Pusil—Usa ka Kalibotan nga Wala Kanila
GIKAN sa sinugdanan sa tawhanong kasaysayan, ang tawo midangop sa kabangisan sa iyang mga pakiglabot sa iyang isigkatawo. Ang pagpatay mitungha diha sa unang pamilya sa dihang gipatay ni Cain ang iyang igsoong si Abel. Ang pagpatay nagapadayon sukad niadto—sulod sa mga pamilya, mga tribo, ug sa mga nasod. Samtang ang mga hinagiban nahimong mas gamhanan, ang mga biktima midaghan. Ang mga bato ug mga batota mihatag ug dalan sa mga bangkaw ug mga pana, nga gipulihan sa mga pusil ug mga bomba. Ang kalaglagan sa gatosan nahimong kaliboan; karong adlawa ang kaliboan nahimong minilyon. Ug dili lamang panahon sa gubat kondili sa panahon usab sa kalinaw. Dili lamang sa mga sundalo kondili sa pribadong mga lungsoranon usab. Dili lamang sa mga hamtong kondili sa mga bata usab. Matapos pa kaha ang pag-usbaw sa kabangisan? Kon kini isalig sa mga tawo, ang mga kalaoman maoy mangiob.—2 Timoteo 3:1-5, 13.
Si Kristo Jesus nagtagna nga kini maoy panahon sa dihang ang mga nasod mobakyaw batok sa laing mga nasod diha sa makalilisang nga mga gubat, nagpapas sa mga kinabuhi sa minilyon. Ang mga kamatay ug mga linog makapatay ug daghan diha sa daghang mga dapit. Ang tawo magahugaw sa yuta sa usa ka sukod nga diin ang katakos niini sa pagsustentog kinabuhi mismo mameligro—daghang mga siyentipiko karon ang nagapatugbaw niana nga kahadlok. Apan ang gugma sa tawo sa salapi nagyudyod kaniya sa iyang walay puas nga paghugaw, ug kini matapos lamang sa dihang mangilabot mismo si Jehova nga Diyos “sa paglaglag niadtong nagalaglag sa yuta.”—Pinadayag 11:18.
Daghan ang nagayubit nianang mga pasidaana ug busa nagatuman sa laing bahin sa gitagnang ilhanan sa kataposang mga adlaw: “Inyo unang mahibaloan kini, nga sa ulahing mga adlaw may mga mayubiton nga managpanungha nga managyubit, nga magapahiuyon sa ilang kaugalingong mga pangibog ug magaingon: ‘Hain na man ang saad sa iyang pag-anhi? Kay sukad sa pagkamatay sa mga amahan, ang tanang mga butang nagapabilin man nga mao ra gihapon sukad sa pagkatukod sa kalibotan.’”—2 Peter 3:3, 4.
Apan kining bagang panganod nga nagalandong ibabaw sa katawhan adunay silaw sa paglaom. Gitagna ni Jesus nga sa iyang presensiya, aduna unya “diha sa yuta kagul-anan sa kanasoran, nga walay lutsanan tungod sa mga dinaguok sa dagat ug sa mga balod, samtang ang mga tawo panguyapan tungod sa kalisang sa mga butang mahitabo sa ginapuy-ang yuta.” Apan siya usab miingon nga mao kini ang panahon sa “pagtindog ug sa paghangad sa inyong mga ulo, kay ang inyong kaluwasan haduol na.”—Lucas 21:25-28.
Ang mga nasod anaa sa kagul-anan, ang mga masa sa katawhan nagkaguliyang, ug ang mga tawo nangahadlok sa mga butang nga mahitabo ibabaw sa yuta, apan mao na kini ang panahon sa kaluwasan alang niadtong kinsa nagahulat sa umaabot nga Gingharian sa Diyos ug sa Usa ka Libo ka Tuig nga pagmando ni Kristo Jesus. Kana unya ang panahon alang sa katumanan sa mga saad ni Jehova nga Diyos sa ‘bag-ong mga langit ug usa ka bag-ong yuta diin nagapuyo ang pagkamatarong.’—2 Pedro 3:13.
Ug walay mga pusil! Wala nay panginahanglan pa niini alang sa gubat. “Siya nagapahunong sa mga gubat hangtod sa kinatumyan sa yuta. Gibali niya ang pana ug gibunggo ang bangkaw; ang mga karwahi [mga karro sa gubat, Rotherham] gisunog niya sa kalayo.”—Salmo 46:9.
Wala nay panginahanglan pa niini alang sa panalipod sa kaugalingon. “Sila molingkod, ang tagsatagsa ilalom sa iyang parras ug ilalom sa iyang kahoy nga igos, ug walay magahadlok kanila; kay ang baba mismo ni Jehova sa mga panon ang nagsulti niini.”—Miqueas 4:4.
Ang mga matul-id lamang, walay daotan, ang maatua didto. “Kay ang mga matul-id magapuyo sa yuta, ug ang mga matarong magapabilin diha niana. Apan ang mga daotan, sila pagaputlon gikan sa yuta; ug ang mabudhion pagalukahon gikan niini.” (Proverbio 2:21, 22) Unya “ang mga maaghop magapanunod sa yuta, Ug sila magakalipay sa ilang kaugalingon tungod sa kadagaya sa pakigdait.”—Salmo 37:11.
Diha mga mata sa Diyos ang kabangisan nagadaot sa yuta. Sa mga adlaw ni Noe “ang yuta nadunot sa panan-aw sa matuod nga Diyos ug ang yuta napuno sa kabangisan.” (Genesis 6:11-13) Busa, gitapos ni Jehova kadtong kalibotana pinaagi sa tibuok yutang Lunop. Gipakasama ni Jesus ang kataposan niini karong mabangis nga kalibotan sa iyang presensiya ngadto sa kataposan niadtong karaang kalibotan: “Kay sila niadtong mga adlawa sa wala pa ang lunop, nagapangaon ug nagapanginom, ang mga lalaki nagapangasawa ug ang mga babaye gipangasawa, hangtod sa adlaw sa pagsulod ni Noe sa arka; ug sila wala manumbaling hangtod miabot ang lunop ug gianod silang tanan, maingon man unya ang presensiya sa Anak sa tawo.”—Mateo 24:38, 39.
Diha sa bag-ong kalibotan sa Diyos ang tanan nga buhi magatuman sa Marcos 12:31: “Higugmaa ang imong silingan sama sa imong kaugalingon.” Ug ang Isaias 11:9: “Dili nila pagadauton ni pagagub-on ang tibuok ko nga bukid nga balaan; kay ang yuta mapuno sa kahibalo kang Jehova ingon sa mga tubig nga nagatabon sa dagat.” Ug matuman usab diha sa bag-ong kalibotan sa pagkamatarong ang mahimayaong mga kahimtang nga gihubit sa Pinadayag 21:1, 4: “Ug unya nakita ko ang usa ka bag-ong langit ug usa ka bag-ong yuta; kay ang unang langit ug ang unang yuta nangahanaw na man, ug ang dagat wala na. Ug iyang pagapahiran ang tanang luha gikan sa ilang mga mata, ug ang kamatayon mawala na, ug wala na usab unyay pagminatay, ni paghilak, ni kasakit. Kay ang unang mga butang nangagi na.” Nan, tino nga walay tawhanong mga katilingban nga nanagtumpig mga pusil!
Walay usa niining halandumong mga kausaban ang ipatungha pinaagi ug mga rebolusyonaryo uban sa ilang nagkalayong mga pusil nga nagrakrak ug mga kaaway. Hinunoa, kini ipatungha ni Jehova nga Diyos pinaagi sa iyang Gingharian ubos ni Kristo Jesus. Busa ang Isaias 9:6, 7 nag-ingon: “Kay alang kanato ang usa ka bata natawo, alang kanato ang usa ka anak nga lalaki gihatag; ug ang kagamhanan igatungtong sa iyang abaga. Ug ang iyang ngalan pagatawgong Kahibulongang Magtatambag, Gamhanang Diyos, Amahan nga Walay Kataposan, Prinsipe sa Pakigdait. Sa kadagaya sa iyang kagamhanan ug sa pakigdait walay kataposan, ibabaw sa trono ni David ug ibabaw sa iyang gingharian aron sa pagtukod niini nga malig-on ug sa pagtuboy niini nga may hustisya ug pagkamatarong, gikan karon ug hangtod sa walay kataposan. Ang kakugi ni Jehova sa mga panon maoy magahimo niini.”