Kapitulo Diyes

Usa ka Gingharian “nga Dili Gayod Malumpag”

 1. Unsang kamatuoran ang gipasiugda sa mga hitabo sa kalibotan latas sa tawhanong kasaysayan?

ANG mga hitabo sa kalibotan kada adlaw nagpasiugda sa kamatuoran nga ang mga tawo wala makakaplag ug kalipay tungod sa pagsalikway sa pagkasoberano ni Jehova ug sa pagpaningkamot sa pagmando sa ilang kaugalingon. Walay usa ka sistema sa tawhanong kagamhanan ang nakahatag ug patas nga mga kaayohan sa katawhan. Bisan tuod ang mga tawo nakamugna sa ilang siyentipikanhong kahibalo sa gilapdong wala pa mahimo sukad, sila wala makabuntog sa sakit o makapukgo sa kamatayon, bisan alang sa usa ka tawo. Ang tawhanong pagmando wala makahanaw sa gubat, kapintasan, krimen, korapsiyon, o kakabos. Ang malupigong mga kagamhanan nagagahom gihapon sa mga tawo sa daghang nasod. (Ecclesiastes 8:9) Ang teknolohiya, kahakog, ug kaignorante duyog nga naghugaw sa yuta, tubig, ug hangin. Ang dili-maayong pagdumala sa mga opisyales sa ekonomiya nakapalisod sa daghang tawo sa pagbaton sa mga kinahanglanon sa kinabuhi. Ang linibong katuigan sa tawhanong pagmando nagpadayag niining kamatuoran: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.”​—Jeremias 10:23.

 2. Unsa ang bugtong sulbad sa mga suliran sa katawhan?

² Unsa ang sulbad? Ang Gingharian sa Diyos, nga maoy gitudlo ni Jesus nga iampo sa iyang mga sumusunod: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:​9, 10) Ang langitnong Gingharian sa Diyos gihubit sa 2 Pedro 3:13 ingon nga “bag-ong mga langit,” nga magmando ibabaw sa “bag-ong yuta,” nga mao, ang matarong tawhanong katilingban. Hinungdanon kaayo ang langitnong Gingharian sa Diyos nga gihimo kini ni Jesus nga sentro sa iyang pagsangyaw. (Mateo 4:17) Gipakita niya ang angayng dapit niini diha sa atong mga kinabuhi, nga nag-awhag: “Magpadayon sa pagpangita pag-una sa gingharian ug sa iyang pagkamatarong.”​—Mateo 6:33.

 3. Nganong ang pagkakat-on bahin sa Gingharian sa Diyos dinalian kaayo karon?

³ Ang pagkakat-on bahin sa Gingharian sa Diyos dinalian kaayo karon, kay sa dili madugay kana nga Gingharian magbag-o sa walay kataposan sa pagmando niining yutaa. Ang Daniel 2:44 nagtagna: “Sa mga adlaw nianang mga haria [mga kagamhanan nga nagamando karon] ang Diyos sa langit magatukod ug usa ka gingharian [sa langit] nga dili gayod malumpag. Ug ang maong gingharian dili igapasa ngadto sa lain nga katawhan [ang mga tawo dili na gayod magmando sa yuta pag-usab]. Kini magadugmok ug magatapos niining tanang gingharian [karon], ug kini mobarog hangtod sa panahong walay tino.” Sa ingon, taposon sa Gingharian kining kataposang mga adlaw pinaagi sa paglaglag niining tibuok daotang sistema sa mga butang. Ang pagmando sa yuta pinaagi sa langitnong Gingharian dili na unya malalis. Mapasalamaton gayod kita nga ang kahupayan nga dad-on niini haduol na gayod kaayo!

 4. Maylabot sa Gingharian, unsay nahitabo sa langit sa 1914, ug nganong kana hinungdanon kanato?

⁴ Sa 1914, si Kristo Jesus gientrono nga Hari ug gisangonan nga ‘magapangdaog taliwala sa iyang mga kaaway.’ (Salmo 110:​1, 2) Nianang tuiga usab, ang “kataposang mga adlaw” niining presenteng daotang sistema sa mga butang nagsugod. (2 Timoteo 3:1-5, 13) Sa samang panahon, ang mga hitabo nga nakita ni Daniel diha sa matagnaong panan-awon aktuwal nga nahitabo sa langit. Ang “Karaan sa mga Adlaw,” si Jehova nga Diyos, nagtugyan ngadto sa Anak sa tawo, si Jesu-Kristo, sa “pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.” Sa pagtaho bahin niini nga panan-awon, si Daniel misulat: “Ang iyang pagmando maoy usa ka pagmando nga mohangtod sa panahong walay tino nga dili mahanaw, ug ang iyang gingharian dili magun-ob.” (Daniel 7:​13, 14) Maoy pinaagi niining langitnong Gingharian diha sa mga kamot ni Kristo Jesus nga ipahigayon sa Diyos nga ang mga mahigugmaon sa pagkamatarong makapahimulos sa dili-maisip nga maayong mga butang nga maoy iyang katuyoan sa dihang gibutang niya ang atong unang tawhanong mga ginikanan sa Paraiso.

 5. Unsang mga detalye bahin sa Gingharian ang makapaikag kaayo kanato, ug ngano?

⁵ Mao bay atong tinguha nga mahimong maunongong sakop sa Gingharian? Kon mao, ikaw dulot nga maikag sa gambalay ug kalihokan niining langitnong kagamhanan. Ikaw gustong mahibalo sa ginabuhat niini karon, sa palamposon niini sa umaabot, ug sa gikinahanglan niini kanimo. Samtang susihon nimog maayo ang bahin sa Gingharian, ang imong pagpabili niini motubo gayod. Kon ikaw mosanong sa pagmando niini, ikaw masangkapag maayo sa pagsulti sa uban bahin sa kahibulongang mga butang nga buhaton sa Gingharian sa Diyos alang sa masinugtanong katawhan.​—Salmo 48:​12, 13.

Ang mga Magmamando sa Gingharian sa Diyos

 6. (a) Giunsa pagpakita sa Kasulatan kon kansang pagkasoberano ang gipadayag sa Mesiyanikong Gingharian? (b) Sa unsang paagi maapektohan kita sa atong makat-onan bahin sa Gingharian?

⁶ Usa sa unang mga butang nga ibutyag sa maong pagsusi mao nga kining Mesiyanikong Gingharian maoy ekspresyon sa pagkasoberano ni Jehova mismo. Si Jehova ang naghatag sa “pagmando ug dignidad ug gingharian” ngadto sa iyang Anak. Human sa paghatag ug gahom sa Anak sa Diyos aron mosugod pagmando ingong Hari, ang mga tingog sa langit tukmang nagpahayag: “Ang gingharian sa kalibotan nahimo nang gingharian sa atong Ginoo [Jehova nga Diyos] ug sa iyang Kristo, ug siya [Jehova] magamando ingong hari hangtod sa kahangtoran.” (Pinadayag 11:15) Busa ang tanang butang nga atong masayran bahin niini nga Gingharian ug sa malampos niini mas makapasuod nato kang Jehova. Ang atong makat-onan angayng magpalalom sa atong tinguha nga magpasakop sa iyang pagkasoberano hangtod sa kahangtoran.

 7. Nganong makapaikag gayod kanato nga si Jesu-Kristo mao ang Luyoluyong Magmamando ni Jehova?

⁷ Matikdi usab ang kamatuoran nga gipalingkod ni Jehova si Jesu-Kristo diha sa trono ingon nga iyang Luyoluyong Magmamando. Ingong Batid nga Magbubuhat nga gigamit sa Diyos sa pagbuhat sa yuta ug sa mga tawo, si Jesus mas nahibalo sa atong mga panginahanglan kay ni bisan kinsa kanato. Dugang pa, gikan sa sinugdan sa tawhanong kasaysayan, gipakita niya ang iyang ‘kahimuot sa mga anak sa mga tawo.’ (Proverbio 8:​30, 31; Colosas 1:15-17) Dako gayod ang iyang gugma sa mga tawo nga personal siyang mianhi sa yuta ug mihatag sa iyang kinabuhi ingon nga lukat alang kanato. (Juan 3:16) Busa gitagana niya kanato ang paagi sa pagpagawas gikan sa sala ug kamatayon ug ang kahigayonan sa kinabuhing dayon.​—Mateo 20:28.

 8. (a) Dili sama sa tawhanong mga magmamando, nganong molungtad man ang kagamhanan sa Diyos? (b) Unsay relasyon sa “matinumanon ug maalamong ulipon” sa langitnong kagamhanan?

⁸ Ang Gingharian sa Diyos maoy malig-on, malungtarong kagamhanan. Ang malungtarong hiyas niini gipasalig diha sa kamatuoran nga si Jehova mismo walay kamatayon. (Habacuc 1:12) Dili sama sa tawhanong mga hari, si Jesu-Kristo, ang gitugyanan sa Diyos sa pagkahari, dili-mamatay usab. (Roma 6:9; 1 Timoteo 6:​15, 16) Mahiuban kang Kristo sa langitnong mga trono mao ang 144,000 nga uban pa, nga matinumanong mga alagad sa Diyos gikan sa “matag tribo ug pinulongan ug katawhan ug nasod.” Hatagan usab silag dili-mamatay nga kinabuhi. (Pinadayag 5:​9, 10; 14:1-4; 1 Corinto 15:42-44, 53) Ang kadaghanan kanila atua na sa mga langit, ug ang nanghibilin kanila nga ania pa sa yuta maoy naglangkob sa presenteng-adlaw nga “matinumanon ug maalamong ulipon,” nga maunongong nagapauswag sa intereses sa maong Gingharian dinhi.​—Mateo 24:45-47.

9, 10. (a) Unsang mabahinbahinon, makadaot nga mga impluwensiya ang hanawon sa Gingharian? (b) Kon kita dili buot mahimong mga kaaway sa Gingharian sa Diyos, unsang mga kalangkitan ang angay natong likayan?

⁹ Sa dili na madugay, sa iyang tinudlong panahon, ipadala ni Jehova ang iyang mopatay nga mga puwersa aron sa paghinlo sa yuta. Ilang laglagon sa bug-os ang mga tawo nga tinuyong modumili sa pag-ila sa iyang pagkasoberano ug mobiaybiay sa mahigugmaong mga tagana nga iyang gihimo pinaagi ni Jesu-Kristo. (2 Tesalonica 1:6-9) Mao unya kana ang adlaw ni Jehova, ang dugay nang gipaabot nga panahon sa iyang kabayawan ingong Soberano sa Uniberso. “Tan-awa! Ang adlaw ni Jehova nagsingabot, mapintas uban sa mabangis nga kasuko ug sa nagsilaob nga kasuko, . . . aron laglagon ang mga makasasala sa yuta gikan niini.” (Isaias 13:9) “Kanang adlawa maoy usa ka adlaw sa mabangis nga kasuko, usa ka adlaw sa kasakitan ug kagul-anan, usa ka adlaw sa bagyo ug sa kagun-oban, usa ka adlaw sa kangitngit ug kangiob, usa ka adlaw sa panganod ug sa mabagang kangiob.”​—Sofonias 1:15.

¹⁰ Ang tanang bakak nga relihiyon ug tanang tawhanong kagamhanan ug ilang mga kasundalohan, nga gimaniobra sa dili makitang daotang magmamando niining kalibotana, pagalaglagon sa bug-os. Ang tanang makig-abyan niining kalibotana pinaagi sa pagpangagpas sa nasentro sa kaugalingon, malimbongon, imoral nga paagi sa kinabuhi pagalaglagon. Si Satanas ug ang iyang mga demonyo dili na makakontak sa mga molupyo sa yuta, nga gitanggong sa kahiladman sa usa ka libo ka tuig. Sa ingon ang Gingharian sa Diyos bug-os nang makakontrolar sa tanang kalihokan sa yuta. Pagkadakong kahupayan unya niana alang sa tanang nahigugma sa pagkamatarong!​—Pinadayag 18:​21, 24; 19:11-16, 19-21; 20:​1, 2.

Ang mga Tumong sa Gingharian—Kon sa Unsang Paagi Makab-ot

11. (a) Sa unsang paagi ang Mesiyanikong Gingharian magpalampos sa katuyoan ni Jehova alang sa yuta? (b) Unsay mahimong kahulogan sa pagmando sa Gingharian alang sa mga tawong magkinabuhi unya sa yuta?

¹¹ Ang Mesiyanikong Gingharian bug-os nga magpalampos sa orihinal nga katuyoan sa Diyos alang sa yuta. (Genesis 1:28; 2:​8, 9, 15) Hangtod karon, ang tawo napakyas sa pagsuportar sa maong katuyoan. Hinuon, “ang puloy-anang yuta sa umaabot” ipailalom sa Anak sa tawo, si Jesu-Kristo. Ang tanang makalabang-buhi sa pagpakanaog sa paghukom ni Jehova niining daang sistema molihok nga nahiusa ilalom kang Kristo nga Hari, nga malipayong mobuhat sa bisan unsay iyang ipabuhat, aron ang yuta mahimong usa ka tibuok yutang paraiso. (Hebreohanon 2:5-9) Ang tanang tawo mahimuot sa buhat sa ilang mga kamot ug makapahimulos sa bug-os sa dagayang abot sa yuta.​—Salmo 72:​1, 7, 8, 16-19; Isaias 65:​21, 22.

12. Sa unsang paagi ang kahingpitan sa hunahuna ug lawas makab-ot alang sa mga ginsakpan sa Gingharian?

¹² Sa paglalang kang Adan ug Eva, sila hingpit, ug maoy katuyoan sa Diyos nga ang yuta mapuno sa ilang mga anak, nga ang tanan magtagamtam sa kahingpitan sa hunahuna ug lawas. Kana nga katuyoan modangat sa mahimayaong katumanan ilalom sa pagmando sa Gingharian. Kini nagkinahanglan sa pagtangtang sa tanang epekto sa sala, ug sa maong tumong, si Kristo mag-alagad dili lamang ingong Hari kondili ingong Hataas nga Saserdote usab. Sa kamapailobon, tabangan niya ang iyang masinugtanong mga ginsakpan nga makapahimulos sa nagatabon-sa-sala nga bili sa halad sa iyang tawhanong kinabuhi.

13. Unsang pisikal nga mga kaayohan ang matagamtam ilalom sa pagmando sa Gingharian?

¹³ Ilalom sa pagmando sa Gingharian, ang mga molupyo sa yuta makatagamtam sa kahibulongang pisikal nga mga kaayohan. “Nianang panahona ang mga mata sa mga buta mabuka, ug ang igdulungog sa mga bungol mabuksan. Nianang panahona ang bakol mosaka ingon sa laking osa, ug ang dila sa amang mosinggit sa kasadya.” (Isaias 35:​5, 6) Ang nangunot nga kaunoran tungod sa edad o sakit mahimong mas lunhaw kay sa iya sa usa ka bata, ug ang naglaygay nga mga kaluyahon pulihan sa kahimsog sa panglawas. “Mabag-o ang iyang unod labi pa kay sa pagkabatan-on; mahibalik siya sa mga adlaw sa kabaskog sa iyang pagkabatan-on.” (Job 33:25) Moabot ang adlaw nga wala nay tawo nga dunay rason sa pag-ingon, “Ako masakiton.” Ngano? Kay ang mahinadlokon sa Diyos nga mga tawo pagawson na sa kabug-at sa sala ug sa makaguol nga mga epekto niini. (Isaias 33:24; Lucas 13:11-13) Oo, “pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”​—Pinadayag 21:4.

14. Unsay nalangkit sa pagkab-ot sa tawhanong kahingpitan?

¹⁴ Hinuon, ang pagkab-ot sa kahingpitan naglangkit ug labaw pa kay sa pagbaton lamang ug hingpit nga lawas ug hunahuna. Naglakip kini sa hustong pagbanaag sa mga hiyas ni Jehova, kay kita gilalang ‘sa larawan sa Diyos, sumala sa iyang dagway.’ (Genesis 1:26) Aron makab-ot kana, dakong edukasyon ang gikinahanglan. Sa bag-ong kalibotan, “magpuyo ang pagkamatarong.” Busa, sumala sa gitagna ni Isaias, “ang pagkamatarong mao gayod ang makat-onan sa mga molupyo sa mabungahong yuta.” (2 Pedro 3:13; Isaias 26:9) Kining hiyasa mosangpot sa kalinaw​—tali sa mga tawo sa tanang rasa, sa suod nga mga kauban, sa pamilya sa usa ka tawo ug, labaw sa tanan, uban sa Diyos mismo. (Salmo 85:10-13; Isaias 32:17) Kadtong makakat-on sa pagkamatarong edukahon sa mauswagong paagi bahin sa kabubut-on sa Diyos alang kanila. Sa dihang matisok na diha sa ilang mga kasingkasing ang gugma alang kang Jehova, ilang sundon ang iyang mga dalan diha sa tanang bahin sa ilang kinabuhi. Sila makahimo na sa pagsulti sama sa gisulti ni Jesus, ‘Ginabuhat ko kanunay ang mga butang nga makapahimuot sa akong Amahan.’ (Juan 8:29) Pagkamakapalipay unya sa kinabuhi sa dihang maingon na unya niana ang tanang katawhan!

Mga Kalamposan nga Nadayag Na

15. Sa paggamit sa mga pangutana niining parapoha, ipasiugda ang mga kalamposan sa Gingharian ug ipakita kon unsay angay natong himoon karon.

¹⁵ Ang dalayegong mga kalamposan sa Gingharian sa Diyos ug sa mga ginsakpan niini maoy dayag. Ang mosunod nga mga pangutana ug mga kasulatan magpahinumdom kanimo sa pipila niining mga kalamposan, maingon man sa mga butang nga mahimo ug angayng himoon karon sa tanang ginsakpan sa Gingharian.

Batok kang kinsa unang milihok ang Gingharian, ug uban sa unsang sangpotanan? (Pinadayag 12:7-10, 12)

Unsang grupoha ang gihatagag pagtagad aron matigom ang nanghibiling mga membro niini sukad nga gientrono si Kristo? (Pinadayag 14:1-3)

Unsang buluhatona ang gitagna ni Jesus nga iyang buhaton human sa pagsilaob sa dakong kasakitan, sumala sa gitala sa Mateo 25:31-33?

Unsang pasiunang buluhaton ang ginapalampos karong adlawa? Kinsay nagapakigbahin niini? (Salmo 110:3; Mateo 24:14; Pinadayag 14:​6, 7)

Nganong ang politikanhon ug relihiyosong mga magsusupak wala makapahunong sa buluhatong pagsangyaw? (Zacarias 4:6; Buhat 5:​38, 39)

Unsang mga kausaban ang nagakahitabo sa mga kinabuhi niadtong magpasakop sa pagmando sa Gingharian? (Isaias 2:4; 1 Corinto 6:9-11)

Ang Gingharian sa Usa ka Libo ka Tuig

16. (a) Unsa ka dugay nga si Kristo magmando? (b) Unsang kahibulongang mga butang ang pagabuhaton sulod sa maong panahon ug human niana?

¹⁶ Human sa pagtambog kang Satanas ug sa iyang mga demonyo sa kahiladman, si Jesu-Kristo ug ang iyang 144,000 nga kaubang mga manununod magmando ingong mga hari ug mga saserdote sa usa ka libo ka tuig. (Pinadayag 20:6) Sulod nianang panahona, ang katawhan mamahingpit, diin ang sala ug Adanhong kamatayon mahanaw na sa bug-os. Sa kataposan sa Usa ka Libo ka Tuig nga Pagmando, kay malamposong nakatuman sa iyang asaynment ingong Mesiyanikong Hari-Saserdote, si Jesus ‘magtugyan sa gingharian’ ngadto sa iyang Amahan, “aron ang Diyos mahimong tanang butang ngadto sa tanan.” (1 Corinto 15:24-28) Nianang higayona, si Satanas buhian makadiyot aron sulayan ang nalukat nga katawhan maylabot sa ilang pagpaluyo sa unibersohanong pagkasoberano ni Jehova. Human mabug-os ang maong kataposang pagsulay, laglagon ni Jehova si Satanas ug ang mga rebelde nga modapig kaniya. (Pinadayag 20:7-10) Kadtong naglaban sa pagkasoberano ni Jehova​—sa iyang katungod sa pagmando—​makapasundayag na unya sa bug-os sa ilang dili-matarog nga pagkamaunongon. Sila makadangat unya sa ilang nahiangayng relasyon kang Jehova, kay iyang dawaton sila ingong iyang mga anak nga lalaki ug babaye, nga inuyonan sa Diyos alang sa walay kataposang kinabuhi.​—Roma 8:21.

17. (a) Unsay mahitabo sa Gingharian sa kataposan sa usa ka libo ka tuig? (b) Sa unsang diwa tinuod nga ang Gingharian “dili gayod malumpag”?

¹⁷ Busa, ang papel ni Jesus ug sa 144,000 maylabot sa yuta mausab. Unsa unya ang ilang umaabot nga buluhaton? Ang Bibliya wala magsulti. Apan kon kita matinumanong maglaban sa pagkasoberano ni Jehova, kita unya mabuhi sa kataposan sa Usa ka Libo ka Tuig nga Pagmando aron atong masusi ang katuyoan ni Jehova alang kanila ug sa iyang kahibulongang uniberso. Bisan pa niana, ang usa ka libo ka tuig nga pagmando ni Kristo “mohangtod sa panahong walay tino” ug ang iyang Gingharian “dili magun-ob.” (Daniel 7:14) Sa unsang diwa? Sa usa ka paagi, ang awtoridad sa pagmando dili mahipasa ngadto sa ubang mga kamot nga dunay laing mga tumong, kay si Jehova mao unya ang Magmamando. Ug ang Gingharian “dili gayod malumpag” kay ang mga kalamposan niini molungtad hangtod sa kahangtoran. (Daniel 2:44) Ug ang Mesiyanikong Hari-Saserdote ug iyang kaubang mga hari-saserdote pasidunggan hangtod sa kahangtoran tungod sa ilang matinumanong pag-alagad kang Jehova.

Repasong Panaghisgot

• Nganong ang Gingharian sa Diyos mao ang bugtong sulbad sa mga suliran sa katawhan? Kanus-a nagsugod pagmando ang Hari sa Gingharian sa Diyos?

• Unsay ilabinang nakapadani kanimo bahin sa Gingharian sa Diyos ug unsay malampos niini?

• Unsang mga kalamposan sa Gingharian ang ato nang nakita, ug unsay atong bahin niini?

[Hulagway sa panid 92, 93]

Ilalom sa Gingharian sa Diyos, ang tanang tawo makakat-on sa pagkamatarong