtaron ug hamili. Apan, kon unsa ang gitanyag niining dunot nga kalibotan taphaw ug lumalabay. Mao kana ngano takdo ang tambag ni Juan: “Ayaw higugmaa ang kalibotan o ang mga butang sa kalibotan. Kon ang bisan kinsa mahigugma sa kalibotan, ang gugma sa Amahan wala kaniya; tungod kay ang tanang butang sa kalibotan​—ang kailibgon sa unod ug ang kailibgon sa mga mata ug ang mapagarbohong pagpasundayag sa paagi sa kinabuhi sa usa—​wala maggikan sa Amahan, apan naggikan sa kalibotan. Dugang pa, ang kalibotan lumalabay ug mao man ang kailibgon niini, apan siya nga nagabuhat sa kabubut-on sa Diyos magapabilin hangtod sa kahangtoran.” Dili ba mopalabi ka nga magpabilin hangtod sa kahangtoran?​—1 Juan 2:​15-17.

Gisaad Bag-ong Kalibotan

17. Unsa ang anaa sa kaugmaon alang niadtong kinsa nangita sa matuod nga Diyos?

¹⁷ Sanglit kay ang Diyos maghukom sa kalibotan pinaagi kang Kristo Jesus, unsa ang mosunod? Dugay na kanhi, sa Hebreohanong Kasulatan, ang Diyos nagtagna nga siya magatuman sa iyang orihinal nga katuyoan sa katawhan niining yuta, nga mao, sa pagbaton sa masinugtanon tawhanong pamilya nga magpahimulos sa hingpit nga kinabuhi sa paraisong yuta. Ang pagsulay ni Satanas sa pagpukan nianang katuyoan wala mag-anular sa saad sa Diyos. Busa, si Haring David makasulat: “Kay ang mga mamumuhat-daotan mismo pagaputlon, apan kadtong naglaom kang Jehova mao ang magapanag-iya sa yuta. Ug sa dili na madugay, ang usa nga daotan mawala na . . . Ang matarong sa ilang kaugalingon magapanag-iya sa yuta, ug sila magapuyo niini hangtod sa kahangtoran.”​—Salmo 37:​9-11, 29; Juan 5:​21-30.

18-20. Unsang kausaban ang mahitabo niining yuta?

¹⁸ Unsa ang kahimtang sa yuta human niana? Sa bug-os hugaw? Sunog? Upaw? Dili! Sa orihinal gituyo ni Jehova nga ang yuta mahimong hinlo, balanse, paraisong parke. Ang potensiyal niana naglungtad bisan pa sa mga abuso sa tawo sa yuta. Apan si Jehova nagsaad nga siya “magalaglag niadtong nagalaglag sa yuta.” Ang situwasyon sa nagkaduol globonhong kalaglagan naglungtad lamang sa ika-20 ka siglo. Dugang rason, nan, sa pagtuo nga sa dili madugay si Jehova magkuhag aksiyon sa pagpanalipod sa iyang propiedad, sa iyang linalang.​—Pinadayag 11:​18; Genesis 1:​27, 28.

¹⁹ Kining kausaban mahitabo sa dili madugay ubos sa kahikayan sa Diyos sa “usa ka bag-ong langit ug usa ka bag-ong yuta.” Dili kini magkahulogan sa usa ka bag-ong langit ug usa ka bag-ong planeta apan, hinonoa, usa ka bag-o espirituhanong pagmando ibabaw sa usa ka nabag-ong yuta nga puy-an sa katilingban sa nabag-ong katawhan. Nianang bag-ong kalibotan, wala nay luna alang sa pagpamintaha sa isigkatawo o sa mananap. Wala nay kapintas o pag-ulag dugo. Wala nay walay-balay, wala nay gutom, wala nay pagdaogdaog.​—Pinadayag 21:1; 2 Pedro 3:​13.

²⁰ Ang Pulong sa Diyos nagkanayon: “‘Ug sila tinong magatukod ug mga balay ug magapuyo niini; ug sila tinong magatanom ug mga parrasan ug magakaon sa mga bunga niini. Dili sila magatukod ug unya lain ang magapuyo; dili sila magatanom ug unya lain ang magakaon. Kay sama sa mga adlaw sa usa ka kahoy mao man ang mga adlaw sa akong katawhan; ug ang buhat sa ilang kaugalingong mga kamot ang akong mga pinili magpahimulos sa bug-os. . . . Ang lobo ug ang kordero magsalo sa pagsibsib, ug ang liyon magkaon sa dagami sama sa torong baka; ug mahitungod sa bitin, ang iyang pagkaon mao ang abug. Dili sila magdaot ni magpahinabog bisan unsang kalaglagan sa tanan nakong bukid nga balaan,’ nag-ingon si Jehova.”​—Isaias 65:​17-25.

Patukoranan sa Bag-ong Kalibotan

21. Ngano ang bag-ong kalibotan segurado?

²¹ ‘Sa unsang paagi kining tanan mahimong posible?’ mangutana ka. Tungod kay ang “Diyos, nga dili arang makabakak, nagsaad sa wala pa ang kapanahonan” nga ang katawhan ipasig-uli ug makabaton sa walay kataposang kinabuhi sa kahingpitan. Ug ang pasukaranan niining paglaom mao kanang gipahayag sa apostol Pedro sa iyang unang sulat sa isigka-dinihogang Kristohanon: “Bulahan ang Diyos ug Amahan sa atong Ginoong Jesu-Kristo, kay sumala sa iyang dakong kaluoy siya naghatag kanato sa usa ka bag-ong pagkatawo ngadto sa usa ka buhing paglaom pinaagi sa pagkabanhaw ni Jesu-Kristo gikan sa mga patay, ngadto sa usa ka dili madunot ug dili mabuling ug dili malawos nga panulondon.”​—Tito 1:​1, 2; 1 Pedro 1:​3, 4.

22. Unsa ang pasukaranan sa paglaom sa bag-ong kalibotan, ug ngano?

²² Ang pagkabanhaw ni Jesu-Kristo mao ang pasukaranan sa paglaom sa usa ka matarong bag-ong kalibotan tungod kay siya gitudlo sa Diyos sa pagmando gikan sa mga langit ibabaw sa nahinloang yuta. Si Pablo usab nagpasiugda kon unsa ka hinongdanon ang pagkabanhaw ni Kristo sa dihang siya misulat: “Bisan pa, karon si Kristo gibanhaw gikan sa mga patay, ang unang mga bunga niadtong kinsa natulog sa kamatayon. Kay sanglit ang kamatayon pinaagi sa usa ka tawo, ang pagkabanhaw sa mga patay usab pinaagi sa usa ka tawo. Kay maingon nga kang Adan ang tanan namatay, mao man usab kang Kristo ang tanan mabuhi.”​—1 Corinto 15:​20-22.

23. (a) Ngano ang pagkabanhaw ni Kristo hinongdanon? (b) Unsang sugo ang gihatag sa nabanhaw nga Jesus ngadto sa iyang mga sumusunod?

²³ Ang halad kamatayon ni Kristo maoy usa ka takdong lukat ug ang iyang pagkabanhaw nagpahaluna sa pasukaranan alang sa paglaom sa “usa ka bag-ong langit,” ang pagmando sa Gingharian, ug sa usa ka nausab, nabag-o tawhanong rasa, “usa ka bag-ong yuta” nga katilingban. Ang iyang pagkabanhaw naghatag ug panukmod sa pagwali ug pagtudlo nga gihimo sa iyang matinumanong mga apostol. Ang talaan nagsugid kanato: “Bisan pa niana, ang napulog-usa ka disipolo miadto sa Galilea ngadto sa bukid diin [ang gibanhaw nga] Jesus naghikay alang kanila, ug sa dihang sila nakakita kaniya sila nagtimbaya kaniya, apan ang pipila nagduda. Ug si Jesus miduol ug misulti kanila, nga nag-ingon: ‘Ang tanang awtoridad gihatag kanako sa langit ug sa yuta. Busa panlakaw ug maghimog mga disipolo sa katawhan sa tanang kanasoran, nga magbawtismo kanila sa ngalan sa Amahan ug sa Anak ug sa espiritu santo, nga magtudlo kanila sa pagbantay sa tanang mga butang akong gisugo kaninyo. Ug, tan-awa! Ako magauban kaninyo sa tanang mga adlaw hangtod sa konklusyon sa sistema sa mga butang.’”​—Mateo 19:​28, 29; 28:​16-20; 1 Timoteo 2:6.

24. Unsang dugang panalangin ang gigarantiya sa pagkabanhaw ni Jesus?

²⁴ Ang pagkabanhaw ni Jesus usab naggarantiya sa laing panalangin alang sa katawhan​—ang pagkabanhaw sa mga patay. Ang pagbanhaw ni Jesus kang Lazaro gikan sa mga patay timailhan sa mas tanan-malukopong pagkabanhaw sa umaabot. (Tan-awa ang panid 249-50.) Nag-ingon si Jesus: “Ayaw kahibulong niini, tungod kay ang takna nagsingabot diin ang tanan niadtong sa handumanang mga lubnganan makadungog sa iyang tingog ug manggula, kadtong kinsa nagbuhat sa maayong mga butang sa pagkabanhaw sa kinabuhi, kadtong kinsa nagbatasan sa daotang mga butang sa pagkabanhaw sa paghukom.”​—Juan 5:​28, 29; 11:​39-44; Buhat 17:​30, 31.

25. (a) Unsang pagpili ang mabatonan sa tanan sa bag-ong kalibotan? (b) Unsang porma sa relihiyon ang maglungtad sa bag-ong kalibotan?

²⁵ Pagkadakong kasadya ang mag-abiabi balik sa atong mga hinigugma, ang matag kaliwatan lagmit magbuhat niana nga sunodsunod! Didto sa bag-ong kalibotan, ang matag tawo makahimo unya sa paghukom ubos sa hingpit nga mga kahimtang kon siya ba mosimba sa matuod nga Diyos, si Jehova, o mawad-an ba sa kinabuhi isip magsusupak. Oo, sa bag-ong kalibotan, duna lamang usa ka relihiyon, usa ka porma sa pagsimba. Ang tanang pagdayeg moadto sa mahigugmaong Maglalalang, ug ang matag masinugtanong tawo maglanog sa mga pulong sa salmista: “Ako magdayeg kanimo, O Diyos ko nga Hari, ug ako magpanalangin sa imong ngalan hangtod sa panahon nga walay katinoan, bisan hangtod sa kahangtoran. . . . Dako si Jehova ug angay gayod nga dayegon, ug ang iyang kadako dili matukib.”–​Salmo 145:​1-3; Pinadayag 20:​7-10.

26. Nganong kinahanglan susihon nimo ang Pulong sa Diyos, ang Bibliya?

²⁶ Karon nga nakatandi ka na sa dagkong relihiyon sa kalibotan, kami nagdapit kanimo sa dugang pagsusi sa Pulong sa Diyos, ang Bibliya, diin gibase ang tinoohan sa mga Saksi ni Jehova. Pamatud-i alang sa imong kaugalingon nga ang matuod nga Diyos mahimong makaplagan. Bisan kon ikaw Hindu, Muslim, Budista, Shinto, Confuciano, Taoista, Hudiyo, Kristohanon, o bisan unsang laing tinoohan, karon na ang panahon sa pagsusi sa imong relasyon sa matuod ug buhi nga Diyos. Lagmit ang imong relihiyon gidesidihan alang kanimo pinaagi sa imong dapit natawhan, diin wala kay kontrol. Segurado, walay bisan unsang butang mawala kanimo pinaagi sa pagsusi kon unsa ang ginaingon sa Bibliya mahitungod sa Diyos. Mahimong kini ang imong oportunidad sa tibuok kinabuhi nga sa matuod mahibalo sa katuyoan sa Soberano Ginoong Diyos alang niining yuta ug sa katawhan niini. Oo, ang imong sinserong pagpangita sa matuod nga Diyos mahimong matagbaw pinaagi sa pagtuon sa Bibliya uban sa mga mensahero ni Jehova, sa iyang mga Saksi, kinsa nagdala kanimo niining basahon.

27. (a) Unsang panapit ang gipaabot ni Jesus kanimo? (b) Harmonya sa tema niining basahon, unsa ang gidapit ni Isaias nga buhaton sa tanan?

²⁷ Dili kawang nga si Jesus miingon: “Magpadayon sa pagpangayo, ug kini ihatag kaninyo; magpadayon sa pagpangita, ug kamo makakaplag; magpadayon sa pagtuktok, ug kini pagabuksan kaninyo.” Mahimong malakip ka niadtong kinsa nakakaplag sa matuod nga Diyos kon magpatalinghog ka sa mensahe sa manalagna Isaias: “Pangitaa si Jehova, kamong katawhan, samtang siya mahimong makaplagan pa. Sangpita siya samtang siya anaa pa sa duol. Pasagdi ang tawo nga daotan magbiya sa iyang dalan, ug ang tawo nga makadaot sa iyang mga hunahuna; ug pasagdi siya nga magbalik kang Jehova, kinsa maluoy kaniya, ug sa atong Diyos, kay siya mopasaylo kaniya sa madagayaon gayod.”​—Mateo 7:​7; Isaias 55:​6, 7.

28. Kinsa ang makatabang kanimo sa pagkaplag sa matuod nga Diyos?

²⁸ Kon nangita ka sa matuod nga Diyos, magbati nga libre sa pagkontak sa mga Saksi ni Jehova.c Sa walay bayad sila magmalipayon sa pagtabang kanimo nga suod makaila sa Amahan ug sa iyang kabubut-on samtang may panahon pa.​—Sofonias 2:3.

[Mga footnote]

[Kahon/Hulagway sa panid 377]

Unsaon Pag-ila sa Matuod nga Relihiyon

1. Ang matuod nga relihiyon nagsimba sa bugtong matuod nga Diyos, si Jehova.​—Deuteronomio 6:​4, 5; Salmo 146:​5-10; Mateo 22:​37, 38.

2. Ang matuod nga relihiyon nagtanyag sa pagduol sa Diyos pinaagi kang Kristo Jesus.​—Juan 17:​3, 6-8; 1 Timoteo 2:​5, 6; 1 Juan 4:15.

3. Ang matuod nga relihiyon nagtudlo ug nagbuhat sa dili hakog nga gugma.​—Juan 13:​34, 35; 1 Corinto 13:​1-8; 1 Juan 3:​10-12.

4. Ang matuod nga relihiyon nagpabiling wala mamantsahi sa kalibotanong politika ug panagbangi. Neyutral kini sa panahon sa gubat.​—Juan 18:​36; Santiago 1:27.

5. Ang matuod nga relihiyon nagtugot sa Diyos nga makaplagang matuod pinaagi sa pagdawat sa Bibliya isip Pulong sa Diyos.​—Roma 3:​3, 4; 2 Timoteo 3:​16, 17; 1 Tesalonica 2:13.

6. Ang matuod nga relihiyon wala mokonsentir sa gubat o personal nga kapintas.​—Miqueas 4:​2-4; Roma 12:​17-21; Colosas 3:​12-14.

7. Ang matuod nga relihiyon malamposong naghiusa sa katawhan sa tanang rasa, sinultihan, ug tribo. Wala kini magwali sa nasyonalismo o pagdumot, apan sa gugma.​—Isaias 2:​2-4; Colosas 3:​10, 11; Pinadayag 7:​9, 10.

8. Ang matuod nga relihiyon nagpaluyo sa pag-alagad sa Diyos, dili alang sa hakog nga ganansiya o suweldo, apan tungod sa gugma. Wala kini maghimaya sa mga tawo. Kini naghimaya sa Diyos.​—1 Pedro 5:​1-4; 1 Corinto 9:​18; Mateo 23:​5-12.

9. Ang matuod nga relihiyon nagmantala sa Gingharian sa Diyos isip seguradong paglaom sa tawo, dili sa pipila ka politikal o sosyal nga pilosopiya.​—Marcos 13:​10; Buhat 8:​12; 28:​23, 30, 31.

10. Ang matuod nga relihiyon nagtudlo sa kamatuoran mahitungod sa katuyoan sa Diyos alang sa tawo ug sa yuta. Wala kini magtudlo sa relihiyosong kabakakan sa imortal nga kalag ug sa waykataposang pagsakit sa impiyerno. Kini nagtudlo nga ang Diyos gugma.​—Maghuhukom 16:​30; Isaias 45:​12, 18; Mateo 5:​5; l Juan 4:​7-11; Pinadayag 20:​13, 14.

[Hulagway]

Mga Saksi nga nagwali sa Olanda

[Mga hulagway sa panid 373]

Ang yuta may potensiyal nga mahimong paraiso​—alang niini ang permanente, matarong kagamhanan ang kinahanglanon, ug kini gisaad sa Diyos

[Hulagway sa panid 374]

Una pa mibalik sa langit, gisugo ni Jesus ang iyang mga disipolo sa pagwali ug pagtudlo sa maayong balita sa tanang yuta

[Hulagway sa panid 379]

Ang pagbanhaw sa mga patay magdalag kasadya sa tawhanong banay sa tibuok kalibotan