Nahibalo ba ang Diyos nga si Adan ug Eva Makasala?

DAGHAN ang buot gayod masayod sa tubag niining pangutanaha. Kon hisgotan ang isyu nganong gitugotan sa Diyos ang pagkadaotan, mosantop dayon sa atong hunahuna ang sala sa unang tawhanong magtiayon sa tanaman sa Eden. Sanglit gihunahuna sa uban nga ang ‘Diyos nahibalo sa tanang butang,’ tingali mohinapos dayon sila nga ang Diyos nahibalo nang daan nga si Adan ug Eva mosupak kaniya.

Kon ang Diyos nahibalo nang daan nga ang hingpit nga magtiayon makasala, unsay atong ikaingon kaniya? Makaingon kita nga siya dili mahigugmaon, walay hustisya, ug salingkapaw. Ang uban makaingon nga siya walay puangod kay siya ray nagtahan kanila sa kapeligrohan bisag nasayod na siyang daan nga mahitumpawak sila sa kadaotan. Ang Diyos mopatim-awng maoy hinungdan sa tanang kadaotan ug pag-antos nga nahitabo latas sa kasaysayan. Alang sa uban, ang atong Maglalalang daw nagbinuang lamang.

Sumala sa Bibliya, ingon ba gayod niana si Jehova nga Diyos? Aron matubag kana, atong susihon kon unsay giingon sa Bibliya bahin sa kalalangan ug sa personalidad ni Jehova.

“Kadto Maayo Kaayo”

Kon bahin sa kalalangan sa Diyos, lakip na ang unang magtiayon sa yuta, ang asoy sa Genesis nag-ingon: “Nakita sa Diyos ang tanan nga iyang gibuhat ug, tan-awa! kadto maayo kaayo.” (Genesis 1:31) Si Adan ug Eva hingpit nga pagkalalang alang sa yuta. Wala gayoy nakulang kanila. Kay gilalang nga “maayo kaayo,” sila may katakos nga makapasundayag ug maayong panggawi. Sila gilalang sumala “sa larawan sa Diyos.” (Genesis 1:27) Busa sila makapasundayag ug diyosnong mga hiyas sama sa kaalam, maunongong gugma, hustisya, ug pagkamaayo. Pinaagi niini sila makahimog mga desisyon nga mapuslanon kanila ug makapalipay sa ilang langitnong Amahan.

Gihatagan ni Jehova kining intelihenteng mga linalang ug kagawasan. Busa dili samag robot, walay instruksiyon nga giprograma daan kanila aron pahimut-an ang Diyos. Palandonga kini. Asay mas pabilhan nimo nga gasa, ang gihatag nga wala sa buot o kanang kinasingkasing? Siyempre kanang kinasingkasing. Sa susama, kon si Adan ug Eva kinabubut-on pang misunod sa Diyos, pabilhan gayod niya ang ilang pagkamasinugtanon. Kay gihatagag kagawasan, sila makahimo unta sa pagsunod kang Jehova tungod sa gugma.—Deuteronomio 30:19, 20.

Pagkamatarong, Hustisya, ug Pagkamaayo

Gibutyag sa Bibliya kanato ang mga hiyas ni Jehova. Tungod niini nga mga hiyas, imposible gayong siya malangkit sa sala. Si Jehova “nahigugma sa pagkamatarong ug sa hustisya,” matod sa Salmo 33:5. Busa ang Santiago 1:13 nag-ingon: “Ang Diyos dili masulayan sa daotang mga butang ni siya mosulay kang bisan kinsa.” Tungod sa iyang kahingawa, siya nagpasidaan kang Adan: “Gikan sa tanang kahoy sa tanaman makakaon ka hangtod sa pagkatagbaw. Apan kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.” (Genesis 2:16, 17) Gipapili ang unang magtiayon tali sa kinabuhing dayon ug kamatayon. Dili ba salingkapaw gayod ang Diyos kon iyang gipasidan-an sila batok sa usa ka espesipikong sala, unya nasayod na diay siya sa ilang daotang sangpotanan? Sanglit si Jehova “nahigugma sa pagkamatarong ug sa hustisya,” dili gayod siya magpapili ug butang nga wala maglungtad.

Dagaya usab ang pagkamaayo ni Jehova. (Salmo 31:19) Sa paghubit sa pagkamaayo sa Diyos, si Jesus miingon: “Kinsang tawhana taliwala kaninyo nga pangayoan ug tinapay sa iyang anak—dili siya motunol kaniyag bato, dili ba? O, kaha, mangayo siyag isda—dili siya motunol kaniyag halas, dili ba? Busa, kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan nga anaa sa mga langit mohatag ug maayong mga butang niadtong nagapangayo kaniya!” (Mateo 7:9-11) Ang Diyos naghatag ug “maayong mga butang” sa iyang mga linalang. Ang pagkalalang sa mga tawo ug ang giandam nga Paraiso alang kanila nagpamatuod sa pagkamaayo sa Diyos. Kini nga Magmamando dili kay walay puangod nga magtaganag matahom nga puy-anan nga nasayran niyang daan nga mahanaw ra. Ang atong matarong ug maayong Magbubuhat dili gayod mabasol sa pagrebelde sa tawo.

“Ang Bugtong Maalamon”

Gipakita usab sa Bibliya nga si Jehova “ang bugtong maalamon.” (Roma 16:27) Ang mga manulonda sa langit nakasaksi sa daghang ebidensiya niining walay kinutobang kaalam. Sila “misinggit sa pagdayeg” human lalanga ni Jehova ang yutan-ong kalalangan. (Job 38:4-7) Walay duhaduha nga kini sila interesado kaayo sa pagpaniid sa mga panghitabo sa tanaman sa Eden. Human lalanga ang katingalahang uniberso ug kalalangan sa yuta, makataronganon bang ang maalamong Diyos magbuhat atubangan sa mga manulonda ug duha ka talagsaong linalang kinsa nahibaloan niyang daan nga dili magmatinumanon? Dili gayod.

Apan tingali may motutol gihapon, ‘Sa unsang paagi ang maalamon-sa-tanan nga Diyos wala makahibalo?’ Tinuod, tungod sa dakong kaalam ni Jehova, siya may katakos nga mahibalo “sa kataposan sukad sa sinugdan.” (Isaias 46:9, 10) Apan, dili niya kinahanglang gamiton kini nga katakos, maingon nga dili niya kinahanglang gamiton kanunay sa bug-os ang iyang dakong gahom. Si Jehova maalamong modesidir kon kanus-a niya gamiton ang iyang katakos sa pagkahibalo daan. Iya kining gamiton kon makataronganon ug gikinahanglan.

Mahimo kining ipakasama sa pagtan-awg girekord nga kompetisyon sa esport. Ang usa makapili sa pagtan-aw una sa kataposang mga minuto sa dula aron mahibal-an kon kinsay midaog. Apan dili kinahanglan nga ingon niana ang iyang buhaton. May mosaway ba kaniya kon tan-awon niya ang katibuk-ang dula sugod sa sinugdanan? Sa susama, dayag nga gipalabi sa Maglalalang nga dili sayron daan kon unsay mahitabo. Hinunoa, siya naghulat ug nagtan-aw, sumala sa dagan sa panghitabo, kon unsay buhaton sa ulahi sa iyang yutan-ong mga anak.

Sa nahisgotan na, si Jehova wala maglalang sa unang magtiayon ingong mga robot nga giprograma daan kon unsay buhaton. Hinunoa, siya mahigugmaong naghatag kanilang kagawasan. Pinaagi sa pagpili sa hustong dalan, ilang ikapasundayag ang ilang gugma, pagkamapasalamaton, ug pagkamasinugtanon, nga mas makapalipay kanila ug kang Jehova nga ilang langitnong Amahan.—Proverbio 27:11; Isaias 48:18.

Gipakita sa Bibliya nga sa daghang higayon wala gamita sa Diyos ang iyang katakos sa pagkahibalo daan. Pananglitan, sa dihang ang matinumanong si Abraham misulay sa paghalad sa iyang anak, si Jehova miingon: “Karon akong nahibaloan nga ikaw mahinadlokon-sa-Diyos sa pagkaagi nga wala nimo idumili gikan kanako ang imong anak, ang imong bugtong anak.” (Genesis 22:12) Sa laing bahin, may mga higayon usab nga ang daotang panggawi sa ubang mga tawo ‘nakapasakit’ sa Diyos. Masakitan ba siya kon dugay na niyang nahibaloan kon unsay ilang buhaton?—Salmo 78:40, 41; 1 Hari 11:9, 10.

Busa, makataronganon lamang nga ang maalamon-sa-tanan nga Diyos wala mogamit sa iyang katakos sa pagkahibalo daan aron masayran kon makasala ba ang atong unang mga ginikanan. Dili gayod siya tonto nga lalangon ang unang magtiayon ug unya pasagdan lang silang makasinati sa daotang mga panghitabo nga iya nang nahibaloan daan sukad pa sa sinugdan.

“Ang Diyos Gugma”

Ang kaaway sa Diyos, si Satanas mao ang nangulo sa rebelyon didto sa Eden nga naghatod ug kaalaotan, lakip sa sala ug kamatayon. Busa siya “usa ka mamumuno.” Siya usab “usa ka bakakon ug ang amahan sa bakak.” (Juan 8:44) Kay gigamhan sa daotang mga motibo, buot usab niyang palutawon nga ang mahigugmaong Maglalalang may daotang mga motibo. Gusto niyang ipasangil kang Jehova ang sala sa tawo.

Ang gugma mao ang kinadak-ang rason kon nganong gipalabi ni Jehova nga dili sayron daan ang pagkasala ni Adan ug Eva. Kini ang pangunang hiyas sa Diyos. “Ang Diyos gugma,” nag-ingon ang 1 Juan 4:8. Ang gugma positibo, dili negatibo. Kini mangita sa kaayohan sa uban. Oo, tungod sa gugma, buot ni Jehova nga Diyos ang labing maayo alang sa unang magtiayon.

Bisan pag ang yutan-ong mga anak sa Diyos makapili sa dili maayong desisyon, ang atong mahigugmaong Diyos dili negatibo o suspetsoso sa iyang hingpit nga mga linalang. Siya dagayang nagtagana ug bug-os nagsangkap kanila. Nan haom lamang nga dahomon sa Diyos nga sila magmatinumanon, ug dili magrebelde. Nasayod siya nga si Adan ug Eva mahimong magmaunongon, ingon sa gipamatud-an sa ulahi bisan sa dili hingpit nga mga tawo, sama kang Abraham, Job, Daniel, ug sa daghan pa.

“Sa Diyos ang tanang butang posible,” matod ni Jesus. (Mateo 19:26) Makapahupay gayod kana. Ang gugma ni Jehova, lakip ang uban niyang pangunang mga hiyas, sama sa hustisya, kaalam, ug gahom, nagpasalig nga sa tinudlong panahon siya maghanaw sa tanang epekto sa sala ug kamatayon.—Pinadayag 21:3-5.

Dayag, si Jehova wala mahibalo daan nga ang unang magtiayon makasala. Bisag siya nasakitan sa pagrebelde sa tawo ug sa misangpot nga pag-antos, nahibalo ang Diyos nga kini temporaryo lamang ug dili makababag sa katumanan sa iyang walay kataposang katuyoan sa yuta ug sa mga tawo. Palihog susiha ug dugang ang maong katuyoan ug kon sa unsang paagi makabenepisyo ka sa mahimayaong katumanan niini.a

[Footnote]

[Blurb sa panid 14]

Si Jehova wala maglalang sa unang magtiayon ingong mga robot nga giprograma daan kon unsay buhaton

[Blurb sa panid 15]

Ang Diyos nasayod nga si Adan ug Eva mahimong magmaunongon