Adlaw sa Paghukom—Usa ka Panahon sa Paglaom!

KON ang ideya sa adlaw sa paghukom makapahadlok kanimo, nganong dili susihon ang gisulti sa Bibliya bahin niini? Pananglitan, matuod ba nga sa dihang ang Diyos magapahamtang sa paghukom diha sa mga makasasala, sila igatambog sa impiyernong-kalayo?

Buweno, ang unang natala nga panig-ingnan sa balaang paghukom maoy sa panahon mismo sa sinugdan sa kasaysayan sa tawo. Nabatonan ni Adan ug Eva ang kahigayonan nga mabuhing walay kataposan sa usa ka paraisong yuta. (Genesis 1:26-28; 2:7-9, 15-25) Apan, sila nakasala ug nakaagom sa makapasubong paghukom gikan sa Diyos. Unsay resulta? Gibawi sa Diyos ang gasa sa kinabuhi. Ang buot ipasabot, sila namatay. Ang Diyos nag-ingon kanila: “Sa singot sa imong nawong ikaw magakaon sa tinapay hangtod mobalik ka sa yuta, kay ikaw gikan niini gikuha. Kay abog ka ug sa abog ikaw mobalik.”​—Genesis 3:16-19.

Usa kadto ka masakit nga paghukom, apan kadto maoy matarong. Ug pihong wala malakip niadto ang impiyernong-kalayo. Dihang namatay si Adan ug Eva, sila mibalik sa abog. Sila wala nay kinabuhi. Walay gihisgotan sa Bibliya nga ang usa ka bahin ni Adan o nianang iya sa laing tawo nakalabang-buhi sa kamatayon aron sakiton sa usa ka dapit nga walay kataposan. Hinunoa, atong mabasa: “Ang mga buhi nasayod nga sila mamatay, apan ang mga patay; sila wala nay nahibaloan nga bisan unsa.”​—Ecclesiastes 9:5.

Nahibalo ka ba nga ang Bibliya nag-ingon niini? Nahibalo ka ba usab nga ang Bibliya wala gayod mogamit sa pulong “dili-mamatay nga kalag”? Hinuon, kini nagaingon: “Ang kalag nga makasala, kini mamatay.” (Ezekiel 18:4, King James Version) Kini bug-os kaharmoniya sa prinsipyo sa Bibliya: “Ang bayad sa sala mao ang kamatayon.” (Roma 6:23, KJ) Kining lagdaa nag-apektar kanatong tanan. Kitang tanan mga kaliwat sa makasasalang Adan, busa kitang tanan makasala ug makadawat sa bayad sa sala, ang kamatayon. Sumala sa giingon sa Bibliya: “Pinaagi sa usa ka tawo ang sala misulod sa kalibotan, ug ang kamatayon pinaagi sa sala; ug tungod niini mikuyanap ang kamatayon sa tanang tawo, sanglit ang tanan nakasala man.” (Roma 5:12, KJ) Ang Adlaw sa Paghukom maoy usa ka dakong bahin sa kahikayan sa Diyos sa pagluwas kanato gikan niining kahimtanga.

Ang Pasikaranan Alang sa Adlaw sa Paghukom

Sumala sa Bibliya, duolan na sa 2,000 ka tuig kanhi gipahiluna sa Diyos ang pasikaranan alang sa kon unsa unya ang mahitabo sa Adlaw sa Paghukom. Nahitabo kadto dihang si Jesus mianhi sa yuta ug mitanyag sa iyang hingpit tawhanong kinabuhi alang kanato. Si Jesus mismo mipahayag: “Kay gihigugma gayod sa Diyos ang kalibotan nga tungod niana iyang gihatag ang iyang bugtong nga Anak, aron ang tanan nga motuo kaniya dili malaglag apan makabaton ug kinabuhing dayon.”​—Juan 3:16.

Kon kita motuo kang Jesus, kita makabenepisyo sa iyang halad bisan karon sa espirituwal nga paagi. Ang Diyos nagapasaylo sa atong mga sala ug nagatugot kanato nga makaduol kaniya. (Juan 14:6; 1 Juan 2:1, 2) Apan kita mga dili hingpit pa, mga makasasala, ug tungod niini, sa gihapon magsakit ug sa ulahi mamatay. Wala pa nato mabatoni ang kinabuhing dayon nga gisaad ni Jesus. Kini moabot ra ingong resulta sa Adlaw sa Paghukom.

Ang Adlaw sa Paghukom

Nakita ni apostol Juan ang panan-awon sa Adlaw sa Paghukom, ug iyang gihubit kini sumala sa mosunod: “Nakita ko ang dako maputing trono, ug ang naglingkod niini, gikan sa iyang atubangan ang yuta ug ang langit mikalagiw; ug walay dapit nga nakaplagan alang kanila. Ug akong nakita ang mga patay, ang gagmay ug ang dagko, nga nagtindog atubangan sa Diyos; ug ang mga basahon gibuksan: ug ang laing basahon gibuksan, nga mao ang basahon sa kinabuhi: ug ang mga patay gihukman pinasukad sa mga butang gisulat sa maong basahon, sumala sa ilang mga binuhatan.”​—Pinadayag 20:11, 12. KJ.

Oo, sumala sa panan-awon ni Juan, ang Adlaw sa Paghukom pagadumalahon sa Diyos mismo. Apan may usa pa nga nalangkit. Si apostol Pablo mipahayag: “[Ang Diyos] migahin na ug adlaw, nga iyang pagahukman ang kalibotan diha sa pagkamatarong pinaagi sa usa ka tawo nga iyang gisugo.” (Buhat 17:31, KJ) Kinsa kanang tawhana? Si Jesus, kinsa mismo miingon: “Ang Amahan dili magahukom kang bisan kinsa, apan gitugyan ang tanang paghukom diha sa iyang Anak.” (Juan 5:22, KJ) Busa si Jesus mao unya ang tinudlong Maghuhukom sa Adlaw sa Paghukom.

Kini maoy maayong balita alang sa katawhan. Gibutyag sa mga Ebanghelyo nga si Jesus maoy maluluy-on kaayo. Siya dili mapagawalon o hariharion apan “mahinay sa kasuko ug mapainubsanon sa kasingkasing.” (Mateo 11:29; 14:14; 20:34) Kita malipayon ubos sa pagdumala sa maong maghuhukom.

Kanus-a Kini Mahitabo?

Nan, kanus-a ang Adlaw sa Paghukom? Ang Pinadayag miingon nga mahitabo kini dihang “ang yuta ug ang langit mikalagiw.” Kini nagpahinumdom kanato sa mga pulong ni apostol Pedro: “Ang mga langit ug ang yuta nga karon naglungtad gikatagana alang sa kalayo ug gitipigan alang sa adlaw sa paghukom ug sa kalaglagan sa mga tawong dili diyosnon.” (2 Pedro 3:7) Pagasunogon ba ang literal nga yuta? Dili, ang Bibliya tin-awng nagpasabot niini. Ang literal nga yuta dili pagalaglagon. “Ang yuta . . . dili matarog sa walay kataposan.” (Salmo 104:5, KJ) Ang konteksto sa mga pulong ni Pedro nagapakita nga kining presenteng sistema sa mga butang sa dili-diyosnong kalibotan mao ang pagalaglagon. Ang dili-diyosnong mga tawo, dili ang planetang Yuta, ang mahanaw.​—Juan 12:31; 14:30; 1 Juan 5:19.

Kining dili-diyosnong mga tawo pagalaglagon sa gitawag sa Bibliya nga Armageddon​—nga mao, sumala sa kanunayng gipakita niining magasina, mahitabo sa dili madugay. (Pinadayag 16:14, 16) Human niana, si Satanas mismo igatambog sa gahong ug pugngan sa pagpanghilabot sa mga tawo sulod sa usa ka libo ka tuig, ug kining usa ka libo ka tuig mao ang aktuwal nga gidugayon sa Adlaw sa Paghukom. (Pinadayag 19:17–20:3) Unsa ang mahitabo sa mga matinumanon sa dihang ang dili-diyosnong mga tawo pagalaglagon sa Armageddon? Sila maluwas gayod ngadto sa Adlaw sa Paghukom. Atong mabasa: “Ang mga matul-id mao ang mahibilin diha sa [yuta]. Ug mahitungod sa daotan, sila pagaputlon gikan sa yuta mismo.”​—Proverbio 2:21, 22.

Sa pagpaluyo niini, ang Bibliya naghisgot sa “usa ka dakong panon, nga walay tawo nga makaihap, gikan sa tanang kanasoran ug kabanayan ug katawhan ug pinulongan” nga mopatim-aw sa yuta sa dili pa ang Armageddon. Kini “migula gikan sa dakong kasakitan”; ang buot ingnon, sila maluwas sa kalaglagan niining dili-diyosnong kalibotan sama sa pagkaluwas ni Noe sa pagkalaglag sa kalibotan sa iyang adlaw. (Pinadayag 7:9-17; 2 Pedro 2:5) Nasayod ba ikaw nga kining internasyonal dakong panon sa aktibong mga Kristohanon nagalungtad na karon? Sila nagalaom nga maluwas sa dakong kasakitan ug mabuhing walay kataposan sa yuta. Ang ilang paglungtad usa ka tinong pamatuod sa pagkaduol na sa Adlaw sa Paghukom.

Kinsa ang Pagahukman?

Kining dakong panon pagahukman sa Adlaw sa Paghukom. Apan dili ra sila. Ang asoy ni Juan nagapadayon: “Ang dagat mitugyan sa iyang patay nga anaa niini; ug ang kamatayon ug ang impiyerno mitugyan sa ilang patay nga anaa kanila: ug sila gihukman ang matag tawo sumala sa ilang binuhatan.” (Pinadayag 20:13, KJ) Kini ang dugang pamatuod nga ang mga tawo dili pagasakiton sa walay kataposan sa impiyerno. Kon ang impiyerno magtugyan sa mga patay nga anaa niini, sa unsang paagi may usa nga magpabilin didto hangtod sa hangtod? Sa pagkamatuod, ang impiyerno sa Bibliya mao ang komun nga lubnganan sa katawhan, diin ang mga patay bug-os nga wala nay hunahuna nga nagpaabot sa pagkabanhaw. Sa Adlaw sa Paghukom, ang impiyerno bug-os haw-asan sa mga patay nga anaa niini.​—Ecclesiastes 9:10.

Kinsa ang pagabanhawon gikan sa mga patay panahon sa Adlaw sa Paghukom? Si apostol Pablo mipahayag: “Aduna unyay pagkabanhaw sa mga patay, sa mga matarong ug sa mga dili-matarong.” (Buhat 24:15, KJ) Busa, ang matinumanong mga alagad sa Diyos, “ang mga matarong” pagabanhawon. Ingon man ang uban pang daghan, “ang mga dili-matarong.” Dayag, ang pagkabanhaw maglakip niadtong tanan nga nangamatay ug anaa pa sa lubnganan​—nga walay labot kadtong kansang mga sala maoy grabe kaayo nga ang Diyos naghukom na kanila nga bug-os dili angay sa kinabuhi.​—Mateo 12:31.

Ang Paghukom

Apan, unsay mahitabo sa dakong panon sa mga makalabang-buhi ug sa mga binanhaw sa Adlaw sa Paghukom? Ang Bibliya nag-ingon: “Ang mga patay gihukman sumala sa mga butang nga nahisulat diha sa mga basahon, sumala sa ilang mga binuhatan.” Kini maoy panahon sa pagsusi. Ang tanan nga andam molihok sumala ‘nianang mga butang nahisulat diha sa mga basahon’​—lagmit nga mga kinahanglanon sa Diyos alang sa katawhan sa maong panahon​—igasulat diha sa “ang basahon sa kinabuhi.” (Pinadayag 20:12, KJ) Sila magapadulong sa pagbaton ug kinabuhing walay kataposan!

Unya, sa kataposan, ang haladnong kamatayon ni Kristo magpatunghag pisikal nga mga benepisyo! Kadtong nahitala diha sa basahon sa kinabuhi sa maong panahon dili na inanay maluya hangtod masakit ug mamatay. Hinunoa, sila mapasig-uli nga inanay ngadto sa tawhanong kahingpitan, uban sa kinabuhing walay kataposan nga gisaad ngadto niadtong magbaton ug pagtuo diha kang Jesus. Pagkatalagsaon nga palaaboton! Bisan pa niana, ang pipila lagmit modumili sa pagsugot ‘niadtong mga butang nahisulat diha sa mga basahon.’ Unsay mahitabo kanila? Sila dili makabaton ug kinabuhing dayon. Inay hinuon, ang kasulatan nag-ingon: “Si bisan kinsa nga wala hikaplagi nga nahisulat diha sa basahon sa kinabuhi gitambog ngadto sa linaw sa kalayo.”​—Pinadayag 20:15, KJ.

Mao ba kini ang impiyernong-kalayo nga gihisgotan sa Kakristiyanohan? Dili, kay sa nag-unang bersikulo, atong mabasa: “Ang kamatayon ug impiyerno gitambog ngadto sa linaw sa kalayo. Kini mao ang ikaduhang kamatayon.” (Pinadayag 20:14, KJ) Kon ang impiyerno itambog ngadto sa linaw sa kalayo, ang linaw dili mahimong mao mismo ang impiyernong-kalayo. Dugang pa, ang kamatayon dili butang mahikap nga mapunit ug ikatambog sa laing dapit. Busa ang linaw sa kalayo simboliko gayod. Sa unsa? Ang Bibliya nag-ingon: “Kini mao ang ikaduhang kamatayon.” Sa dihang ang kamatayon ug ang Hades igatambog ngadto sa linaw sa kalayo, sila “mamatay,” mohunong sa paglungtad. Sa susama, ang rebelyosong mga tawo nga mosangko didto mamatay, o mohunong sa paglungtad. Kini, hinuon, mao ang ikaduhang kamatayon, nga walay paglaom sa usa ka pagkabanhaw.

Adlaw sa Paghukom—Usa ka Panahon sa Paglaom

Busa inighunahuna nato sa Adlaw sa Paghukom, angay dili kita malisang o mayugot. Ang Adlaw sa Paghukom maoy usa ka panahon sa paglaom, usa ka panahon sa pagpasig-uli sa katawhan sa kinabuhing walay kataposan nga giwala ni Adan. Pamati sa mga panalangin nga ipatungha niini alang niadtong pagahukman nga matinumanon: “Tan-awa! Ang balongbalong sa Diyos magauban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo magauban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbalata ni paghilak ni kasakit pa. Ang unang mga butang miagi na.”​—Pinadayag 21:3, 4.

Sa pagkatapos sa usa ka libo ka tuig nga Adlaw sa Paghukom, ang matinumanong mga tawo gikan sa tanang bahin sa yuta sa kataposan mahimo nang hingpit. Sila “mahidangat sa kinabuhi” sa labing bug-os nga kahulogan, ug makab-ot na unya sa Adlaw sa Paghukom ang katuyoan niana. (Pinadayag 20:5) Unya, ang Bibliya nag-ingon, si Satanas tugotan nga makaabot sa katawhan sa kataposang panahon. (Pinadayag 20:3, 7-10) Kadtong mosukol kaniya sa maong kataposang panahon magpahimulos sa kompletong katumanan sa saad sa Bibliya: “Ang mga matarong mismo magapanunod sa yuta, ug sila mopuyo sa walay kataposan ibabaw niana.”​—Salmo 37:29.

Pagkakahibulongan nga tagana ang Adlaw sa Paghukom! Ug pagkatalagsaon nga kita makapangandam alang niana bisan karon, pinaagi sa pagtuon sa Bibliya, pagkakat-on sa kabubut-on sa Diyos, ug pagpadapat niining balaang kabubut-on diha sa atong mga kinabuhi! Dili katingad-ang ang salmista mipahayag ug kalipay sa paghunahuna sa paghukom sa Diyos sa dihang siya misulat: “Papagmayaa ang mga langit, ug pasadyaa ang yuta. Pasagdi nga ang dagat modahunog ug kanang nagapuno niana. Papaglipaya ang hawan nga kapatagan ug ang tanan diha niana. Sa samang panahon ang tanang kakahoyan sa lasang pahugyawa sa kalipay sa atubangan ni Jehova. Kay siya miabot; kay siya miabot aron sa paghukom sa yuta.”​—Salmo 96:11-13.