Kon Unsay Atong Makat-onan Kang Jesus

Bahin sa Pamilya

Unsa ang angayng panglantaw bahin sa kaminyoon nga makapalipay sa pamilya?

Ang kaminyoon maoy sagrado nga relasyon. Sa dihang si Jesus gipangutana kon gitugot ba ang diborsiyo, siya miingon: “Wala ba ninyo mabasa nga siya nga naglalang kanila sukad sa sinugdan nagbuhat kanila nga lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’? Mao nga dili na sila duha, kondili usa ka unod. Busa, kon unsay gihiusa pagyugo sa Diyos ayaw ipabulag ni bisan kinsang tawo. . . . Bisan kinsa nga makigdiborsiyo sa iyang asawa, gawas kon tungod sa pakighilawas, ug magminyog lain makapanapaw.” (Mateo 19:4-6, 9) Kon sundon sa magtiayon ang tambag ni Jesus ug magmaunongon sa usag usa, ang tibuok pamilya mobatig kasegurohan ug kalipay.

Nganong ang paghigugma sa Diyos makapalipay sa mga pamilya?

Si Jesus miingon: “‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo.” Unsa ang ikaduha nga kinadak-ang sugo? Si Jesus miingon: “Higugmaon mo ang imong silingan [lakip niadtong labing suod kanimo—ang imong pamilya] sama sa imong kaugalingon.” (Mateo 22:37-39) Busa ang sekreto sa kalipay sa pamilya mao ang pagbatog suod nga relasyon sa Diyos tungod kay ang paghigugma kaniya magpalihok kanato sa paghigugma sa usag usa.

Sa unsang paagi ang bana ug asawa makapalipay sa usag usa?

Ang mga bana makapalipay sa ilang mga asawa kon sila mosunod sa panig-ingnan ni Jesus. Siya may masakripisyohong gugma alang sa iyang simbolikong asawa, ang kongregasyon. (Efeso 5:25) Si Jesus miingon: “Ang Anak sa tawo mianhi, dili aron pagaalagaran, kondili aron sa pag-alagad.” (Mateo 20:28) Si Jesus dili gayod mahariharion o mapintason sa mga tawo nga iyang gidumala kondili siya maluloton kaayo kanila. (Mateo 11:28) Busa, ang mga bana angayng mogamit sa ilang awtoridad sa malulotong paagi aron makabenepisyo ang tibuok pamilya.

Ang mga asawa makabenepisyo usab sa panig-ingnan ni Jesus. “Ang ulo ni Kristo mao ang Diyos,” matod sa Bibliya. Kini nag-ingon usab nga “ang ulo sa usa ka babaye mao ang lalaki.” (1 Corinto 11:3) Si Jesus wala mobati nga napaubos tungod sa iyang pagpasakop sa Diyos. Gitahod niya pag-ayo ang iyang Amahan. “Ginabuhat ko kanunay ang mga butang nga makapahimuot kaniya,” matod ni Jesus. (Juan 8:29) Ang usa ka asawa nga magpasakop sa pagkaulo sa iyang bana tungod sa iyang gugma ug pagtahod sa Diyos makapalipay gayod sa iyang pamilya.

Unsay makat-onan sa mga ginikanan sa tinamdan ni Jesus sa mga bata?

Si Jesus nakig-uban sa mga bata ug interesado sa ilang mga hunahuna ug pagbati. Ang Bibliya nag-ingon: “Gitawag ni Jesus ngadto kaniya ang gagmayng mga bata, nga nag-ingon: ‘Pasagdi ang mga bata nga moduol kanako.’” (Lucas 18:15, 16) Sa usa ka higayon, gibadlong sa mga tawo ang pipila ka batang lalaki nga nagpahayag sa ilang pagtuo kang Jesus. Apan gidayeg ni Jesus ang mga bata, nga miingon ngadto sa mga nagbadlong kanila: “Wala ba gayod kamo makabasa niini, ‘Gikan sa baba sa mga bata ug sa mga masuso ikaw nagtaganag pagdayeg’?”—Mateo 21:15, 16.

Unsay makat-onan sa mga bata kang Jesus?

Si Jesus naghatag ug maayong panig-ingnan sa mga bata sa pagpakitag interes sa espirituwal nga mga butang. Sa dihang siya 12 anyos pa, siya nakaplagan “sa templo, nga naglingkod taliwala sa mga magtutudlo ug nagpatalinghog kanila ug nangutana kanila.” Unsay epekto niana? “Kadtong tanan nga nagpatalinghog kaniya nahibulong kanunay sa iyang pagsabot ug sa iyang mga tubag.” (Lucas 2:42, 46, 47) Bisan pa niana, si Jesus wala manghambog tungod sa iyang kahibalo. Hinunoa, kini naghimo kaniyang matinahoron sa iyang ginikanan. Ang Bibliya nag-ingon: “Siya nagpadayon sa pagpasakop kanila.”—Lucas 2:51.

Alang sa dugang impormasyon, tan-awa ang kapitulo 14 sa librong Unsay Tinuod nga Gitudlo sa Bibliya?a

[Footnote]