Usa ka Dakong Panon nga Nagahatag ug Sagradong Pag-alagad
“Sila nagahatag kaniya ug sagradong pag-alagad adlaw ug gabii diha sa iyang templo.”—PINADAYAG 7:15.
1. Unsang talagsaong espirituwal nga pagsabot ang nabatonan niadtong 1935?
NIADTONG Mayo 31, 1935, dihay dakong kalipay taliwala sa mga delegado sa usa ka kombensiyon sa mga Saksi ni Jehova sa Washington, D.C. Didto, sa unang panahon, ang dakong pundok (o, dakong panon) sa Pinadayag 7:9 tin-awng nailhan nga nahiuyon sa ubang bahin sa Bibliya ug sumala sa mga hitabo nga nagsugod pagkahitabo.
2. Unsay nagpaila nga ang nagauswag nga gidaghanon nakaamgo nga ang Diyos wala magtawag kanila alang sa langitnong kinabuhi?
2 Mga unom ka semana nga miagi, sa pagsaulog sa Panihapon sa Ginoo sa mga kongregasyon sa mga Saksi ni Jehova, 10,681 niadtong nanambong (mga 1 sa 6) wala makig-ambit sa emblematikanhong tinapay ug bino, ug 3,688 kanila maoy aktibong mga magmamantala sa Gingharian sa Diyos. Nganong wala man sila makig-ambit sa mga emblema? Tungod kay pinasukad sa ilang nakat-onan gikan sa Bibliya, nakaamgo sila nga ang Diyos wala magtawag kanila alang sa langitnong kinabuhi kondili sila makaambit sa mahigugmaong mga tagana ni Jehova sa laing paagi. Busa niadtong kombensiyona, sa dihang nangutana ang mamumulong: “Palihog nga motindog ang tanang naghambin sa paglaom nga mabuhing walay kataposan sa yuta,” unsay nahitabo? Libolibo ang mitindog, nga gisundan sa dugayng pagpakpak sa bahin sa mamiminaw.
3. Nganong ang pag-ila sa dakong pundok naghatag ug dugang kadasig sa pagsangyaw sa kanataran, ug unsay gibati sa mga Saksi bahin niini?
3 Ang nahibaloan sa mga delegado niadtong kombensiyona dugang nakapadasig sa ilang ministeryo. Ilang naila nga karon, sa wala pa ang kataposan sa daang sistema, dili lamang pipila ka libo kondili usa ka dakong pundok sa katawhan ang kahatagag higayon nga mosulod sa kahikayan ni Jehova alang sa pagpatunhay sa kinabuhi, uban sa paalaboton nga mabuhing walay kataposan sa usa ka paraisong yuta. Pagkamakapalipay nga mensahe ang gipahayag didto ngadto sa mga nahigugma sa kamatuoran! Naamgohan sa mga Saksi ni Jehova nga dako pa ang buluhaton nga pagabuhaton—usa ka makapalipayng buluhaton. Katuigan sa ulahi, si John Booth, kinsa nahimong membro sa Nagamandong Lawas, nahinumdom: “Kadtong asembliyaha daghag gihatag nga naglipay kanamo.”
4. (a) Sa unsang gidak-on nga adunay aktuwal nga pagpanigom sa dakong panon sukad sa 1935? (b) Sa unsang paagi kadtong sakop sa dakong panon nagahatag ug pamatuod nga ang ilang pagtuo maoy buhing pagtuo?
4 Sulod sa misunod nga katuigan, dako ang pag-uswag sa gidaghanon sa mga Saksi ni Jehova. Bisan pa sa kasagarang mapintas nga paglutos nga gipahamtang kanila panahon sa Gubat sa Kalibotan II, ang ilang gidaghanon hapit mitulo ka pilo sulod sa napulo ka tuig. Ug ang 56,153 ka magmamantala nga mihatag sa publikong pagpanaksi sa 1935 miuswag, sa pagka-1994, ngadto sa kapig 4,900,000 ka magmamantala sa Gingharian sa kapig 230 ka nasod. Ang kinabag-an kanila maikagong naglaom nga mahilakip sa mga pagahatagan ni Jehova ug hingpit nga kinabuhi sa usa ka paraisong yuta. Kon itandi sa gamayng panon, sila tinuod gayod nga dakong panon. Dili sila katawhan nga moingon nga sila adunay pagtuo apan wala magpasundayag niana. (Santiago 1:22; 2:14-17) Silang tanan nagpakig-ambit sa uban sa maayong balita mahitungod sa Gingharian sa Diyos. Ikaw ba usa sa maong malipayong panon? Ang pagkaaktibong Saksi usa ka bililhong timaan, apan labaw pa ang nalangkit.
“Nagbarog Atubangan sa Trono”
5. Unsay gipaila sa kamatuoran nga ang dakong panon “nagbarog atubangan sa trono”?
5 Sa panan-awon nga gihatag kang apostol Juan, nakita niya sila nga “nagbarog atubangan sa trono ug atubangan sa Kordero.” (Pinadayag 7:9) Ang ilang pagbarog atubangan sa trono sa Diyos, sumala sa gibatbat niining kontekstoha, nagpaila nga sila naghatag ug bug-os nga pag-ila sa pagkasoberano ni Jehova. Daghan ang nalangkit niini. Pananglitan: (1) Sila nag-ila sa katungod ni Jehova sa pagdesidir kon unsay maayo ug kon unsay daotan alang sa iyang mga alagad. (Genesis 2:16, 17; Isaias 5:20, 21) (2) Sila nagpatalinghog kang Jehova samtang siya makigsulti kanila pinaagi sa iyang Pulong. (Deuteronomio 6:1-3; 2 Pedro 1:19-21) (3) Sila nag-ila sa pagkahinungdanon sa pagpasakop ngadto sa mga gisaligan ni Jehova sa pagkamagtatan-aw. (1 Corinto 11:3; Efeso 5:22, 23; 6:1-3; Hebreohanon 13:17) (4) Bisag dili hingpit, sila naningkamot pag-ayo nga mosunod sa teokratikanhong pagtultol, dili nga magbagutbot, kondili andam, nga kinasingkasing. (Proverbio 3:1; Santiago 3:17, 18) Sila anaa sa atubangan sa trono aron ihatag ang sagradong pag-alagad kang Jehova, kinsa gitahod nila pag-ayo ug dulot nga gihigugma. Sa kahimtang niining dakong panon, ang ilang ‘pagbarog’ atubangan sa trono nagpaila sa pag-uyon sa Usa nga naglingkod sa trono. (Itandi ang Pinadayag 6:16, 17.) Pag-uyon nga gipasukad sa unsa?
“Nagbiste sa Maputing Tag-as nga mga Biste”
6. (a) Unsay gipasabot nga ang dakong panon “nagbiste sa maputing mga biste”? (b) Sa unsang paagi ang dakong panon makabaton ug matarong nga baroganan atubangan ni Jehova? (c) Sa unsang gidak-on ang pagtuo diha sa giulang dugo ni Kristo mag-impluwensiya sa mga kinabuhi sa dakong panon?
6 Ang kahubitan ni apostol Juan sa iyang nakita nag-ingon nga ang mga sakop niining dakong panon “nagbiste sa maputing tag-as nga mga biste.” Kanang maputing tag-as nga mga biste nagsimbolo sa ilang mahinlo, matarong nga baroganan atubangan ni Jehova. Sa unsang paagi naangkon nila ang maong baroganan? Ato nang napanid-an nga diha sa panan-awon ni Juan sila nagbarog “atubangan sa Kordero.” Giila nila si Jesu-Kristo ingong “ang Kordero sa Diyos nga nagakuha sa sala sa kalibotan.” (Juan 1:29) Si Juan nakadungog sa usa sa mga ansiano kinsa, diha sa panan-awon, presente sa trono sa Diyos nga misaysay: “Ilang gilabhan ang ilang mga taas-nga-biste ug nagpaputi niini sa dugo sa Kordero. Mao kana kon nganong sila anaa sa atubangan sa trono sa Diyos.” (Pinadayag 7:14, 15) Sa masambingayong paagi, ilang gilabhan ang ilang tag-as nga mga biste pinaagi sa pagpakitag pagtuo sa nagatubos nga dugo ni Kristo. Sila dili lamang sa kaisipan miuyon sa pagtulon-an sa Bibliya bahin sa lukat. Ang pagpabili niini magaapektar sa matang sa pagkatawo sa kahiladman; sa ingon, maoy “pinaagi sa kasingkasing” nga sila nagpakitag pagtuo. (Roma 10:9, 10) Kini adunay layog-abot nga epekto diha sa kon unsay ilang buhaton sa ilang mga kinabuhi. Tungod sa pagtuo, ilang gipahinungod ang ilang kaugalingon kang Jehova pinasukad sa halad ni Kristo, nga gipasimbolohan ang maong pagpahinungod pinaagi sa pagtuslob sa tubig, nga tinuod nagkinabuhing nahiuyon sa ilang pagpahinungod, ug sa ingon makatagamtam sa inuyonang relasyon uban sa Diyos. Pagkamaayong pribilehiyo—usa nga pagaampingan pag-ayo!—2 Corinto 5:14, 15.
7, 8. Sa unsang paagi ang organisasyon ni Jehova nakatabang sa dakong panon sa paghupot sa ilang tag-as nga mga biste nga wala mahugawi?
7 Tungod sa mahigugmaong paghunahuna sa ilang malungtarong kaayohan, ang organisasyon ni Jehova subsob nga nagpunting sa mga tinamdan ug panggawi nga makamantsa, o makapahugaw, sa bisteng ilhanan sa usa mao nga, bisan pa sa panggawas nga mga pangangkon, ang maong tawo dili gayod mohaom sa matagnaong kahubitan sa Pinadayag 7:9, 10. (1 Pedro 1:15, 16) Sa pagpalig-on kon unsay gipatik nga sayo pa, ang The Watchtower, niadtong 1941 ug human niadto, subsob nagpakita nga dili gayod angay nga magwali sa uban ug unya, sa mga taknang wala magsangyaw, mohimo sa pagpakighilawas o pagpanapaw. (1 Tesalonica 4:3; Hebreohanon 13:4) Niadtong 1947 gipasiugda nga ang Kristohanong mga batakan sa kaminyoon ni Jehova mapadapat diha sa tanang nasod; walay sapayan kon unsay uyonan tingali sa lokal nga kustombre, kadtong nagpadayon sa pagbaton ug daghang asawa dili mahimong mga Saksi ni Jehova.—Mateo 19:4-6; Tito 1:5, 6.
8 Niadtong 1973, ang mga Saksi ni Jehova sa tibuok kalibotan gipakitaan nga silang tanan kinahanglang bug-os molikay sa dili-ikalimod nga mahugawng mga bisyo, sama sa sayop nga paggamit sa tabako, bisag diin sila—dili lang diha sa Kingdom Hall o sa pagsangyaw sa kanataran kondili diha usab sa sekular nga trabaho o sa usa ka nahilit nga dapit nga dili makita sa kadaghanan. (2 Corinto 7:1) Niadtong 1987 sa distritong mga kombensiyon sa mga Saksi ni Jehova, ang Kristohanong mga batan-on gitambagan nga aron mahuptan ang hinlong baroganan atubangan sa Diyos, kinahanglan nga sila magbantay sa pagkinabuhi ug dobleng kinabuhi. (Salmo 26:1, 4) Sa subsob, Ang Bantayanang Torre nagpasidaan batok sa lainlaing mga kinaiyahan sa espiritu sa kalibotan tungod kay “ang dagway sa pagsimba nga hinlo ug wala-mahugawi sa panglantaw sa atong Diyos ug Amahan” naglakip sa pag-amping sa kaugalingon nga “dili mabulingan sa kalibotan.”—Santiago 1:27.
9. Kinsa sa aktuwal ang motindog nga inuyonan atubangan sa trono sa Diyos human sa dakong kasakitan?
9 Sila kansang pagtuo magpalihok kanila sa pagkinabuhi sa paagi nga magpabiling hinlo sa espirituwal ug moral mao unya gihapon ang ‘magabarog atubangan sa trono’ ingong inuyonang mga alagad sa Diyos human sa umaabot nga dakong kasakitan. Kini sila mao ang katawhan nga wala lamang mosugod sa Kristohanong pagkinabuhi kondili maunongong nagpadayon niana.—Efeso 4:24.
“Mga Palwa sa Palma Diha sa Ilang mga Kamot”
10. Unsa ang kahulogan sa mga palwa sa palma nga nakita ni Juan diha sa mga kamot sa dakong panon?
10 Apil sa talagsaong mga kinaiyahan sa dakong panon, sumala sa nakit-an ni apostol Juan, mao nga “dihay mga palwa sa palma sa ilang mga kamot.” Unsay kahulogan niana? Sa walay duhaduha kanang mga palwa sa palma nagpahinumdom kang Juan sa Hudiyohanong pista sa mga tabernakulo, ang labing sadyang pista sa Hebreohanong kalendaryo, nga gisaulog human sa ting-ani sa ting-adlaw. Nahiuyon sa Kasugoan, ang mga palwa sa palma, uban sa mga sanga sa ubang kakahoyan, gigamit sa pagtukod ug mga balongbalong nga puy-an panahon sa pista. (Levitico 23:39-40; Nehemias 8:14-18) Sila gitabyog usab sa mga magsisimba sulod sa templo panahon sa pag-awit sa Hallel (Salmo 113-118). Ang pagtabyog sa mga palwa sa palma sa dakong panon lagmit nagpahinumdom usab kang Juan sa higayon sa dihang si Jesus misulod sa Jerusalem nga nagsakay ug asno samtang usa ka panon sa mga magsisimba malipayong nagtabyog sa mga palwa sa palma ug misinggit: “Bulahan siya nga nagaanhi sa ngalan ni Jehova, gani ang hari sa Israel!” (Juan 12:12, 13) Busa ang pagtabyog sa mga palwa sa palma nagpaila nga ang dakong panon malipayong nagdayeg sa Gingharian ni Jehova ug sa iyang dinihogang Hari.
11. Nganong ang mga alagad sa Diyos tinuod nga makakaplag ug kalipay sa pag-alagad kang Jehova?
11 Ang maong espiritu sa kalipay gipadayag sa dakong panon bisan karon samtang sila nag-alagad kang Jehova. Wala kini magpasabot nga wala sila magsagubang ug kalisdanan o wala sila makasinatig kaguol o kasakitan. Apan ang katagbawan gumikan sa pag-alagad ug pagpahimuot kang Jehova motabang sa pagbakwi nianang mga butanga. Sa ingon, usa ka misyonaryo nga nag-alagad kauban sa iyang bana sulod sa 45 ka tuig sa Guatemala misugilon bahin sa kinaraang mga kahimtang alirong nila, sa bug-at nga trabaho ug sa peligrosong biyahe nga bahin na sa kinabuhi samtang sila naningkamot sa pagduaw sa Indian nga mga balangay nga dala ang mensahe sa Gingharian. Siya mihinapos: “Kadto ang panahon sa among mga kinabuhi nga kami maoy labing malipayon.” Bisan pag gibati niya ang mga epekto sa pagkatigulang ug sakit, apil sa kataposang mga gisulat sa iyang talaadlawan mao ang mga pulong: “Kadto usa ka maayong kinabuhi, nga magantihon kaayo.” Sa tibuok yuta, sama ang gibati sa mga Saksi ni Jehova bahin sa ilang ministeryo.
“Sagradong Pag-alagad Adlaw ug Gabii”
12. Maadlaw man o magabii, unsay makita ni Jehova dinhi sa yuta?
12 Kining malipayong mga magsisimba naghatag kang Jehova ug “sagradong pag-alagad adlaw ug gabii diha sa iyang templo.” (Pinadayag 7:15) Sa tibuok yuta, minilyon ang nagahimo niining sagradong pag-alagad. Sa dihang gabii na sa pila ka nasod ug ang katawhan didto natulog na, sa ubang mga nasod nagsilang pa ang adlaw ug ang mga Saksi ni Jehova puliking nagasangyaw. Sa pagtuyok sa yuta, nga walay hunong, adlaw ug gabii, sila nagaawit ug mga pagdayeg kang Jehova. (Salmo 86:9) Apan ang adlaw-ug-gabii nga pag-alagad nga gitumong sa Pinadayag 7:15 mas personal pa.
13. Sa unsang paagi gipaila sa Kasulatan kon unsay kahulogan sa pag-alagad “adlaw ug gabii”?
13 Ang mga tawong naglangkob sa dakong panon nagahatag ug sagradong pag-alagad adlaw ug gabii. Nagkahulogan ba kini nga ang tanan nilang ginabuhat giisip nga sagradong pag-alagad? Tinuod nga bisan unsa ang ilang ginabuhat, sila makakat-on sa pagbuhat niana sa paaging magpasidungog kang Jehova. (1 Corinto 10:31; Colosas 3:23) Bisan pa niana, ang “sagradong pag-alagad” mapadapat lamang ngadto sa butang nga laktod nalangkit sa pagsimba sa usa sa Diyos. Ang pagbuhat sa usa ka kalihokan “adlaw ug gabii” nagpasabot sa pagkaregular o pagkamakanunayon ug sa matinguhaong paningkamot usab.—Itandi ang Josue 1:8; Lucas 2:37; Buhat 20:31; 2 Tesalonica 3:8.
14. Unsay maghimo sa atong personal nga pag-alagad sa kanataran nga mohaom sa kahubitan sa “adlaw ug gabii” nga pag-alagad?
14 Samtang sila nag-alagad diha sa yutan-ong sawang sa dakong espirituwal nga templo ni Jehova, kadtong sakop sa dakong panon maningkamot sa pagpakig-ambit sa regular ug makanunayong paagi sa pagsangyaw sa kanataran. Ang daghan naghimo nga ilang tumong nga makabaton ug bahin sa pagsangyaw sa kanataran kada semana. Ang uban nanlimbasog pag-ayo isip mga regular payunir o mga oksilyare payunir. Sagad nga sila puliki sa pagsangyaw sa kadalanan ug sa mga tindahan sayo sa buntag. Sa pagpauyon sa mga tawong interesado, ang pipila ka Saksi nagdumala ug mga pagtuon sa Bibliya sa magabii. Sila nagsangyaw samtang naniyangge, samtang nagbiyahe, sa mga yugto sa paniudto, ug pinaagi sa telepono.
15. Gawas sa pagsangyaw sa kanataran, unsay nalakip sa atong sagradong pag-alagad?
15 Ang pagpakig-ambit diha sa mga tigom sa kongregasyon maoy bahin usab sa atong sagradong pag-alagad; mao usab ang trabahong nalangkit sa pagpanukod ug pag-atiman sa mga dapit sa Kristohanong asembliya. Ang mga paningkamot nga gihimo sa pagdasig ug pagtabang sa Kristohanong mga igsoong lalaki ug babaye sa usa, sa espirituwal ug sa materyal nga paagi, sa pagpabiling buhi diha sa pag-alagad ni Jehova nahiapil. Nalakip niini ang buluhaton sa atong mga Komite sa Pagpakiglabot sa Ospital. Ang lainlaing matang sa pag-alagad sa Bethel, ingon man ang boluntaryong pag-alagad panahon sa atong mga kombensiyon, ngatanan maoy sagradong pag-alagad. Sa pagkatinuod, sa dihang ang atong kinabuhi masentro sa atong relasyon kang Jehova, kini mapuno ug sagradong pag-alagad. Sumala sa giingon sa kasulatan, ang katawhan ni Jehova naghatag ug “sagradong pag-alagad adlaw ug gabii,” ug sila makakaplag ug dakong kalipay sa paghimo niana.—Buhat 20:35; 1 Timoteo 1:11.
‘Gikan sa Tanang Kanasoran, mga Tribo, mga Katawhan, ug mga Dila’
16. Sa unsang paagi nagakatuman nga ang dakong panon manggula “gikan sa tanang kanasoran”?
16 Gikan sa tanang nasod, ang mga sakop sa dakong panon nagapangabot. Dili madapigon ang Diyos, ug ang tagana sa lukat nga gihimo pinaagi ni Jesu-Kristo maoy igo aron pagtubos kanilang tanan. Sa dihang unang nailhan ang dakong panon sa Kasulatanhong paagi niadtong 1935, aktibo ang mga Saksi ni Jehova sa 115 ka nasod. Sa katuigang 1990, ang pagpangita sa mga karnerohon nakaabot sa labaw sa dobleng gidaghanon sa kanasoran.—Marcos 13:10.
17. Unsay ginahimo aron sa pagtabang sa katawhan sa tanang ‘tribo, mga katawhan, ug mga dila’ aron malakip sa dakong panon?
17 Sa pagkaplag sa umaabot nga mga membro sa dakong panon, gitagad sa mga Saksi ni Jehova dili lang ang nasodnong mga pundok kondili ang mga tribo ug mga katawhan ug mga pundok sa katawhan sumala sa pinulongan nianang mga nasora. Aron maabot kining mga tawhana, ang mga Saksi nagpatik ug literatura sa Bibliya sa kapig 300 ka pinulongan. Nalangkit niini ang pagbansay ug pagmentenar ug mga tem sa may katakos nga mga maghuhubad, pagtaganag kompiyuter nga kasangkapan nga makaarang sa pagproseso nianang tanan nga pinulongan, ingon man ang aktuwal nga pag-imprenta. Sa miaging lima lang ka tuig, 36 ka pinulongan, nga gigamit sa pagsulti sa mga 98,000,000 ka tawo, ang nadugang sa mga pinulongan nga gihubad. Dugang pa, ang mga Saksi naningkamot sa pagduaw nga personal niining mga tawhana sa pagtabang kanila nga makasabot sa Pulong sa Diyos.—Mateo 28:19, 20.
“Gikan sa Dakong Kasakitan”
18. (a) Inig-ulbo sa dakong kasakitan, kinsa ang mapanalipdan? (b) Unsang makapalipayng mga pagmantala ang pagahimoon unya?
18 Sa dihang buhian sa mga manulonda ang mga hangin sa kalaglagan nga gihisgotan sa Pinadayag 7:1, dili lamang ang dinihogang “mga ulipon sa atong Diyos” makasinati sa mahigugmaong panalipod ni Jehova kondili ang dakong panon usab nga miduyog kanila sa matuod nga pagsimba. Sumala sa giingon kang apostol Juan, kadtong sakop sa dakong panon “manggula gikan sa dakong kasakitan” ingon nga mga nakalabang-buhi. Pagkadakong singgit sa pasalamat ug pagdayeg ang ila unyang ihatag samtang ilang igapahayag: “Ang kaluwasan utang namo sa atong Diyos, kinsa naglingkod sa trono, ug sa Kordero”! Ug ang tanang maunongong mga alagad sa Diyos sa mga langit modugang sa ilang mga tingog sa pagpahayag: “Amen! Ang panalangin ug ang himaya ug ang kaalam ug ang pagpasalamat ug ang dungog ug ang gahom ug ang kusog mahiadto sa atong Diyos hangtod sa kahangtoran. Amen.”—Pinadayag 7:10-14.
19. Unsang makapalipayng buluhaton ang maikagong pakig-ambitan sa mga makalabang-buhi?
19 Pagkamalipayon unya kana nga panahon! Ang tanang buhi maoy mga alagad sa bugtong matuod nga Diyos! Ang kinadak-ang kalipay niini nilang tanan mao unya ang pag-alagad kang Jehova. Aduna unyay dakong buluhaton nga buhatonon pa—makapalipayng buluhaton! Ang yuta pagahimoon nga Paraiso. Pagabanhawon ang kaliboan ka milyon sa mga patay ug pagatudloan sa mga dalan ni Jehova. Pagkamakalilipayng pribilehiyo ang pagpakig-ambit unya niana!
Unsay Imong Komento?
◻ Unsay epekto sa mga hitabo sa 1935 diha sa ministeryo sa kanataran sa mga Saksi ni Jehova?
◻ Unsay gipaila sa kamatuoran nga ang dakong panon makita nga “nagbarog atubangan sa trono”?
◻ Sa unsang paagi ang pagpabili sa dugo sa Kordero mag-apektar sa mga kinabuhi?
◻ Unsay gipasabot sa ilang pagtabyog sa mga palwa sa palma?
◻ Sa unsang paagi ang dakong panon naghatag ug sagradong pag-alagad adlaw ug gabii?
[Mga hulagway sa panid 16, 17]
Ang ilang sagradong pag-alagad magpabanaag sa pagkaregular, sa kakugi, ug sa matinguhaong paningkamot