KRISOLITO

Usa ka sihag o medyo sihag, dalag o berde ug dili kaayo mahalong bato nga gilangkoban sa silicate sa magnesium ug puthaw. Kini kasagarang makaplagan diha sa mga bato sa bolkan (ug usab, diha sa dolomite ug sa pipila ka matang sa anapog) nga solido, kristal, o linginon ug porma. Ang “krisolito” maoy gikan sa Gregong pulong nga khry·soʹli·thos, nga nagkahulogang “bulawan nga bato,” ug lagmit ang pipila sa kakaraanan nagpadapat niining ngalana ngadto sa nagkalainlaing dalag ug kolor nga mga mutya. Ang dekalidad nga mga kristal nga krisolito makaplagan sa Ehipto.

Sa dihang si Ezequiel nakadawat ug duha ka lainlaing mga panan-awon maylabot sa upat ka ligid, iyang nakita ang dagway sa mga ligid nga “ingon sa gilak sa krisolito.” (Eze 1:15-21; 10:9) Gitandi sa babayeng Sulamita ang mga kamot sa iyang hinigugmang magbalantay sa ‘mga silindro nga bulawan, nga puno sa krisolito.’ Tingali ang mga silindro nga bulawan nagtumong sa mga tudlo ug ang gihal-op nga mga krisolito nagtumong sa mga kuko. (Aw 5:14) Sa susama, gigamit ni Daniel ang krisolito sa paghubit sa “usa ka tawo nga nagbestig lino” nga miabot aron isulti sa manalagna kon unsay modangat sa iyang katawhan “sa kaulahiang bahin sa mga adlaw.” (Dan 10:​5, 6, 14) Sa iyang panan-awon bahin sa Bag-ong Jerusalem, nakita ni apostol Juan nga ang ikapitong patukoranan sa paril sa siyudad maoy usa ka krisolito nga gikulitan sa ngalan sa usa sa “napulog-duha ka apostoles sa Kordero.”​—Pin 21:​2, 10, 14, 20; tan-awa ang MUTYA UG BILILHONG BATO.