Ang Kataposang mga Adlaw—Unsay Pamatuod?

“Ug walay mga kampana ang gibagting ug walay nanghilak bisan pa unsa man ang iyang kapildihan tungod kay halos ang tanan nagdahom sa kamatayon. . . . Ug ang mga tawo miingon ug nagtuo, ‘Kini mao ang kataposan sa kalibotan.’”—Usa ka Italianong magsusulat nga nagsulat bahin sa mga epekto sa Black Death sa ika-14ng siglo.

ANG sinserong mga tawo sa nangaging mga kaliwatan sayop nagtuo nga sila nagpuyo sa kataposang mga adlaw. Sa kaso nga gikutlo sa ibabaw, ang giisip nga ilhanan sa kataposan sa kalibotan mao ang bubonic plague. Ang pipila ka banabana nagaingon nga kadto nagpatay sa un-tersiya sa populasyon sa Uropa. Apan wala moabot ang kataposan. Dili pa kadto ang panahon aron mobalda ang Diyos.

Busa sa unsang paagi si bisan kinsa makatino nga ang mga Saksi ni Jehova husto sa pagpahibalo sa umaabot nga kataposan sa sistema sa kalibotan karon ug sa pagpakatap sa pagmando sa Gingharian sa Diyos sa tibuok yuta? Pinaagi lamang sa pag-imbestigar sa ilang mga pangangkon ug pagtandi niana sa mga tagna sa Bibliya. Nan, unsa ang ispisipikong mga tagna nga nagalaraw sa mga hitabong nagatimaan sa kataposang mga adlaw?

Gubat, Gutom, ug Hampak

Ang pipila sa dagkong mga bahin sa maong mga tagna gisuma diha sa bantog nga panan-awon sa mga magkakabayo sa Apocalipsis sa Pinadayag 6:1-8, ug kana sila mao:

“Usa ka kabayo nga mapula; ug ang nagkabayo niana gitugotan sa pagwagtang sa pagdinaitay gikan sa yuta aron sila magpinatyanay sa usag usa.” Palihog matikdi nga ang nagkabayo niining kabayoa magwagtang sa pagdinaitay gikan sa yuta, dili ra gikan sa pila ka nasod. Busa, kini nagasimbolo sa usa ka panahon sa tibuok-kalibotang gubat ug pagpinatyanay. Ato ba kanang nakita sulod sa ika-20ng siglo?

“Usa ka kabayo nga maitom; ug ang nagkabayo niana may timbangan sa iyang kamot.” Kini haom nga nagasimbolo sa gutom, kanihit sa pagkaon, ug kagutmanan. Nagalungtad ba kining mga kahimtanga sa atong kaliwatan?

“Usa ka kabayo nga luspad; ug ang nagkabayo niana may ngalang Kamatayon. Ug ang Hades nagsunod kaniya. Ug sila gihatagag kagahom ibabaw sa ikaupat nga bahin sa yuta, sa pagpamatay pinaagi sa espada ug pinaagi sa kanihit sa pagkaon ug pinaagi sa makamatay nga hampak ug pinaagi sa mapintas nga mga mananap sa yuta.” Dinhi, ang dili-pa-panahong kamatayon, kon kaha tungod sa gubat, kagutmanan, hampak, o mapintas nga mananap, nagatapok sa mga biktima niini nganha sa ahat nga lubnganan (Hades). Dili ba tinagpulo ka milyon nangadto sa maong lubnganan sa atong panahon?

Nagaduyog sa maong mga panan-awon mao ang mga kahimtang nga gitagna ni Jesus, nga ang pipila niana mao: “Ang nasod makig-away batok sa nasod, ug ang gingharian batok sa gingharian. Aduna unyay mga kagutmanan ug mga linog . . . Motindog ang daghang bakakong manalagna; sila magalimbong sa daghan, ug uban sa pag-uswag sa pagkamalapason, ang gugma sa kadaghanang tawo mabugnaw.” (The Jerusalem Bible) Gitagna usab niya ang usa ka tibuok-kalibotang buluhaton sa pagsangyaw, o pagwali sa “maayong balita sa gingharian,” sa dili pa moabot ang kataposan.

Dugang pa, gibatbat sa Kristohanong apostol Pablo ang mga sanong sa katawhan, nga nag-ingon nga sa kataposang mga adlaw “ang mga tawo magmahigugmaon lamang sa salapi ug sa kaugalingon . . . nga walay pagtahod sa mga ginikanan, dili mapasalamaton.” Siya midugang: “Aduna unyay mga tawo nga magabutang sa kalingawan puli sa Diyos, kinsa nagatipig sa panggawas nga dagway sa relihiyon, apan maoy iladong paglimod sa kamatuoran niini.”—The New English Bible.a

Atong hinumdoman nga bisan tuod ang tagna ni Jesus nagapaila sa usa ka tayuktok sa kasaysayan sa tawo samtang kining tanang hitaboa mahitabong tingob sa samang kaliwatan, kana wala magkinahanglan nga sila mas daghan o mas dagko kay sa nangaging kaliwatan, bisan pag tingali kana matuod.

Imo bang nakita kining mga panghitaboa ug mga kahimtang sulod niining ika-20ng siglo, ilabina sukad sa 1914? Imo ba kining nakita bisan karon sa 1988? Ingong pahinumdom, atong sublion ang pipila sa talagsaong mga hitabo nga nag-apektar ug nagaapektar sa katawhan ug tubagon ang pangutana, Nagapaila ba sila nga haduol na ang panahon nga mobalda ang Diyos pinaagi sa iyang Gingharian?—Lucas 21:29-33.

[Mga footnote]

[Letrato sa panid 4]

Ang sinulat sa ubos niining tipikal nga memoryal sa Gubat sa Kalibotan I mabasa: “Alang sa malungtarong paghandom sa Hinimayang mga Patay sa Lungsod sa Evesham [Inglaterra] nga mitugyan sa ilang mga kinabuhi alang sa ilang Nasod sa Dakong Gubat.”

Halos tanang kaliwatan nagpatungha sa iyang mga tagna sa pag-abot sa kataposan sa kalibotan.

Nan, nagkahulogan ba kana nga walay pasikaranan ang gipahibalo sa mga Saksi ni Jehova sukad 1914—ang kataposan sa sistema niining kalibotana, ug ang umaabot nga bag-ong kalibotang sistema nga magbalhin sa yuta ngadto sa usa ka paraiso? Kini bang tanan maoy sayop lamang nga paghubad? Sa laing bahin, kon husto ang mga Saksi ni Jehova, unsa ang epekto niana kanimo?

Ang mga tubag niining mga pangutanaha bililhon kanatong tanan, ilabina karon sa dihang kita nagapuyo sa talagsaong yugto sa kasaysayan, ang panahong nukleyar diin ang tawo sa unang panahon, makapahayag sa mga pulong, “Tingali wala nay mga anak o mga apo.”