Atong “Iwali ang Pulong”

¹ Sama gayod sa giingon sa Bibliya bahin sa “kataposang mga adlaw,” kadaghanang katawhan karong adlawa nagbaton lamang sa “dagway sa diyosnong pagkamahinalaron.” (2 Tim. 3:1, 5) Kini tungod kay ang relihiyosong mga pangulo wala magsunod sa Bibliya. Gipalabi nila ang pagkutlo sa mga pagtulon-an sa mga pilosopo ug mga teologo o sa pagpakighisgot sa sosyal ug politikal nga mga isyu inay kay sa pagsangyaw sa Pulong sa Diyos. Daghang relihiyosong mga pangulo mibati nga ang Bibliya kinaraan, ug busa gipalabi nila ang pagpalambo sa teoriya sa ebolusyon inay kay sa pagtulon-an sa Bibliya bahin sa usa ka Maglalalang. Kadaghanan sa mga klerigo wala gani maggamit sa personal nga ngalan sa Diyos, ug wala sila mosupak sa pagkuha niana gikan sa kadaghanang modernong mga hubad sa Bibliya.

² Ingon nga tinuod sa relihiyosong mga pangulo sa adlaw ni Jesus, ang klero karong adlawa nagasangyaw sa kawang. (Mat. 15:8, 9) Sama gayod sa gitagna ni propetang Amos, adunay “gutom, dili sa tinapay, ug kauhaw, dili sa tubig, apan sa pagpatalinghog sa mga pulong ni Jehova.” (Amos 8:11) Labaw pa sa bisan unsa, ang katawhan nanginahanglan sa espirituwal nga pagkaon sa Pulong sa Diyos.

³ Kon Unsaon Pagtagbaw ang Espirituwal nga Panginahanglan sa Katawhan: Giawhag ni Pablo si Timoteo sa pagtapot sa “balaang mga sinulat, nga makapahimo [sa usang] maalamon alang sa kaluwasan” ug iyang gisugo siya nga “iwali ang pulong” ngadto sa uban. (2 Tim. 3:14, 15; 4:2) Ingong mga Saksi ni Jehova, kinahanglang huptan nato kon unsay ginatudlo sa Bibliya sa dihang kita mosangyaw, nga sa ingon nagasundog kang Jesus, nga miingon: “Ang akong ginatudlo dili akoa, kundili iyaha sa nagpadala kanako.” (Juan 7:16) Buot natong masayod ang mga tawo nga ang Pulong sa Diyos mao ang tinubdan sa impormasyon nga atong ginapaambit kanila.​—1 Cor. 2:4-7.

⁴ Kinahanglang makadungog una ang mga tawo sa kamatuoran gikan sa Bibliya aron motuo kang Jehova. Masinabotong misulat si Pablo: “Unsaon, sa baylo, pagbutang nila ug pagtuo kaniyang kinsa wala nila madunggi? Unsaon, sa baylo, nila pagkadungog kon walay magwali?” (Roma 10:14) Pinaagi sa pagsangyaw sa Pulong sa Diyos, atong matabangan ang uban sa pagbaton ug pagtuo pinaagi sa tukmang kahibalo. Ang maong kahibalo nagabag-o sa mga kinabuhi alang sa mas maayong resulta. Ang Ingles nga awtor nga si Charles Dickens misulat bahin sa Bibliya: “Kini mao ang labing maayong libro nga sukad nahuptan o mahuptan sa kalibotan, tungod kay kini nagatudlo kanimo sa labing maayong mga pagtulon-an nga niana ang bisan kinsang tawhanong linalang nga naninguhang magmatinud-anon ug magmatinumanon posible nga magiyahan.”

⁵ Kadtong gigutom sa espirituwal nga kamatuoran daling makaila nga kini gipalig-on pinaagi sa awtoridad sa Pulong sa Diyos. Balik niadtong 1913, si Frederick W. Franz, ingon nga batan-ong estudyante sa kolehiyo, gihatagan sa pulyetong Where Are the Dead? Tapos mabasa ang tubag sa Bibliya, siya mipahayag: “Kini mao ang kamatuoran.” Tugoting mopadayon kita sa mainitong pagsangyaw sa Pulong ug busa makaambit sa kangaya sa pagkadungog sa uban nga moingon: “Kini mao ang kamatuoran.”