Ang “Ubang mga Karnero” ug ang Panihapon sa Ginoo
“Si [Jesus] mao ang halad pasighiuli sa atong mga sala, ug dili lamang sa atong mga sala kondili sa sala usab sa tibuok kalibotan.”—1 JUAN 2:2.
1. Unsang positibong mga resulta ang naabot sa ‘pagwali sa maayong balita sa gingharian’?
SI Jesus miingon: “Kining maayong balita sa gingharian igawali sa tanang pinuy-anang yuta sa pagpamatuod sa tanang kanasoran; ug unya moabot ang kataposan.” (Mateo 24:14) Ang ubang mga kaliwatan sa 1914 mabuhi gihapon sa pagpamatuod nga ang mga Saksi ni Jehova matinumanong nakatuman ning sugoa. Ingong resulta, ang ginatos ka libo sa matinud-anon ug kasingkasing nga mga tawo, nga nawad-ag paglaom tungod sa kapakyasan sa kalibotan, positibong misanong sa maayong balita. Ilang gipahinungod ang ilang kaugalingon kang Jehova nga Diyos ug ilang gihatag ang ilang pagkamaunongon ngadto sa iyang Gingharian, gipahibalo kining pagpahinungod pinaagi sa bawtismo sa tubig. Dihay 179,421 ang mipili nianang dalana sa kaalam sa miaging 1984. Ingong resulta, sila miingon ngadto sa katawhan nga nagdala sa ngalan sa Diyos: “Kami mouban kaninyo, kay kami nakadungog nga ang Diyos nagauban kaninyo.”—Zacarias 8:23.
2. Unsang butang ang nangibabaw sa panempo sa pagtigom ni Jesus sa iyang “ubang mga karnero”?
2 Kining padayong nag-uswag nga “dakong panon” sa mga magsisimba maoy bahin niadtong gibatbat ni Jesus ingong iyang “ubang mga karnero.” (Pinadayag 7:9, 15; Juan 10:16) Sila adunay dakong paglaom sa pagkinabuhi sa walay kataposan diha sa yutan-ong paraiso. (Salmo 37:29) Si Jesus mitagna nga iyang tigomon kining matinumanon niyang mga sumusunod human sa iyang unang paghatag sa bug-os nga pagtagad ingong magbalantay sa pagtigom sa “diyutayng panon” sa mga karnerohon nga kanila siya mao ang nagpataliwala sa bag-ong pakigsaad. (Lucas 12:32; Hebreohanon 9:15) Diha sa hunahuna kining maong pagtigom sa duha ka matang sa karnerohong mga tawo ngadto sa “usa ka panon,” atong masabtan kon nganong si apostol Juan miingon nga si Jesu-Kristo “mao ang halad pasighiuli sa atong mga sala, ug dili lamang sa atong mga sala kondili sa tibuok kalibotan.”—1 Juan 2:1, 2.
Kausaban sa Panghunahuna
3, 4. (a) Unsang kausaban sa hunahuna ang nabatonan sa kadaghanan bahin sa pagsaulog sa Panihapon sa Ginoo? (b) Unsay gipasabot ni Pablo sa pag-ingon, “Kay sa imong matag kaon . . . ug inom”?
3 Daghan sa bag-ong natigom nga “ubang mga karnero” naanad sa pagsaulog sa Misa ug sa Pagkalawat, ang kasunsun ug paagi sa pagsaulog naimpluwensiyahan sa mga pagtulon-an sa partikular nga relihiyosong organisasyon nga niini nasakop sila. Apan, karon, kini sila nakaamgo nga kinahanglang saulogon ang Panihapon sa Ginoo makausa lamang sa usa ka tuig. Ngano? Buweno, gisaulog ang Hudiyohanong Paskua makausa lamang sa usa ka tuig, ug gisugdan ni Jesus ang Memoryal sa mao gihapong gabii sa Paskua, sa Nisan 14. Dayon iyang gisugo ang iyang mga tinun-an: “Sa kanunay buhata ninyo kini sa paghinumdom kanako.” Si Pablo midugang: “Kay sa matag kaon ninyo niining tinapay ug matag inom ninyo niining kopa, ginasangyaw ninyo ang kamatayon sa Ginoo, hangtod sa iyang pag-anhi.” (1 Corinto 11:24-26) Tin-awng gipasabot ni Jesus nga ang iyang mga tinun-an kinahanglang magpadayon sa pagsaulog sa iyang kamatayon sa Adlaw sa Paskua, nga moabot makausa sa usa ka tuig. Busa, ginasaulog kini “sa kanunay” sa panahon sa paglungtad sa Kristohanong kongregasyon. Sa pagkatinuod, ginasaulog na ang Memoryal sa 1,952 ka beses.
4 Adunay laing hinungdanong kalainan sa panghunahuna nga gipabilhan sa “ubang mga karnero” nga matang. Imbes makig-ambit sa tinapay ug sa bino sama sa gihimo sa kadaghanan kanila kanhi diha sa ubang iglesya, ilang nakita karon ang ilang kahimtang nga “napasibo” nianang sa tumatan-aw. Nganong ingon man niini, ug kita ba adunay Kasulatanhong pamatuod sa paagi nga nagtugot sa mga tumatan-aw maingon man sa mga mag-aambit?—1 Corinto 13:11; 2 Timoteo 3:16, 17.
5. (a) Ibatbat ang pangunang mga lakang nga kinahanglang buhaton sa tawo aron makapahimulos sa halad ni Jesus. (b) Nganong milihok ang Diyos sa espesyal nga paagi alang sa 144,000 nga mga sumusunod ni Kristo Jesus?
5 Aron mapahimuslan sa usa ang “halad pasighiuli” ni Kristo Jesus, adunay pipila ka lakang nga kinahanglang buhaton, bisan unsa pay kahimtang kon kana siya nag-abiabi sa paglaom sa kinabuhi sa langit ug usa nga nag-abiabi sa paglaom sa kinabuhi sa yutan-ong Paraiso. Kining pangunang mga lakang mao ang mosunod: (1) pagkuhag tukmang kahibalo sa Pulong sa Diyos (Roma 10:13-15); (2) pagpakitag pagtuo (Hebreohanon 11:6); (3) Paghinulsol (Mateo 4:17); (4) pagkanakabig (Buhat 3:19); (5) pahinungod (Lucas 9:23); ug (6) bawtismo (Mateo 28:19). Human mahimo kining mga lakanga nga molihok ang Diyos sa espesyal nga paagi diha sa usa ka tawo nga iyang pilion nga mahimong usa sa 144,000 o “diyutayng panon.” Alang sa unsa nga katuyoan? Aron ang tawo mahimong espirituwal nga mga anak sa Diyos nga may palaabuton sa pagkahimong saserdote ug hari uban kang Kristo Jesus. (Pinadayag 20:4, 6) Diyutay na lamang ang nahibilin ning espirituwal nga mga anak nga buhi karon, ug kini sila ang tukmang makaambit sa mga simbolo. Nan, kini, mao ang hinungdan kon nganong ang kinabag-an sa mga Saksi ni Jehova maoy mga maniniid lamang ug dili mga mag-aambit.
Ang Paskua ug ang Memoryal
6. Nganong ang uban miingon nga ang “ubang mga karnero” kinahanglang makig-ambit sa mga simbolo, ug mopabangon kinig unsang mga pangutana?
6 Misugyot ang uban nga ang nagatubong gidaghanon sa “ubang mga karnero” angayng moambit sa mga simbolo. Ang ilang pangatarongan mao: Sanglit “ang Kasugoan adunay landong sa maayong mga butang nga umaabot,” ug sanglit ang usa sa mga kinahanglanon sa Kasugoan mao ang pagsaulog sa Paskua taliwala sa mga Israelitas ug sa sirkunsadong mga pomuluyong langyaw, nagpasabot kini nga ang duha ka klase sa mga karnerohon diha sa “usa ka panon” ilalom sa “usa ka magbalantay” angay makig-ambit sa mga simbolo sa Memoryal. (Hebreohanon 10:1; Juan 10:16; Numeros 9:14) Mobangon kini ug hinungdanong pangutana: Ang Paskua ba maoy malarawanong Memoryal?
7. Sa unsang bahin nga ang Paskua maoy “landong sa maayong mga butang nga umaabot”?
7 Tinuod nga adunay pipila ka bahin sa pagsaulog sa Paskua sa Ehipto nga sa walay duhaduha natuman kang Jesus. Gipakasama ni Pablo si Jesus sa kordero sa Paskua, nga nag-ingon, “Si Kristo nga among paskua gihalad.” (1 Corinto 5:7) Ang pagwisik sa dugo sa kordero sa Paskua sa mga pultahan ug sa mga mapait nga utanon nakahatag kaluwasan sa panganayng anak sa matag balayng Israelinhon. Maingon man, pinaagi sa pagwisik sa dugo ni Kristo nga “ang kongregasyon sa panganay nga gilista sa langit” makadawat sa ilang kaluwasan, o “kagawasan pinaagi sa lukat.” (Hebreohanon 12:23, 24; Efeso 1:3, 7) Dugang pa, walay bukog sa kordero sa Paskua ang nabali, ug nakita ang katumanan niini diha kang Kristo Jesus. (Exodo 12:46; Salmo 34:20; Juan 19:36) Busa, tinuod ang pag-ingon nga ang Paskua, sa pipila ka bahin, mao ang usa sa daghang mga bahin sa Kasugoan nga nagtaganag “landong sa maayong mga butang nga umaabot.” Kining tanang bahin nagpunting diha kang Kristo Jesus, “ang Kordero sa Diyos.”—Juan 1:29.
8-10. (a) Unsang importanteng bahin may kalabotan sa dugo ang nagpalahi sa Paskua gikan sa Memoryal? (b) Sa unsang paagi ang mga pakigsaad may kalabotan sa Memoryal nagpakitag kalainan? (c) Moagak kini kanato ug unsang konklusyon?
8 Apan, dili bug-os ang Paskua nga naglarawan sa Panihapon sa Ginoo. Nganong dili? Sa gisugdan ang Paskua sa Ehipto, ang sinugbang unod sa nating karnero gikaon, apan walay gikaon nga dugo sa Paskua. Apan, sa kasukwahi, sa gisugdan ni Jesus ang Memoryal sa iyang kamatayon espisipikong misugo siya sa presente niadtong higayona sa pagkaon sa iyang unod ug sa pag-inom sa iyang dugo, nga gisimbolohan sa tinapay ug bino. (Exodo 12:7, 8; Mateo 26:27, 28) Niining importante kaayong bahin—ang dugo—ang Paskua dili mao ang larawan sa Panihapon sa Ginoo.
9 Adunay laing butang nga kinahanglang dili kalimtan. Gihisgotan ni Jesus ang duha ka may kalangkitang pakigsaad uban sa iyang mga tinun-an, “ang bag-ong pakigsaad” ug ang ‘pakigsaad alang sa usa ka gingharian.’ (Lucas 22:20, 28-30) Ang duha ka pakigsaad adunay kalabotan sa mga mag-aambit nga mahimong mga saserdote ug mga hari uban kang Kristo Jesus. Apan sa Israel wala gayoy sirkunsadong dumoluong ang mahimong saserdote o hari. Niining bahina, usab, atong makita ang kalainan tali sa piyesta sa Paskua sa Israel ug sa Panihapon sa Ginoo.
10 Busa motultol kini kanato ug unsa nga konklusyon? Ang kamatuoran nga mikaon ang sirkunsadong dumoluong sa walay lebadorang tinapay, mapait nga mga utanon, ug sa nating karnero sa Paskua wala magpatuod nga kadtong sakop karon sa “ubang mga karnero” sa Ginoo nga presente sa Memoryal makaambit sa tinapay ug bino.
Bili sa Pagtambong sa Memoryal
11. Alang sa unsang hinungdanong katarongan nga kinahanglang motambong sa Memoryal ang “ubang mga karnero”?
11 Apan, kini ba, nagpakita nga mahimong dili na motambong kadtong sakop sa “ubang mga karnero” nga matang sa pagsaulog sa Memoryal? Dili gayod! Kini maoy okasyon alang sa tanang karnerohong mga sumusunod ni Jesus sa paghinumdom kang Jesus sa tagsaon kaayong diwa. Ang “ubang mga karnero” nianang okasyona makapanumdom nga natagamtam na nila ang kaayohan tungod sa ilang pagtuo sa naulang dugo ni Kristo sa usa ka sukod nga sila karon giisip ni Jehova nga “nakalaba ug nakapaputi sa ilang mga besti sa dugo sa Kordero.” Tungod niini sila nakahimo sa paghatag “balaang pag-alagad sa adlaw ug sa gabii diha sa templo sa [Diyos].” (Pinadayag 7:14, 15) Makahinumdom usab sila nga kinahanglang magpadayon sila sa ‘pagpangita kang Jehova, sa pagkamatarong, ug sa pagkamaaghop’ uban sa paglaom nga dili malaglag sa panahon sa “adlaw sa kasuko ni Jehova,” ug busa makabaton sa kalipay sa pagkadangat sa tawhanong kahingpitan. Sa kataposan sila matawag ni Jehova nga tinuod nga matarong, nga mahitabo human nga itugyan ni Jesus ang Gingharian ngadto sa iyang Amahan.—Sofonias 2:2, 3; 1 Corinto 15:24; Pinadayag 20:5.
12. Unsang mga kaayohan ang moresulta sa pagpamati sa pakigpulong sa Memoryal?
12 Laing importanteng katarongan nga kinahanglan gayod nga motambong mao nga ang mga kamatuoran nga hisgotan sa panahon sa pakigpulong sa Memoryal maoy lakip sa “laglom nga mga butang sa Diyos,” ‘magahing mga kalan-on maoy alang sa mga hamtong,’ dili lamang sa gatas sa “nahaunang mga doktrina.” (1 Corinto 2:10; Hebreohanon 5:13-6:1) Ang Kasulatanhong pakigpulong makapalalom sa apresasyon sa gugma nga gipakita ni Jehova sa paghatag ug katingalahang kahikayan sa Gingharian alang sa pagpanalangin sa tawhanong banay. Higayon usab kini sa ‘pagtutok sa Pangulong Ahente ug Maghihingpit sa atong pagtuo, si Jesus.’ Dili angay ipakamenos ang gugma nga gipakita ni Jesus alang kanato, ni sa mga pag-antos nga iyang giagian. (Hebreohanon 12:2, 3) Dugang pa, mouyon kitang tanan nga daghan sa bililhong mga hunahuna nga gihisgotan ni Jesus uban sa iyang mga apostoles sa gisugdan ang Memoryal—mga hunahuna mahitungod sa panaghiusa, gugma, ug pagbayaw sa ngalan ni Jehova—mahimong maambitan usab sa “ubang mga karnero” maingon man sa “diyutayng panon.”
Pagpakitag Mahigugmaong Pagtagad sa Tanan
13. Nganong hinungdanong mapasa ang mga simbolo ngadto sa tanang tumatambong?
13 Hinungdanon nga ang tanang presente sa Panihapon sa Ginoo mapahinumdoman sa paagi nga gisugdan ni Jesus. Ang aktuwal nga pagpasa sa tinapay ug sa bino gikan sa usa ngadto sa lain makatabang sa pagpalalom sa pagpabili sa balaang mga butang nga hisgotan nianang gabhiona. Kini makahimo usab sa matag usa sa pagpadayag kon unsay iyang paglaom sa kinabuhi—langitnon ba o yutan-on.a Ang pagsunod sa hustong paagi magpahiusa sa kongregasyon sa himoon nianang gabhiona sa tibuok yuta.—1 Corinto 14:40.
14. Sa unsang paagi makapakita ang mga ansiano ug mahigugmaong pagtagad sa usa nga dinihogan nga may sakit sa gabii sa Memoryal?
14 Pananglitan kon adunay sakit ang usa sa dinihogan sa kongregasyon ug dili makatambong sa Memoryal. Nan unsay buhaton? Kinahanglang paningkamotan gayod nga madala sa usa sa mga ansiano ang mga simbolo ngadto sa Kristohanong may sakit ug kon, kombenyente, mohimog tukmang mga komento ang ansiano sa dili pa itanyag ang mga simbolo ug taposon kini sa tukmang pag-ampo. Unsa ka dakong pagdasig ang bation sa nagmasakiton! Ang maong buhat sa mahigugmaong pagtagad mopasiugdag espiritu sa gugma sulod sa kongregasyon. (Tan-awa usab ang panid 31.)—Salmo 133:1.
15. Ibatbat ang pipila ka paagi nga niini ikapakita ang pagtahod sa Panihapon sa Ginoo.
15 Adunay makaikag nga mga pangutana ang mibangon mahitungod sa paagi ug sa matang sa mga simbolo nga gamiton sa Memoryal. Ang mga tubag ning mga pangutanaha makita diha sa panid 19 ilalom sa “Pagpakitag Pagtahod sa Panihapon sa Ginoo.” Maayong sundon pag-ayo sa kasaligang mga ansiano ang gilatid niana.
Ang Panginahanglan sa Pagsusi sa Kaugalingon
16, 17. (a) Unsang mga pangutana ang gibangon sa pipila mahitungod sa pakig-ambit sa Memoryal, ug kinsa lamang ang makahatag tubag? (b) Sa unsang paagi mitagana ang Diyos ug lig-ong ebidensiya alang niadtong inanak pinaagi sa iyang espiritu?
16 Adunay uban nga natugaw sa mga pagduhaduha kon sila ba takos nga makig-ambit sa mga simbolo. Mobangon usahay kining mga pangutanaha sa mga semana sa dili pa moabot ang laing selebrasyon sa Panihapon sa Ginoo. Sa masubsub gipangutana kini sa pipila nga bag-o pang nakig-uban sa mga Saksi ni Jehova. Usa ba ikaw nga may pagduhaduha niining bahina sa imong hunahuna? Unsaon nimo sa pagtino kon unsa ang hustong dalan ang himoon?
17 Mirekomendar si Pablo bahin sa Panihapon sa Ginoo: “Una pasagdi nga pamatud-an sa tawo ang iyang kaugalingon human sa pag-usisa, ug busa pakan-a siya sa tinapay ug paimna siya sa kopa.” (1 Corinto 11:28, 29) Nakamatikod ka ba nga miingon si Pablo nga ikaw mismo ang mohimo sa ‘pagpamatuod human sa pag-usisa’? Tinuod, dili daotan nga makighisgot niining seryosong butang uban sa hamtong nga Kristohanon, apan ikaw mismo ang motino sa imong personal nga relasyon kang Jehova ug sa iyang Anak. Gitino sa Diyos nga walay usa sa 144,000 ang magduhaduha. Kita gipasaligan: “Ang espiritu mao ang magapanghimatuod uban sa atong espiritu nga kita mga anak sa Diyos.” Ang espiritu sa Diyos maoy mopukaw sa kasingkasing sa tanang sakop sa lawas ni Kristo sa pagtuo nga siya usa sa espirituwal nga mga anak sa Diyos. Nahibalo niini ang usa nga pinili ug dili na kinahanglang mangutana sa uban diha sa kongregasyon ug kalig-onan.—Roma 8:15, 16.
18. Unsang makasaysayanhong mga kamatuoran bahin sa “ubang mga karnero” ang makaikag kanato?
18 Ang modernong kasaysayan sa mga Saksi ni Jehova nagpakita nga sukad sa 1931 gisugdan nga gihatagag dugang pagtagad ang “ubang mga karnero” pinaagi sa balita sa Gingharian. Dayon sa Mayo 31, 1935, pinaagi sa pakigpulong bahin sa “Ang Dakong Katilingban,”b ang “dakong panon” nga nakita ni apostol Juan sa panan-awon tin-awng napaila nga mao ang “ubang mga karnero.” Unsay gipakita niining bag-ong pasiugda? Sa pagpakita nga ang pagtigom sa “diyutayng panon” hapit nang matapos ug ang panahon miabot na alang kang Jesus, pinaagi sa administrasyon sa “matinumanon ug maalamong ulipon,” sa pagbali sa iyang pagtagad sa pagtigom sa “ubang mga karnero.”—Mateo 24:45-47.
19. Unsang personal nga pagsusi ang maayong himoon sa mga bag-ohan nga nagtuong dinihogan?
19 Uban niini sa hunahuna, kita moingon alang niadtong tanan nga bag-o pang nakig-uban sa katawhan ni Jehova o tingali moangkon nga sakop sa dinihogang matang: Susiha pag-ayo ang inyong relasyon kang Jehova. Pangutan-a ang imong kaugalingon, Ang langitnong paglaom nga akong giangkong mabatonan impluwensiyado pa ba sa kanhing pagtulon-an sa iglesya nga ang tanang mga sakop moadto sa langit? Nalangkit ba ang akong paglaom sa mahakugong tinguha o emosyonal nga pagbati? Si Pablo miingon: “Dili arang makabakak ang Diyos.” (Hebreohanon 6:18) Ni makabakak ang balaang espiritu sa pagkainanak. Busa, ang si bisan kinsa nga tinuod nga inanak sa espiritu sa Diyos dili matugaw sa mga pagduhaduha kondili makapamatuod sa tanang maayong konsensiya nga siya usa sa mga anak sa Diyos.
Pagsaulog sa 1986
20. Unsa ka bililhon ang Memoryal alang sa mga Saksi ni Jehova?
20 Ang Panihapon sa Ginoo, sa walay duhaduha, mao ang labing dakong selebrasyon sa tanang tinuod nga mga Kristohanon. Wala nay lain pang okasyon nga sama niini ka bililhon, sa katuyoan ug paagi. Busa, samtang nagbiyo ang yuta sa iyang agianan, nga maoy mopasalop sa adlaw ubos sa kapunawpunawan sa tibuok yuta, ang tanang kongregasyon sa mga Saksi ni Jehova, dako ug gamay, ug sa tanang nahilain nga grupo magtigom sa pagsunod sa sugo sa Agalon.
21. Unsang tinamdan ug mga kalaoman ang motungha sa mga kasingkasing sa katawhan sa Diyos sa umaabot nga Memoryal sa 1986?
21 Busa ang tanang karnerohong mga tinun-an malipay sa palaabuton sa dungang pakigbahin sa laing pagsaulog sa Memoryal. Hinaot nga ang okasyon sa sunod tuig mapamatud-ang panahon sa makapalig-ong pagdasig sa tanang mga alagad ni Jehova. Hinaot nga mapasilsil niini kanila ang samang espiritu sa pagsalig nga gihuptan sa ilang Panig-ingnan, si Jesu-Kristo, kinsa miingon: “Magmaisogon! Gidaog ko na ang kalibotan!”—Juan 16:33.
[Mga footnote]
a Diha sa usa ka dakong kongregasyon naandan na niadtong tigsilbi sa mga simbolo sa pagbarog sa kataposan sa matag linya sa mga lingkoranan ug sinyasan kadtong anaa sa linya. Mosinyas lang sa mga tigsilbi ang usa nga buot makigbahin. Apan, sumala sa gipakita sa ibabaw, dili kini husto.
b Gihatag kining pakigpulonga sa Washington, D.C., ni J. F. Rutherford, presidente niadto sa Watch Tower Bible and Tract Society.
Makahinumdom Ka Ba—
◻ Nganong dili usa ka matang ang Paskua sa Memoryal?
◻ Unsa ang unom ka lakang ang kinahanglang himoon sa dili pa makapahimulos sa halad ni Jesus
◻ Nganong hinungdanon ang imong pagtambong sa Memoryal?
◻ Nganong hinungdanon ang pag-usisa sa kaugalingon sa dili pa ang Memoryal?
[Kahon sa panid 19]
Pagpakitag Pagtahod sa Panihapon sa Ginoo
Mga Simbolong Gamiton
Tinapayng walay lebadura: Ang tinapay, sama sa walay lebadorang tinapay sa mga Hudiyo, nga ginama sa harina sa trigo ug tubig mahimong gamiton. Ayawg paggamit ug walay lebadorang tinapay nga may timpla sama sa asin, kalamay, malt, itlog o sibuyas. Makaluto kag tinapayng walay lebadura pinaagi sa paggamit sa mosunod nga resipe: Sagola ang usa ug tungang tasa sa harina sa trigo (kon wala, gamita ang harina sa humay, mais o ubang harina sa lugas) ug usa ka tasang tubig, himoon kining minasa. Dayon pigsata ang minasa sama ka nipisa sa wafer. Ibutang kini sa lutoanan ug tusoktusoki pinaagig tinidor. Lutoa kini sa mainit nga hurnohan hangtod nga mauga ug kagubkob.
Bino: Gamita ang walay sambog nga pulang bino sama sa Chanti, Burgundy, o claret. Ayaw gamita ang bino nga gipaisog o gisagolag brandy, sama sa sherry, port o muscatel. Ayawg paggamit ug nga gisambogag panakot o mga yerba, sama sa Dubonnet o ubang pangpaganang mga bino. Ang ginama sa kaugalingon nga pulang bino mahimong gamiton kon kini walay sambog nga kalamay, panakot o pagpaisog.
Preparasyon sa Kingdom Hall
Lamesa alang sa mga simbolo: Hapini ang lamesa ug limpiyong mantel ug pagbutang ug igong mga plato ug mga kopa sa bino aron episyente ang pagdalit. Mahimong tipaktipakon ang tinapay ug mahimong ipisong daan ang bino sa di pa ang tigom. Si Jesus wala magtukod ug mga rituwal nga sundon bahin ning butanga. Kon pangayoon sa mga sirkumstansiya, taboni ang mga simbolo ug limpiyong panapton aron dili matugdonan sa mga insekto.
Mga magsisilbi: Itudlong daan ang paagi nga sundon aron malikayan ang kalangan o kalibog sa pagsilbi sa mga simbolo sa tanang tumatambong, lakip sa mamumulong ug sa mga magsisilbi.
Mga attendant: Kinahanglang adunay supisyenteng mga attendant sa dili pa magsugod ang tigom aron ang tanan maabiabi inig-abot ug kahatagag lingkoranan.
Dekorasyon sa bulak: Mahimong itagana, apan kinahanglang simple ug mahapsay.
Paagi sa Tigom
Panahon sa selebrasyon: Bisag sayo nga magsugod ang tigom, ang mga simbolo kinahanglang dili ipasa hangtod nga mosalop ang adlaw. Kinahanglang tinoon kon kanus-a mosalop ang adlaw ning panahona sa inyong lugar.
Pakigpulong sa Memoryal: Kinahanglang mangandam pag-ayo ang mamumulong aron siya makahatag sa iyang materyal sulod sa gitakdang panahon. Kinahanglang tin-aw kining ipahayag ug makapadasig sa tanang tumatambong.
[Hulagway sa panid 17]
Ang Memoryal makapalalom sa gugma alang kang Jehova ug sa iyang Anak