ATSA

Usa ka himan nga may puloan nga ang ulo adunay sulab, nga gigamit sa pagputol ug kahoy o pagsapsap ug bato; gigamit usab ingong hinagiban.

Ubay-ubayng Hebreohanon ug Grego nga mga pulong ang gigamit sa pagtumong niini nga himan. Ang Hebreohanong pulong nga gar·zenʹ, nga makaplagan sa Bibliya ug nagtumong sa usa ka atsa nga gigamit sa pagputol ug kahoy, makaplagan usab diha sa inskripsiyon sa Siloam alang sa usa ka atsa nga gigamit sa pagkubkob ug bato. (Deu 19:5; Isa 10:15) Sumala sa Lexicon in Veteris Testamenti Libros ni Koehler ug Baumgartner (Leiden, 1958, p. 650), ang Hebreohanong pulong nga sa·gharʹ, nga makita sa Salmo 35:​3, nagtumong sa usa ka “atsa nga duhay-sulab.” Ug diha sa 2 Hari 6:​5, 6, ang Hebreohanong pulong nga bar·zelʹ, nga sa literal nagkahulogang “puthaw,” nagkahulogan nga “ulo sa atsa.”

Sa Pinadayag 20:​4, gihisgotan nga ang mga manununod sa langitnong gingharian “gipamatay pinaagi sa atsa tungod sa ilang pagpamatuod bahin kang Jesus ug tungod sa pagsulti bahin sa Diyos.” Sanglit ang atsa usahay gigamit sa politikanhong estado aron sa pagpahamtang ug silot nga kamatayon, kini nagpasabot gayod nga gihukman sa tawhanong mga kagamhanan kining maunongong mga alagad sa Diyos ingong dili takos nga mabuhi.