Kapitulo 14
Ang Mahimayaon nga Langitnong Trono ni Jehova
Panan-awon 2—Pinadayag 4:1–5:14
Ulohan: Makapahinganghang mga hitabo atubangan sa trono sa paghukom sa Diyos
Panahon sa katumanan: Kini nga panan-awon naglakip sa mga hitabo sukad sa 1914 hangtod sa kataposan sa Milenyo ug saylo pa niini, sa dihang ang tanang linalang nga anaa sa langit ug sa yuta magdayeg kang Jehova.—Pinadayag 5:13
1. Nganong kinahanglan kitang magpakitag dakong interes sa mga panan-awon nga gipaambit kanato ni Juan?
SI Juan nagsugod sa pagpaambit kanato ug laing makapatandog-sa-galamhan nga mga panan-awon. Pinaagig inspirasyon siya anaa gihapon sa adlaw sa Ginoo. Busa, ang iyang gihubit adunay lalom nga kahulogan alang kanato nga nagkinabuhi gayod nianang adlawa. Pinaagi niining maong mga panan-awon, gibuksan ni Jehova ang tabil nga nagtabon sa langitnong mga butang ug gihatag kanato ang kaugalingon niyang panglantaw sa iyang mga paghukom nga ipatuman sa yuta. Dugang pa, kita man adunay langitnon o yutan-on nga paglaom, kining maong mga pinadayag motabang kanato sa pagsusi sa atong luna diha sa katuyoan ni Jehova. Busa, kitang tanan kinahanglang magpadayon sa pagpakitag dakong interes sa mga pulong ni Juan: “Malipayon siya nga nagabasa sa makusog ug kadtong nagapatalinghog sa mga pulong niini nga tagna, ug kinsa nagatuman sa mga butang nga nahisulat niini.”—Pinadayag 1:3.
2. Unsang kasinatian ang napahimuslan karon ni Juan?
2 Ang sunod nga nakita ni Juan maoy labaw pa kaayo kay sa bisan unsang salida nga nakita sa mga tawo karon! Siya misulat: “Human niining mga butanga nakita ko, ug, tan-awa! usa ka binuksang pultahan sa langit, ug ang unang tingog nga akong nadungog maoy ingon sa trompeta, nga misulti kanako, nga nag-ingon: ‘Saka ngari, ug akong ipakita kanimo ang mga butang nga kinahanglang mahitabo.’” (Pinadayag 4:1) Pinaagi sa panan-awon, si Juan nakalahos ngadto sa dili-makitang kalangitan sa presensiya ni Jehova, nga mas layo pa kay sa pisikal nga kawanangan nga nasuhid sa mga astronot, ug mas layo pa gani kay sa mga galaksiya sa pisikal nga uniberso. Daw misulod sa usa ka binuksang pultahan, si Juan gidapit sa pagtagbaw sa iyang mga mata sa talagsaon kaayong mga talan-awon sa kinalay-an nga espirituhanong kalangitan diin si Jehova mismo naglingkod sa trono. (Salmo 11:4; Isaias 66:1) Pagkadakong pribilehiyo!
3. Unsay gipahinumdom sa tingog nga “ingon sa trompeta,” ug kinsa gayod ang Tuboran niini?
3 Ang Bibliya wala magpaila niining “unang tingog.” Sama sa kusog nga tingog ni Jesus nga nadunggan sayosayo pa niini, kini adunay puwersadong tingog nga samag trompeta. (Pinadayag 1:10, 11) Kini nagpahinumdom sa lanog nga tingog sa trompeta nga nagtimaan sa presensiya ni Jehova sa Bukid sa Sinai. (Exodo 19:18-20) Walay duhaduha nga si Jehova mao ang harianong Tuboran sa maong mga tawag. (Pinadayag 1:1) Gibuksan niya ang pultahan aron si Juan, pinaagi sa panan-awon, makasulod sa labing balaang dapit diha sa dakong teritoryo nga sakop sa pagkasoberano ni Jehova.
Mahimayaong Presensiya ni Jehova
4. (a) Unsay kahulogan sa panan-awon ni Juan alang sa dinihogang mga Kristohanon? (b) Unsay kahulogan sa maong panan-awon alang niadtong naglaom nga mabuhing walay kataposan sa yuta?
4 Unsay nakita ni Juan? Mamati kita samtang iyang ipaambit kanato karon ang talagsaon niyang kasinatian: “Human niining mga butanga dihadiha gigamhan ako sa espiritu: ug, tan-awa! dihay usa ka trono nga nahimutang sa langit, ug may naglingkod sa trono.” (Pinadayag 4:2) Dihadiha, pinaagi sa balaang espiritu nakita ni Juan ang mismong trono ni Jehova, nga morag siya atua gayod sa Iyang presensiya. Pagkakulbahinam niini alang kang Juan! Ania siya gihatagan ug usa ka masanag nga pasiunang pagtan-aw sa mismong mga langit diin giandam alang kaniya ug sa uban pang dinihogang mga Kristohanon ang “usa ka dili-madunoton ug wala-mahugawi ug dili-malawos nga panulondon.” (1 Pedro 1:3-5; Filipos 3:20) Alang niadtong naglaom nga mabuhing walay kataposan sa yuta, ang panan-awon ni Juan adunay lalom usab nga kahulogan. Kini motabang kanila sa pagsabot sa himaya sa presensiya ni Jehova ug sa langitnong kahikayan sa pagmando nga gigamit ni Jehova sa paghukom sa mga nasod ug sa ulahi sa pagmando sa mga tawo dinhi sa yuta. Sa pagkatinuod, si Jehova usa gayod ka Diyos nga maayo kaayong moorganisar!
5. Unsang katinuoran ang nakita ni Juan nga gisimbolohan sa tabon sa arka sa pakigsaad?
5 Kadaghanan sa nakita ni Juan didto sa langit susama ra sa makita diha sa tabernakulo sa kamingawan. Kini gitukod mga 1,600 ka tuig kanhi ingong sangtuwaryo sa matuod nga pagsimba alang sa mga Israelinhon. Ang arka sa pakigsaad anaa sa Balaan sa mga Balaan niana nga tabernakulo, ug si Jehova mismo nagsulti diha sa ibabaw sa tabon sa Arka nga gama sa solidong bulawan. (Exodo 25:17-22; Hebreohanon 9:5) Busa, ang tabon sa Arka nagsilbing simbolo sa trono ni Jehova. Si Juan karon nakakita sa katinuoran nianang simboliko nga paghulagway: ang Soberanong Ginoong Jehova mismo nga naglingkod nga halangdon kaayo diha sa iyang mahimayaon nga langitnong trono!
6. Unsay gisulti kanato ni Juan bahin sa iyang nakita kang Jehova, ug nganong haom kini?
6 Dili sama sa unang mga manalagna nga nakakitag mga panan-awon sa trono ni Jehova, si Juan wala maghatag ug detalyadong kahubitan sa Balaang Usa nga naglingkod niini. (Ezequiel 1:26, 27; Daniel 7:9, 10) Apan si Juan nagsulti kanato bahin sa iyang nakita sa Usa nga naglingkod sa trono niining mga pulonga: “Ug ang naglingkod may panagway nga sama sa usa ka batong haspe ug sa usa ka bililhong pulag-bulok nga bato, ug ang trono gilibotan sa usa ka balangaw nga sama ug esmeralda tan-awon.” (Pinadayag 4:3) Dili gayod ikatandi ang katahom niini! Nakita ni Juan ang usa ka tin-aw, magilakong katahom sama nianang sinaw, naggilakgilak nga mga batong mutya. Haom gayod kini nga kahubitan sa giingon sa tinun-ang si Santiago mahitungod kang Jehova ingong “Amahan sa langitnong mga kahayag”! (Santiago 1:17) Wala madugay tapos sa pagsulat sa Pinadayag, si Juan mismo nag-ingon: “Ang Diyos maoy kahayag ug diha kaniya wala gayoy kangitngit.” (1 Juan 1:5) Si Jehova usa gayod ka mahimayaong Persona!
7. Unsay atong makat-onan bahin sa pagkaadunay balangaw palibot sa trono ni Jehova?
7 Matikdi nga si Juan nakakitag usa ka balangaw palibot sa trono, nga may berdeng kolor nga samag esmeralda. Ang Gregong pulong nga gihubad dinhi nga balangaw (irʹis) nagpasabot ug lingin gayod nga porma. Ang balangaw unang gihisgotan sa Bibliya maylabot sa adlaw ni Noe. Sa dihang mihubas na ang tubig sa Lunop, si Jehova nagpatunghag usa ka balangaw diha sa panganod, ug iyang gipatin-aw kon unsay gisimbolohan niini, nga miingon: “Gihatag ko ang akong balangaw diha sa panganod, ug magsilbi kining ilhanan sa pakigsaad tali kanako ug sa yuta. Ug ako tinong mahinumdom sa akong pakigsaad nga maoy tali kanako ug kaninyo ug sa matag buhing kalag taliwala sa tanang unod; ug wala nay mga tubig nga molunop sa paglaglag sa tanang unod.” (Genesis 9:13, 15) Nan, unsa kahay misantop sa hunahuna ni Juan bahin sa maong langitnong panan-awon? Ang balangaw nga iyang nakita nagpahinumdom kaniya sa panginahanglan alang sa usa ka malinawon nga relasyon uban kang Jehova, sama sa napahimuslan sa Juan nga matang karon. Kini usab magsilsil diha sa iyang hunahuna sa pagkamalinawon sa presensiya ni Jehova, usa ka kalinaw nga moabot ngadto sa tanang masinugtanong katawhan sa dihang bukharon na ni Jehova ang iyang tolda ibabaw sa bag-ong katilingban sa mga tawo dinhi sa yuta.—Salmo 119:165; Filipos 4:7; Pinadayag 21:1-4.
Pag-ila sa 24 ka Ansiyano
8. Kinsay nakita ni Juan nga naglibot sa trono, ug kinsay ilang gihawasan?
8 Si Juan nahibalo nga ang mga saserdote gitudlo sa pag-alagad diha sa karaang tabernakulo. Lagmit natingala siya sa pagkakita sa sunod niyang gihubit: “Ug ang trono gilibotan sa kawhaag-upat ka trono, ug diha niini nga mga trono akong nakita nga naglingkod ang kawhaag-upat ka ansiyano nga nagsul-ob ug maputing panggawas nga mga besti, ug diha sa ilang ulo may mga koronang bulawan.” (Pinadayag 4:4) Oo, imbes mga saserdote, dihay 24 ka ansiyano nga naglingkod sa trono ug may mga korona sama sa mga hari. Kinsa man kini nga mga ansiyano? Walay lain kondili ang mga dinihogan sa Kristohanong kongregasyon, nga gibanhaw ug naglingkod na sa langitnong katungdanan nga gisaad ni Jehova kanila. Sa unsang paagi nahibalo kita niana?
9, 10. Giunsa nato pagkahibalo nga ang 24 ka ansiyano naghawas sa dinihogang Kristohanong kongregasyon sa mahimayaong langitnong katungdanan niini?
9 Una sa tanan, sila nagsul-ob ug mga korona. Ang Bibliya nagsulti mahitungod sa dinihogang mga Kristohanon nga nakabaton ug “purongpurong nga dili-madunot” ug kinabuhing walay kataposan—pagkadili-mamatay. (1 Corinto 9:25; 15:53, 54) Apan tungod kay kining 24 ka ansiyano naglingkod man sa trono, ang mga koronang bulawan niining bahina naghawas sa harianong awtoridad. (Itandi ang Pinadayag 6:2; 14:14.) Kini nagsuportar sa ideya nga ang 24 ka ansiyano naghulagway sa dinihogang mga sumusunod ni Jesus diha sa ilang langitnong katungdanan, kay si Jesus naghimo ug usa ka pakigsaad uban kanila sa paglingkod sa mga trono sa iyang Gingharian. (Lucas 22:28-30) Si Jesus ug ang 24 ka ansiyano lamang ang gihubit ingong nagmando sa langit sa presensiya ni Jehova—walay apil bisan ang mga manulonda.
10 Kini nahiuyon sa gisaad ni Jesus ngadto sa kongregasyon sa Laodicea: “Ngadto sa magmadaogon itugot ko ang paglingkod uban kanako sa akong trono.” (Pinadayag 3:21) Apan ang langitnong katungdanan sa 24 ka ansiyano dili lamang limitado sa pagkamagmamando. Sa introduksiyon sa basahon sa Pinadayag, si Juan nag-ingon mahitungod kang Jesus: “Kita iyang gihimo nga usa ka gingharian, mga saserdote ngadto sa iyang Diyos ug Amahan.” (Pinadayag 1:5, 6) Sila maoy mga hari ug mga saserdote. “Sila mahimong mga saserdote sa Diyos ug sa Kristo, ug magamando ingong mga hari uban kaniya sulod sa usa ka libo ka tuig.”—Pinadayag 20:6.
11. Nganong haom nga ang gidaghanon sa mga ansiyano maoy 24, ug unsay kahulogan sa maong numero?
11 Unsay kahulogan sa numerong 24, sanglit nakita man ni Juan diha sa panan-awon ang 24 ka ansiyano palibot sa trono? Sa daghang bahin, kini naglandong sa matinumanong mga saserdote sa karaang Israel. Si apostol Pedro nagsulat sa dinihogang mga Kristohanon: “Kamo maoy ‘usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya.’” (1 Pedro 2:9) Makapainteres nga ang maong karaan nga Hudiyohanong pagkasaserdote nabahin sa 24 ka dibisyon. Ang matag dibisyon gihatagag buluhaton sa pag-alagad kang Jehova sulod sa pipila ka semana kada tuig, aron walay hunong ang sagradong pag-alagad. (1 Cronicas 24:5-19) Busa, haom nga dunay 24 ka ansiyano nga nakita diha sa panan-awon ni Juan sa langitnong pagkasaserdote tungod kay kini nga mga saserdote mag-alagad kang Jehova nga walay hunong. Kon makompleto na, aduna unyay 24 ka dibisyon, nga ang matag dibisyon adunay 6,000 ka mananaog, kay ang Pinadayag 14:1-4 nagtug-an kanato nga 144,000 (24 x 6,000) ang “gipalit gikan sa katawhan” sa pagtindog didto sa langitnong Bukid sa Zion uban sa Kordero, si Jesu-Kristo. Sanglit ang numerong 12 nagpasabot sa usa ka balanse nga organisasyon sumala sa panglantaw sa Diyos, ang 24 nagdoble—o nagpalig-on—sa maong kahikayan.
Mga Kilat, mga Tingog, ug mga Dalugdog
12. Unsay sunod nga nakita ug nadungog ni Juan, ug unsay gipahinumdom sa “mga kilat ug mga tingog ug mga dalugdog”?
12 Unsay sunod nga nakita ug nadungog ni Juan? “Ug gikan sa trono anaay nagapanggula nga mga kilat ug mga tingog ug mga dalugdog.” (Pinadayag 4:5a) Magpahinumdom gayod kini kanato sa ubang makapahingangha nga mga pasundayag sa langitnong gahom ni Jehova! Pananglitan, sa dihang si Jehova “nanaog” sa Bukid sa Sinai, si Moises nagtaho: “Sa pagkabuntag sa ikatulo nga adlaw dihay mga dalugdog ug mga kilat, ug usa ka mabagang panganod sa bukid ug makusog kaayong tingog sa budyong. . . . Sa dihang ang tingog sa budyong nag-anam pagkakusog, si Moises misulti, ug ang matuod nga Diyos mitubag kaniya sa usa ka tingog.”—Exodo 19:16-19.
13. Unsay gihulagwayan sa mga kilat nga naggikan sa trono ni Jehova?
13 Panahon sa adlaw sa Ginoo, si Jehova nagpadayag sa iyang gahom ug presensiya sa talagsaong paagi. Dili, dili pinaagi sa literal nga kilat, kay si Juan nakakita ug mga ilhanan. Nan, unsay gihawasan sa mga kilat? Buweno, ang mga kidlap sa kilat makapadan-ag, apan makapatay usab sa usa nga maigo niini. Busa, kining mga kilat nga naggikan sa trono ni Jehova haom nga naghulagway sa mga kidlap sa kalamdagan nga kanunay niyang gihatag sa iyang katawhan ug, labi pang makahuloganon, sa iyang kalayonhong mga mensahe sa paghukom.—Itandi ang Salmo 18:14; 144:5, 6; Mateo 4:14-17; 24:27.
14. Sa unsang paagi ang mga tingog milanog karon?
14 Unsa na man ang mga tingog? Sa dihang nanaog si Jehova sa Bukid sa Sinai, dihay tingog nga nakigsulti kang Moises. (Exodo 19:19) Ang mga tingog gikan sa langit nagpagula ug daghang sugo ug mga pahayag diha sa basahon sa Pinadayag. (Pinadayag 4:1; 10:4, 8; 11:12; 12:10; 14:13; 16:1, 17; 18:4; 19:5; 21:3) Karon, si Jehova nagpagula usab ug mga sugo ug mga pahayag ngadto sa iyang katawhan, nga naglamdag sa ilang pagsabot sa mga tagna ug mga prinsipyo sa Bibliya. Ang nagalamdag nga mga impormasyon sagad ginabutyag diha sa internasyonal nga mga kombensiyon, ug ang maong mga kamatuoran sa Bibliya, sa baylo, gimantala sa tibuok kalibotan. Si apostol Pablo naghisgot bahin sa matinumanong mga magwawali sa maayong balita: “Tan-awa, sa pagkatinuod, ‘ang ilang tingog miabot sa tibuok nga yuta, ug ang ilang mga pulong ngadto sa kinatumyan sa gipuy-ang yuta.’”—Roma 10:18.
15. Unsang mga dalugdog ang milanog gikan sa trono niining bahina sa adlaw sa Ginoo?
15 Ang dalugdog sagad magsunod sa kilat. Si David nagtumong sa literal nga dalugdog ingong “ang tingog ni Jehova.” (Salmo 29:3, 4) Sa dihang si Jehova nakig-away alang kang David batok sa iyang mga kaaway, ang dalugdog gikaingon nga naggikan Kaniya. (2 Samuel 22:14; Salmo 18:13) Giingnan ni Elihu si Job nga ang tingog ni Jehova sama sa dalugdog, samtang Siya nagbuhat ug “dagkong mga butang nga dili nato arang mahibaloan.” (Job 37:4, 5) Niining bahina sa adlaw sa Ginoo, si Jehova midahunog ingon sa “dalugdog,” nga nagpasidaan bahin sa dagkong mga buhat nga iyang himoon batok sa iyang mga kaaway. Kining simbolikong mga dahunog sa dalugdog sublisubli nga gipalanog sa tibuok yuta. Malipayon ka kon ikaw nagpatalinghog niining samag-dalugdog nga mga pahayag ug maalamong naggamit sa imong dila sa pagpalanog pa niini!—Isaias 50:4, 5; 61:1, 2.
Mga Lampara sa Kalayo ug Dagat nga Bildo
16. Unsay kahulogan sa “pito ka lampara sa kalayo”?
16 Unsa pay laing nakita ni Juan? Mao kini: “Ug anaay pito ka lampara sa kalayo nga nagadilaab atubangan sa trono, ug mao kini ang pito ka espiritu sa Diyos. Ug atubangan sa trono anaay morag usa ka dagat nga bildo nga sama ug kristal.” (Pinadayag 4:5b, 6a) Si Juan mismo nagsulti kanato sa kahulogan sa pito ka lampara: “Mao kini ang pito ka espiritu sa Diyos.” Ang numerong pito nagsimbolo sa pagkakompleto sumala sa panglantaw sa Diyos; busa ang pito ka lampara naghawas gayod sa kabug-osan sa nagalamdag nga puwersa sa balaang espiritu. Pagkamapasalamaton sa Juan nga matang karon nga gipiyal kanila kini nga kalamdagan, lakip na ang responsabilidad sa pagpasa niini ngadto sa gutom-sa-espirituwal nga katawhan sa yuta! Pagkamalipayon nato nga kada tuig ginatos ka milyong kopya sa magasing Bantayanang Torre ang padayong nagbanwag niini nga kahayag diha sa mga 150 ka pinulongan!—Salmo 43:3.
17. Unsay gisimbolohan sa “dagat nga bildo nga sama ug kristal”?
17 Si Juan nakakita usab ug usa ka “dagat nga bildo nga sama ug kristal.” Unsay gisimbolohan niini maylabot niadtong gidapit ngadto sa langitnong hawanan ni Jehova? Si Pablo naghisgot kon sa unsang paagi gibalaan ni Jesus ang kongregasyon, “nga naghinlo niini pinaagi sa paghugas ug tubig pinaagi sa pulong.” (Efeso 5:26) Una pa sa iyang kamatayon, giingnan ni Jesus ang iyang mga tinun-an: “Kamo mahinlo na tungod sa pulong nga akong gisulti kaninyo.” (Juan 15:3) Busa, kining dagat nga bildo nga sama ug kristal naghawas gayod sa nagahinlo, sinulat nga Pulong sa Diyos. Ang mga sakop sa harianong pagkasaserdote nga manganha sa presensiya ni Jehova kinahanglang bug-os nga nahinloan pinaagi sa iyang Pulong.
Tan-awa—“Upat ka Buhing Linalang”!
18. Unsay nakita ni Juan sa taliwala ug libot sa trono?
18 Aduna na usay laing nakita si Juan. Siya misulat: “Ug sa taliwala sa trono ug libot sa trono nag-alirong ang upat ka buhing linalang nga nalukop sa mga mata sa atubangan ug sa likod.”—Pinadayag 4:6b.
19. Unsay gihulagwayan sa upat ka buhing mga linalang, ug sa unsang paagi kita nahibalo niini?
19 Unsay gihulagwayan niining maong mga linalang? Ang usa ka panan-awon nga gitaho sa laing manalagna, si Ezequiel, motabang kanato aron mahibaloan ang tubag. Nakita ni Ezequiel si Jehova nga naglingkod sa trono sakay sa usa ka langitnong karo, nga inubanan sa buhing mga linalang nga adunay mga kinaiyahan sama niadtong gihubit ni Juan. (Ezequiel 1:5-11, 22-28) Sa ulahi, nakita pag-usab ni Ezequiel ang maong trono nga karo nga giubanan sa buhing mga linalang. Apan, niining higayona, iyang gipaila ang buhing mga linalang ingong mga kerubin. (Ezequiel 10:9-15) Ang upat ka buhing mga linalang nga nakita ni Juan naghawas gayod sa daghang kerubin sa Diyos—mga linalang nga taas ug ranggo diha sa Iyang espirituhanong organisasyon. Dili talagsaon kang Juan ang pagkakita ug mga kerubin nga haduol kaayo kang Jehova, tungod kay sa kahikayan sa karaang tabernakulo, dihay duha ka kerubin nga bulawan diha sa ibabaw sa tabon sa arka sa pakigsaad, nga naghawas sa trono ni Jehova. Gikan sa taliwala niining mga kerubin madungog ang tingog ni Jehova nga naghatag ug mga sugo ngadto sa nasod.—Exodo 25:22; Salmo 80:1.
20. Sa unsang paagi ikaingon nga ang upat ka buhing mga linalang anaa “sa taliwala sa trono ug libot sa trono”?
20 Kining upat ka buhing mga linalang anaa “sa taliwala sa trono ug libot sa trono.” Unsa ba gayod ang kahulogan niini? Kini mahimong nagpasabot nga sila nagpuwesto libot sa trono sa paagi nga ang usa nagtindog sa tunga sa matag kilid sa trono. Busa, ang mga maghuhubad sa Today’s English Version nagbatbat sa orihinal nga Gregong mga pulong niining paagiha: “naglibot sa trono sa matag kilid niini.” O kaha, ang maong mga pulong mahimong nagkahulogan nga ang upat ka buhing mga linalang anaa sa kinataliwad-ang posisyon sa langit diin nahimutang ang trono. Lagmit mao kanay rason kon nganong ang The Jerusalem Bible naghubad sa maong prase: “diha sa sentro, nga nagpundok libot sa trono mismo.” Ang hinungdanon mao nga ang mga kerubin duol sa trono ni Jehova, sama sa mga kerubin nga nakita ni Ezequiel sa matag suok sa organisasyonal nga karo ni Jehova. (Ezequiel 1:15-22) Kining tanan nahiuyon sa mga pulong sa Salmo 99:1: “Si Jehova nahimong hari. . . . Siya nagalingkod ibabaw sa mga kerubin.”
21, 22. (a) Sa unsang paagi gihubit ni Juan ang upat ka buhing mga linalang? (b) Unsay gihawasan sa dagway sa matag usa sa upat ka buhing mga linalang?
21 Si Juan nagpadayon: “Ug ang unang buhing linalang sama sa leyon, ug ang ikaduhang buhing linalang sama sa toreyong baka, ug ang ikatulong buhing linalang may nawong nga sama sa tawo, ug ang ikaupat nga buhing linalang sama sa nagalupad nga agila.” (Pinadayag 4:7) Nganong kining upat ka buhing mga linalang magkalahi man ug dagway? Kining lainlaing dagway sa buhing mga linalang dayag nga nagpasiugda sa espesipikong mga hiyas sa Diyos. Una, anaa ang leyon. Ang leyon gigamit sa Bibliya ingong simbolo sa kaisog, ilabina sa pagtinguha nga mabatonan ang hustisya ug pagkamatarong. (2 Samuel 17:10; Proverbio 28:1) Busa, ang leyon naghawas gayod sa hiyas sa Diyos nga maisogong hustisya. (Deuteronomio 32:4; Salmo 89:14) Ang ikaduhang buhing linalang samag dagway sa toreyong baka. Unsang hiyas ang imong mahunahunaan sa usa ka baka? Sa mga Israelinhon ang baka maoy usa ka bililhong manggad tungod sa kusog niini. (Proverbio 14:4; tan-awa usab ang Job 39:9-11.) Busa, ang toreyong baka naghawas sa gahom, sa dinamikong kusog nga itagana ni Jehova.—Salmo 62:11; Isaias 40:26.
22 Ang ikatulong buhing linalang may nawong nga sama sa usa ka tawo. Kini naghawas gayod sa diyosnong gugma, tungod kay dinhi sa yuta ang tawo lang ang gilalang sumala sa larawan sa Diyos, nga may kinalabwang hiyas sa gugma. (Genesis 1:26-28; Mateo 22:36-40; 1 Juan 4:8, 16) Walay duhaduha nga ang mga kerubin nagpasundayag niining hiyasa samtang sila nag-alagad libot sa trono ni Jehova. Komosta man ang ikaupat nga buhing linalang? Ang dagway niini sama sa usa ka naglupad nga agila. Si Jehova mismo naghisgot bahin sa talagsaong panan-aw sa agila: “Ngadto sa halayo ang iyang mga mata magatan-aw.” (Job 39:29) Busa, ang agila nagsimbolo gayod sa layog-abot nga kaalam. Si Jehova mao ang Tuboran sa kaalam. Ang iyang mga kerubin nagpasundayag sa kaalam sa Diyos samtang sila nagatuman sa iyang mga sugo.—Proverbio 2:6; Santiago 3:17.
Mga Pagdayeg Kang Jehova Nadungog
23. Unsay ipasabot nga ang upat ka buhing mga linalang ‘nalukop sa mga mata,’ ug unsay gipasiugda sa ilang tulo ka pares nga mga pako?
23 Si Juan nagpadayon sa paghubit: “Ug bahin sa upat ka buhing linalang, ang matag usa kanila may unom ka pako; sa palibot ug sa ilalom nalukop sila sa mga mata. Ug wala silay hunong sa pag-ingon adlaw ug gabii: ‘Balaan, balaan, balaan si Jehova nga Diyos, ang Labing Gamhanan, nga mao ang kaniadto ug ang karon ug ang umaabot.’” (Pinadayag 4:8) Kining pagkalukop sa mga mata nagpasabot sa kompleto ug layog-abot nga panan-aw. Kanunay kining gigamit sa upat ka buhing mga linalang tungod kay dili man sila kinahanglang matulog. Ilang gisundog ang Usa nga bahin kaniya kini ang gisulat: “Mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” (2 Cronicas 16:9) Tungod sa pagkadaghan ug mata, ang mga kerubin makakita bisan asa. Walay makaikyas sa ilang panan-aw. Busa sila bug-os nga nasangkapan sa pag-alagad sa Diyos diha sa iyang pagpanghukom. Kini ang giingon bahin kaniya: “Ang mga mata ni Jehova anaa sa tanang dapit, nga nagpadayon pagbantay sa mga daotan ug sa mga maayo.” (Proverbio 15:3) Ug tungod kay sila adunay tulo ka pares nga mga pako—ang numerong tulo gigamit sa Bibliya alang sa pagpasiugda—ang mga kerubin makalihok sama ka tulin sa kilat sa pagpahibalo sa mga paghukom ni Jehova ug sa pagpatuman niana.
24. Sa unsang paagi ang mga kerubin nagdayeg kang Jehova, ug unsay kahulogan niini?
24 Pamati! Ang mga kerubin nanag-awit ug mananoy ug makapukaw-sa-galamhan nga awit sa pagdayeg kang Jehova: “Balaan, balaan, balaan si Jehova nga Diyos, ang Labing Gamhanan, nga mao ang kaniadto ug ang karon ug ang umaabot.” Sa makausa pa, ang tulo nagpaila ug puwersa. Ang mga kerubin lig-ong nagpamatuod sa pagkabalaan ni Jehova nga Diyos. Siya ang Tuboran ug ang kinalabwang Sukdanan sa pagkabalaan. Siya usab ang “Hari nga walay kataposan,” nga mao kanunay “ang Alfa ug ang Omega, ang una ug ang ulahi, ang sinugdan ug ang kataposan.” (1 Timoteo 1:17; Pinadayag 22:13) Ang mga kerubin dili mopahulay samtang sila nagmantala sa dili-hitupngang mga hiyas ni Jehova atubangan sa tanang linalang.
25. Sa unsang paagi nagkahiusa ang buhing mga linalang ug ang 24 ka ansiyano sa pagdayeg kang Jehova?
25 Ang langit sa mga langit migahob sa mga pagdayeg kang Jehova! Ang paghubit ni Juan nagpadayon: “Ug sa matag higayon nga ang buhing mga linalang magahatag ug himaya ug dungog ug pagpasalamat ngadto sa Usa nga naglingkod sa trono, ang Usa nga buhi hangtod sa kahangtoran, ang kawhaag-upat ka ansiyano manghapa atubangan sa Usa nga naglingkod sa trono ug mosimba sa Usa nga buhi hangtod sa kahangtoran, ug ilang ipang-itsa ang ilang mga korona atubangan sa trono, nga magaingon: ‘Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.’” (Pinadayag 4:9-11) Sa tibuok Kasulatan, kini ang usa sa kinalabwang mga pagpahayag ug pagdayeg kang Jehova, ang atong Diyos ug Soberanong Ginoo!
26. Nganong gipang-itsa sa 24 ka ansiyano ang ilang mga korona atubangan ni Jehova?
26 Ang 24 ka ansiyano adunay tinamdan nga sama sa gipasundayag ni Jesus, nga nag-itsa pa gani sa ilang mga korona atubangan kang Jehova. Halayo kaayo sa ilang mga hunahuna ang pagtuboy sa ilang kaugalingon sa atubangan sa Diyos. Mapaubsanon nilang giila nga ang bugtong katuyoan sa ilang pagkahari mao ang pagpasidungog ug paghimaya kaniya, sama sa kanunayng gihimo ni Jesus. (Filipos 2:5, 6, 9-11) Sa pagkamapinasakopon, ilang giila ang ilang pagkaubos ug sila nagpahayag nga ang ilang pagmando nag-agad sa pagkasoberano ni Jehova. Busa, sila kaharmonya gayod sa mga kerubin ug sa uban pang matinumanong mga linalang sa pagdayeg ug paghimaya sa Diyos nga maoy naglalang sa tanang butang.—Salmo 150:1-6.
27, 28. (a) Sa unsang paagi ang paghubit ni Juan niining panan-awona angayng mag-apektar kanato? (b) Unsang mga pangutana ang motungha bahin sa sunod nga nakita ug nadungog ni Juan?
27 Kinsa may dili mapalihok sa pagbasa sa asoy ni Juan bahin niini nga panan-awon? Kini maanindot ug katingalahan kaayo! Unsa pa gayod kaha ang aktuwal nga mga langit? Ang pagkahalangdon mismo ni Jehova angayng magpalihok kang bisan kinsa uban ang kinasingkasing nga pagpabili sa pagduyog sa upat ka buhing mga linalang ug sa 24 ka ansiyano sa pagdayeg Kaniya, diha sa pag-ampo ug pinaagi sa publikong pagmantala sa Iyang ngalan. Kini ang Diyos nga ang mga Kristohanon adunay pribilehiyo nga mahimong mga saksi karon. (Isaias 43:10) Hinumdomi nga ang panan-awon ni Juan mapadapat sa adlaw sa Ginoo, diin kita nagkinabuhi karon. “Ang pito ka espiritu” andam kanunay sa paggiya ug paglig-on kanato. (Galacia 5:16-18) Ang Pulong sa Diyos mabatonan karon sa pagtabang kanato nga mahimong balaan sa pag-alagad sa usa ka balaan nga Diyos. (1 Pedro 1:14-16) Sa pagkatinuod, kita malipay sa pagbasa sa makusog sa mga pulong niining tagnaa. (Pinadayag 1:3) Pagkamaayong pagdasig ang gihatag niini aron kita magmatinumanon kang Jehova ug dili magtugot sa kalibotan sa paglinga kanato sa aktibong pag-awit ug mga pagdayeg kaniya!—1 Juan 2:15-17.
28 Hangtod niining puntoha, si Juan naghubit kon unsa ang iyang nakita sa dihang siya gidapit sa pagsulod nianang abli nga pultahan sa langit. Labing talagsaon, siya nagtaho nga si Jehova, diha sa bug-os nga pagkamahimayaon sa Iyang kahalangdon ug dignidad, naglingkod sa Iyang langitnong trono. Siya gilibotan sa labing gamhanan sa tanang organisasyon—nga nagdan-ag sa katahom ug pagkamaunongon niini. Nagsugod na ang langitnong Korte. (Daniel 7:9, 10, 18) Andam na ang entablado alang sa usa ka talagsaong panghitabo. Unsa kini, ug sa unsang paagi kini nag-apektar kanato karon? Tan-awon nato samtang ang talan-awon nadayag!
[Tibuok panid nga hulagway sa panid 75]
[Tibuok panid nga hulagway sa panid 78]