TABANG ALANG SA PAMILYA
Kon Unsaon Nimo Pagtabang sa Imong Anak nga Motaas ang Iyang Grado
Walay gana moeskuyla ang imong anak, ug dili siya magtuon ug maghimog homwork. Ang resulta? Miubos ang iyang grado ug nausab ang iyang batasan. Unsaon nimo pagtabang sa imong anak nga motaas ang iyang grado?
Ang angay nimong mahibaloan
Ang presyur makasamot sa problema. Kon imong presyuron ang imong anak, ma-stress siya sa eskuylahan ug sa balay! Aron dili ma-stress, posibleng mamakak siya, itago ang gagmayng grado, pekeon ang imong pirma sa iyang card, o mosibat sa klase. Mosamot lang ang problema.
Posibleng kadaot sa premyo. “Aron madasig ang among anak nga babaye, amo siyang hatagag premyo sa tag-as nga mga grado,” miingon ang amahan nga si Andrew, “pero napokus na lang hinuon siya sa premyo. Kon makakuha siyag ubos nga grado, mas maguol siya nga wala siya makadawat ug premyo imbes mas maguol sa iyang ubos nga grado.”
Dili maayo kon basolon ang mga titser. Basig hunahunaon sa imong anak nga ang maayong mga resulta dili kinahanglang hagoan. Lagmit basolon pod niya ang uban sa iyang mga sayop ug magdahom nga ang uban maoy mosulbad sa iyang mga problema. Busa posible nga dili makat-onan sa imong anak ang katakos nga gikinahanglan sa pagkahamtong—dawaton ang resulta sa iyang binuhatan.
Ang imong mahimo
Kontrolaha ang imong emosyon. Kon nasuko ka, ayaw unag estoryahi ang imong anak bahin sa iyang grado. “Kon kalmado ug masinabtanon mi sa akong asawa, mas maayo ang mga resulta,” miingon ang amahan nga si Brett.
Prinsipyo sa Bibliya: “Magmaabtik sa pagpaminaw, magmahinay sa pagsulti, magmahinay sa pagkapungot.”—Santiago 1:19.
Sayra ang tinuod nga problema. Ang komon nga mga rason sa gagmayng grado mao ang pagdaogdaog o bullying, pagbalhin ug eskuylahan, kahadlok sa mga eksam, mga problema sa pamilya, kakulang sa tulog, walay klarong eskedyul, o kakulang sa konsentrasyon. Ayawg hunahunaa nga tapolan ra ang imong anak.
Prinsipyo sa Bibliya: “Siya nga adunay hait nga salabotan sa usa ka butang makakaplag ug maayo [o, kalamposan].”—Proverbio 16:20.
Paningkamoti nga walay mga kabaldahan sa pagtuon. Paghimog eskedyul para sa homwork ug pagtuon. Seguroa nga ang lugar diin maghimog homwork ang imong anak walay mga kabaldahan (sama sa TV ug cellphone). Bahinbahina sa mugbo nga sesyon ang paghimog homwork aron makapokus ang imong anak. Si Hector, usa ka amahan nga taga-Germany, miingon, “Kon dunay umaabot nga eksam, mag-anam-anam mig tuon kada adlaw imbes magtuon dihang hapit na kaayo ang eksam.”
Prinsipyo sa Bibliya: “Adunay tinudlong panahon alang sa tanang butang.”—Ecclesiastes 3:1.
Dasiga nga mokat-on. Kon mas masabtan sa imong anak kon unsay mga kaayohan sa iyang pag-eskuyla karon, mas madasig siyang mokat-on. Pananglitan, ang math makatabang niya sa pagbadyet sa iyang kuwarta.
Prinsipyo sa Bibliya: “Batoni ang kaalam, batoni ang pagsabot. . . . Pabilhi kini pag-ayo.”—Proverbio 4:5, 8.
Tip: Tabangi ang imong anak sa iyang homwork, pero ayaw nig himoa para niya. Si Andrew miingon, “Ang among anak nga babaye nagsalig nga kami ray mohimo sa iyang homwork imbes siya.” Tudloi ang imong anak kon unsaon paghimog homwork nga siya ra.