Kaluwasan sa Pagpadayag ni Jesu-Kristo
“Magpadayon kamo sa pagmaya . . . aron kamo managmaya ug managsadya panahon sa pagpadayag sa iyang himaya.”—1 PEDRO 4:13.
1. Giunsa pagpadato ni Jehova ang iyang mga alagad?
SI Jehova nagpadato sa iyang mga Saksi pinaagig daghang mga gasa. Ingong atong Dakong Instruktor, kita gilamdagan niya pinaagi sa bug-os nga kahibalo sa iyang kabubut-on ug katuyoan. Pinaagi sa iyang balaang espiritu, siya nag-ugmad diha kanato sa katakos sa pagpadan-ag nga maisogon sa kahayag. Ang dinasig nga si apostol Pablo nagsulti kanato diha sa 1 Corinto 1:6, 7: “Ang pamatuod mahitungod kang Kristo gilig-on sa inyong taliwala, mao nga wala kamo hikabsi sa bisan unsang gasa, samtang maikagon kamong nagpaabot sa pagpadayag sa atong Ginoong Jesu-Kristo.”
2. Unsang makalipayng mga palaaboton ang gitanyag sa “pagpadayag sa atong Ginoong Jesu-Kristo”?
2 “Pagpadayag sa atong Ginoong Jesu-Kristo”—unsay kahulogan niana? Kini nagtumong sa panahon sa diha nga igapadayag si Jesus ingong mahimayaong Hari, nga molihok na aron gantihan ang matinumanon niyang mga sumusunod ug ipatuman ang panimalos diha sa mga dili-diyosnon. Sumala sa gipaila sa 1 Pedro 4:13, kini unya maoy usa ka panahon nga ang naghupot-sa-integridad dinihogan-sa-espiritung mga Kristohanon ug ang ilang maunongong mga kauban nga sakop sa dakong panon “magmaya ug magsadya,” kay magpaila kana sa kataposan sa sistema sa mga butang ni Satanas.
3. Sa unsang paagi kinahanglan kitang mobarog nga malig-on, sama sa atong mga igsoon sa Tesalonica?
3 Samtang nagkahiduol kanang panahona, tungod sa iyang kasuko ang pagpiit ni Satanas kanato modako. Samag nagangulob nga leyon, mosulay siya sa pagtukob kanato. Kinahanglang mobarog kita nga malig-on! (1 Pedro 5:8-10) Ang atong mga igsoon sa karaang Tesalonica, sa bag-o pa sa kamatuoran, nakaagom ug mga kasakitan nga kaamgid niadtong nasinati sa daghang mga Saksi ni Jehova karong adlawa. Busa, ang mga pulong ni apostol Pablo ngadto kanila makahuloganon kaayo alang kanato. Misulat siya: “Matarong sa bahin sa Diyos ang pagbalos ug kasakitan ngadto niadtong nagasakit kaninyo, apan, alang kaninyo nga nagaantos sa kasakitan, kahupayan kauban namo sa pagpadayag ni Ginoong Jesus gikan sa langit uban sa iyang gamhanang mga manulonda diha sa nagdilaab nga kalayo, samtang siya magapanimalos niadtong wala makaila sa Diyos ug niadtong wala magasugot sa maayong balita mahitungod sa atong Ginoong Jesus.” (2 Tesalonica 1:6-8) Oo, ang kahupayan moabot!
4. Nganong ang klero angay sa paghukom nga ipatuman sa pagpadayag ni Jesus?
4 Sa panahon ni Pablo ang kinadak-ang bahin sa kasakitan gipahinabo sa Hudiyong relihiyosong mga pangulo. Susama karong adlawa, ang pagbatok sa mahigugmaog-kalinaw nga mga Saksi ni Jehova sagad gisibahan niadtong nagaangkong hawas sa Diyos, ilabina ang klero sa Kakristiyanohan. Kini sila nagpakaaron-ingnong nakaila sa Diyos, apan sila nagsalikway sa “usa ka Jehova” sa Bibliya, nga gipulihan siya sa misteryosong Trinidad. (Marcos 12:29) Sila wala magmasinugtanon sa maayong balita mahitungod sa atong Ginoong Jesus, kay nagasalig sa pagmando-sa-tawo alang sa kahupayan ug nagasalikway sa maayong balita sa umaabot nga Gingharian ni Kristo nga may pagkamatarong. Kining tanang relihiyosong mga magsusupak mangalaglag panahon sa “pagpadayag ni Ginoong Jesus gikan sa langit”!
Ang “Pag-anhi” ni Jesu-Kristo
5. Sa unsang paagi ang pagpadayag ni Jesus tin-awng gihulagway sa Mateo 24:29, 30?
5 Kanang pagpadayaga tin-awng gihulagway ni Jesus sa Mateo 24:29, 30. Sa pagbatbat sa lainlaing mga bahin sa ilhanan sa iyang presensiya ug sa konklusyon sa sistema sa mga butang, siya nag-ingon: “Ang adlaw mongitngit, ug ang bulan dili mohatag sa iyang kahayag, ug ang mga bituon mangatagak gikan sa langit, ug pagauyogon ang mga gahom sa kalangitan.” Sa maong panahon “ang ilhanan sa Anak sa tawo motungha sa langit.” Ang mga nasod sa yuta “mamukpok sa ilang dughan sa kaguol, ug ilang makita ang Anak sa tawo [Mesiyasnong Hari sa Diyos] nga moanhi diha sa mga panganod sa langit uban ang gahom ug dakong himaya.” Ang maong “pag-anhi,” er·khoʹme·non sa Grego, nagatumong sa pagpatim-aw ni Jesus ingong Tigbayaw ni Jehova.
6, 7. Sa unsang paagi “ang tanang mata makakita kaniya,” ug kinsay naapil niini?
6 Ang maong “pag-anhi” gibatbat usab ni apostol Juan sa Pinadayag 1:7, diin siya nag-ingon: “Tan-awa! Siya moanhi uban sa mga panganod.” Ah, kanang mga kaaway dili aktuwal makakita kang Jesus pinaagig literal nga mga mata, kay “ang mga panganod” nagpasabot nga siya moanhi nga dili makita aron ipatuman ang paghukom. Kon ang mga tawo makakita sa iyang langitnong himaya pinaagi sa mata nga hubo, sila mabuta, sama nga si Saulo, sa dalan paingon sa Damasco, nabuta sa dihang ang hinimayang Jesus nagpakita kaniya diha sa kusog nga kasanag.—Buhat 9:3-8; 22:6-11.
7 Ang asoy sa Pinadayag nag-ingon nga “ang tanang mata makakita kaniya, ug kadtong nagduslak kaniya; ug ang tanang banay sa yuta mamukpok sa ilang mga dughan sa kaguol tungod kaniya.” Kini nagkahulogan nga ang mga magsusupak sa yuta makaila sa kalaglagan nga ipaulan ni Jesus diha kanila nga siya miabot nang gamhanan ug may dakong himaya ingong Tiglaglag ni Jehova. Nganong ang maong mga kaaway gibatbat ingong “kadtong nagduslak kaniya”? Tungod kay ang ilang mayugtanong tinamdan ngadto sa mga alagad ni Jehova karong adlawa maoy sama sa iya sa mga maglulutos ni Jesus. Sa pagkatinuod, sila ‘mamukpok sa ilang mga dughan nga mayugtanon sa kaguol tungod kaniya.’
8. Unsang pasidaan ang gipahayag ni Jesus ug Pablo mahitungod sa kalit nga kalaglagan?
8 Sa unsang paagi moabot kanang adlaw sa panimalos ni Jehova? Sa tagna sa Lucas kapitulo 21, gibatbat ni Jesus ang malaglagong mga panghitabo nga nagsilbing ilhanan sa iyang presensiya sukad sa 1914. Unya, sa mga bersikulo 34 ug 35, si Jesus nagpasidaan: “Bantayi ninyo ang inyong kaugalingon nga ang inyong mga kasingkasing dili mabug-atan sa hinobrang pagkaon ug kusog nga pag-inom ug sa mga kabalaka sa kinabuhi, ug sa kalit kanang adlawa modangat kaninyo ingon sa lit-ag. Kay kana moabot sa tanan nga nagapuyo sa nawong sa tibuok yuta.” Oo, kanang adlaw sa panimalos ni Jehova moabot nga kalit, dihadiha! Si apostol Pablo nagpamatuod niini diha sa 1 Tesalonica 5:2, 3, nga nagaingon: “Ang adlaw ni Jehova sa tukma maoy sama sa kawatan sa kagabhion. Sa dihang sila nagaingon: ‘Pakigdait ug kasegurohan!’ unya ang kalit nga kalaglagan modangat dihadiha kanila.” Bisan karon ang mga nasod nagsabotsabot mahitungod sa pakigdait ug kasegurohan ug nagsugyot sa paglig-on sa Hiniusang Kanasoran aron sa pagbantay sa gubot nga mga dapit pinaagig militaryong puwersa.
9. Alang kang kinsa ang ‘kahayag misidlak,’ ug ngano?
9 Sa bersikulo 4 ug 5, ang apostol nagpadayon sa pagsulti kanato: “Apan, kamo, mga igsoon, kamo wala na sa kangitngit, mao nga kanang adlawa makasakop kaninyo sama sa pagkasakop sa mga kawatan, kay kamong tanan maoy mga anak sa kahayag ug mga anak sa adlaw. Kita dili iya sa kagabhion o sa kangitngit.” Kita nagmaya nga nahimong mga anak sa kahayag—mga tigdala sa kahayag alang sa ubang nangandoy sa matuod nga kalinaw ug kasegurohan diha sa bag-ong kalibotan sa Diyos. Sa Salmo 97:10, 11, atong mabasa: “Oh kamong mga nahigugma kang Jehova, dumti ninyo ang daotan. Siya nagabantay sa mga kalag sa iyang mga maunongon; gikan sa kamot sa mga daotan sila pagaluwason niya. Ang kahayag mismo mikidlap alang sa usang matarong, ug ang pagsadya bisan alang sa mga matul-id ug kasingkasing.”
Sunodsunod nga mga Hitabo
10. Unsang abanteng pahibalo ang kinahanglang atong pamatian mahitungod sa adlaw sa panudya sa Diyos? (Pinadayag 16:15)
10 Unsa unya ang sunodsunod nga mga hitabo inighapak sa dakong kasakitan? Paklion ta ang Pinadayag kapitulo 16. Matikdi, sumala sa gibatbat diha sa mga bersikulo 13 hangtod sa 16, nga ang mahugaw, demonyohanong mga espiritu nagtigom sa mga nasod sa tibuok yuta ngadto sa Har–Magedon, ang gubat sa dakong adlaw sa Diyos nga Labing Gamhanan. Sa makausa pa, ang samag-kawatan nga pagsingabot sa adlaw sa panudya gipasiugda, ug kita gipasidan-an sa pagtukaw—sa pagsul-ob nga padayon sa espirituwal nga biste nga nagtimaan kanato alang sa kaluwasan. Ang panahon miabot na aron sa paghukom sa mga katawhan sa yuta, sa mga nasod, ug—sa lain pa. Kinsa ba kana siya?
11. Sa unsang paagi ang babaye sa Pinadayag 17:5 nagpaila sa iyang kaugalingon?
11 Kini ang masambingayong babaye nga naningkamot gayod nga mahimong inila. Siya ang gibatbat sa Pinadayag 17:5 ingong “usa ka misteryo: ‘Babilonya nga Bantogan, ang inahan sa mga bigaon ug sa dulumtanang mga butang sa yuta.’” Apan siya dili na misteryo alang sa mga Saksi ni Jehova. Tin-aw niyang gipaila ang iyang kaugalingon nga mao ang empiryo sa kalibotan sa bakak nga relihiyon, nga ang Kakristiyanohan maoy dakong bahin. Sa panan-aw ni Jehova maoy dulumtanan ang iyang pag-apil-apil sa mga kahikayang politikanhon, ang iyang “pagkahubog sa dugo sa mga balaan” pinaagi sa paglutos sa matuod nga mga Kristohanon, ug sa iyang pagkamay-tulubagon sa dugo “sa tanang gipatay sa yuta,” apil ang kapig usa ka gatos ka milyong namatay sa mga gubat niini lamang ika-20ng siglo.—Pinadayag 17:2, 6; 18:24.
12. Nganong ang mga sekta sa Kakristiyanohan gihukman sa kalaglagan?
12 Grabe sa tanan, ang mga sekta sa Kakristiyanohan nagdalag kaulawan diha sa ngalan sa Diyos nga sa kasalingkapaw giangkon nila nga mao ang ilang gihawasan. Sila nagtudlo sa Babilonyanhon ug Gresyanhong mga pilosopiya inay sa putling Pulong sa Diyos ug nakaamot sa moral nga kamalapason sa tibuok nga mga nasod pinaagi sa pag-uyon sa matinugotong mga paagi sa pagkinabuhi nga naglapas sa mga prinsipyo sa Bibliya. Ang hakog nga mga negosyante sa ilang taliwala gitunglo sa mga pulong sa Santiago 5:1, 5: “Umari kamo, karon, kamong mga tawong dato, panghilak, paniyabaw tungod sa mga kagul-anan nga taliabot kaninyo. Kamo nagkinabuhing maluho sa yuta ug nangagpas sa unodnong kalipayan. Inyong gipatambok ang inyong mga kasingkasing alang sa adlaw sa ting-ihaw.”
Kalaglagan sa Babilonya nga Bantogan!
13. Sa unsang paagi ang unang salba sa dakong kasakitan moabot, ug unsang pagkadinalian ang gipasiugda sa Pinadayag 18:4, 5?
13 Ang unang salba sa dakong kasakitan moabot diha sa pagpatuman sa hukom ni Jehova sa Babilonya nga Bantogan. Ang Pinadayag 17:15-18 tatawng nagbatbat sa “hunahuna” sa Diyos—sa pagmaneobra sa “napulo ka sungay,” ang gamhanang mga puwersa sulod sa daghag-nasod HK nga “mapintas nga mananap,” sa paghipos kaniya. “Ug ang napulo ka sungay nga imong nakita, ug ang mapintas nga mananap, sila magdumot sa bigaon ug maglaglag kaniya ug maghubo kaniya, ug magkaon sa iyang mga undanong bahin ug bug-os magsunog kaniya sa kalayo. Kay gibutang sa Diyos sa ilang mga kasingkasing ang pagtuman sa iyang hunahuna.” Dili katingad-ang usa ka langitnong tingog nagpalanog sa dinaliang pasidaan sa Pinadayag 18:4, 5: “Gumula kamo gikan kaniya, akong katawhan, kon dili mo buot makaambit kaniya sa iyang mga sala, ug kon dili mo buot makadawat ug bahin sa iyang mga hampak. Kay ang iyang mga sala nagtipun-og sungko sa langit, ug ang Diyos naghinumdom sa iyang mga buhat sa inhustisya.” Ang awhag nagpadayong nagagawas: Ihunong ang tanang pakiglangkit sa bakak nga relihiyon, sa dili pa unya ulahi na kaayo!
14. Kinsay magbalata tungod sa pagkalaglag sa Babilonya nga Bantogan, ug ngano?
14 Unsay pag-isip sa kalibotan sa paglaglag sa Babilonya nga Bantogan? Gikan sa layo, ang hiwing mga politiko—“mga hari sa yuta”—magbangotan tungod kaniya kay sa kasiglohan silang duha nagkalipay sa ilang espirituwal nga pakighilawas. Nanghilak usab ug nagbangotan tungod kaniya ang hakog nga mga negosyante, “nagapanawng mga magpapatigayon . . . , nga nadato tungod kaniya.” Kini usab nagpalayo kaniya, nga nag-ingon: “Alaot, alaot—ang dakong siyudad, nga binestihan sa pino nga lino ug purpura ug eskarlata, ug dinayandayanan pag-ayo sa bulawang dayandayan ug mahalong bato ug mutya, tungod kay sa usa ka takna ang dagkong mga bahandi nangalaglag!” Ang tanang matahom nga biste sa pari ug kahalangdon sa dagkong mga katedral sa kalibotan mahanaw hangtod sa kahangtoran! (Pinadayag 18:9-17) Apan magbangotan ba ang tanan tungod sa Babilonya nga Bantogan?
15, 16. Unsang hinungdan sa pagsadya ang mabatonan sa katawhan sa Diyos?
15 Ang Pinadayag 18:20, 21 nagtubag: “Maglipay ka tungod kaniya, Oh langit, kamo usab nga mga balaan ug kamong mga apostol ug kamong mga propeta, tungod kay alang kaninyo ang Diyos nagpatuman sa silot batok kaniya!” Sama sa usa ka dakong galingang bato nga gitambog ngadto sa dagat, “sa matulin ang Babilonya ang siyudad nga bantogan gitambog, ug siya dili na gayod igkita pa.”
16 Pagkatalagsaong hinungdan sa pagmaya! Ang Pinadayag 19:1-8 nagpamatuod niini. Sa makaupat ang awhag, “Dayega ninyo si Jah!” nadungog gikan sa langit. Ang unang tulo sa maong mga Hallelujah o Aleluya nagdayeg kang Jehova tungod kay iyang gipatuman ang matarong nga paghukom diha sa daotag-dungog nga bigaon, ang Babilonya nga Bantogan. Ang empiryo sa kalibotan sa bakak nga relihiyon wala na! Usa ka tingog ang gikan sa trono sa Diyos, nga nag-ingon: “Managdayeg sa atong Diyos, kamong tanan niyang mga ulipon, nga nahadlok kaniya, ang gagmay ug ang dagko.” Pagkabulahan unya nato nga makaambit sa maong awit!
Ang Kaminyoon sa Kordero
17. Sa pagtandi sa Pinadayag 11:17 ug 19:6, sa unsang duha ka konteksto si Jehova mosugod sa pagmando nga Hari?
17 Ang ikaupat nga Aleluya nagpailaila sa laing tema: “Dayega ninyo si Ja, tungod kay si Jehova nga atong Diyos, ang Labing Gamhanan, nagsugod sa pagmando nga hari.” Apan dili ba ang susamang berso gigamit sa Pinadayag 11:17? Dinha atong mabasa: “Nagpasalamat kami kanimo, Jehova nga Diyos, ang Labing Gamhanan, . . . tungod kay nagbaton ka sa imong dakong gahom ug nagsugod sa pagmando nga hari.” Oo. Ugaling, ang konteksto sa Pinadayag 11:17 nagatumong sa pagtukod ni Jehova sa Mesiyasnong Gingharian niadtong 1914 “aron sa pagbantay sa tanang mga nasod pinaagi sa usa ka olisi nga puthaw.” (Pinadayag 12:5) Ang Pinadayag 19:6 nagkahulogan sa paglaglag sa Babilonya nga Bantogan. Pinaagi sa paghanaw sa samag-bigaong relihiyon, ang Pagkadiyos ni Jehova mabindikar gayod. Ang pagsimba kaniya ingong Supremong Soberano ug Hari magalungtad karon hangtod sa kahangtoran!
18. Ang paghanaw sa Babilonya nga Bantogan magbukas sa dalan alang sa unsang makalipayng pahibalo?
18 Busa, ang makalipayng pahibalo ikapahayag: “Magmaya kita ug magmasadyaon, ug atong ihatag kang [Ja] ang himaya, tungod kay miabot na ang kaminyoon sa Kordero ug ang iyang pangasaw-onon nakaandam na sa iyang kaugalingon. Oo, gitugotan siya nga mabistehan sa masanag, mahinlo, pino nga lino, kay ang pino nga lino nagahawas sa matarong nga mga buhat sa mga balaan.” (Pinadayag 19:7, 8) Kon kanus-a ang mga dinihogan nga nahibilin pa sa yuta modawat sa ilang langitnong pagkabanhaw wala ipahayag. Apan gipasaligan kita sa konteksto dinhi nga ang ilang pag-ambit sa kaminyoon sa Kordero, si Kristo Jesus, mahimong malipayong panahon, ug ilabina sanglit ilang masaksihan nga direkta ang kaulawan sa daotag-dungog nga bigaon, ang Babilonya nga Bantogan.
Kalibotan ni Satanas Gilaglag
19. Unsang laing hitabo ang gibatbat sa Pinadayag 19:11-21?
19 Ang kabayong maputi nga gihisgotan pag-una sa Pinadayag 6:2 nagpakita na usab. Atong mabasa sa Pinadayag 19:11: “Ang usang naglingkod sa [kabayong maputi] gitawag Matinumanon ug Matuod, ug siya naghukom ug nagpakiggubat diha sa pagkamatarong.” Sa ingon ang “Hari sa mga hari ug Ginoo sa mga ginoo” nagasakay aron sa paghapak sa kanasoran ug sa pagyatak sa “pigsanan sa kasuko sa kapungot sa Diyos nga Makagagahom sa Tanan.” Kawang nga “ang mga hari sa yuta ug ilang kasundalohan” magkatigom sa pagpakig-away sa gubat sa Har–Magedon. Ang Mangangabayo sa kabayong maputi maghuman sa iyang pagpamukan. Walay nabilin sa yutan-ong organisasyon ni Satanas.—Pinadayag 19:12-21.
20. Unsay mahitabo sa Yawa mismo?
20 Apan komosta ang Yawa mismo? Sa Pinadayag 20:1-6, si Kristo Jesus gibatbat ingong “usa ka manulonda nga nanaog gikan sa langit nga may yawi sa bung-aw ug usa ka dakong tanikala sa iyang kamot.” Gidakop niya ang dragon, ang unang Serpente, nga mao ang Yawa ug Satanas, gigapos siya, gitambog siya sa bung-aw, ug gitak-opan ug gitimrihan kini. Tungod kay si Satanas wala na ug dili na makapahisalaag sa mga nasod, ang mahimayaong Milenyong Paghari sa Kordero ug sa iyang pangasaw-onon mosugod na. Wala nay mga luha sa kasub-anan! Wala nay Adanhong kamatayon! Walay pagbalata, walay paghilak, walay kasakit! “Ang unang mga butang miagi na.”—Pinadayag 21:4.
21. Samtang kita maikagong magpaabot sa pagpadayag ni Jesu-Kristo, kinahanglan unsa ang atong determinasyon?
21 Samtang maikagon kitang magpaabot sa pagpadayag sa atong Ginoong Jesu-Kristo, atong ipakita ang kasibot sa pagsulti sa uban mahitungod sa mahigugmaong mga saad sa Diyos maylabot sa Gingharian. Ang kaluwasan haduol na! Hinaot nga kita mopadayon sa pag-abante, nga kanunayng abante, ingong nalamdagang mga anak sa Soberanong Ginoo si Jehova!
Pagsubli
◻ Unsay nagpaila nga ang pagpadayag ni Jesu-Kristo haduol na?
◻ Sa unsang paagi moabot ang adlaw sa panimalos ni Jehova?
◻ Sa unsang paagi angay pagaisipon sa “mga nahigugma kang Jehova” ang kahimtang karon sa kalibotan?
◻ Unsa unya ang sunodsunod nga mga hitabo inighapak sa dakong kasakitan?
[Hulagway sa panid 23]
Si Jesus ‘moanhi uban sa mga panganod,’ nga dili makita, aron sa pagpatuman sa hukom
[Hulagway sa panid 25]
Sa dili na madugay ang bakak nga relihiyon, ang daotang sistema ni Satanas, ug si Satanas mismo ngatanan malaglag