Pagpangitag Usa ka May Kasegurohang Kinabuhi
ANG kasegurohan nagkahulogan ug nagkalainlaing mga butang sa nagkalainlaing mga tawo. Alang sa usa ka tawo, ang kasegurohan nagkahulogan ug pagkabatog trabaho; ngadto sa lain, kini bahandi; ug ngadto sa ikatulong tawo, ang kasegurohan maoy usa ka walay-krimen nga palibot. Lahi ba kini ug kahulogan alang kanimo?
Bisan pag unsay imong panghunahuna, sa walay duhaduha ikaw mohimog mga lakang sa paghimo sa imong kinabuhi nga may kasegurohan sumala gayod sa imong gusto. Palandonga kon unsay gihimo sa mga tawo sa Uropa aron makab-ot ang igong personal nga kasegurohan.
Hataas nga Edukasyon
Sumala kang Jacques Santer, presidente sa European Commission, 20 porsiyento sa mga batan-on sa European Union walay mga trabaho. Busa, alang sa maong pundok sa edad, nagadepende kini ug dako diha sa usa ka pangutana, Sa unsang paagi makakita ako ug trabaho nga maghimo sa akong kinabuhi nga may kasegurohan? Daghan ang nagtuo nga ang labing maayo sa pagkab-ot niining tumonga maoy pinaagi sa hataas nga edukasyon, diin, ingon sa gikomento sa The Sunday Times sa London, makahatag sa mga estudyante ug “dakong bentaha sa pagkakitag trabaho.”
Sa Alemanya, pananglitan, “ang pagtinguhag edukasyon ug ang pagkabatog titulo dako gihapon,” nagtaho ang Nassauische Neue Presse. Kini bisan pa sa kamatuoran nga ang pagkinabuhi ingong usa ka estudyante sa gidugayon sa usa ka kurso sa unibersidad nianang nasora mokantidad, sa aberids, ug duolan sa $55,000.
Ang mga batan-on nga seryoso sa pagtungha ug nagtinguha nga makabaton ug kasegurohan sa trabaho dalayegon. Ug ang tawong may mga katakos ug mga kuwalipikasyon kanunayng may bentaha sa dihang mangitag trabaho. Apan ang hataas nga edukasyon ba kanunayng naghatag ug kasegurohan sa trabaho? Usa ka estudyante nag-ingon: “Nahibalo ako sa sinugdanan pa nga ang akong kurso sa pagtuon dili gayod motultol ug klarong propesyonal nga kalihokan ug dili makahatag ug kasegurohan.” Ang iyang kahimtang komon. Sa usa ka dili pa dugayng tuig, ang gidaghanon sa walay-trabahong mga graduwado sa unibersidad sa Alemanya nakaabot sa kinatas-ang gidaghanon.
Sa Pransiya, sumala sa usa ka mantalaan, ang mga batan-on nagtungha sa mga unibersidad tungod kay ang diploma sa hayskul walay bili tungod kay daghang batan-on ang walay mga trabaho. Apan, daghang estudyante sa unibersidad miadmitir nga sa kataposan sa ilang mga pagtuon, sila “dili mas maarang-arang ug kahimtang bisan pag sila adunay titulo.” Ang The Independent nagtaho nga sa Britanya “ang mga kalisod sa kinabuhing estudyante nakahatag ug grabeng kapildihan sa mga estudyante.” Gikataho nga imbes makatabang sa mga estudyante sa pagsagubang sa pagkawalay-kasegurohan sa kinabuhi, ang kinabuhi diha sa unibersidad usahay moresulta ug mga problema sama sa depresyon, kabalaka, ug ubos nga pagtamod-sa-kaugalingon.
Kasagaran, ang pagtuon ug pangamot o pagkuhag praktikal nga pagbansay sa usa ka natad sa paggama makapaarang sa usa sa pagbaton ug seguradong trabaho nga mas madali kay sa niadtong titulado sa unibersidad.
Ang 10,000 ka Kabtangan Igo na Ba?
Daghan ang nagtuo nga ang sekreto sa usa ka may kasegurohang kinabuhi mao ang bahandi. Daw makataronganong paagi kini nga pamation, sanglit ang dakodakong pondong salapi sa bangko maoy usa ka reserba nga kadangpan sa malisod nga mga panahon. Ang Bibliya nagpatin-aw nga ang “salapi maoy alang sa panalipod.” (Ecclesiastes 7:12) Apan, ang pagdaghan ba sa bahandi magpauswag sa personal nga kasegurohan sa tanang panahon?
Dili kinahanglan. Palandonga kon sa unsang paagi ang bahandi midaghan sa miaging 50 ka tuig. Sa kataposan sa Gubat sa Kalibotan II, dakong bahin sa populasyong Aleman halos wala gayoy nabatonan. Karong adlawa, sumala sa usa ka mantalaang Aleman, ang aberids nga Aleman nakabaton ug 10,000 ka butang. Kon husto ang panagna bahin sa panalapi, ang umaabot nga kaliwatan makabaton ug mas daghan pa. Apan kini bang pagdaghan sa bahandi naghimo sa kinabuhi nga mas may kasegurohan? Wala. Usa ka surbi sa Alemanya nagbutyag nga 2 ka tawo gikan sa 3 naglantaw sa kinabuhi nga walay kasegurohan kay sa miaging 20 o 30 ka tuig. Busa ang dakong pagdaghan sa bahandi wala magpabati sa mga tawo nga mas may kasegurohan.
Masabtan kini tungod kay, ingon sa gihisgotan sa nag-unang artikulo, ang pagbatig pagkawalay-kasegurohan maoy usa ka emosyonal nga palas-anon. Ug ang emosyonal nga palas-anon dili bug-os mahupayan sa materyal nga bahandi. Tinuod, ang bahandi nagalihok ingong panagang batok sa kakabos ug makatabang sa mga panahon sa kalisod. Apan ubos sa pipila ka kahimtang, ang pagkabaton ug daghang salapi maoy sama ka bug-at nga palas-anon sa pagkabaton ug diyutay.
Busa, ang timbang nga tinamdan sa materyal nga mga kabtangan motabang kanato sa pagsilsil diha sa hunahuna nga samtang ang bahandi mahimong usa ka panalangin, dili kini ang pangunang butang sa pagkabaton ug may kasegurohang kinabuhi. Samtang dinhi pa sa yuta, gidasig ni Jesu-Kristo ang iyang mga sumusunod pinaagi sa pag-ingon: “Bisag adunay kadagaya ang usa ka tawo ang iyang kinabuhi wala magagikan sa mga butang nga iyang gipanag-iya.” (Lucas 12:15) Aron makabati ug hingpit nga may kasegurohang kinabuhi, ang tawo nagkinahanglag labaw pa kay sa materyal nga bahandi.
Alang sa mga tigulang, ang mga kabtangan dili kaayo hinungdanon tungod sa materyal nga bili niini kondili sa sentimental nga bili niini. Ang labawng gikabalak-an sa mga tigulang kay sa bahandi mao ang risgo sa pagkahimong biktima sa krimen.
Pagbantay!
“Ang krimen . . . maoy usa ka nagdakong problema sa tibuok kalibotan sa miaging 30 ka tuig,” nag-ingon ang pulyetong Practical Ways to Crack Crime, nga gipatik sa Britanya. Ang mga puwersa sa kapolisan tuman nga nagtrabaho. Sa unsang paagi nagasagubang ang mga tawo?
Ang personal nga kahilwasan magsugod diha sa balay. Sa Switzerland, pananglitan, ang usa ka arkitekto nag-espesyalisar sa pagdisenyo ug dili-malungkab sa kawatan nga mga balay nga may dili daling matangtang nga mga trangka, lig-ong mga pultahan, ug rinehasan nga mga bentana. Giliteral pagsabot sa mga tag-iya niining mga balaya ang popular nga sanglitanan: “Ang akong balay mao ang akong luwas nga dalangpanan.” Sumala sa magasin sa balita nga Focus, kining mga balaya mahal, apan pinangita.
Sa pagpauswag sa personal nga kahilwasan sa sulod ug sa gawas sa balay, ang mga lungsoranon sa pipila ka komunidad nag-organisar ug mga laraw sa pagronda sa kasilinganan. Ang mga residente sa pipila ka siyudad naghimo pag dugang mga panagana, nga nagsuhol ug mga kompaniya nga tigguwardiya sa pagpatrolya sa ilang mga lugar sa espesipikong mga oras. Daghang tawo ang nagtuo nga maayong dili mag-inusara magabii diha sa mingawng mga karsada sa siyudad. Ug ang mga ginikanan, nga may katarongang mabalaka sa kaayohan sa ilang mga anak, maghimog dugang mga panagana sa pagpanalipod kanila. Tagda ang mga sugyot nga makita sa kahon niining panira.
Apan dili tanan ang makaabot sa pagpalit ug balay nga dili-malungkab sa kawatan. Gawas pa, ang mga laraw sa pagronda sa kasilinganan ug mga pagguwardiya mahimong dili makakunhod sa krimen sa katibuk-an; mahimong mobali lamang sila sa mga lugar nga walay nagbantay. Mao nga ang krimen nagpabiling usa ka dakong kapeligrohan sa personal nga kasegurohan. Aron may kasegurohan ang atong kinabuhi, labaw pa ang gikinahanglan kay sa bug-os nga paningkamot sa pagpildi sa krimen.
Tambali ang Sakit—Dili Lamang ang mga Simtoma
Ang matag usa kanato adunay kinaiyanhong tinguha nga makabaton ug may kasegurohang kinabuhi, ug maayo nga kita maghimog makataronganon, praktikal nga mga lakang aron makab-ot kining tumonga. Apan ang krimen, pagkawalay-trabaho, ug tanang ubang mga butang nga naghimo sa atong mga kinabuhi nga walay kasegurohan maoy mga simtoma lamang sa usa ka sakit nga mitakboy sa tanang katawhan. Aron matambalan kining kahimtanga, kinahanglang atakehon dili lamang ang mga simtoma, kondili ang hinungdan gayod niini.
Unsa ang hinungdan sa pagkawalay-kasegurohan diha sa atong mga kinabuhi? Sa unsang paagi atong mawala kini ug sa ingon magkuha sa pagkawalay-kasegurohan sa kinabuhi sa walay kataposan? Kini pagahisgotan sa sunod nga artikulo.
[Kahon sa panid 6]
Mga Paagi sa Pagpanalipod sa mga Bata
Tungod sa kasubsob sa mga pag-atake, mga pagpangidnap, ug mga pagbuno sa bata, daghang ginikanan nakakaplag nga mapuslanon ang pagtudlo sa ilang mga anak sa pagbuhat sa mosunod:
1. Pagsultig dili—sa malig-ong paagi—ngadto kang bisan kinsa nga mosulay sa pagpahimo kanilag usa ka butang nga ilang gituohan nga dili maayo.
2. Ayaw pahikap kang bisan kinsa sa pribadong mga parte sa lawas—sa usa ka doktor o nars—gawas kon presente ang usa ka ginikanan.
3. Dagan, siyagit, singgit ug kusog, o pagpakitabang sa usa ka edaran nga anaa sa duol kon anaa sa peligro.
4. Isulti sa mga ginikanan ang bisan unsang hitabo o panagkokabildo nga gihunahuna sa bata nga dili maayo.
5. Ayaw pagtago ug sekreto gikan sa mga ginikanan.
Ingong kataposang punto, maayong mag-amping ang mga ginikanan sa pagpilig bisan kinsa nga binlan sa pagbantay sa ilang anak.
[Mga hulagway sa panid 5]
Aron may kasegurohan ang atong kinabuhi, nagkinahanglan kita ug labaw pa kay sa edukasyon, bahandi, o bug-os nga paningkamot sa pagpildi sa krimen