. . . nagasulod sa ruta sa espirituwal nga paraiso, ‘ang Dalan sa Pagkabalaan.’”a

21. Sa unsang paagi ug nganong ang mga alagad ni Jehova magpaila sa ilang kaugalingon gikan sa panon sa Yawa, ug unsay pagahisgotan sa sunod nga artikulo?

²¹ Oo, ang dinihogang nahibilin sa espirituwal nga mga Israelinhon ug ilang mga kauban, ang ubang mga karnero, nagapaila sa ilang kaugalingon karong adlawa ingong usa ka katawhan nga gilain gikan sa kalibotan ni Satanas, nga alang kaniya ang pagkabalaan nawad-an sa tanang kahulogan. Walay butang sagrado alang sa panon sa Yawa nga nagalakaw subay sa “sangkad ug haluag . . . nga dalan padulong sa kalaglagan.” Dili lamang sila mahugaw sa espirituwal ug sa moral kondili sa daghang kaso sila mahugaw sa lawasnon ug ang ilang panagway nagkato, sa pagsulting labing menos. Bisan pa niana, si apostol Pablo miingon: “Hinloan nato ang atong kaugalingon sa tanang kahugawan sa unod ug sa espiritu, nga hingpiton ang pagkabalaan diha sa pagkahadlok sa Diyos.” (2 Corinto 7:1) Kon sa unsang mga paagi ang katawhan sa Diyos magmaampingon nga magmahinlo sa kaisipan ug lawas pagahisgotan sa sunod nga artikulo.

Magmahinlo sa Hunahuna ug Lawas

“Itanyag ninyo ang inyong mga lawas nga halad nga buhi, balaan, dalawaton sa Diyos.”—ROMA 12:1.

1. Sumala kang apostol Pablo, nganong kinahanglanon ang kahinlo sa hunahuna ug lawas?

ANG usa ka tawo nga buot mag-alagad sa balaang Diyos nga si Jehova kinahanglang putli sa espirituwal nga paagi ug sa kagawian. Makataronganon, nagkahulogan usab kini sa pagkahinlo sa hunahuna ug sa lawas. Tungod sa kahimtang sa presenteng kahikayan sa mga butang, ang mga tawo nga nanggawas niini aron mag-alagad kang Jehova kinahanglang mohimog kausaban dili lang sa ilang mga paagi sa paghunahuna kondili kadaghanan sa personal usab nilang mga batasan. Si apostol Pablo misulat ngadto sa mga Kristohanon sa Roma: “Busa ako nagahangyo kaninyo tungod sa mga kahangawa sa Diyos, mga igsoon, nga itanyag ninyo ang inyong mga lawas nga halad nga buhi, balaan, dalawaton sa Diyos, usa ka sagradong pag-alagad uban sa inyong gahom sa pangatarongan. Ug ayaw na kamo pagpahiuyon niining kahikayan sa mga butang, kondili magbag-o pinaagi sa pagbag-o sa inyong hunahuna, aron kamo makapamatuod sa inyong kaugalingon sa maayo ug dalawaton ug hingpit nga kabubut-on sa Diyos.” (Roma 12:1, 2) Unsay nalangkit sa pagkahinlo sa hunahuna ug lawas?

Kahinlo sa Hunahuna

2. Sa unsang paagi ang atong mga mata ug kasingkasing makapahimo nato sa malaw-ayng kagawian, ug unsay gikinahanglan sa paglikay niini?

² Bisan sa wala pa ihatag ang Kasugoan, ang matinumanong si Job nagpadayag nga ang atong mga mata ug kasingkasing makapahimo nato sa malaw-ay nga kagawian kon dili nato kini kontrolahon. Siya miingon: “Gihimo ko ang usa ka pakigtugon sa akong mga mata. Busa unsaon nako pagpadayag nga ako matinagdanon sa usa ka ulay? Kon ang akong kasingkasing nahaylo sa usa ka babaye, . . . kana maoy malaw-ay nga kagawian, ug kana usa ka kasal-anan nga pagatagdon sa mga maghuhukom.” (Job 31:1, 9-11) Kon kita dunay naglirawliraw nga mga mata ug mabalhinong kasingkasing, gikinahanglan nato ang disiplina sa hunahuna, “ang disiplina nga nagahatag ug salabotan.”​—Proverbio 1:3.

3, 4. (a) Unsay gipakita sa pananglitan ni David ug Batseba, ug unsay gikinahanglan aron usbon ang daotang mga batasan sa paghunahuna? (b) Nganong ang Kristohanong mga ansiano angay nga mag-amping ilabina?

³ Ang mga mata ni Haring David miagak niya sa pagpanapaw uban kang Batseba. (2 Samuel 11:2, 4) Kining panig-ingnana nagapakita nga bisan ang mga tawo nga iladong gigamit ni Jehova mahatumpawak sa sala kon dili nila disiplinahon ang ilang mga hunahuna. Basin kinahanglan ang dakong singkamot aron usbon ang atong mga batasan sa paghunahuna. Ang maong singkamot angay ubanan sa mainitong pag-ampo alang sa tabang ni Jehova. Tapos maghinulsol sa iyang sala uban kang Batseba, si David miampo: “Mugnaa diha kanako ang usa ka maputling kasingkasing, Oh Diyos, ug ibutang sa akong kahiladman ang usa ka bag-ong espiritu, usa nga malig-on.”​—Salmo 51:10.

⁴ Ang Kristohanong mga ansiano mag-amping ilabina nga dili maghambin ug daotang mga pangibog nga mahimong moagak kanila ngadto sa seryosong sala. (Santiago 1:14, 15) Ngadto sa Kristohanong ansiano si Timoteo, si Pablo misulat: “Ang tumong niining sugoa mao ang gugma gikan sa usa ka mahinlong kasingkasing ug sa usa ka maayong tanlag ug gikan sa pagtuo nga walay pagkasalingkapaw.” (1 Timoteo 1:5) Tinong sinalingkapaw nga tumanon sa usa ka ansiano ang iyang espirituwal nga mga katungdanan samtang nagatugot nga ang matang naglirawliraw magpukaw diha sa iyang kasingkasing sa mga hunahuna sa pagbuhat ug kalaw-ayan.

5. Unsay pagalikayan aron mahuptan ang kahinlo sa hunahuna?

⁵ Kitang tanang Kristohanon angay mobuhat sa atong maarangan nga magmahinlo sa hunahuna. Kini nagkahulogan sa paglikay sa bisan unsang mga pelikula, mga programa sa TV, o balasahon nga makadaot sa atong panghunahuna. Ang paghinlo sa hunahuna nagalangkit sa tinuyong singkamot sa pagpalandong sa mga butang nga “matuod, . . . matarong, . . . maputli.” Midugang si apostol Pablo: “Bisan unsang maayong batasan ug bisan unsang butang dalayegon, padayon sa pagpalandong niining mga butanga.”​—Filipos 4:8.

Personal nga Panghinlo

6. (a) Paghatag ug mga pananglitan gikan sa basahong Levitico nga nagapakita nga gibaod ang personal ingon man katilingbanong pagkahinlo sa Israel. (b) Unsa ang katuyoan sa maong mga kasugoan?

⁶ Gikaingon nga “ang pagkahinlo maoy sunod sa pagkadiyosnon.” Tinuod, ang usa ka tawo nga mahinlo sa kagawian ug lawas tingali dili diyosnon. Apan ang usa ka tawong diyosnon kinahanglan gayong mahinlo sa kagawian ug lawas. Ang Moisesnong Kasugoan mihatag ug tukmang mga instruksiyon bahin sa paghinlo sa naimpektar nga mga balay ug sa paghugas sa lawas sa lainlaing kaso sa pagkahugaw. (Tan-awa ang Levitico, mga kapitulo 14 ug 15.) Ang tanang Israelinhon gibaoran nga magbalaan. (Levitico 19:2) Ang basahong Insight on the Scriptures nagaingon: “Ang mga kasugoan bahin sa pagkaon, panghinlo, ug kagawian nga gihatag sa Diyos sa [mga Israelinhon] maoy makanunayong mga pahinumdom kanila sa ilang pagkabulag ug pagkabalaan alang sa Diyos.”​—Tomo 1, panid 1128.

7. Unsay matuod bahin sa mga Saksi ni Jehova ingong katawhan, apan unsay gitaho sa pila ka nagapanawng magtatan-aw?

⁷ Samtang ang mga Saksi ni Jehova ingong katawhan maoy mahinlo sa tanang kahugawan sa Babilonyanhong bakak nga relihiyon ug dili mokonsentir sa moral nga kahugawan sa ilang taliwala, ang mga taho gikan sa mga nagapanawng magtatan-aw nagapaila nga ang pila ka indibiduwal nagapasagad sa personal nga panghinlo ug panghindik. Unsaon nato pagtino nga kita hinlo usab niining bahina? Ang usa ka maayong sulundan sa tanang Kristohanong balay mao ang Bethel, nga ang maong ngalan nagkahulogang “Balay sa Diyos.”

8, 9. (a) Unsang tambag ang gihatag sa tanang bag-ong membro sa pamilyang Bethel? (b) Unsang mga prinsipyo nga gisunod sa mga Balayng Bethel ang angay magmando sa matag Kristohanong panimalay?

⁸ Sa dihang ang usa ka tawo mahimong membro sa pamilyang Bethel sa hedkuwarter sa Watch Tower Society o sa usa sa mga sangang-buhatan niini sa tibuok kalibotan, siya hatagag usa ka brosyur nga gisulat sa Nagamandong Lawas. Kining basahona nagapatin-aw kon unsay gidahom kaniya bahin sa mga batasan sa pagtrabaho ug personal. Ubos sa ulohang “Pag-atiman sa Lawak ug Kahinlo,” kini nagaingon: “Ang kinabuhi sa Bethel nagkinahanglan nga huptan ang hataas nga mga sukdanan sa lawasnon, kagawian, ug espirituwal. Ang tanan sa Bethel angay mabalaka sa paghupot sa iyang kaugalingon ug sa iyang lawak nga hinlo. Kini makaamot sa maayong panglawas. Walay katarongan nga si bisan kinsa maghinugawan. Maayong batasan ang pagkaligo kada adlaw. . . . Ang pagpanghugas sa dili pa mangaon kinahanglanon ug gidahom sa tanan. Isip konsiderasyon sa imong kauban sa lawak ug manghihinlo sa lawak, ang hilam-osan o banyo hugasan tapos sa matag paggamit.”

⁹ Sa mga Balayng Bethel, ang mga kasilyas gihuptang hinlo kaayo, ug gihimo ang tagana aron kadtong nagagamit kanila makahugas dayon sa ilang mga kamot. Ang mga membro sa pamilya gidahom nga mobiya sa kasilyas nga hinlo human sa paggamit, nga nagkahulogang tinoong ang inodoro wala nay hugaw. Kini nagapakitag konsiderasyon sa sunod nga mogamit o sa maghihinlo. Dili ba angay ang maong maayo, mahigugmaong mga prinsipyo magagahom sa tanang Kristohanong panimalay?

10. (a) Nganong dili kinahanglan ang maartihong banyo aron magmahinlo sa kaugalingon ug ang mga anak? (b) Unsang mga kasugoan sa Israel ang nakaabag sa maayong panglawas, ug unsang pagtulon-an ang matun-an sa katawhan ni Jehova karong adlawa gikan niini?

¹⁰ Natural lamang, ang mga kondisyon lainlain gikan sa usa ka nasod ngadto sa lain. Sa pila ka dapit, ang mga balay walay banyera o shower. Hinuon, sa linangkob nga pagkasulti, ang Kristohanong mga lalaki ug mga babaye makakitag igong sabon ug tubig sa paghupot sa ilang mga lawas nga hinlo ug pagtino nga hinlo ang ilang mga anak.a Daghang balay sa tibuok kalibotan ang dili konektado sa usa ka sistemang hiposanan sa hugaw. Apan ang hugaw luwas nga mahipos pinaagi sa paglubong, sumala sa gibaod sa mga Israelinhon bisan diha sa mga kampong militaryo. (Deuteronomio 23:12, 13) Gawas niini, ang mga kasugoan ni Jehova nga nagamando sa kinabuhi sa kampo nagbaod sa kanunay nga paglaba sa sinina ug pagkaligo, madali nga pagsusi ug pagtambal sa sakit, tukmang paghipos sa mga minatay, ug pagmentenar sa hinlong tubig ug abiyo sa pagkaon. Kining tanang kasugoan nakaabag sa kahimsog sa nasod. Dili ba angay ang katawhan ni Jehova karong adlawa samang magmahinlo sa ilang personal nga mga batasan?​—Roma 15:4.

Limpiyong mga Balay ug mga Sakyanan

11. (a) Unsay angay nga magmatuod bisan sa labing gamay Kristohanong balay? (b) Unsang kooperasyon ang gikinahanglan sa tanang membro sa pamilyang Bethel?

¹¹ Ang atong mga balay, bisan unsa ka gamay, mamahimong hapsay ug hinlo, apan kinahanglan kinig maayong organisasyon sa pamilya. Ang usa ka Kristohanong inahan buot mogastog labing daghang panahon kutob sa mahimo sa espirituwal nga mga butang, apil sa buluhatong pagsangyaw, busa angay siya dili kinahanglang mogastog panahon kada adlaw sa pagsunod sa paghinlo sa mga membro sa pamilya nga nagabilin sa sinina, mga libro, peryodiko, mga magasin, ug uban pa nga wala mahipos. Sa Bethel, bisan pag adunay mga maghihinlo sa lawak nga nagahinlo, ang kada membro sa pamilya gidahom sa paghipos sa iyang higdaanan ug pagbiya sa iyang kuwarto nga hapsay sa buntag. Kitang tanan nagapabili sa atong hapsay ug hinlong mga Kingdom Hall ug Assembly Hall. Hinaot ang atong mga balay magpamatuod usab nga kita maoy bahin sa hinlo ug balaang katawhan ni Jehova!

12, 13. (a) Unsang tambag ang gihatag mahitungod sa mga kotse nga gigamit sa pag-alagad kang Jehova, ug nganong dili kinahanglang kini mogastog dakong panahon? (b) Unsa ang espirituwal nga katarongan sa paghupot sa lawasnong kahinlo ug pagbatog hapsay nga mga balay ug mga sakyanan?

¹² Daghan sa mga alagad ni Jehova karong adlawa nagagamit ug mga kotse aron pag-adto sa mga tigom ug pagsangyaw sa kanataran. Sa pila ka nasod ang sakyanan nahimong kinahanglanon kaayong galamiton sa pag-alagad kang Jehova. Tungod kay mao man, kini angay huptang hapsay ug hinlo, sama ra sa atong balay. Tino, ang mga Kristohanon dili makagugol ug hingaping panahon sa sobrang pag-atiman sa ilang mga sakyanan sama sa ginabuhat sa pila ka kalibotanong tawo. Apan nga dili buhaton ang maong paghingapin, ang mga alagad ni Jehova angay manlimbasog sa paghupot sa ilang mga kotse nga hinlo ug maayog kondisyon. Sa pila ka nasod ang pagpahugas sa sakyanan sa usa ka gasolinahan dili mahal o magdugay. Bahin sa sulod sa sakyanan, ang diyes minutos nga paghinlo ug paghiposhipos makahimog mga katingalahan. Ang mga ansiano ug mga ministeryal nga alagad, ilabina, ang angay manlimbasog nga mahimong sulundan niining bahina, sanglit kanunay nilang gigamit ang ilang mga sakyanan sa pagpasakay sa mga grupo sa mga magmantala sa pagsangyaw sa kanataran. Sa dihang mohapit ang usa ka magmamantala sa usa ka tawong interesado aron dad-on siya sa tigom, tinong dili maayong pamatuod kon hugaw ug dili hapsay ang sakyanan.

¹³ Busa, pinaagi sa atong paningkamot nga magmahinlo sa lawas ug magbaton sa hinlo ug hapsay nga mga balay ug mga kotse, atong gipasidunggan si Jehova isip mga membro sa iyang hinlong organisasyon.

Kahinlo sa Dihang Nagahalad sa Espirituwal nga mga Halad

14. Unsang mga kasugoan ang nagmando sa seremonyal nga kahinlo sa Israel, ug unsay gipaila sa maong mga kasugoan?

¹⁴ Ang seremonyal nga kahinlo maylabot sa pagsimba gibaod sa Israel, nga may silot nga kamatayon. Giingnan ni Jehova si Moises ug Aaron: “Pagabulagon mo ang mga anak sa Israel gikan sa ilang pagkahugaw, aron sila dili mangamatay diha sa ilang pagkahugaw tungod sa paghugaw nila sa akong tabernakulo, nga anaa sa ilang taliwala.” (Levitico 15:31) Sa Adlaw sa Pagtabon sa Sala, ang hataas nga saserdote kinahanglang magdigo sa iyang lawas sa tubig sa kaduha. (Levitico 16:4, 23, 24) Ang dulang nga tumbaga diha sa tabernakulo, ug sa ulahi ang dako kaayong dagatdagat nga tumbaga sa templo, mitaganag tubig aron ang mga saserdote manghugas sa dili pa magahalad sa mga halad kang Jehova. (Exodo 30:17-21; 2 Cronicas 4:6) Komosta ang katibuk-an sa mga Israelinhon? Kon sila nahugawan sa seremonyal nga paagi tungod sa bisan unsang hinungdan, sila dili paapilon sa pagsimba hangtod nga sila makatuman sa mga kinahanglanon alang sa pagputli. (Numeros 19:11-22) Kining tanan nagpasiugda nga ang lawasnong kahinlo gibaod niadtong nagasimba sa balaang Diyos si Jehova.

15. Nganong ang mga halad nga hayop dili na kinahanglanon, apan unsang mga pangutana ang gipatungha?

¹⁵ Tinuod, ang katawhan ni Jehova karong adlawa wala obligaha sa paghalad sa mga hayop nga halad diha sa usa ka yutan-ong templo. Ang mga halad ubos sa Kasugoan gipulihan sa “paghalad sa lawas ni Jesu-Kristo sa makausa sa tanang panahon.” (Hebreohanon 10:8-10) Kita “nagasimba sa Amahan uban sa espiritu ug kamatuoran.” (Juan 4:23, 24) Apan nagkahulogan ba kini nga kita walay mga halad nga igahalad ngadto sa atong balaang Diyos si Jehova? Ug dili ba ang pagkahinlo usa ka kinahanglanon alang kanato sama sa mga Israelinhon?

16. Sa unsang paagi ang tagna sa Malakias 3:3, 4 natuman diha sa dinihogang mga Kristohanon sukad sa 1918, ug unsang dalawatong mga halad ang ilang ikatanyag kang Jehova?

¹⁶ Ang tagna ni Malakias nagapakitang ang dinihogang mga Kristohanon sa yuta sa panahon sa kataposan pagadalisayon, o pagaputlion, alang sa pag-alagad sa templo. Ginapakita sa kasaysayan nga ang maong pagdalisay nagsugod sa 1918. Sukad sa 1919 ang dinihogang nahibilin “tino nga nahimong katawhan nga nagatanyag ug usa ka gasa sa pagkamatarong alang kang Jehova,” ug ang ilang gasa maoy “makapahamuot kang Jehova.” (Malakias 3:3, 4) Busa, sila makaarang sa “pagtanyag ug espirituwal nga mga halad nga dalawaton sa Diyos pinaagi kang Jesu-Kristo.” (1 Pedro 2:5) Si apostol Pablo misulat: “Pinaagi kaniya atong itanyag kanunay sa Diyos ang usa ka halad sa pagdayeg, nga mao, ang bunga sa mga ngabil nga nagahimog katilingbanong pagpahayag sa iyang ngalan.”​—Hebreohanon 13:15.

17. Bisan pag ang ubang mga karnero dili bahin sa harianong pagkasaserdote, nganong sila kinahanglang mahinlo sa lawas, sa hunahuna, sa kagawian, ug sa espirituwal nga paagi?

¹⁷ Bisan tuod ang “dakong panon” wala tawga sa saserdotehanong pag-alagad sa templo sama sa dinihogang nahibilin, sila “nagahimog balaang pag-alagad [kang Jehova] sa adlaw ug gabii” diha sa yutan-ong sawang sa iyang espirituwal nga templo. (Pinadayag 7:9, 10, 15) Pagahinumdoman nga ang dili-saserdoteng mga Israelinhon kinahanglang mahinlo sa seremonyal nga paagi aron makaapil sa pagsimba sa tabernakulo o, sa ulahi, sa templo. Sa susama, ang dakong panon sa ubang mga karnero kinahanglang mahinlo sa lawasnon, sa hunahuna, sa kagawian, ug sa espirituwal nga paagi kon buot nila nga moalagad sa templo ug moduyog sa nahibilin sa ‘pagtanyag sa Diyos sa usa ka halad sa pagdayeg’ pinaagi sa paghimog “katilingbanong pagpahayag sa iyang ngalan.”

Mahinlo ug Mahapsay Alang sa Pagsangyaw sa Kanataran ug sa mga Tigom

18. Samtang nakig-ambit sa buluhaton sa katilingbanong pagsangyaw ug pagtambong sa mga tigom, unsay atong pagatagdon bahin sa personal nga kahinlo, sinina, ug sapatos?

¹⁸ Unsay kahulogan niini sa praktikal nga mga pulong? Kini nagkahulogan nga labing dili haom ug dili matinahoron kang Jehova ang paghawas kaniya diha sa balay-balay nga ministeryo, sa kadalanan, o sa balay sa lain kon kita dili hinlo sa lawasnon ug maayog pamiste. Busa, angay nga dili kita mahimong kaswal sa maong mga butang. Kinahanglang hatagan nato kinig maayong pagtagad, aron molihok kita sa paagi nga haom alang sa mga ministro nga nagadala sa ngalan ni Jehova. Ang atong sinina dili kinahanglang mahalon, apan kini angay nga limpiyo, nindot, ug kasarangan. Ang atong sapatos angay usab nga dili guba ug maayo ang dagway. Sa susama, sa tanang tigom, apil ang Pagtuon sa Libro sa Kongregasyon, ang atong mga lawas angay nga mahinlo, ug angay nga ang atong biste hinlo ug haom.

19. Unsang espirituwal nga mga kaayohan ang mosangpot sa atong hinlo ug hapsay nga panagway ingong Kristohanong mga ministro?

¹⁹ Ang atong hinlo ug hapsay nga panagway samtang nagahimo sa pagsangyaw ug panahon sa atong mga tigom maoy usa ka paagi sa “pagdayandayan sa pagtulon-an sa atong Manluluwas, ang Diyos.” (Tito 2:10) Kini usa ka pamatuod sa iyang kaugalingon. Daghang tawo ang nakadayeg sa atong kahinlo ug kahapsay, ug kini nakadasig nila sa pagpamati sa atong mensahe mahitungod sa kahibulongang mga katuyoan ni Jehova alang sa matarong bag-ong mga langit ug sa mahinlong bag-ong yuta.​—2 Pedro 3:13.

20. Unsang dugang maayong mga bunga ang mosangpot sa atong pagkahinlo sa hunahuna ug lawas?

²⁰ Samtang nagsingabot ang hinlong bag-ong kahikayan ni Jehova, kitang tanan kinahanglang magsusi sa pagtino kon kinahanglan himoon nato ang pila ka pagpasibo sa atong panghunahuna o sa personal natong mga batasan. Misulat si Pablo: “Nagasulti ako sa tawhanong pinulongan tungod sa kahuyang sa inyong unod: kay maingon nga inyong gitanyag ang inyong mga bahin sa lawas ingong mga ulipon sa kahugawan ug sa kamasupilon uban ang hunahuna sa pagkamasupilon, busa karon itanyag ninyo ang inyong mga bahin sa lawas ingong mga ulipon sa pagkamatarong uban ang hunahuna sa pagkabalaan.” (Roma 6:19) Ang espirituwal nga kahinlo ug lawasnong kahinlo nagapatunghag maayong mga bunga bisan karon, “bunga nga pagkabalaan, ug sa kataposan [mao unya] ang kinabuhing walay kataposan.” (Roma 6:22) Busa, magmahinlo kita sa hunahuna ug lawas samtang atong ‘itanyag ang atong mga lawas ingong halad nga buhi, balaan, dalawaton sa Diyos.’​—Roma 12:1.

[Mga Footnote]

Mga Puntong Hinumdoman

◻ Sa unsang paagi ang atong mga mata ug kasingkasing makapahimo nato sa malaw-ayng kagawian?

◻ Unsang mga kaayohan ang nadawat sa mga Israelinhon sa dihang gisunod nila ang mga kasugoan ni Jehova bahin sa katilingbanon ug indibiduwal nga panghinlo?

◻ Unsang mga prinsipyo nga gisunod diha sa mga Balayng Bethel ang magamando sa matag Kristohanong panimalay?

◻ Kanus-a, ilabina, nga angay kitang mag-amping bahin sa atong panagway?

◻ Unsang espirituwal nga mga katarongan ang nabatonan sa mga alagad ni Jehova sa paghupot sa ilang mga balay ug mga sakyanan nga hinlo ug hapsay?

[Hulagway sa panid 17]

“Ang kinabuhi sa Bethel nagkinahanglan nga huptan ang hataas nga mga sukdanan sa lawasnon, kagawian ug espirituwal nga paagi”

[Hulagway sa panid 18]

Angay bang gastohon sa usa ka inahan ang ekstrang panahon kada adlaw sa pagsunod sa paghinlo sa dili-mahunahunaong mga sakop sa pamilya?

[Hulagway sa panid 19]

Sa diyes minutos, mahimo ang mga katingalahan sa paglimpiyo sa sulod sa usa ka sakyanan