Ang Bag-ong mga Linalang Gilalang!

ANG maalamon nga Haring Solomon kas-a miingon: “Walay butang nga bag-o ilalom sa adlaw.” (Ecclesiastes 1:9) Tinuod kana kon mahitungod sa pisikal nga kalibotan nga atong gipuy-an, apan komosta na man ang halapad nga kalibotan sa espirituwal nga linalang ni Jehova? Dinhang dapita, ang usa nga dako pa kang Solomon, sa pagkatinuod, ang labing bantogang tawo nga nabuhi sukad, nahimong usa ka tagsaon bag-ong linalang. Sa unsang paagi kana nahitabo?

Sa tuig 29 sa atong Komong Panahon, ang hingpit nga tawo, si Jesus, miadto kang Juan aron bawtismohan niya sa Suba sa Jordan. “Ug sa nabawtismohan na si Jesus, siya mihaw-as dayon gikan sa tubig; ug, tan-awa! ang kalangitan nabuksan, ug iyang nakita ang espiritu sa Diyos nga ingon ug salampati nga mikunsad kaniya. Unya! Dihay usa ka tingog gikan sa mga langit nga nag-ingon: ‘Kini mao ang akong Anak, ang pinalangga, nga akong giuyonan.’” (Mateo 3:16, 17) Sa ingon, ang tawong si Kristo Jesus maoy una sa bag-ong linalang, nga gidihogan sa pagtuman sa kabubut-on sa Diyos. Sa ulahi, pinasikad sa iyang masakripisyohong kamatayon, si Jesus nahimong Tigpataliwala sa bag-ong pakigtugon tali sa Diyos ug sa usa ka piniling grupo sa mga tawo. Ang kada usa niini nahimong “usa ka bag-ong linalang,” nga gianak sa espiritu sa Diyos nga may langitnong paglaom, nga may palaaboton nga momando uban ni Jesus sa iyang langitnong Gingharian.​—2 Corinto 5:17; 1 Timoteo 2:5, 6; Hebreohanon 9:15.

Latas sa kasiglohan, kining mga dinihogan, gianak-sa-espiritu nga mga Kristohanon gitigom aron mahiusa kang Kristo ingong tinuod nga Kristohanong kongregasyon, nga sa iyang kaugalingon usa ka bag-ong linalang. Ang Diyos nagtawag niana gikan niining kalibotana alang sa usa ka katuyoan, ingon sa gipahayag ni apostol Pedro: “Kamo maoy ‘usa ka kaliwatan nga pinili, harianon nga pagkasaserdote, balaang nasod, katawhan alang sa linaing pagpanag-iya, aron kamo magamantala sa kahalangdon’ sa usa nga nagtawag kaninyo gikan sa kangitngit ngadto sa iyang kahibulongang kahayag.” (1 Pedro 2:9) Sama kang Kristo Jesus, ang unang bag-ong linalang sa Diyos, kining sunod nga bag-ong linalang adunay pangunang obligasyon sa pagwali sa maayong balita. (Lucas 4:18, 19) Ang matag indibiduwal, sa iyang mga membro, nga 144,000 ang gidaghanon, kinahanglang “mosul-ob sa bag-ong pagkatawo nga gibuhat sumala sa kabubut-on sa Diyos diha sa tinuod nga pagkamatarong ug kamaunongon.” (Efeso 4:24; Pinadayag 14:1, 3) Kinahanglan nga ilang ugmaron ang “mga bunga sa espiritu,” nga gihulad sa Galacia 5:22, 23, ug matinumanong atimanon ang gisalig kanila.​—1 Corinto 4:2; 9:16.

Unsa na man ang mahitungod niining bag-ong linalang sa modernong mga panahon? Niadtong tuig 1914, ingon sa gipakita sa orasan sa Bibliya, ang mga pulong sa Pinadayag 11:15 natuman: “Ang gingharian sa kalibotan nahimong gingharian sa atong Ginoo [Jehova] ug sa iyang Kristo, ug siya magahari hangtod sa kahangtoran.” Ang unang gibuhat ni Kristo ingong bag-ong naentrono nga Hari mao ang pagtambog kang Satanas ug iyang demonyo nga mga manulonda gikan sa langit nganhi sa kasikbitan sa yuta. Kini midala ug “kaalaotan alang sa yuta,” sa porma sa unang gubat sa kalibotan ug kaubanan niini nga mga kagul-anan.​—Pinadayag 12:9, 12, 17.

Kini usab nagsilbing pahibalo sa nanghibilin sa bag-ong linalang sa yuta nga sila kinahanglang moambit sa pagtuman sa tagna ni Jesus: “Kining maayong balita mahitungod sa [natukod nga] gingharian igawali ngadto sa tibuok gipuy-an nga yuta ingon nga pagpamatuod ngadto sa tanang nasod; ug unya moabot ang kataposan.” Unsa kanang maong “kataposan”? Si Jesus mipadayon sa pagpatin-aw: “Kay unya moabot ang dakong kasakitan nga ang ingon wala pa mahitabo sukad sa sinugdan sa kalibotan hangtod karon, ug dili na gayod mahitabo pa. Sa pagkamatuod, kon wala pa pamub-i kadtong mga adlawa, wala untay unod nga maluwas; apan tungod sa iyang mga pinili pamub-an kadtong mga adlawa.”​—Mateo 24:3-14, 21, 22.

Ang espiritu ni Jehova nagpalihok kanilang mga dinihogan sa iyang bag-ong linalang aron magmapuliki sa labing mabug-osong kampanya sa pagwali nga nahitabo sukad sa yuta. Gikan sa pipila ka libo niadtong 1919, ang gidaghanon niining masibotong mga magmamantala sa Gingharian miusbaw ngadto sa mga 50,000 sa tunga-tunga sa katuigang 1930. Ingon sa gitagna, “ang ilang tingog milanog ngadto sa tibuok yuta, ug ang ilang mga pulong ngadto sa mga kinatumyan sa kalibotan.”​—Roma 10:18.

Ang nanghibilin lang ba sa bag-ong linalang ang pagatigomon alang sa kaluwasan? Dili, kay ang tagna nagpahayag nga pugngan sa mga manulonda sa Diyos ang mga hangin sa dakong kasakitan hangtod ang pagtigom mabug-os dili lamang niining paingon-langit nga espirituwal nga mga Israelinhon kondili sa uban usab, ang “usa ka dakong panon, nga walay bisan kinsa nga makaihap, gikan sa tanang kanasoran ug kabanayan ug katawhan ug pinulongan.” Unsay ilang padulngan? Aw, sila makalabang “gikan sa dakong kasakitan” nga walay tatsa aron sa pagtagamtam sa kinabuhing walay kataposan sa paraiso sa yuta!​—Pinadayag 7:1-4, 9, 14.

Makalilipay, kining dakong panon, nga gitigom gikan sa mga 229 ka kayutaan, kusog nga midaghan ngadto sa halos kapin sa 4,500,000 ka aktibong mga Saksi. Daghan pa ang nagapangabot, ingon sa gipaila sa mitambong nga 11,431,171 sa Memoryal sa kamatayon ni Jesus sa Abril 17 sa miaging tuig. Niining minilyon, 8,683 lamang, nga nangangkon nga nanghibilin sa yuta sa bag-ong linalang, ang miambit sa mga emblema sa Memoryal. Kining gamayng grupo dili gayod, sa ilang kaugalingon, makalampos sa dakong buluhaton sa pagwali karong adlawa. Ang minilyon nga naglangkob sa dakong panon sa karon nagbuhat abaga sa abaga uban kanila sa pagtuman niining buluhaton. (Sofonias 3:9) Dugang pa, ang nabansay-pag-ayo nga mga membro sa dakong panon sa karon naghimog administratibo ug ubang hinungdanong buluhaton uban sa dinihogang Nagamandong Lawas sa espirituwal nga Israel, ingon gayod sa dili-Israelinhong mga Nethinhanon nga nagtrabaho kauban sa mga saserdote sa pag-ayo sa mga paril sa Jerusalem.​—Nehemias 3:22-26.

Paglalang sa “Bag-ong mga Langit ug Usa ka Bag-ong Yuta”

Pagkadakong kalipay ang gibati niining pagtigom! Kana sama gayod sa giingon ni Jehova nga mahitabo: “Ania karon ako nagalalang ug bag-ong mga langit ug usa ka bag-ong yuta; ug ang unang butang dili na pagahinumdoman, ni mosantop pa sa hunahuna. Apan magkalipay, kamong katawhan, ug managmaya sa walay kataposan tungod niadtong akong gilalang. Kay ania karon gihimo ko ang Jerusalem nga pagmaya ug ang iyang mga pumoluyo nga kalipay. Ug ako magamaya diha sa Jerusalem ug magakalipay diha sa akong katawhan; ug dili na madunggan diha kaniya ang pagbakho ug ang paghilak.” (Isaias 65:17-19) Ang bag-ong mga langit nga gilalang ni Jehova pagalangkoban sa ulahi ni Kristo Jesus ug sa 144,000 ka binanhaw nga mga membro sa bag-ong linalang nga gipalit gikan sa katawhan sulod sa kapin sa 19 ka siglo. Kana maoy labaw, ug mas pang mahimayaon kay sa bisan unsang yutan-ong kagamhanan nga nagmando sa literal nga Jerusalem, bisan sa mga adlaw ni Solomon. Mao kana ang molangkob sa Bag-ong Jerusalem, usa ka langitnong siyudad, nga gihubit diha sa iyang bug-os magilawong katahom sa Pinadayag kapitulo 21.

Ang Bag-ong Jerusalem mao ang espirituwal nga pangasaw-onon ni Kristo, ang iyang 144,000 dinihogan nga mga sumusunod, nga miduyog sa ilang Pamanhonon sa langit tapos sa ilang kamatayon ug pagkabanhaw sa espiritu. Sila gihulagway sa Pinadayag 21:1-4 ingong “nanaog gikan sa langit gikan sa Diyos,” nga mao, gamiton niya sa pagdumala sa mga panalangin sa katawhan dinhi sa yuta. Niining paagiha ang tagna matuman: “Tan-awa! Ang puloy-anan sa Diyos anaa uban sa mga tawo, ug siya magapuyo ipon kanila, ug sila mahimong iyang katawhan. Ug ang Diyos gayod mao ang magpakig-uban kanila. Ug iyang pagapahiran ang tanang luha gikan sa ilang mga mata, ug ang kamatayon wala na, ug wala na usab unyay pagminatay ni paghilak ni kasakit. Ang unang mga butang nangagi na.”

Pagkamapasalamaton gayod nato sa paglalang sa Diyos sa bag-ong mga langit! Dili sama sa lumalabay, dunot nga mga pagmando nga dugay nang nagsakit sa katawhan, kining kahikayan sa kagamhanan sa Diyos permanente. Ang bag-ong linalang ug ilang espirituwal nga mga anak, ang dakong panon, nagkalipay sa dugang saad sa Diyos: “‘Kay ingon nga ang bag-ong mga langit ug ang bag-o nga yuta nga akong pagabuhaton magapabilin sa akong atubangan,’ miingon si Jehova, ‘mao man magapabilin ang inyong kaliwatan ug ang inyong ngalan.’”​—Isaias 66:22.

“Ang bag-ong yuta” nagsugod niining kaliwat sa mga dinihogan sa bag-ong linalang. Kini mao ang bag-o, mahinadlokon-sa-Diyos nga katilingban sa katawhan sa yuta. Ang pagdumot, krimen, kapintasan, kadunotan, ug imoralidad sa tawhanong sosyedad karong adlawa sa walay sipyat nagpaila sa panginahanglan alang sa usa ka bug-os nga kausaban ngadto sa usa ka bag-ong sosyedad sa yuta, nga nagalihok ubos sa pagdumala sa mabinationg bag-ong mga langit. Mao kana ang mga katuyoan ni Jehova. Sama nga iyang gilalang ang bag-ong mga langit, sa ingon siya nagalalang ug bag-ong yuta pinaagi sa pagtigom sa dakong panon ingong sentro sa makigdaitong sosyedad sa bag-ong kalibotan. Kining sosyedara lamang ang pagaluwasong buhi “gikan sa dakong kasakitan.”​—Pinadayag 7:14.

Unsay atong mapaabot tapos sa dakong kasakitan? Sa nagsulti ngadto sa iyang mga apostol, ang una nga molangkob sa bag-ong mga langit nga momando sa bag-ong yuta, misaad si Jesus: “Sa pagkatinuod magaingon ako kaninyo, Sa bag-ong kalibotan, sa dihang ang Anak sa Tawo magalingkod na sa iyang mahimayaong trono, kamo nga mga nanagsunod kanako magalingkod usab sa napulog-duha ka trono.” (Mateo 19:28) Ang tanan sa 144,000 niining Bag-ong Jerusalem magapakigbahin uban kang Jesus sa paghukom sa katawhan. Unya pagapulihan sa gugma ang kahakog ug pagdumot ingong pasikaranan sa pagtukod sa tawhanong katilingban. Ang tribonhon, rasanhon, ug nasodnong mga suliran mawala na. Inanay nga ibalik sa pagkabanhaw ang mga hinigugma. Ang matinumanong katawhan nga binilyon mahimong usa ka dako, nahiusang pamilya, nga tinuboy ngadto sa walay kataposang kinabuhi ibabaw sa yuta nga nahimong paraiso.

Kini labaw pa kaayo kay sa Utopia o sa Shangri-la. Permanente kining linalang​—“ang bag-ong mga langit ug usa ka bag-ong yuta nga sumala sa iyang mga saad kita nagapaabot, diin nagapuyo ang pagkamatarong”! (2 Pedro 3:13) Sa walay duhaduha, kini usa ka matahom nga paglaom, usa ka dakong saad niya nga nag-ingon, “Tan-awa! Ginabag-o ko ang tanang mga butang,” ug nga midugang sa makapadasig-sa-pagtuo nga pahayag: “Kining mga pulonga kasaligan ug matuod.”​—Pinadayag 21:5.