Ang Bibliya Makabag-o sa Kinabuhi
UNSAY nakaplagan sa usa ka lalaki sa Scotland nga mas bililhon pa kay sa malamposong negosyo? Unsay nakatabang sa usa ka lalaki sa Brazil sa pagbiya sa iyang imoral nga pagkinabuhi ug sa paghunong paggamit ug crack cocaine? Sa unsang paagi naundang sa usa ka lalaki sa Slovenia ang iyang pagkapalainom? Basaha ang ilang asoy.
“Haruhay Kog Kinabuhi.”—JOHN RICKETTS
NATAWO: 1958
NASOD: SCOTLAND
KANIADTO: MALAMPOSONG NEGOSYANTE
KAAGI: Maayo mig pagkabutang. Si Papa opisyal sa kasundalohan sa Britain, busa pirmeng magbalhinbalhin ang among pamilya. Gawas sa Scotland, nakapuyo pod mi sa England, Germany, Kenya, Malaysia, Ireland, ug Cyprus. Sukad sa edad nga 8, nagtungha ko sa may dormitoryong mga eskuylahan sa Scotland. Sa ulahi, migraduwar ko sa Cambridge University.
Sa edad nga 20, akong gisugdan ang 8 ka tuig nga karera sa industriya sa aseite. Una nako kining gihimo sa South America, dayon sa Africa, ug sa ulahi sa Western Australia. Human mobalhin sa Australia, nagtukod kog investment firm, nga sa ulahi akong gibaligya.
Kay mikita kog dako, miretiro ko sa edad nga 40. Dayon nagsige na lang kog biyahe. Kaduha nako gilibot ang Australia nga nagmotor, ug gibiyahe pod nako ang tibuok kalibotan. Haruhay kog kinabuhi.
GIBAG-O SA BIBLIYA ANG AKONG KINABUHI: Bisan sa wala pa ko moretiro, nangita kog paagi nga mapasalamatan ang Diyos sa tanan nakong natagamtam. Misugod kog simba sa Anglican Church, nga maoy akong namat-an. Apan wala kaayo sila magtudlo bahin sa Bibliya. Sunod, nagtuon ko uban sa Mormons, pero nawad-an kog interes kay wala silay pagsalig sa Bibliya.
Usa ka adlaw niana, ang mga Saksi ni Jehova nanuktok sa akong balay. Nakita nako nga ang ilang gitudlo gibase sa Bibliya. Ang usa ka teksto nga ilang gibasa mao ang 1 Timoteo 2:3, 4. Kana nag-ingong kabubut-on sa Diyos nga ‘ang tanang matang sa tawo maluwas unta ug makadangat sa tukmang kahibalo sa kamatuoran.’ Nakadayeg ko nga ang mga Saksi nagpasiugda dili lang sa basta kahibalo kondili sa tukmang kahibalo nga gibase sa Bibliya.
Ang pagtuon sa Bibliya uban sa mga Saksi nakatabang nako sa pagbaton nianang tukmang kahibalo. Pananglitan, akong nakat-onan nga ang Diyos ug si Jesus dili bahin sa usa ka misteryosong Trinidad; hinunoa, sila magkalahi. (Juan 14:28; 1 Corinto 11:3) Nalipay kong nakakat-on nianang simpleng kamatuoran. Gianugnan ko sa panahon nga akong gigugol sa pagpaningkamot sa pagsabot sa butang nga dili masabtan!
Wala madugay, nagtambongan na kog tigom sa mga Saksi. Nakadayeg ko sa ilang pagkamahigalaon ug hataas nga moral nga sukdanan—mora silag mga santos. Ang ilang tinuod nga gugma nakakombinsir nako nga akong nakaplagan ang matuod nga relihiyon.—Juan 13:35.
MGA KAAYOHAN NGA AKONG NABATONAN: Human ko mabawtismohi, nakaila nako ang usa ka buotang dalaga nga si Diane. Nagdako siyang Saksi, ug daghan siyag hiyas nga akong naangayan. Sa ulahi, nagminyo mi. Ang pagmahal ug pagpaluyo ni Diane nako maoy tinuod nga panalangin gikan ni Jehova.
Gusto gyod namo ni Diane nga mobalhin diin gikinahanglan pag-ayo ang magsasangyaw sa maayong balita sa Bibliya. Sa 2010, mibalhin mi sa Belize, Central America. Dinhi, nangita mi sa mga tawong nahigugma sa Diyos ug gustong mahibalo sa kamatuoran sa Bibliya.
Nakabaton kog kalinaw sa hunahuna kay nahibalo na ko sa kamatuoran bahin sa Diyos ug sa iyang Pulong, ang Bibliya. Ingong bug-os-panahong magsasangyaw, nalipay ko nga daghan kog natabangan sa pagkakat-on sa Bibliya. Wala nay molabaw pa kay sa pagkakita nga ang Bibliya nakabag-o sa kinabuhi sa usa—sama sa nahitabo nako. Sa kataposan, nakaplagan ra gyod nako ang labing maayong paagi sa pagpasalamat sa Diyos sa kinabuhi nga akong natagamtam.
“Maayo Kaayo Sila Nako.”—MAURÍCIO ARAÚJO
NATAWO: 1967
NASOD: BRAZIL
KANIADTO: IMORAL
KAAGI: Nagdako ko sa Avaré, usa ka gamayng lungsod sa São Paulo. Kadaghanan sa namuyo dinhi mga mamumuo.
Si Papa namatay samtang gimabdos pa ko ni Mama. Sa bata pa ko, akong isul-ob ang sinina ni Mama kon wala siya. Nahimong binabaye ang akong lihok busa nagtuo ang mga tawo nga bayot ko. Sa ngadtongadto, nakigsekso ko sa batan-on ug hamtong nga mga lalaki.
Sa hapit na kong mag-20 anyos, magpangita kog ikadulog (lalaki man o babaye) bisan diin—sa bar, naytklab, ug bisan sa simbahan. Inigpista, magsinina kog binabaye ug mosayaw ko sa mga parada sa mga nagtuon ug samba. Sikat kaayo ko.
Daghan kog higalang mga bayot, pampam, ug adik. Ang pipila kanila nagpasulay nakog crack cocaine, ug sa wala madugay naadik ko. Usahay tibuok gabii ming magyupyop. Sa laing mga higayon, ako rang usa ang magyupyop sa tibuok adlaw. Miniwang ko pag-ayo maong gidungog kong gi-AIDS.
GIBAG-O SA BIBLIYA ANG AKONG KINABUHI: Nianang panahona, nakahimamat kog mga Saksi ni Jehova. Maayo kaayo sila nako. Usa sa mga tekstong gibasa nila mao ang Roma 10:13, nga nag-ingon: “Ang matag usa nga magatawag sa ngalan ni Jehova maluwas.” Gisilsil niana kanako ang kahinungdanon sa paggamit sa ngalan ni Jehova. Daghang higayon nga, human makayupyop ug cocaine sa tibuok gabii, akong buksan ang bentana, mohangad sa langit, ug moampo kang Jehova nga maghilak, nga mangayo niyag tabang.
Kay nabalaka ko kang Mama, nga naguol pag-ayong gidaot nako ang akong kinabuhi sa droga, midesidir kong undangon kana. Sa wala madugay, gidawat nako ang tanyag sa mga Saksi nga pagtuon sa Bibliya. Gipasaligan ko nila nga magpalig-on kana sa akong determinasyon nga talikdan ang droga—ug mao kadtoy nahitabo!
Samtang nagpadayon ko sa pagtuon, akong naamgohan nga kinahanglan kong magbag-o. Nalisdan ko ilabina sa pagbiya sa homoseksuwal nga mga buhat, kay nahimo na kanang bahin sa akong kinabuhi sukad sa pagkabata. Apan ang usa nga nakatabang mao ang paglikay sa daotang impluwensiya. Gibiyaan nako ang akong kanhing mga higala ug wala na ko moadtog bar ug naytklab.
Bisag dili sayon ang paghimo niana, nalipay ko sa pagkahibalo nga si Jehova nagmahal nako ug nakasabot sa akong pakigbisog. (1 Juan 3:19, 20) Sa 2002, gihunong na nako ang tanang homoseksuwal nga buhat, ug nianang tuiga nabawtismohan ko ingong Saksi ni Jehova.
MGA KAAYOHAN NGA AKONG NABATONAN: Nakadayeg kaayo si Mama sa akong kausaban maong nagtuon pod siya sa Bibliya. Ikasubo, siya naestrok. Bisan pa niana, padayon niyang naugmad ang gugma kang Jehova ug sa kamatuoran sa Bibliya.
Sulod na sa 8 ka tuig, ako nag-alagad ingong bug-os-panahong ministro, nga naggugol ug daghang panahon sa pagtudlo sa uban bahin sa Bibliya. Angkonon ko nga usahay kinahanglan kong makigbisog sa daotang tinguha. Apan mapalig-on ko sa pagkahibalo nga kon pugngan nako ang akong kaugalingon, akong mapahimut-an si Jehova.
Tungod sa akong pagpakigsuod kang Jehova ug pagkinabuhi sa paaging makapahimuot kaniya, midako ang akong pagtahod sa kaugalingon. Karon, malipayon na ko.
“Mora Kog Baril nga di Mapuno.”—LUKA ŠUC
NATAWO: 1975
NASOD: SLOVENIA
KANIADTO: PALAINOM
KAAGI: Natawo ko sa Ljubljana, ang kaulohan sa Slovenia. Malipayon ang akong pagkabata hangtod sa edad nga kuwatro. Dayon si Papa naghikog. Human niini nga trahedya, si Mama nangamas pag-ayo aron mabuhi mi sa akong magulang nga lalaki.
Sa edad nga 15, mipuyo ko sa akong apohang babaye. Ganahan ko didto kay kadaghanan sa akong mga higala naa ra sa palibot. Mas gawasnon pod ko kay sa didto ko sa amo. Sa edad nga 16, nakabarkada kog hilig mag-inom sa hinapos sa semana. Nagpataas kog buhok, nagsininag binugoy, ug sa ulahi nagsugod pagpanigarilyo.
Misulay kog lainlaing matang sa droga, apan mas ganahan kong moinom. Sa primero, pipila lang ka baso ang akong mainom, apan kadugayan makahurot na kog kapin sa usa ka botelya. Maayo kaayo kong motago sa akong kahubog. Sagad, baho lang sa akong gininhawa ang magpaila nga nakainom ko. Apan nakahurot na diay kog pipila ka botelyang bino o serbesa—ug miinom pa gyod ug vodka!
Daghang higayon nga akoy moagak sa akong mga higalang nagsusapinday sa kahubog human magbuntag sa diskohan, bisan tuod mas daghan pa tingali kog nainom nila. Usa ka adlaw niana, nadunggan nako ang usa sa akong mga barkada nga miingong mora kog baril nga di mapuno—usa ka matamayong ekspresyon sa Slovenia para sa tawong way makalupig sa inom. Nahiubos kaayo ko.
Misugod ko pagpamalandong bahin sa akong kinabuhi. Mibati kong walay pulos. Morag wala koy nahimong maayo.
GIBAG-O SA BIBLIYA ANG AKONG KINABUHI: Nianang panahona, akong namatikdan nga usa sa akong mga klasmet ang nagbag-o; siya nahimong mas lumo. Kay naikag niini nga kausaban, ako siyang giimbitar ug pagpangaon. Sa among pag-estoryahay, siya miingon nga nagtuon siyag Bibliya uban sa mga Saksi ni Jehova. Iyang gipaambit nako ang pipila sa mga butang nga iyang nakat-onan, nga ang tanan bag-o kaayo kanako kay nagdako ko nga walay relihiyon. Misugod ko pagtambong sa tigom sa mga Saksi ni Jehova ug pagtuon sa Bibliya uban kanila.
Tungod sa pagtuon sa Bibliya, nabuksan ang akong mga mata sa daghang gamhanan, makapadasig nga kamatuoran. Pananglitan, akong nakat-onan nga kita nagkinabuhi na sa gitawag sa Bibliya nga “kataposang mga adlaw.” (2 Timoteo 3:1-5) Nakat-onan sab nako nga sa dili madugay wagtangon sa Diyos ang mga daotan ug hatagag kahigayonan ang mga matarong nga mabuhi sa walay kataposan sa Paraiso sa yuta. (Salmo 37:29) Gibati nako ang kusganong tinguha nga hinloan ang akong kinabuhi aron mahiuban niining maayong mga tawo.
Akong gipaambit sa akong mga barkada ang kamatuoran sa Bibliya nga akong nakat-onan. Kadaghanan nila mibiaybiay nako, apan maayo hinuon ang resulta niini kay nakita nako nga dili diay sila tinuod nga higala. Nakaamgo ko nga ang akong pagkapalainom nalangkit sa akong pagpilig mga kauban. Mahinamon silang magpaabot sa hinapos sa semana aron mag-inom na pod.
Gibiyaan nako ang kanhi nakong mga higala ug gipahimuslan ang makapadasig nga panag-ubanay sa mga Saksi ni Jehova. Nadasig kaayo ko kay sila tinuod nga nahigugma sa Diyos ug naningkamot sa pagsunod sa iyang sukdanan. Sa ngadtongadto, nabuntog ra nako ang pagkapalainom.
MGA KAAYOHAN NGA AKONG NABATONAN: Mapasalamaton ko kang Jehova kay wala na ko magdepende sa ilimnon aron malipay. Ambot kon unsay akong gidangatan kon wala ko mobiya sa akong bisyo. Kombinsido ko nga mas maayo ang akong kinabuhi karon.
Sulod na sa 7 ka tuig, ako nakapribilehiyo sa pag-alagad sa sangang buhatan sa mga Saksi ni Jehova sa Slovenia. Ang pagkaila kang Jehova ug ang pag-alagad kaniya naghimo sa akong kinabuhi nga tinuod nga malipayon.