DENARIO

Usa ka Romanhong sensilyo nga plata nga motimbang ug mga 3.85 g ug busa mokantidad ug $0.74 karong adlawa. Kinulitan kini sa hulagway sa ulo ni Cesar ug mao ang “kuwarta nga ibayad sa buhis por ulo” nga gipangayo sa mga Romano gikan sa mga Hudiyo. (Mat 22:19-21) Sa mga adlaw sa yutan-ong ministeryo ni Jesus, ang mga mamumuo sa uma sagad nga makadawat ug usa ka denario alang sa 12-oras nga trabaho sa tibuok adlaw. (Mat 20:2) Busa, ang Pinadayag 6:6 naghulagway sa usa ka grabeng kahimtang sa dihang kini nag-ingon nga ang usa ka litrong trigo o tulo ka litrong sebada mokantidad ug usa ka denario (suhol sa tibuok adlaw).

Kon ang mahalon nga nardo nga gigamit ni Maria, nga igsoong babaye ni Lazaro, sa paghaplas kang Jesu-Kristo gikabaligya pa ug 300 ka denario (halos usa ka tuig nga suhol), dakodako untang kantidad sa salapi ang ikahulog sa kahon sa salapi nga gitipigan ni Judas Iskariote. Dili gayod ikatingala nga ang dili-matinud-anon nga si Judas Iskariote mitutol pag-ayo, sanglit dili man siya makapanguha bisan ug tipik niining dakong kantidad.​—Ju 12:3-6; 13:29; Mar 14:3-11.

Ang matinabangon nga Samarianhon sa sambingay ni Jesus migasto ug duha ka denario (suhol sa duha ka adlaw) aron tabangan ang wala-hiilhing estranyo, ug siya miingon nga andam siyang moabaga sa dugang pang galastohon alang sa estranyo. (Luc 10:33-35) Sa kasukwahi, diha sa usa sa mga sambingay ni Jesus nga nagpasiugda sa pagkamapasayloon, ang usa ka ulipon kansang 60,000,000-ka-denario nga utang gikanselar dili buot mopasaylo sa 100-ka-denario nga utang sa iyang isigkaulipon.​—Mat 18:​24-33.