Kapitulo 5

Nakita ni Juan ang Hinimayang Jesus

Panan-awon 1​—Pinadayag 1:10–3:22

Ulohan: Gisusi ni Jesus ang espirituwal nga Israel sa yuta ug naghatag ug pagpalig-on

Panahon sa katumanan: Kini nga bahin sa adlaw sa Ginoo nagsugod sa 1914 ug nagpadayon hangtod mamatay ug mabanhaw ang kataposan sa matinumanong mga dinihogan

 1. Sa unsang paagi gipresentar ang unang panan-awon, ug sa unsang paagi gipaila ni Juan ang panahon sa aktuwal nga katumanan niini?

ANG unang panan-awon sa basahon sa Pinadayag nagsugod sa kapitulo 1, bersikulo 10. Kining maong panan-awon, sama sa uban pa diha sa Pinadayag, gipaila pinaagi sa pahayag nga si Juan nakadungog o nakakita ug talagsaong butang. (Pinadayag 1:10, 12; 4:1; 6:1) Kining unang panan-awon gipresentar sumala sa kahimtang sa unang siglo diin ang mga mensahe gitumong ngadto sa pito ka kongregasyon sa panahon ni Juan. Apan gipaila ni Juan ang panahon sa aktuwal nga katumanan niini sa dihang siya nag-ingon: “Pinaagi sa pagdasig ako nahidangat sa adlaw sa Ginoo.” (Pinadayag 1:10a) Kanus-a kini nga “adlaw”? May kalabotan ba niini ang dramatikanhong mga hitabo sa magubot nga panahon karon? Kon mao, kinahanglang hatagan nato ug pagtagad ang tagna, kay apektado niini ang ato mismong kinabuhi—bisan ang atong kaluwasan usab.—1 Tesalonica 5:20, 21.

Sa Adlaw sa Ginoo

 2. Kanus-a nagsugod ang adlaw sa Ginoo, ug kanus-a kini matapos?

² Sa unsang yugto sa panahon natuman ang Pinadayag? Buweno, unsa kining adlaw sa Ginoo? Gihisgotan kini ni apostol Pablo ingong panahon sa paghukom ug sa katumanan sa mga saad sa Diyos. (1 Corinto 1:8; 2 Corinto 1:14; Filipos 1:6, 10; 2:16) Sa pag-abot niana nga “adlaw,” ang dagkong mga katuyoan ni Jehova naglihok nga mauswagon ug madaogon paingon sa sangkoanan niini. Kana nga “adlaw” nagsugod dihang gikoronahan si Jesus ingong langitnong Hari. Bisan human sa paghukom ni Jesus sa kalibotan ni Satanas, ang adlaw sa Ginoo nagpadayon gihapon, sa pagpasig-uli sa Paraiso ug sa pagpahingpit sa katawhan, hangtod nga si Jesus sa kataposan ‘magtugyan sa gingharian ngadto sa iyang Diyos ug Amahan.’—1 Corinto 15:24-26; Pinadayag 6:1, 2.

 3. (a) Sa unsang paagi ang tagna ni Daniel bahin sa “pito ka panahon” makatabang kanato sa pagsabot kon kanus-a nagsugod ang adlaw sa Ginoo? (b) Unsay mga hitabo sa yuta nga nagpamatuod nga ang tuig 1914 mao ang sinugdan sa adlaw sa Ginoo?

³ Ang katumanan sa ubang mga tagna sa Bibliya motabang kanato sa pagsabot kon kanus-a nagsugod ang adlaw sa Ginoo. Pananglitan, si Daniel naghubit bahin sa pagputol sa pagmando sa linya ni Haring David; paglabay sa “pito ka panahon” madayag “nga ang Labing Hataas maoy Magmamando sa gingharian sa mga tawo, ug ngadto sa usa nga buot niya kini iyang ihatag.” (Daniel 4:23, 24, 31, 32) Ang dakong katumanan nianang tagnaa nagsugod dihang naawaaw ang gingharian sa Juda, nga gipakita sa ebidensiya sa Bibliya nga natapos sa Oktubre 607 W.K.P. Ang Pinadayag 12:6, 14 nagpakita nga ang 3 1/2 ka panahon katumbas sa 1,260 ka adlaw; busa, ang pito ka panahon (doble nianang numeroha) maoy 2,520 ka adlaw. Kon isipon nato nga ang ‘usa ka adlaw maoy usa ka tuig,’ makadangat kita sa 2,520 ka tuig ingong gitas-on sa “pito ka panahon.” (Ezequiel 4:6) Busa, si Kristo Jesus nagsugod sa iyang pagmando sa langit sa ulahing bahin sa 1914. Ang pagbuto sa unang gubat sa kalibotan nianang tuiga nagtimaan sa “sinugdan sa mga kaul-ol sa kasakit” nga nagpadayon sa paghampak sa katawhan. Sukad sa 1914, talagsaon gayod nga napamatud-an sa mga hitabo niining nabulit-sa-dugo nga yuta kanang tuiga ingong sinugdan sa “adlaw” sa presensiya ni Jesus!—Mateo 24:3-14.a

 4. (a) Unsay gipaila sa mga pulong mismo sa Pinadayag kon kanus-a matuman ang unang panan-awon? (b) Kanus-a matapos ang katumanan sa unang panan-awon?

⁴ Busa, kining unang panan-awon ug ang tambag niini nagtumong sa adlaw sa Ginoo, gikan sa 1914 padayon. Kini nga panahon gipaluyohan sa kamatuoran nga, sa ulahing bahin sa Pinadayag, gihubit sa rekord ang pagpatuman sa tinuod ug matarong nga mga paghukom sa Diyos—mga hitabo diin ang Ginoong Jesus may gidulang talagsaong papel. (Pinadayag 11:18; 16:15; 17:1; 19:2, 11) Kon ang katumanan sa unang panan-awon nagsugod sa 1914, kanus-a kini matapos? Ingon sa gipakita mismo sa mga mensahe, ang organisasyon nga gisulatan mao ang kongregasyon sa Diyos sa mga dinihogan sa yuta. Busa, ang katumanan niining unang panan-awon matapos kon ang kataposan sa matinumanong membro nianang dinihogang kongregasyon mamatay ug mabanhaw ngadto sa langitnong kinabuhi. Bisan pa niana, ang adlaw sa Ginoo, ug ang mga panalangin alang sa ubang mga karnero sa yuta, magpadayon hangtod sa kataposan sa Usa ka Libo ka Tuig nga Pagmando ni Jesu-Kristo.—Juan 10:16; Pinadayag 20:4, 5.

 5. (a) Unsay gisugo sa tingog nga nadunggan ni Juan nga iyang himoon? (b) Nganong dili lisod ihatod ang linukot nga basahon ngadto sa “pito ka kongregasyon”?

⁵ Niining una nga panan-awon, sa wala pay nakita si Juan, siya may nadunggan: “Ug sa akong luyo nadungog ko ang usa ka makusog nga tingog sama nianang sa trompeta, nga nag-ingon: ‘Ang imong makita isulat sa usa ka linukot nga basahon ug ipadala kini ngadto sa pito ka kongregasyon, sa Efeso ug sa Smirna ug sa Pergamo ug sa Tiatira ug sa Sardis ug sa Filadelfia ug sa Laodicea.’” (Pinadayag 1:10b, 11) Usa ka tingog nga may awtoridad ug puwersado, nga sama nianang sa trompeta, nagsugo kang Juan sa pagsulat ngadto sa “pito ka kongregasyon.” Siya makadawat ug usa ka serye sa mga mensahe ug kinahanglang iyang isulat ang mga butang nga iyang makita ug madunggan. Matikdi nga ang mga kongregasyon nga ginganlan dinhi aktuwal nga naglungtad sa adlaw ni Juan. Kining tanan nahimutang sa Asia Minor, sa tabok lamang sa dagat gikan sa Patmos. Dili lisod biyaheon ang matag usa niining dapita agi sa maayong mga dalan sa mga Romano niadtong panahona. Ang mensahero dili maglisod sa paghatod sa linukot nga basahon gikan sa usa ka kongregasyon ngadto sa sunod. Kining pito ka kongregasyon kaamgid sa usa ka bahin sa sirkito sa modernong-adlawng mga Saksi ni Jehova.

 6. (a) Unsay buot ipasabot sa “mga butang karon”? (b) Nganong makapiho kita nga ang mga kahimtang sa kongregasyon sa dinihogang mga Kristohanon karon susama usab sa kahimtang sa adlaw ni Juan?

⁶ Ang kadaghanan sa mga tagna sa Pinadayag matuman tapos sa panahon ni Juan. Kini naghisgot bahin sa “mga butang nga mahitabo human niini.” Apan ang tambag ngadto sa pito ka kongregasyon nga naglangkit sa “mga butang karon,” nagpasabot sa mga kahimtang nga aktuwal nga naglungtad sa maong pito ka kongregasyon. Ang mga mensahe maoy bililhong mga tabang sa matinumanon nga tinudlong mga ansiyano niadtong pito ka kongregasyon, maingon man sa tanang ubang mga kongregasyon sa dinihogang mga Kristohanon sa maong panahon.b Sanglit, ang panan-awon unang natuman sa adlaw sa Ginoo, ang gipamulong ni Jesus nagpaila nga ang susamang mga kahimtang madahom usab diha sa mga kongregasyon sa dinihogang mga Kristohanon sa atong panahon.—Pinadayag 1:10, 19.

 7. Kinsay nakita ni Juan niining una nga panan-awon, ug nganong importante kaayo kini ug makapadasig kanato karon?

⁷ Niining una nga panan-awon, nakita ni Juan ang masilakon nga Ginoong Jesu-Kristo sa Iyang langitnong himaya. May mas haom pa ba niini nga basahon sa mga tagna nga naghisgot bahin sa dakong adlaw niini nga Ginoo nga gipadala sa langit? Ug may mas importante pa ba niini alang kanato, nga nagkinabuhi karon niana nga panahon ug nagtuman sa iyang tagsatagsa ka sugo? Dugang pa, pagkamakapadasig alang sa mga dumadapig sa pagkasoberano ni Jehova nga mapasaligan nga ang Mesiyanikong Binhi, human nga nakaantos sa tanang pagsulay ug mga paglutos nga gipahinabo ni Satanas ug human nga nakaagom ug masakit nga kamatayon sa dihang ang Iyang “tikod” gisamaran halos 2,000 ka tuig kanhi, buhi na karon sa langit, ug gihatagag gahom alang sa madaogong katumanan sa katuyoan sa Diyos!—Genesis 3:15.

 8. Unsay andam na nga himoon ni Jesus karon?

⁸ Dayag nga si Jesus karon andam na sa paglihok ingong naentrono nga Hari. Siya gitudlo ingong Pangulong Tiglaglag ni Jehova sa pagpahamtang sa kataposang mga paghukom ni Jehova batok niining daan, daotang sistema sa mga butang ug sa mapintas nga diyos niini, si Satanas. Iyang hukman usab ang iyang kongregasyon sa mga dinihogan ug ang mga kauban niini nga dakong panon, maingon man ang kalibotan.—Pinadayag 7:4, 9; Buhat 17:31.

 9. (a) Sa unsang paagi gihubit ni Juan ang hinimayang Jesu-Kristo taliwala sa mga tangkawan nga bulawan? (b) Unsay buot ipasabot sa samag-templo nga kahimtang ug besti ni Jesus? (c) Unsay gisimbolohan sa iyang bakos nga bulawan?

⁹ Si Juan milingi sa dihang nakadungog sa dakong tingog, ug kini ang iyang nakita: “Ako miliso aron sa pagtan-aw sa nakigsulti kanako, ug, sa akong pagliso, may nakita akong pito ka tangkawan nga bulawan.” (Pinadayag 1:12) Sa ulahi, nasabtan ni Juan kon unsay gisimbolohan niining pito ka tangkawan. Apan napukaw ang iyang pagtagad sa persona nga anaa sa taliwala sa mga tangkawan. Didto “taliwala sa mga tangkawan dihay usa nga sama sa anak sa tawo, nga nagsul-ob ug besti hangtod sa tiil, ug nagbakos sa dughan ug bakos nga bulawan.” (Pinadayag 1:13) Si Jesus, nga “anak sa tawo,” dinhi nagpresentar sa iyang kaugalingon ingong mahimayaon ug naggilak-gilak nga persona sa atubangan sa nalisang nga saksi nga si Juan. Siya nagpakita sa makasulaw nga himaya taliwala sa nagdilaab nga mga tangkawan nga bulawan. Kining samag-templo nga kahimtang nagpasiugda kang Juan sa kamatuoran nga si Jesus presente ingong ang dakong Hataas nga Saserdote ni Jehova, nga may mga gahom sa paghukom. (Hebreohanon 4:14; 7:21-25) Ang iyang taas, matahom nga besti angay sa iyang katungdanan ingong saserdote. Sama sa Hudiyohanong hataas nga mga saserdote sa karaan, siya nagsul-ob ug bakos—bakos nga bulawan diha sa iyang dughan nga nagtabon sa iyang kasingkasing. Kini nagsimbolo nga iyang tumanon sa bug-os kasingkasing ang balaang sugo nga iyang nadawat gikan kang Jehova nga Diyos.—Exodo 28:8, 30; Hebreohanon 8:1, 2.

10. (a) Unsay gisimbolohan sa samag-niyebe ka puti nga buhok ni Jesus ug sa iyang nagdilaab nga mga mata? (b) Unsay kahulogan sa mga tiil ni Jesus nga sama sa nagsiga nga tumbaga?

¹⁰ Ang paghubit ni Juan nagpadayon: “Dugang pa, ang iyang ulo ug ang iyang buhok maputi ingon sa maputing balhibo sa karnero, ingon sa niyebe, ug ang iyang mga mata ingon sa nagdilaab nga kalayo.” (Pinadayag 1:14) Ang iyang samag-niyebe ka puti nga buhok nagsimbolo sa kaalam tungod sa gitas-on sa kinabuhi. (Itandi ang Proverbio 16:31.) Ug ang iyang nagdilaab nga mga mata nagpakita nga siya igmat, alisto, samtang siya nagsusi, nagsulay, o nagpahayag ug kasuko. Bisan ang mga tiil ni Jesus nakapukaw sa pagtagad ni Juan: “Ug ang iyang mga tiil sama sa dalisay nga tumbaga sa dihang kini nagsiga diha sa hudno; ug ang iyang tingog ingon sa dinaganas sa daghang katubigan.” (Pinadayag 1:15) Sa panan-awon, ang mga tiil ni Jesus sama sa tumbaga, nga nagsiga—nga angay alang sa usa nga naglakaw nga madasigon ug may maayong baroganan sa presensiya ni Jehova nga Diyos. Dugang pa, samtang ang balaang butang diha sa Bibliya sagad gihulagway ingong bulawan, sa ingon ang mga butang nga tawhanon usahay gihulagway ingong tumbaga.c Busa, ang nagsiga nga mga tiil ni Jesus nga samag dalisay nga tumbaga nagpahinumdom kanato kon unsa “katahom” ang iyang mga tiil sa naglakaw pa siya sa yuta nga nagmantala sa maayong balita.—Isaias 52:7; Roma 10:15.

11. (a) Unsay gipahinumdom kanato sa mahimayaong mga tiil ni Jesus? (b) Unsay buot ipasabot sa kamatuoran nga ang tingog ni Jesus “ingon sa dinaganas sa daghang katubigan”?

¹¹ Sa pagkamatuod, ingong hingpit nga tawo, si Jesus nagadan-ag nga maoy kinaiyahan sa mga manulonda ug sa mga tawo. (Juan 1:14) Ang iyang mahimayaong mga tiil nagpahinumdom usab kanato nga siya naglakat sa balaang yuta sa organisasyon ni Jehova, diin siya ang Hataas nga Saserdote. (Itandi ang Exodo 3:5.) Dugang pa, ang iyang tingog kusog nga nagdaguhob samag dako, nagbusagak nga busay. Kini madanihon, makapataha, nga angay gayod alang sa usa nga gitawag nga Pulong sa Diyos, ang usa nga miabot sa ‘paghukom sa gipuy-ang yuta subay sa pagkamatarong.’—Buhat 17:31; Juan 1:1.

12. Unsay kahulogan sa “mahait, taas nga espadang duhay-sulab”?

¹² “Ug dihay pito ka bituon sa iyang tuong kamot, ug gikan sa iyang baba nagagula ang usa ka mahait, taas nga espadang duhay-sulab, ug ang iyang panagway ingon sa adlaw sa dihang kini mosidlak sa bug-os nga gahom niini. Ug sa dihang nakita ko siya, ako natumba nga daw patay diha sa iyang tiilan.” (Pinadayag 1:16, 17a) Gipatin-aw ni Jesus mismo sa ulahi ang kahulogan sa pito ka bituon. Apan matikdi kon unsa ang nagagula sa iyang baba: “usa ka mahait, taas nga espadang duhay-sulab.” Pagkahaom niini nga paghulagway! Kay si Jesus mao ang usa nga gitudlo sa pagpahamtang sa kataposang mga paghukom ni Jehova batok sa Iyang mga kaaway. Ang mahukmanong mga pulong gikan sa iyang baba moresulta ug kalaglagan sa tanang daotan.—Pinadayag 19:13, 15.

13. (a) Unsay gipahinumdom kanato sa hayag, nagasidlak nga panagway ni Jesus? (b) Unsang bug-os nga impresyon ang atong makuha sa paghubit ni Juan bahin kang Jesus?

¹³ Ang hayag, nagasidlak nga panagway ni Jesus nagpahinumdom kanato sa nawong ni Moises nga misidlak human makigsulti kaniya si Jehova sa Bukid sa Sinai. (Exodo 34:29, 30) Hinumdomi, usab, nga sa dihang nausab ang dagway ni Jesus sa atubangan sa tulo sa iyang mga apostoles halos 2,000 ka tuig kanhi, “misidlak ang iyang nawong ingon sa adlaw ug ang iyang panggawas nga mga besti migilaw ingon sa kahayag.” (Mateo 17:2) Karon, diha sa samag-panan-awon nga larawan ni Jesus panahon sa adlaw sa Ginoo, ang iyang nawong nagpabanaag usab ug samang masidlakong katahom sa usa nga anaa sa presensiya ni Jehova. (2 Corinto 3:18) Sa pagkamatuod, ang bug-os nga impresyon nga gipakita sa panan-awon ni Juan maoy usa ka larawan sa masidlakong himaya. Gikan sa buhok nga sama ka puti sa niyebe, sa nagdilaab nga mga mata, ug sa nagsidlak nga nawong ngadto sa nagsiga nga mga tiil, usa gayod kini sa kinalabwan sa tanang panan-awon sa Usa nga nagpuyo karon sa ‘dili-maduol nga kahayag.’ (1 Timoteo 6:16) Tinuod ug buhi kaayo kini nga talan-awon! Unsay reaksiyon sa nalisang nga Juan? Ang apostol nagsugid kanato: “Ug sa dihang nakita ko siya, ako natumba nga daw patay diha sa iyang mga tiilan.”—Pinadayag 1:17.

14. Unsa ang angay natong reaksiyon sa dihang magbasa sa panan-awon ni Juan bahin sa hinimayang Jesus?

¹⁴ Karon, ang katawhan sa Diyos kinasingkasing nga nagpabili sa mabulokon, detalyadong paghubit sa panan-awon ni Juan. Oo, nalabang na nato ang kapin sa 90 ka tuig sa adlaw sa Ginoo, diin niining panahona ang panan-awon nagpadayon paingon sa kulbahinam nga katumanan niini. Alang kanato, ang pagmando ni Jesus sa Gingharian maoy usa ka buhi nga kamatuoran karon, dili usa ka umaabot nga paglaom. Busa, angayan lang ingong maunongong mga sakop sa Gingharian nga kita magpadayon sa paglantaw pa sa unahan nga matahaon sa gihubit ni Juan niining una nga panan-awon ug sa pagpamati nga masinugtanon sa mga pulong sa hinimayang Jesu-Kristo.

[Mga footnote]

[Mga hulagway sa panid 23]

Ang arkeolohikal nga mga kabilin sa mga siyudad nga nahimutangan sa pito ka kongregasyon nagpamatuod sa rekord sa Bibliya. Dinhi nadawat sa unang-siglong mga Kristohanon ang makapalig-ong mga mensahe ni Jesus nga nagpadasig sa tibuok-kalibotan nga kongregasyon

PERGAMO

SMIRNA

TIATIRA

SARDIS

EFESO

FILADELFIA

LAODICEA