Pinadayag​—Unsay Kahulogan Niini Para Nimo Karon?

1-2. Unsa ang usa ka rason nga angay tang mainteres sa basahon sa Pinadayag?

NAKASULAY na ba kag tan-aw sa photo album sa uban? Samtang nagtan-aw ka sa mga picture, daghan sa mga tawo didto ang wa nimo mailhi. Pero naay usa ka picture nga nakakuha sa imong atensiyon. Ngano? Kay naa man ka didto. Samtang imo ning gitan-aw, nagsige kag hunahuna kon asa ug kanus-a mo nagpa-picture ani. Gisulayan pod nimog hunahuna kon kinsa nang imong mga kauban. Nalipay kaayo kang nakakita ana nga picture.

² Ang basahon sa Pinadayag parehas ana nga picture. Ngano? Naay labing menos duha ka rason. Una, kini nga basahon sa Bibliya gisulat para nato. Sa pinakauna nga bersikulo, atong mabasa: “Usa kini ka pinadayag pinaagi ni Jesu-Kristo, nga gihatag sa Diyos kaniya, aron ipakita sa iyang mga ulipon ang mga butang nga kinahanglang mahitabo sa dili madugay.” (Pin. 1:1) Busa kining basahona gisulat dili para sa kadaghanan, kondili para nato nga mga alagad sa Diyos. Ingong katawhan sa Diyos, dili ta angayng matingala nga apil ta sa katumanan sa mga tagna niining makapainteres kaayo nga basahon. Sa laing pagkasulti, naa ta sa picture.

3-4. Sumala sa Pinadayag, kanus-a matuman ang mga tagna niini, ug unsay angayng epekto niana sa matag usa kanato?

³ Interesado pod ta ani nga mga tagna tungod aning ikaduhang rason: kon kanus-a ni matuman. Gisulti sa tigulang na nga si apostol Juan kon kanus-a ni mahitabo. Siya miingon: “Pinaagi sa balaang espiritu nakaabot ko sa adlaw sa Ginoo.” (Pin. 1:10) Dihang gisulat ni ni Juan niadtong mga 96 C.E., ang “adlaw sa Ginoo” layo pa kaayo. (Mat. 25:14, 19; Luc. 19:12) Base sa tagna sa Bibliya, kana nga adlaw nagsugod niadtong 1914, sa dihang si Jesus nahimong Hari sa langit. Sukad nianang tuiga, ang mga tagna sa Pinadayag nga konektado sa katawhan sa Diyos nagsugod pagkatuman. Oo, nagkinabuhi na ta karon sa “adlaw sa Ginoo”!

⁴ Kay nagkinabuhi ta sa kulbahinam nga panahon, angay natong konsiderahon pag-ayo ang mahigugmaong tambag nga narekord sa Pinadayag 1:3: “Malipayon ang usa nga nagabasag kusog ug kadtong mga nagapatalinghog sa mga pulong niining tagnaa ug nagatuman sa mga butang nga nasulat niini, kay ang gitakdang panahon duol na.” Oo, kinahanglan natong ‘basahog kusog,’ ‘patalinghogan ang mga pulong niining tagnaa,’ ug ‘tumanon’ kini. Unsa ang pipila sa mga pulong nga kinahanglan natong tumanon?

 5. Giunsa pagpasiugda sa Pinadayag nga importanteng paneguroon nato nga ang atong pagsimba dalawaton kang Jehova?

⁵ Sa unang kapitulo pa lang sa Pinadayag, nakat-onan nato nga si Jesus nahibalo gyod kon unsay nagakahitabo sa iyang mga kongregasyon. (Pin. 1:12-16, 20; 2:1) Nakita nato nâ sa mga mensahe ni Jesus sa pito ka kongregasyon sa Asia Minor. Sa maong mga mensahe, naghatag siyag espesipikong instruksiyon nga makatabang sa unang siglong mga Kristohanon aron maseguro nila nga ang ilang pagsimba dalawaton kang Jehova. Ug ang iyang giingon mapadapat pod sa tanang alagad sa Diyos karon. Unsay atong makat-onan ani? Ang atong Lider, si Kristo Jesus, nahibalo pag-ayo sa atong kahimtang sa espirituwal. Iya tang giyahan ug proteksiyonan, ug walay matago sa iyang panan-aw. Nahibalo siya kon unsay angay natong himoon aron padayon tang uyonan ni Jehova. Unsang instruksiyon ang iyang gihatag nga angay natong tumanon karon?

 6. (a) Base sa giingon ni Jesus sa Pinadayag 2:3, 4, unsay problema sa kongregasyon sa Efeso? (b) Unsay atong makat-onan niini?

⁶ Basaha ang Pinadayag 2:3, 4. Dili nato angayng tugotan nga mobugnaw ang atong gugma kang Jehova. Sa mensahe ni Jesus sa kongregasyon sa Efeso, masabtan nato nga milahutay sila ug padayong nag-alagad kang Jehova bisan pa sa lainlaing kalisdanan. Pero mibugnaw ang ilang gugma. Kinahanglan nilang ibalik ang kainit sa ilang gugma, kay kon dili, ang ilang pagsimba dili dalawaton. Karon pod, kinahanglan nga dili lang ta basta molahutay. Kinahanglang sakto ang atong mga rason sa paglahutay. Ang atong Diyos interesado dili lang sa kon unsay atong ginahimo, kondili kon ngano nga ato pod ning ginahimo. Importante kang Jehova ang atong motibo, kay gusto niya nga mosimba ta niya kay gihigugma ug giapresyar nato siya pag-ayo.​—Prov. 16:2; Mar. 12:29, 30.

 7. (a) Sumala sa Pinadayag 3:1-3, unsang problema ang nakita ni Jesus sa kongregasyon sa Sardis? (b) Unsay kinahanglan natong himoon?

⁷ Basaha ang Pinadayag 3:1-3. Kinahanglan nga padayon tang magmata sa espirituwal. Ang mga Kristohanon sa kongregasyon sa Sardis naay laing problema. Aktibo sila sa pag-alagad kang Jehova sa una, pero karon dili na. Busa giingnan sila ni Jesus nga “momata.” Unsay gitudlo niini kanato? Siyempre, dili kalimtan ni Jehova ang atong mga gihimo para niya. (Heb. 6:10) Pero dili ta angayng magsalig sa atong nahimo sa una. Bisag mas daghan na tag limitasyon karon, kinahanglang busy gihapon ta “sa buluhaton sa Ginoo,” nga pabiling nagmata hangtod sa kataposan.​—1 Cor. 15:58; Mat. 24:13; Mar. 13:33.

 8. Unsay atong makat-onan sa giingon ni Jesus sa mga igsoon sa Laodicea nga atong mabasa sa Pinadayag 3:15-17?

⁸ Basaha ang Pinadayag 3:15-17. Kinahanglan nga dasig ta sa pag-alagad ug kinasingkasing ang atong pagsimba. Ang mensahe ni Jesus sa mga taga-Laodicea nagpakita ug lahi na pod nga problema. “Dagaang” ang ilang pagsimba. Tungod sa ilang kawalay kadasig, giingnan sila ni Jesus nga ‘alaot ug makaluluoy’ ang ilang kahimtang. Kinahanglan nga magmadasigon sila pag-ayo para kang Jehova ug sa pagsimba kaniya. (Pin. 3:19) Unsay atong makat-onan ani? Kon medyo nakuhaan na ang atong kadasig, kinahanglan nga maningkamot ta nga palawmon ang atong apresasyon sa espirituwal nga mga tagana ni Jehova ug sa iyang organisasyon. (Pin. 3:18) Dili gyod nato tugotan nga mahimong prayoridad nato nga mohayahay ang atong kinabuhi ug mahimong ikaduha na lang ang espirituwal nga mga buluhaton.

 9. Base sa mensahe ni Jesus sa mga Kristohanon sa Pergamo ug Tiatira, unsay angay natong likayan?

⁹ Likayan gyod nato ang ginatudlo sa mga apostata. Gibadlong ni Jesus ang ubang Kristohanon sa Pergamo kay naa silay ginahimo nga nakapabahinbahin sa mga igsoon. (Pin. 2:14-16) Iyang gikomendahan ang mga taga-Tiatira kay ilang gilikayan ang “lawom nga mga butang ni Satanas,” ug iyang gidasig sila nga ‘panguptan pag-ayo’ ang kamatuoran. (Pin. 2:24-26) Ang mga Kristohanon didto nga luya sa espirituwal ug misunod na sa bakak nga mga pagtulon-an kinahanglang maghinulsol. Komosta pod sa atong bahin? Kinahanglan natong likayan ang bisan unsang pagtulon-an nga supak sa panghunahuna ni Jehova. Ang mga apostata “diyosnon tan-awon pero dili diyosnon ug binuhatan.” (2 Tim. 3:5) Mas daling mailhan ug malikayan ang bakak nga mga pagtulon-an kon kugihan tang magtuon sa Pulong sa Diyos.​—2 Tim. 3:14-17; Jud. 3, 4.

10. Unsa pay atong makat-onan sa giingon ni Jesus sa mga kongregasyon sa Pergamo ug Tiatira?

¹⁰ Dili ta mohimo, motugot, o mouyon sa bisan unsang klase sa imoralidad. Naa pay laing problema sa Pergamo ug Tiatira. Gibadlong ni Jesus ang pipila ka Kristohanon sa maong mga kongregasyon kay ilang gikonsentir ang imoralidad. (Pin. 2:14, 20) Unsay atong makat-onan ani? Dili ta angayng maghunahuna nga balewalaon ra ni Jehova kon naa tay ginahimo nga imoral, bisan pag dugay na tang nag-alagad niya o kaha daghan tag pribilehiyo karon. (1 Sam. 15:22; 1 Ped. 2:16) Gusto niya nga sundon nato ang iyang taas nga moral nga mga sukdanan bisan pag ubos na kaayo ang moralidad sa kalibotan.​—Efe. 6:11-13.

11. Unsa nay atong nakat-onan? (Tan-awa pod ang kahong “Mga Leksiyon Para Nato Karon.”)

¹¹ Unsa nay atong nakat-onan? Atong nakat-onan nga kinahanglan natong seguroon nga ang atong pagsimba dalawaton kang Jehova. Kon naa tay ginahimo nga tungod ana dili dawaton ni Jehova ang atong pagsimba, kinahanglang mohimo dayon tag kausaban aron iya tang uyonan. (Pin. 2:5, 16; 3:3, 16) Pero naa pay laing gipasiugda si Jesus sa iyang mensahe sa mga kongregasyon. Unsa man?

12. Unsay atong makat-onan sa mensahe ni Jesus sa mga igsoon sa Smirna ug Filadelfia? (Pinadayag 2:10)

¹² Karon atong hisgotan ang mensahe ni Jesus sa mga kongregasyon sa Smirna ug Filadelfia. Iyang giingnan ang mga Kristohanon didto nga dili mahadlok sa mga paglutos, kay gantihan ang ilang pagkamatinumanon. (Basaha ang Pinadayag 2:10; 3:10) Unsay atong makat-onan ani? Angay natong dahomon nga lutoson ta, ug kinahanglang andam tang molahutay. (Mat. 24:9, 13; 2 Cor. 12:10) Nganong importante ni nga pahinumdom?

13-14. Sa unsang paagi ang katawhan sa Diyos naapektohan sa mga hitabo nga gihisgotan sa Pinadayag kapitulo 12?

¹³ Ang Pinadayag nag-ingon nga ang katawhan sa Diyos lutoson sa atong panahon​—ang “adlaw sa Ginoo.” Mabasa nato sa Pinadayag kapitulo 12 nga naay gubat nga nahitabo sa langit human dayon sa pagkatukod sa Gingharian sa Diyos. Si Miguel​—nga mao si Jesu-Kristo dihang nakabalik na siya sa langit—​ug ang iyang mga anghel nakiggubat kang Satanas ug sa iyang mga demonyo. (Pin. 12:7, 8) Ang maong mga kaaway sa Diyos napildi ug gitambog sa yuta, nga miresultag grabeng pag-antos sa mga tawo. (Pin. 12:9, 12) Pero unsay epekto niini sa katawhan sa Diyos?

¹⁴ Gisulti sa Pinadayag kon unsay sunod nga gihimo ni Satanas. Kay dili na man siya makaadto sa langit, iyang gipahungaw ang iyang kasuko sa nahibilin nga mga dinihogan, nga maoy representante sa Gingharian sa Diyos dinhi sa yuta ug “may buluhaton sa pagpamatuod bahin kang Jesus.” (Pin. 12:17; 2 Cor. 5:20; Efe. 6:19, 20) Sa unsang paagi natuman kining tagnaa?

15. Kinsay gisimbolohan sa “duha ka saksi” diha sa Pinadayag kapitulo 11, ug unsay nahitabo kanila?

¹⁵ Gipahinabo ni Satanas nga lutoson ang dinihogang mga brader nga nanguna sa buluhatong pagsangyaw sa Gingharian. Ang maong mga brader nga nanguna mao ang gisimbolohan sa “duha ka saksi” nga gipatay.b (Pin. 11:3, 7-11) Niadtong 1918, walo sa mga brader nga nagapanguna sa organisasyon gihukmang sad-an tungod sa bakak nga mga akusasyon, ug ang kada usa nila gisentensiyahan ug dugay nga pagkapriso. Sa panan-aw sa tawo, ang buluhaton niini nga mga dinihogan morag “gipatay,” sa ato pa, nahunong.

16. Unsay katingalahang nahitabo niadtong 1919, pero unsay padayong gihimo ni Satanas sukad niadto?

¹⁶ Ang tagna sa Pinadayag kapitulo 11 nag-ingon pod nga ang “duha ka saksi” mabuhi pag-usab paglabayg mubo nga panahon. Kana nga tagna natuman sa katingalahang paagi wala pay usa ka tuig human mapriso ang maong dinihogang mga brader. Pagka-Marso 1919, gibuhian sila, ug sa ulahi ang kaso batok nila giatras. Mibalik dayon sila sa ilang buluhaton​—ang buluhaton sa Gingharian. Pero wala nâ makapahunong kang Satanas sa pag-atake sa katawhan sa Diyos. Sukad niadto, si Satanas nagpatunghag samag “suba” nga paglutos sa tanang alagad sa Diyos. (Pin. 12:15) Oo, ‘nagkinahanglag paglahutay ug pagtuo’ ang matag usa nato.​—Pin. 13:10.

17. Unsang wala damha nga tabang ang nadawat sa katawhan sa Diyos bisag giatake sila ni Satanas?

¹⁷ Dayon gipakita sa Pinadayag kapitulo 12 nga ang katawhan sa Diyos makadawat ug wala damha nga tabang. Kini nag-ingon nga gilamoy sa “yuta” ang “suba” sa paglutos. (Pin. 12:16) Ug mao gyod nay nahitabo. Usahay, ang mas patas nga mga bahin sa kalibotan ni Satanas, sama sa pipila ka hudisyal nga sistema, motabang sa katawhan sa Diyos. Daghang higayon nga ang mga alagad ni Jehova nakadaog sa mga kaso nga nakahatag nilag kagawasan sa pagsimba. Giunsa nila paggamit ang ilang kagawasan? Ila ning gipahimuslan pag-ayo aron mahimo ang buluhaton nga gihatag ni Jehova. (1 Cor. 16:9) Unsay apil niini nga buluhaton?

18. Unsay panguna natong buluhaton niining kataposang mga adlaw?

¹⁸ Si Jesus nagtagna nga isangyaw sa iyang mga sumusunod ang “maayong balita sa Gingharian” sa Diyos sa tibuok yuta sa dili pa moabot ang kataposan. (Mat. 24:14) Dihang magsangyaw sila, tabangan sila sa anghel, o grupo sa mga anghel, kinsa nagpahayag ug “walay kataposang maayong balita ngadto sa mga nagpuyo sa yuta, ngadto sa matag nasod ug tribo ug pinulongan ug katawhan.”​—Pin. 14:6.

19. Unsa pa nga mensahe ang angayng isangyaw niadtong mga nahigugma kang Jehova?

¹⁹ Dili lang maayong balita sa Gingharian ang angayng isangyaw sa katawhan sa Diyos. Kinahanglan pod silang mosuportar sa buluhaton sa mga anghel nga gihisgotan sa Pinadayag kapitulo 8 hangtod 10. Kini nga mga anghel nagpahayag ug sunodsunod nga grabeng kalisdanan para niadtong dili magpasakop sa Gingharian sa Diyos. Busa, ang mga Saksi ni Jehova nagsangyaw pod ug mensahe sa paghukom, nga morag “ulan nga yelo ug kalayo,” nga nagpakita kon unsay paghukom sa Diyos sa lainlaing bahin sa daotang kalibotan ni Satanas. (Pin. 8:7, 13) Ang mga tawo kinahanglang mahibalo nga duol na ang kataposan aron makahimo dayon silag mga kausaban sa ilang kinabuhi ug maluwas sa adlaw sa kasuko ni Jehova. (Sof. 2:2, 3) Pero kini nga mensahe dili makapalipay sa daghang tawo. Maong nagkinahanglan ug kaisog ang pagsangyaw bahin ani. Panahon sa dakong kasakitan, mas prangka pa gyod ang mensahe bahin sa kataposang paghukom.​—Pin. 16:21.

20. Unsay atong hisgotan sa sunod nga duha ka artikulo?

²⁰ Kinahanglang tumanon gyod nato ang “mga pulong niining tagnaa” kay apil ta sa katumanan sa atong mabasa sa Pinadayag. (Pin. 1:3) Pero unsay makatabang aron matinumanon tang makalahutay sa paglutos ug makapadayon sa pagsangyaw nga maisogon niini nga mga mensahe? Mapalig-on ta niining duha ka butang: una, sa giingon sa Pinadayag bahin sa mga kaaway sa Diyos, ug ikaduha, sa mga panalangin nga atong madawat sa umaabot kon magpabilin tang matinumanon. Hisgotan nato ni sa sunod nga duha ka artikulo.