Daghan bag Ngalan ang Diyos?

Tubag sa Bibliya

Usa lang ang ngalan sa Diyos. Kini nasulat nga יהוה sa Hebreohanon. Sa English, ang kasagarang hubad niini maoy “Jehovah.”a Pinaagi kang propetang Isaias, ang Diyos miingon: “Ako mao si Jehova. Kana ang akong ngalan.” (Isaias 42:8) Kining ngalana makitag mga 7,000 ka beses diha sa karaang mga manuskrito sa Bibliya. Kon ikomparar sa uban pang mga termino para sa Diyos o sa uban pang personal nga ngalan, ang ngalan sa Diyos mao ang kinadaghanang beses nga makita sa Bibliya.b

Duna pa bay laing ngalan ang Diyos?

Bisag usa lang ang ngalan sa Diyos sumala sa gipakita sa Bibliya, kini naggamit ug daghang titulo ug deskripsiyon para sa Diyos. Ang mosunod mao ang mga titulo ug deskripsiyon sa Diyos. Ang matag usa niini magpakita kon unsang matanga sa Diyos si Jehova.

Titulo	Asa makita sa Bibliya	Kahulogan
Allah	(Walâ)	Ang pulong “Allah,” nga gikan sa Arabic, dili personal nga ngalan, kondili usa ka titulo nga nagkahulogang “Diyos.” Ang ubang maghuhubad sa Bibliya diha sa Arabic ug sa uban pang mga pinulongan naggamit sa “Allah” ingong katumbas sa titulong “Diyos.”
Labing Gamhanan	Genesis 17:1	Way makasukol o makapildi sa iyang gahom. Ang Hebreohanong ekspresyon nga ʼEl Shad·daiʹ, o “Diyos nga Labing Gamhanan,” pito ka beses nga makita diha sa Bibliya.
Ang Alfa ug ang Omega	Pinadayag 1:8; 21:6; 22:13	Ang terminong “ang una ug ang ulahi,” o “ang sinugdan ug ang kataposan,” nagpasabot nga wala nay laing Labing Gamhanang Diyos gawas kang Jehova ug wala nay mosunod pa niya. (Isaias 43:10) Ang alfa ug omega mao ang una ug kataposang mga letra sa Gregong alpabeto.
Karaan sa mga Adlaw	Daniel 7:9, 13, 22	Walay sinugdanan ang Diyos; dugay na kaayo siyang naglungtad sa wala pa ang bisan unsa o bisan kinsa.—Salmo 90:2.
Maglalalang	Isaias 40:28	Siya ang naglalang o nagbuhat sa tanang butang.
Amahan	Mateo 6:9	Siya ang naghatag sa kinabuhi.
Diyos	Genesis 1:1	Ginasimba; gamhanan ug kusgan. Ang Hebreohanong pulong ʼElo·himʹ maoy plural, nga nagpaila sa dignidad, pagkahalangdon, o pagkamaayo ni Jehova.
Diyos sa mga diyos	Deuteronomio 10:17	Ang pinakagamhanang Diyos, nga lahi sa “walay-bili nga mga diyos” nga ginasimba sa uban.—Isaias 2:8.
Dakong Instruktor	Isaias 30:20, 21	Nagtudlo ug naggiya alang sa atong kaayohan.—Isaias 48:17, 18.
Dakong Magbubuhat	Salmo 149:2	Gibuhat niya ang tanang butang.—Pinadayag 4:11.
Malipayong Diyos	1 Timoteo 1:11	Siya malipayon nga Diyos.—Salmo 104:31.
Tigpatalinghog sa pag-ampo	Salmo 65:2	Siya maminaw sa matag sinserong pag-ampo.
Ako Mao Ako	Exodo 3:14, Maayong Balita Biblia	Mahimo siyang bisan unsa aron matuman ang iyang katuyoan. Kini nga titulo gihubad sab nga “Ako Mamahimong bisan unsa nga gusto nako” o “Ako Mamao Kon Unsay Mamao Ako.”(The Emphasised Bible, ni J. B. Rotherham; Bag-ong Kalibotang Hubad sa Balaang Kasulatan) Kini nga deskripsiyon nagpatin-aw sa kahulogan sa personal nga ngalang Jehova, nga gipaila sa sunod nga bersikulo.—Exodo 3:15.
Abughoan	Exodo 34:14	Nagpasabot ni nga gusto niyang siya ra gyoy simbahon. Kini nga pulong gihubad sab nga “dili mosugot nga naay karibal” ug “nailhan nga nagapangayog eksklusibong debosyon.”—God’s Word Bible; New World Translation.
Hari nga walay kataposan	Pinadayag 15:3	Ang iyang pagmando walay sinugdanan o kataposan.
Ginoo	Salmo 135:5	Tag-iya o agalon; gikan sa Hebreohanong mga pulong nga ʼA·dhohnʹ ug ʼAdho·nimʹ.
Ginoo sa mga kasundalohan	Roma 9:29, Cebuano Ang Biblia	Siya ang komander sa kasundalohan sa mga anghel. Ang titulong “Ginoo sa mga kasundalohan” gihubad usab nga “Jehova sa mga panon.”—Roma 9:29, Bag-ong Kalibotang Hubad sa Balaang Kasulatan.
Labing Hataas	Salmo 47:2	Siya ang may kinalabwang posisyon o awtoridad.
Labing Balaang Usa	Proverbio 9:10	Siya ang pinakabalaan, o pinakahinlo ug pinakaputli sa moral.
Magkukulon	Isaias 64:8	Duna siyay dakong katungod sa tanang tawo ug nasod, sama nga ang magkukulon dunay katungod kon unsay iyang himoon sa yutang kulonon.—Roma 9:20, 21.
Manlulukat, Manunubos	Isaias 41:14; Ang Biblia, NCV	Iyang gitubos o gipalit ang mga tawo gikan sa sala ug kamatayon pinaagi sa halad lukat ni Jesu-Kristo.—Juan 3:16.
Bato	Salmo 18:2, 46	Kasaligang dangpanan ug tigtaganag kaluwasan.
Manluluwas	Isaias 45:21	Magluwas kanato gikan sa kapeligrohan o kalaglagan.
Magbalantay	Salmo 23:1	Nag-atiman sa iyang mga magsisimba.
Soberanong Ginoo	Genesis 15:2	Walay makatupong o makalabaw sa iyang awtoridad; gikan sa Hebreohanong pulong nga ʼAdho·naiʹ.
Supremong Usa	Daniel 7:18, 27	Kinalabwang magmamando.

Ngalan sa mga lugar nga gihisgotan sa Hebreohanong Kasulatan

Ang pipila ka lugar nga gihisgotan sa Bibliya ginganlan base sa personal nga ngalan sa Diyos. Pero siyempre, dili ni ngalan sa Diyos.

Ngalan sa lugar	Asa makita sa Bibliya	Kahulogan
Jehova-jireh	Genesis 22:13, 14	“Si Jehova Motagana.”
Jehova-nissi	Exodo 17:15	“Si Jehova Mao ang Akong Ilhanang Tukon,” o “akong Bandila.” (Ang Bag-ong Maayong Balita Biblia) Si Jehova ang Diyos nga makahatag ug proteksiyon ug tabang sa mga tawo.—Exodo 17:13-16.
Jehova-shalom	Maghuhukom 6:23, 24	“Si Jehova Maoy Kalinaw.”
Jehovah-shammah	Ezequiel 48:35, footnote, American Standard Version	“Si Jehova Anaa Diha.”

Mga rason kon nganong angay tang mahibalo ug mogamit sa ngalan sa Diyos

Importante sa Diyos ang iyang personal nga ngalan, Jehova, maong iya ning gipasulat libolibo ka beses diha sa Bibliya.—Malaquias 1:11.
Si Jesus, nga Anak sa Diyos, kanunayng nagpasiugda sa kaimportante sa ngalan sa Diyos. Pananglitan, miampo siya kang Jehova: “Pagabalaanon unta ang imong ngalan.”—Mateo 6:9; Juan 17:6.
Masuod lang ta kang Jehova nga Diyos kon atong ilhon ug gamiton ang iyang ngalan. (Salmo 9:10; Malaquias 3:16) Kadtong dunay suod nga relasyon sa Diyos makabenepisyo sa iyang saad: “Tungod kay iyang gipakita kanako ang iyang pagmahal, igatagana ko usab kaniya ang kaikyasan. Panalipdan ko siya tungod kay nakaila siya sa akong ngalan.”—Salmo 91:14.
Ang Bibliya nag-ingon: “Adunay gipanagtawag nga mga ‘diyos,’ sa langit man o sa yuta, ingon nga adunay daghang ‘diyos’ ug daghang ‘ginoo.’” (1 Corinto 8:5, 6) Pero gipaila sa Bibliya ang ngalan sa bugtong matuod nga Diyos, si Jehova.—Salmo 83:18.

a Ang ubang Hebreohanong mga eskolar miuyon nga gamiton ang hubad nga “Yahweh” para sa ngalan sa Diyos.

b Ang pinamubong ngalan sa Diyos, nga “Jah,” makitag mga 50 ka beses diha sa Bibliya, apil na diha sa mga terminong “Haleluya,” o “Aleluya,” nga nagkahulogang “Dayega ninyo si Jah.”—Pinadayag 19:1; Ang Biblia, Bag-ong Hubad nga Binisaya; Biblia sa Kristohanong Katilingban.