Magmalipayong mga Magbabasa sa Basahon sa Pinadayag

“Malipayon siya kinsa nagabasa sa makusog ug kadtong mga nagapaminaw sa mga pulong niini nga propesiya, ug kinsa nagasunod sa mga butang nga nahisulat niini.”​—PINADAYAG 1:3.

 1. Unsay kahimtang ni apostol Juan sa dihang iyang gisulat ang Pinadayag, ug alang sa unsang katuyoan nga gisulat kining maong mga panan-awon?

AKO si Juan . . . nahidangat sa pulo nga gitawag Patmos tungod sa pagpamulong bahin sa Diyos ug sa pagpanaksi bahin kang Jesus.” (Pinadayag 1:9) Mao kini ang mga kahimtang nga gisulat ni apostol Juan ang basahong Apokalipsis, o Pinadayag. Gituohan nga siya gidestiyero sa Patmos panahon sa pagmando sa Romanong Emperador Domitian (81-96 K.P.), kinsa nagpatuman sa pagsimba sa emperador ug nahimong maglulutos sa mga Kristohanon. Samtang didto sa Patmos, si Juan nakadawat ug mga seryal sa mga panan-awon nga iyang gisulat. Iyang giasoy kini, dili sa paghadlok sa unang mga Kristohanon, kondili sa paglig-on, paglipay, ug pagdasig kanila tungod sa mga pagsulay nga ilang ginaagoman ug nianang anaa pa sa unahan.​—Buhat 28:22; Pinadayag 1:4; 2:3, 9, 10, 13.

 2. Nganong ang kahimtang ni Juan ug sa iyang kaubang mga Kristohanon makapaikag sa mga Kristohanon nga nagkinabuhi karon?

² Ang mga kahimtang diin gisulat kining basahona sa Bibliya hinungdanon kaayo alang sa mga Kristohanon nga nagkinabuhi karon. Si Juan gilutos tungod kay siya usa ka saksi ni Jehova ug sa Iyang Anak, si Kristo Jesus. Siya ug ang iyang kaubang mga Kristohanon nagkinabuhi sa usa ka masuk-anong palibot tungod kay, samtang naningkamot nga mahimong maayong mga lungsoranon, sila dili makahimo sa pagsimbag emperador. (Lucas 4:8) Diha sa ubang kayutaan, ang tinuod nga mga Kristohanon karon nakakita sa ilang kaugalingon nga anaa sa samang kahimtang, diin ang Kagamhanan nagagamit sa katungod sa paghubit kon unsa ang “husto sa relihiyoso nga paagi.” Busa, pagkamakapahupay ang mga pulong nga makita diha sa pasiuna sa basahong Pinadayag: “Malipayon siya kinsa nagabasa sa makusog ug kadtong mga nagapaminaw sa mga pulong niini nga propesiya, ug kinsa nagasunod sa mga butang nga nahisulat niini; kay ang tinudlong panahon haduol na.” (Pinadayag 1:3) Oo, ang mapatalinghogon ug masinugtanong mga magbabasa sa Pinadayag makakaplag ug tinuod nga kalipay ug daghang panalangin.

 3. Kinsa ang Tuboran sa Pinadayag nga gihatag ngadto kang Juan?

³ Kinsa ang Tuboran gayod sa Pinadayag, ug unsang galamiton ang gigamit sa pagpasa niini? Ang unang bersikulo nagtug-an kanato: “Usa ka pinadayag ni Jesu-Kristo, nga gihatag sa Diyos kaniya, aron ipakita sa iyang mga ulipon ang mga butang nga kinahanglang mahitabo sa dili-madugay. Ug iyang gipadala ang iyang anghel ug gipresentar kini pinaagig mga ilhanan pinaagi kaniya ngadto sa iyang ulipon nga si Juan.” (Pinadayag 1:1) Sa yanong pagkasulti, ang aktuwal nga Tuboran sa Pinadayag mao si Jehova nga Diyos, nga maoy naghatag niini ngadto kang Jesus, ug pinaagi sa usa ka manulonda, gipadayag kini ni Jesus ngadto kang Juan. Ang dugang pagsusi magpakita nga gigamit usab ni Jesus ang balaang espiritu aron sa pagpasa sa mga mensahe ngadto sa mga kongregasyon ug sa paghatag kang Juan ug mga panan-awon.​—Pinadayag 2:7, 11, 17, 29; 3:6, 13, 22; 4:2; 17:3; 21:10; itandi ang Buhat 2:33.

 4. Unsang mga galamiton ang gigamit gihapon ni Jehova karon aron sa pagdumala sa iyang katawhan dinhi sa yuta?

⁴ Gigamit gihapon ni Jehova ang iyang Anak, ang “ulo sa kongregasyon,” sa pagtudlo sa iyang mga alagad sa yuta. (Efeso 5:23; Isaias 54:13; Juan 6:45) Gigamit usab ni Jehova ang iyang espiritu sa pagtudlo sa iyang katawhan. (Juan 15:26; 1 Corinto 2:10) Ug sama nga gigamit ni Jesus ang “iyang ulipon nga si Juan” sa pagpadayag sa makapahimsog nga espirituwal nga pagkaon ngadto sa unang-siglong mga kongregasyon, mao man usab karon iyang gigamit ‘ang matinumanon ug maalamong ulipon nga matang,’ nga gilangkoban sa iyang dinihogang “mga igsoon” sa yuta, sa paghatag sa iyang mga sulugoon sa panimalay ug sa ilang mga kauban sa espirituwal nga “pagkaon sa hustong panahon.” (Mateo 24:45-47; 25:40) Malipayon kadtong moila sa Tuboran sa ‘maayong mga gasa’ nga atong madawat pinaagi sa espirituwal nga pagkaon ug sa galamiton nga Iyang ginagamit.​—Santiago 1:17.

Gidumala-ni-Kristo nga mga Kongregasyon

 5. (a) Gipakasama sa unsa ang Kristohanong mga kongregasyon ug ang ilang mga magtatan-aw? (b) Bisan pa sa pagkadi-hingpit sa tawo, unsay makadugang sa atong kalipay?

⁵ Sa pangbukas nga mga kapitulo sa Pinadayag, ang Kristohanong mga kongregasyon gipakasama sa mga lamparahan. Ang ilang mga magtatan-aw gipakasama sa mga manulonda (mga mensahero) ug sa mga bituon. (Pinadayag 1:20)a Naghisgot bahin sa iyang kaugalingon, gisugo ni Kristo si Juan sa pagsulat: “Kini mao ang mga butang nga ginaingon niyang kinsa nagakupot sa pito ka bituon diha sa iyang tuong kamot, siya nga nagalakaw taliwala sa pito ka tungtonganag-lampara nga bulawan.” (Pinadayag 2:1) Ang pito ka mensahe nga gipadala ngadto sa pito ka kongregasyon sa Asia nagpakita nga sa unang siglo K.P., ang mga kongregasyon ug ang mga ansiyano niini dunay ilang mga katakos ug ilang mga kahuyangan. Mao man usab karon. Busa, kita mas magmalipayon kon dili gayod nato wad-on sa hunahuna ang kamatuoran nga si Kristo, ang atong Ulo, anaa taliwala sa mga kongregasyon. Siya nahibalo gayod kon unsay nagakahitabo. Ang mga magtatan-aw sa mahulagwayon “diha sa iyang tuong kamot,” sa ato pa, ilalom sa iyang pagmando ug pagtultol ug manubag kaniya sa paagi sa ilang pagbantay sa mga kongregasyon.​—Buhat 20:28; Hebreohanon 13:17.

 6. Unsay nagpakita nga ang mga magtatan-aw dili lamang ang manubag kang Kristo?

⁶ Hinunoa, atong gilimbongan ang atong kaugalingon kon kita maghunahuna nga ang mga magtatan-aw lamang ang manubag kang Kristo sa ilang mga binuhatan. Diha sa usa sa iyang mga mensahe, si Kristo nag-ingon: “Ang tanang kongregasyon mahibalo nga ako mao ang usa nga nagasusi sa mga rinyon ug mga kasingkasing, ug pagahatagan ko ang tagsa-tagsa kaninyo sumala sa inyong mga buhat.” (Pinadayag 2:23) Kini sa samang higayon maoy usa ka pasidaan ug usa ka pagdasig​—usa ka pasidaan nga si Kristo nahibalo sa atong kinailadmang mga motibo, usa ka pagdasig tungod kay kini nagpasalig kanato nga si Kristo nahibalo sa atong mga paningkamot ug magpanalangin kanato kon kita maningkamot sa paghimo kutob sa atong maarangan.​—Marcos 14:6-9; Lucas 21:3, 4.

 7. Sa unsang paagi ang mga Kristohanon sa Filadelfia ‘nagbantay sa pulong bahin sa pag-agwanta ni Jesus’?

⁷ Ang mensahe ni Kristo sa kongregasyon sa siyudad sa Lydia sa Filadelfia wala masudli ug pagbadlong, apan kini nagsaad nga angay makapaikag pag-ayo kanato. “Tungod kay gibantayan mo ang pulong bahin sa akong pag-agwanta, ako usab magabantay kanimo gikan sa takna sa pagsulay, nga moabot sa tibuok gipuy-ang yuta, aron sa pagsulay sa mga nagapuyo sa yuta.” (Pinadayag 3:10) Ang Grego alang sa ‘gibantayan ang pulong bahin sa akong pag-agwanta’ mahimong magkahulogan usab nga ‘gibantayan ang akong giingon bahin sa pag-agwanta.’ Ang bersikulo 8 nagsugyot nga ang mga Kristohanon sa Filadelfia wala lamang magsunod sa mga sugo ni Kristo kondili nagsunod sa iyang tambag nga sila molahutay nga matinumanon.​—Mateo 10:22; Lucas 21:19.

 8. (a) Unsay gisaad ni Jesus ngadto sa mga Kristohanong taga-Filadelfia? (b) Kinsa karon ang naapektohan sa “takna sa pagsulay”?

⁸ Si Jesus midugang nga iyang bantayan sila sa “takna sa pagsulay.” Kon unsa man ugaling ang kahulogan niana alang sa maong mga Kristohanon balik didto, kita wala mahibalo. Bisan tuod dihay daklit nga paghunong sa paglutos human mamatay si Domitian sa 96 K.P., usa ka bag-ong bul-og sa paglutos ang nagsugod ilalom ni Trajan (98-117 K.P.), nga sa walay duhaduha naghatag ug dugang mga pagsulay. Apan ang kinadak-ang “takna sa pagsulay” mahitabo sa “adlaw sa Ginoo” sulod sa “panahon sa kataposan,” nga atong nahimutangan karon. (Pinadayag 1:10; Daniel 12:4) Ang dinihogan-sa-espiritu nga mga Kristohanon nakaagom ug usa ka partikular nga yugto sa pagsulay sa panahon ug human gilayon sa Gubat sa Kalibotan I. Bisan pa, ang “takna sa pagsulay” nagpadayon gihapon. Kini nakaapektar sa “tibuok gipuy-ang yuta,” apil na ang minilyon nga naglangkob sa dakong panon, kinsa naglaom nga makalabang-buhi sa dakong kasakitan. (Pinadayag 3:10; 7:9, 14) Magmalipayon kita kon atong ‘bantayan ang giingon ni Jesus bahin sa pag-agwanta,’ nga mao: “Siya nga nakalahutay hangtod sa kataposan mao ang maluwas.”​—Mateo 24:13.

Malipayong Nagpasakop sa Pagkasoberano ni Jehova

9, 10. (a) Sa unsang mga paagi naapektohan kita sa panan-awon sa trono ni Jehova? (b) Sa unsang paagi ang atong pagbasa sa Pinadayag makadugang sa atong kalipay?

⁹ Ang panan-awon sa trono ni Jehova ug sa iyang langitnong mga alagad nga gihatag sa mga kapitulo 4 ug 5 sa Pinadayag angayng mopatugob kanato sa kataha. Kita angayng maikag sa kinasingkasing nga mga pulong sa pagdayeg nga gipamulong sa gamhanang langitnong mga linalang samtang sila malipayong nagpasakop sa matarong nga pagkasoberano ni Jehova. (Pinadayag 4:8-11) Ang atong mga tingog angay madungog duyog niadtong nag-ingon: “Ngadto sa Usa nga nagalingkod sa trono ug ngadto sa Kordero ang kabulahanan ug ang dungog ug ang himaya ug ang gahom hangtod sa kahangtoran.”​—Pinadayag 5:13.

¹⁰ Sa praktikal nga paagi, kini nagpasabot sa atong malipayong pagpasakop sa kabubut-on ni Jehova sa tanang butang. Si apostol Pablo nagsulat: “Bisan unsa man nga inyong ginahimo diha sa pulong o diha sa buhat, buhata ang tanang butang sa ngalan sa Ginoong Jesus, nga magapasalamat sa Diyos nga Amahan pinaagi kaniya.” (Colosas 3:17) Ang atong pagbasa sa Pinadayag makapalipay gayod kanato kon kita diha sa kinailadmang mga bahin sa atong mga hunahuna ug mga kasingkasing moila sa pagkasoberano ni Jehova ug magtagad sa iyang kabubut-on sa tanang bahin sa atong mga kinabuhi.

11, 12. (a) Sa unsang paagi ang yutan-ong sistema ni Satanas pagauyogon ug pagalaglagon? (b) Sumala sa Pinadayag kapitulo 7, kinsa ang “makaarang sa pagbarog” nianang panahona?

¹¹ Ang malipayong pagpasakop sa pagkasoberano ni Jehova mao ang pasikaranan sa kalipay sa personal nga kahimtang ug sa unibersohanong kahimtang. Sa dili madugay uyogon sa usa ka simbolikong dakong linog ang sistema sa kalibotan ni Satanas diha gayod sa mga pundasyon niini ug laglagon kini. Wala unyay dapit nga kadangpan alang sa mga tawo nga modumili sa pagpasakop sa langitnong Ginghariang kagamhanan ni Kristo, nga naghawas sa tinuod nga soberanya sa Diyos. Ang tagna nag-ingon: “Ang mga hari sa yuta ug ang mga kinatas-ag ranggo ug ang mga komandante militar ug ang mga dato ug ang mga kusgan ug ang tanang ulipon ug ang tanang tawong gawasnon nagtago sa ilang kaugalingon sa mga langob ug sa dagkong-bato sa kabukiran. Ug sila nagsigig ingon ngadto sa kabukiran ug ngadto sa dagkong-bato: ‘Tumpagi kami ug tagoi kami gikan sa nawong sa Usa nga naglingkod sa trono ug gikan sa kapungot sa Kordero, tungod kay ang dakong adlaw sa ilang kapungot nahiabot na, ug kinsay makaarang sa pagbarog?’”​—Pinadayag 6:12, 15-17.

¹² May kalabotan niana nga pangutana, diha sa sunod nga kapitulo, si apostol Juan naghubit niadtong maglangkob sa dakong panon, kinsa nanagpakagawas gikan sa dakong kasakitan, ingong “nagbarog atubangan sa trono ug atubangan sa Kordero.” (Pinadayag 7:9, 14, 15) Ang ilang pagbarog atubangan sa trono sa Diyos nagpakita nga ilang giila kana nga trono ug bug-os nga nagpasakop sa pagkasoberano ni Jehova. Busa sila nagbarog nga inuyonan.

13. (a) Unsay gisimba sa kadaghanan sa mga molupyo sa yuta, ug unsay gisimbolohan sa timaan diha sa ilang mga agtang o sa ilang mga kamot? (b) Busa nganong kinahanglan ang pag-agwanta?

¹³ Sa laing bahin, ang kapitulo 13 naglarawan sa nahibilin sa molupyo sa yuta ingong nagsimba sa politikanhong sistema ni Satanas, nga gisimbolohan sa mapintas nga mananap. Sila nakadawat ug timaan diha sa ilang mga “agtang” o sa ilang mga “kamot,” nga nagpakita sa ilang mental ug pisikal nga pagpaluyo alang niana nga sistema. (Pinadayag 13:1-8, 16, 17) Dayon, ang kapitulo 14 nagdugang: “Kon si bisan kinsa mosimba sa mapintas nga mananap ug sa larawan niini, ug makadawat ug marka diha sa iyang agtang o diha sa iyang kamot, siya usab magainom sa bino sa kasuko sa Diyos nga ibubong dili-tinimbolan ngadto sa kopa sa iyang kapungot . . . Dinhi niini nagakahulogan ug pag-agwanta alang sa mga balaan, kadtong mga nagasunod sa mga sugo sa Diyos ug sa pagtuo kang Jesus.” (Pinadayag 14:9, 10, 12) Sa pagdagan sa panahon, ang pangutana nga dugang nga ipatugbaw mao: Kinsay imong paluyohan? Si Jehova ug ang iyang pagkasoberano ba o ang dili-diyosnong politikanhong sistema nga gisimbolohan sa mapintas nga mananap? Malipayon kadtong maglikay nga makadawat ug timaan sa mananap ug matinumanong molahutay sa pagpasakop sa pagkasoberano ni Jehova.

14, 15. Unsang mensahe ang nakaputol sa paghubit sa Pinadayag bahin sa Armagedon, ug unsay kahulogan niini alang kanato?

¹⁴ Ang mga magmamando sa “tibuok gipuy-ang yuta” nagsubay sa dalan nga mosangko sa panagbangga, nga nagpaingon sa panagharongay kang Jehova bahin sa isyu sa pagkasoberano. Ang kataposang paghusay sa isyu mahitabo sa Armagedon, “sa gubat sa dakong adlaw sa Diyos nga Labing-Gamhanan.” (Pinadayag 16:14, 16) Usa ka makapaikag nga parentesis makita sa tunga mismo sa kahubitan sa pagtigom sa mga magmamando sa yuta alang sa gubat ni Jehova. Si Jesus mismo nagputol makadiyot sa panan-awon aron sa pag-ingon: “Tan-awa! Ako moabot ingon sa usa ka kawatan. Malipayon ang usa nga pabiling nagatukaw ug nagabantay sa iyang panggawas nga mga bisti, aron nga dili siya magalakaw nga hubo ug ang mga tawo managtan-aw sa iyang kaulawan.” (Pinadayag 16:15) Kini mahimong nagpunting sa Levihanong mga guwardiya sa templo nga hukasan sa ilang mga bisti ug pakaulawan sa katilingban kon sila maabtan nga natulog panahon sa ilang pagguwardiya.

¹⁵ Ang mensahe tin-aw: Kon kita buot nga makalabang-buhi sa Armagedon, kita kinahanglang magpabiling alisto sa espirituwal ug magpadayon sa pagsul-ob sa simbolikong mga besti nga magpaila kanato ingong matinumanong mga Saksi ni Jehova nga Diyos. Kita magmalipayon kon kita maglikay nga mahimong dili-aktibo sa espirituwal ug magpadayon nga walay paghunong, nga makigbahin nga madasigon sa pagpakaylap sa “walay kataposang maayong balita” sa natukod nga Gingharian sa Diyos.​—Pinadayag 14:6.

‘Malipayon ang Bisan Kinsa nga Magbantay Niining mga Pulonga’

16. Nganong ang hinapos nga mga kapitulo sa Pinadayag makapalipay?

¹⁶ Ang malipayong mga magbabasa sa basahon sa Pinadayag malipay gayod samtang magbasa sila sa panapos nga mga kapitulo nga naghubit sa atong mahimayaong paglaom​—usa ka bag-ong langit ug usa ka bag-ong yuta, sa ato pa, usa ka matarong langitnong kagamhanang Gingharian nga magmando sa bag-o, nahinloan nga tawhanong katilingban, ang tanan sa kadayeganan sa “Labing-Gamhanang Diyos nga si Jehova.” (Pinadayag 21:22) Samtang ang maanindot kaayong mga seryal sa panan-awon natapos, ang mensahero nga manulonda miingon kang Juan: ‘Kining mga pulonga kasaligan ug matuod; oo, si Jehova ang Diyos sa inspiradong mga pahayag sa mga propeta nagpadala sa iyang anghel aron ipakita sa iyang mga ulipon ang mga butang nga kinahanglang mahitabo sa dili-madugay. Ug, tan-awa! ako moabot sa dili madugay. Malipayon ang bisan kinsa nga nagatuman sa mga pulong sa propesiya niining basahong-linukot.’​—Pinadayag 22:6, 7.

17. (a) Unsang pasalig ang gihatag sa Pinadayag 22:6? (b) Unsa ang atong alistong pagalikayan?

¹⁷ Ang malipayong mga magbabasa sa Pinadayag mahinumdom nga ang mga pulong nga sama niini makita diha sa sinugdanan sa “basahong-linukot.” (Pinadayag 1:1, 3) Kining mga pulonga nagpasalig kanato nga ang tanang “mga butang” nga gitagna niining kataposang basahon sa Bibliya “mahitabo sa dili-madugay.” Kita nagkinabuhi nga duol na kaayo ang panahon sa kataposan nga ang hinungdanong mga hitabo nga gitagna sa Pinadayag seguradong mahitabo sa dili madugay nga sunodsunod gayod. Busa, ang daw malig-on nga sistema ni Satanas dili angay magpabati kanato nga katulogon. Ang alistong magbabasa maghinumdom sa mga pasidaan nga gihatag diha sa mga mensahe nga gipadala ngadto sa pito ka kongregasyon sa Asia ug maglikay sa mga lit-ag sa materyalismo, idolatriya, imoralidad, pagkadagaang, ug apostatang sektaryanismo.

18, 19. (a) Nganong kinahanglang moabot pa si Jesus, ug unsang paglaom ang gipahayag ni Juan nga atong giambitan? (b) Sa unsang katuyoan nga si Jehova “moabot” pa?

¹⁸ Diha sa basahong Pinadayag, si Jesus nagpahibalo sa daghang higayon: “Ako moabot sa dili madugay.” (Pinadayag 2:16; 3:11; 22:7, 20a) Siya moabot pa aron sa pagpahamtang sa paghukom sa Dakong Babilonya, sa politikanhong sistema ni Satanas, ug sa tanang tawo nga dili magpasakop sa pagkasoberano ni Jehova, ingon sa gipadayag karon pinaagi sa Mesiyanikong Gingharian. Kita moduyog sa pagpatugbaw sa atong mga tingog nianang kang apostol Juan, kinsa nag-ingon: “Amen! Umari ka, Ginoong Jesus.”​—Pinadayag 22:20b.

¹⁹ Si Jehova mismo nag-ingon: ‘Tan-awa! Ako moabot sa dili madugay, ug ang ganti nga akong ihatag ania kanako, sa pagbalos sa matag usa sumala sa iyang buhat.’ (Pinadayag 22:12) Samtang naghulat sa mahimayaong ganti nga kinabuhing walay kataposan ingong bahin sa gisaad nga “bag-ong langit” o “bag-ong yuta,” hinaot nga kita madasigong moduyog sa pagpaabot sa imbitasyon sa tanang matinud-anon ug kasingkasing nga mga tawo: “‘Umari!’ Ug si bisan kinsa nga giuhaw pasagding moanhi; ang si bisan kinsa nga buot pasagding mokuha sa tubig sa kinabuhi nga libre.” (Pinadayag 22:17) Hinaot nga sila mahimo usab nga malipayong mga magbabasa sa dinasig ug makapadasig nga basahon sa Pinadayag!

[Footnote]

Mga Punto Agig Pagsubli

◻ Unsang galamiton ang gigamit ni Jehova sa pagpasa sa Pinadayag, ug unsay atong makat-onan gikan niini?

◻ Nganong magmalipayon kita sa pagbasa sa mga mensahe nga gipadala ngadto sa pito ka kongregasyon sa Asia?

◻ Sa unsang paagi kita mabantayan panahon sa “takna sa pagsulay”?

◻ Unsang kalipay ang atong maangkon kon atong sundon ang mga pulong sa basahong-linukot nga nag-unod sa Pinadayag?

[Hulagway sa panid 15]

Malipayon kadtong moila sa Tuboran sa makalipay nga balita

[Hulagway sa panid 18]

Malipayon ang usa nga nagpabiling nagmata