Si Jacob May Dakong Pamilya

TAN-AWA ra kining dakong pamilya. Kini sila mao ang 12 ka anak lalaki ni Jacob. Ug siya may mga anak babaye usab. Sayron ta ang pipila sa ilang mga ngalan.

Si Leah nanganak kang Ruben, Simeon, Levi ug Juda. Si Raquel wala manganak mao nga iyang gihatag ang iyang ulipong babaye si Bilha kang Jacob. Si Bilha nakaanak duha ka anak lalaki, si Dan ug Naphtali. Unya si Leah mihatag sa iyang ulipong babaye nga si Silpa kang Jacob. Si Silpa nanganak kang Gad ug Aser. Unya si Leah nakapanganak dugang duha ka anak lalaki, si Isakar ug Zabulon.

Sa kataposan si Raquel nakaanak. Iyang gihinganlan siyang Jose. Sa ulahi siya nahimong inila kaayo. Kini mao ang 11 ka anak lalaki nga nangatawo kang Jacob sa nagpuyo siya uban sa amahan ni Raquel, si Laban.

Sa paglabay sa panahon, si Jacob nagtigom sa iyang dakong pamilya ug sa tanan niyang karnero ug mga baka, ug misugod sa taas nga panaw balik sa Canaan.

Balik sa Canaan, si Raquel nanganak ug laing anak lalaki. Naglisod si Raquel, ug sa kataposan siya namatay samtang nanganak. Pero ang gamay batang lalaki maayo ra man. Si Jacob naghinganlan kaniya ug Benjamin.

Magtinguha kita sa paghinumdom sa mga ngalan sa 12 ka anak lalaki ni Jacob tungod kay ang tibuok nasod sa Israel nagagikan man kanila. Sa pagkamatuod, ang 12 ka tribo sa Israel gipanghinganlan sumala sa 10 ka anak lalaki ni Jacob ug sa duha ka anak lalaki ni Jose. Si Isaac, ang amahan ni Jacob, buhi pa sa daghang tuig tapos kining tanang batang lalaki nangatawo, ug nagmalipayon gayod siyang nakabaton sa daghang apo. Apan tan-awon ta unsay nahitabo sa iyang apong babaye, si Dina.