4 Pagpasaylo

Ang pagpasaylo nagpasabot nga imo nang gikalimtan ang sayop nga nahimo ug ang kasuko nga imong gibati. Ang pagpasaylo wala magpasabot nga imong gikonsentir ang sayop o pagpakaaron-ingnon nga wala ray problema.

PRINSIPYO SA BIBLIYA: “Padayon sa pagpailob sa usag usa ug kinasingkasing nga magpinasayloay kon ang usa dunay reklamo batok sa lain.”​—Colosas 3:13.

“Kon gimahal nimo ang usa ka tawo, dili ka magpokus sa iyang kahuyangan, kondili sa iyang mga paningkamot nga matul-id ang iyang mga sayop.”​—Aaron.

Kon magdumot ka, makahatag na nimog pisikal ug emosyonal nga kadaot​—makadaot sab na sa inyong kaminyoon.

“Dihay higayon nga nangayog pasaylo ang akong bana kay nasakitan kaayo ko sa iyang nahimo. Nalisdan ko sa pagpasaylo niya. Pero sa kadugayan napasaylo ra nako siya, pero nagmahay ko nga wala dayon to nako himoa. Tungod adto, naapektohan ang among relasyon.”​—Julia.

SUSIHA ANG IMONG KAUGALINGON

Kon nasakitan ka sa gihimo o gisulti sa imong kapikas, pamalandonga:

• ‘Sensitibo ra ba kaayo ko?’

• ‘Seryoso ba gyod ang iyang sayop nga kinahanglan siyang mangayog pasaylo nako, o mapalabay ra nako?’

HISGOTI UBAN SA IMONG KAPIKAS

• Unsa ka dugay ta makapasaylo sa usag usa?

• Unsay atong himoon aron dali ra tang makapasaylo?

MGA SUGYOT

• Kon nasakitan ka, ayawg kuwestiyona ang motibo sa imong kapikas.

• Palabya ang sayop sa imong kapikas, ug hinumdomi nga “kitang tanan mapandol sa makadaghan.”​—Santiago 3:2.

“Dali rang magpasaylo kon parehas ming nasayop, pero lisod magpasaylo kon usa ra namo ang nasayop. Aron makapasaylo, kinahanglan kang magpaubos.”​—Kimberly.

PRINSIPYO SA BIBLIYA: “Pakighusay dayon.”​—Mateo 5:25.