Independensiya

Kahubitan: Usa ka kahimtang nga ang usa ka tawo dili, o nagaangkon nga dili, nagadepende sa uban, dili ubos sa ilang pagtultol o impluwensiya. Tungod kay gihatagan ug kabubut-ong gawas (free will), ang mga tawo adunay kinaiyanhong tinguha alang sa gidak-on sa pagkinaugalingon o independensiya. Kon masobrahan na kaayo, bisan pa niana, kining tinguhaa magpatunghag pagkamasinupakon, pag-alsa pa gani.

Sa dihang isalindot sa mga tawo ang mga sukdanan sa Bibliya, sila ba gayod nakahupot ug kagawasan?

Roma 6:16, 23: “Wala ba kamo masayod nga kon padayong itugyan ninyo ang inyong kaugalingon ingong mga ulipon ngadto kang bisan kinsa sa pagsunod kaniya, kamo mga ulipon niya tungod kay kamo nagasugot kaniya, sa sala man nga nagahatod sa kamatayon o sa pagkamasinugtanon nga nagahatod sa pagkamatarong? . . . Ang bayad sa sala mao ang kamatayon, apan ang gasa nga igahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.”

Gal. 6:7-9: “Ayawg palimbong: Ang Diyos dili mabiaybiay. Kay bisan unsay igapugas sa usa ka tawo, kini mao usab ang iyang pagaanihon; kay siya nga nagapugas may kalabotan sa iyang unod magaani ug pagkadunot gikan sa iyang unod, apan siya nga nagapugas may kalabotan sa espiritu magaani ug kinabuhing walay kataposan gikan sa espiritu. Busa dili kita mohunong sa pagbuhat sa mas maayo.”

Seksuwal nga moralidad: “Siya nga makihilawason nagapakasala batok sa iyang kaugalingong lawas.” (1 Cor. 6:18) “Ang bisan kinsa nga nagapanapaw sa usa ka babaye . . . nagalaglag sa iyang kaugalingong kalag.” (Prov. 6:32) (Mahitungod sa homoseksuwalidad, tan-awa ang Roma 1:24-27.) (Ang ginadili seksuwal nga mga relasyon mahimong, sa makadiyot, daw makalipay. Apan kini mohatod ngadto sa makaluod nga mga sakit, dili gustong pagkamabdos, aborsiyon, pangabugho, nadaot nga konsensiya, kahigwaos sa pagbati, ug tino ang dili pag-uyon sa Diyos, nga kaniya ang atong kalaoman sa umaabot nga kinabuhi nahasalig.)

Materyalistikanhong mga pangagpas: “Sila nga maikagon gayod nga mahimong dato mangahulog sa tentasyon ug sa bitik ug daghang binuang ug makadaot nga mga kailibgon, nga nagaunlod sa mga tawo ngadto sa kalaglagan ug kaparotan. Kay ang gugma sa salapi mao ang gamot sa tanang matang sa makadaot nga mga butang, ug sa pagpangagpas alang niining gugmaha ang uban nanghisalaag gikan sa pagtuo ug gipalagbaslagbasan ang ilang kaugalingon sa daghang kasakitan.” (1 Tim. 6:9, 10) “Ako moingon sa akong kalag: ‘Kalag, gikatagan-an na ikawg daghan maayong butang alang sa daghang katuigan; pumahulay ka, kumaon, uminom, magsadya ka.’ Apan ang Diyos miingon kaniya, ‘Buang ka, karong gabhiona sila nagakinahanglan sa imong kalag gikan kanimo. Nan, kinsa ang makapanag-iya sa mga butang nga imong gitagana?’ Maingon niana ang usa ka tawo nga nagatigom ug bahandi alang sa iyang kaugalingon apan dili bahandianon ngadto sa Diyos.” (Luc. 12:19-21) (Ang materyal nga mga kabtangan dili makahatag ug dumalayong kalipay. Ang mga panlimbasog sa pagbaton ug bahandi sagad mohatod ngadto sa dili malipayong mga pamilya, nadaot nga panglawas, espirituwal nga kagun-oban.)

Paghinobra sa alkohol: “Kinsa ang may kasakit? Kinsa ang may kasubo? Kinsa ang may panagkabingkil? Kinsa ang may pagbagulbol? Kinsa ang may mga samad nga walay gipasikaran? Kinsa ang may kahanap sa mga mata? Mao silang nagapabilin sa pag-inom ug bino, silang nagapanggula sa pagpangita sa sinambog nga bino. Sa kataposan kini magapamaak sama sa serpente, ug magapasirit ug hilo sama sa bitin.” (Prov. 23:29, 30, 32) (Ang pag-inom sa sinugdan daw makatabang sa tawo sa pagkalimot sa iyang mga gumonhap, pero dili kana magpasulbad niana. Sa dihang siya may panimuot na, ang mga suliran nagapabilin gihapon, sagad madugangan pa. Sa dihang maghingapin sa pag-inom, ang alkohol magadaot sa pagtahod-kaugalingon sa usa ka tawo, sa iyang panglawas, sa iyang panimalaynong kinabuhi, sa iyang relasyon sa Diyos.)

Abuso sa droga: Tan-awang mga panid 147-153, ubos sa “Droga.”

Daotang mga panag-uban: Kon sultihan ka sa usa ka gang (barkada) nga hibalo sila sa paagi sa pagbaton ug daghang kuwarta nga dili na maghago kaayo, mokuyog ka ba kanila? “Ayaw paglakat sa dalan uban kanila. Ilikay ang imong tiil gikan sa ilang alagianan. Kay ang ilang mga tiil nanagdalagan ngadto sa tumang pagkadaotan, ug sila padayong nagadali sa pag-ula ug dugo.” (Prov. 1:10-19) Kon ang usa ka tawo dili magsisimba ni Jehova, apan siya maorag buotan kaayo, isipon mo ba siya nga angay nga higala? Si Sichem maoy anak nga lalaki sa usa ka Canaanhong pangulo, ug ang Bibliya nag-ingon nga siya mao ang “labing tinamod sa tibuok nga panimalay sa iyang amahan,” apan iyang “gikuha [si Dina] ug mitipon sa paghigda kaniya ug gilugos siya.” (Gen. 34:1, 2, 19) May kalainan ba gayod alang kanimo ang punto nga ang ubang mga tawo mahimong dili motuo sa mga kamatuoran nga imong nakat-onan gikan sa Pulong sa Diyos? “Ayaw pagpahisalaag. Ang daotang mga panag-uban makadaot sa mapuslanong pamatasan.” (1 Cor. 15:33) Unsa man ang pagbati ni Jehova kon ang gipili mo ingong imong mga higala mao silang wala mahigugma kaniya? Ngadto sa usa ka hari sa Juda nga nagbuhat niana, ang tigpamaba ni Jehova miingon: “Ang kaaligutgot anaa sa ibabaw nimo gikan sa atubangan ni Jehova.”—2 Cron. 19:1, 2.

Kinsa ang nag-awhag sa mga tawo sa pagbati nga libre sa paghimo sa ilang kaugalingong mga desisyon nga walay pagtagad sa mga sugo sa Diyos?

Gen. 3:1-5: “Karon ang bitin [nga gigamit ingong tigpamaba ni Satanas; tan-awang Pinadayag 12:9] . . . misugod kini sa pag-ingon ngadto sa babaye: ‘Tinuod ba gayod nga nag-ingon ang Diyos nga kamo dili makakaon gikan sa tanang kahoy sa tanaman?’ Ug niini ang babaye miingon ngadto sa bitin: ‘Makakaon kami sa bunga sa mga kahoy sa tanaman. Apan sa pagkaon sa bunga sa kahoy nga anaa sa taliwala sa tanaman, ang Diyos miingon, “Dili gayod kamo magakaon gikan niana, dili, dili gayod kamo maghikap niana aron kamo dili mamatay.”’ Ug niini ang bitin miingon ngadto sa babaye: ‘Dili gayod kamo mamatay. Kay hingbaloan sa Diyos nga sa maong adlaw nga kamo mokaon gikan niini mangabuka ang inyong mga mata ug kamo mahimo nga sama sa Diyos, nga manghibalo sa maayo ug daotan.’”

Unsang espiritu ang nagapalihok sa usa ka tawo sa dihang iyang isalikway ang kabubut-on sa Diyos aron tagbawon ang iyang personal nga mga kailibgon?

Efe. 2:1-3: “Kamo gibuhi sa Diyos bisan pa kamo mga patay sa inyong kalapasan ug kasal-anan, nga kamo kaniadto naggawi sumala sa sistema sa mga butang niining kalibotana [nga si Satanas mao ang magmamando], uyon sa magbubuot sa kagamhanan sa kahanginan, ang espiritu nga mao karon ang nagalihok diha sa mga anak sa pagkamasupilon. Oo, sa ilang taliwala kitang tanan nanagkinabuhi kaniadto sa atong kaugalingon sumala sa mga kailibgon sa atong unod, nga nagbuhat sa mga butang nga gipangandoy sa unod ug hunahuna, ug nga kita sa kinaiya mga anak sa kapungot nga sama ra sa uban.”

Alang niadtong nagaangkon sa pag-alagad sa Diyos unsang independiyenteng mga tinamdan nga hinungdanong pagalikayan?

Prov. 16:18: “Ang pagkagarboso magauna sa pagkalaglag, ug ang mapahitas-ong espiritu magauna sa pagkahulog.”

Prov. 5:12: “Ikaw kinahanglang moingon: ‘Giunsa ko pagdumot ang disiplina ug ang akong kasingkasing nagtamay bisan sa pagbadlong!’” (Ang maong tinamdan mohatod sa usa ka tawo ngadto sa seryosong mga suliran, ingon sa gipakita sa konteksto.)

Num. 16:3: “Busa nanaghiusa sila pagtingob batok kang Moises ug Aaron [kinsa gigamit ni Jehova ingong mga magtatan-aw sa iyang katawhan] ug namulong ngadto kanila: ‘Igo na alang kaninyo, kay ang tibuok katilingban balaan ang tanan kanila ug si Jehova anaa sa ilang taliwala. Nan, nganong nagapataas kamo sa inyong kaugalingon ibabaw sa kongregasyon ni Jehova?’”

Jud. 16: “Kining mga tawhana mga bagulbolan, mga reklamador sa ilang kahimtang sa kinabuhi, nanaggawi uyon sa ilang kaugalingong mga pangibog, ug ang ilang mga baba nagasultig mga pasiatab, samtang sila nagaulog-ulog sa mga tawo alang sa ilang kaugalingong benepisyo.”

3 Juan 9: “Si Diotrepes, nga buot gayod magpakalabaw sa taliwala kanila, nagadumili sa pagdawat sa bisan unsang butang gikan kanamo uban ang pagtahod.”

Prov. 18:1: “Siya nga nagalain sa iyang kaugalingon nagapangita sa iyang kaugalingong hakog nga tinguha; batok sa tanang mapuslanong kaalam siya mapusgay.”

Sant. 4:13-15: “Tan-awa, karon, kamo nga mag-ingon: ‘Karon o ugma mangadto kami niining siyudara ug didto pabilin kamig usa ka tuig, ug kami magpatigayon ug manapi,’ apan kamo wala mahibalo kon unsa ang inyong kinabuhi ugma. Kay kamo usa ka alisngaw nga sa makadiyot magapadayag ug unya mahanaw. Hinunoa, kinahanglang magaingon kamo: ‘Kon itugot ni Jehova, kami mabuhi ug among pagabuhaton usab kini o kana.’”

Sa dihang ang tinguha sa usa ka tawo sa independensiya motultol kaniya sa pagsundog sa kalibotan nga gawas na sa Kristohanong kongregasyon, kang kinsang pagbuot nga siya napailalom? Ug unsa ang pag-isip sa Diyos niini?

1 Juan 2:15; 5:19: “Ayaw higugmaa ang kalibotan ni ang mga butang sa kalibotan. Kon may bisan kinsa nga mahigugma sa kalibotan, ang gugma sa Amahan wala diha kaniya.” “Ang tibuok kalibotan anaa sa gahom sa daotan.”

Sant. 4:4: “Busa, bisan kinsa nga buot mahigala sa kalibotan nagahimo sa iyang kaugalingon nga kaaway sa Diyos.”