“Ang Kataposan Anaa Karon Kanimo”

1, 2. (a) Unsay gihimo ni Ezequiel nga katingad-an? (Tan-awa ang hulagway sa sinugdan sa kapitulo.) (b) Unsay gitagna sa maong mga lihok ni Ezequiel?

ANG katingad-ang lihok ni Ezequiel dali kaayong nabaniog sa Hudiyong mga destiyero, o binihag, sa Babilonya. Usa ka semana na siyang naglingkod nga wala sa hunahuna ug wala magtingog taliwala sa mga destiyero, ug dayon kalit siyang mitindog, misulod sa iyang balay, ug nanirado. Samtang nagtan-aw niya ang iyang mga silingan nga nahibulong, siya migawas ug mikuhag tisa, unya iyang gibutang kini sa iyang atubangan ug gikulitan. Dayon si Ezequiel naghimog gamayng paril nga walay tingogtingog.​—Ezeq. 3:10, 11, 15, 24-26; 4:1, 2.

² Ang mga nanan-aw, nga nagkadaghan, tingali nahibulong, ‘Unsay ipasabot sa iyang gihimo?’ Sa ulahi na nasabtan sa maong Hudiyong mga destiyero nga ang katingad-ang lihok ni propetang Ezequiel nagtagna sa nagsingabot nga makahadlok nga hitabo nga magpakita sa matarong nga kasuko ni Jehova nga Diyos. Unsa kanang hitaboa? Unsay epekto niini sa karaang Israel? Unsay gitudlo niini sa mga magsisimba ni Jehova karon?

3, 4. (a) Unsang tulo ka bahin sa paghukom sa Diyos ang gimostra ni Ezequiel? (b) Giunsa pagmostra ni Ezequiel ang paglikos sa Jerusalem?

³ Sa mga 613 B.C.E., gisugo ni Jehova si Ezequiel sa pagmostra sa tulo ka bahin sa umaabot nga paghukom sa Diyos batok sa Jerusalem. Kini mao ang paglikos sa siyudad, ang pag-antos sa mga molupyo, ug ang pagkalaglag sa siyudad ug katawhan niini.a Atong hisgotan nga mas detalyado kining tulo.

⁴ Ang paglikos sa Jerusalem. Giingnan ni Jehova si Ezequiel: “Pagkuhag tisa ug ibutang kini sa imong atubangan. . . . Likosi kini.” (Basaha ang Ezequiel 4:1-3.) Ang tisa nagsimbolo sa siyudad sa Jerusalem, ug si Ezequiel nagsimbolo sa kasundalohan sa Babilonya nga gamiton ni Jehova. Gisugo sab si Ezequiel sa paghimog gamayng paril, bungdo nga pang-atake, ug troso nga panglumpag. Iya ning ibutang palibot sa tisa. Kini nagsimbolo sa mga galamiton sa mga kaaway sa Jerusalem sa paglikos ug pag-atake niini. Aron ipakita nga samag puthaw ka kusgan ang mga kaaway, si Ezequiel magbutang ug “puthawng lutoanan” taliwala kaniya ug sa siyudad. Dayon iyang ipaatubang ang iyang “nawong batok” sa siyudad. Kining tanan nagsilbing ‘ilhanan alang sa panimalay ni Israel’ nga dunay mahitabo nga wala gyod nila damha. Si Jehova mogamit ug kaaway nga kasundalohan sa paglikos sa Jerusalem, ang pangunang siyudad sa katawhan sa Diyos, diin nahimutang ang templo sa Diyos!

 5. Giunsa pagmostra ni Ezequiel ang mahitabo sa mga molupyo sa Jerusalem?

⁵ Ang pag-antos sa mga molupyo sa Jerusalem. Gisugo ni Jehova si Ezequiel: “Pagkuhag trigo, sebada, mga liso, lentihas, dawa, ug espelta [klase sa trigo] . . . ug himoa kining tinapay,” ug “timbangon nimo ang imong pagkaon, ug 20 ka siklo ang imong kaonon kada adlaw.” Dayon miingon si Jehova: “Putlon nako ang suplay sa pagkaon.” (Ezeq. 4:9-16) Niining tungora, dili na kasundalohan sa Babilonya ang gisimbolohan ni Ezequiel, kondili mga molupyo na sa Jerusalem. Ang gihimo ni Ezequiel nagtagna nga monihit ang pagkaon sa siyudad tungod sa paglikos. Nianang panahona, ang ilang tinapay gamitag dili komon nga mga sangkap, nga nagpakita nga bisan unsa na lay kaonon sa mga tawo. Unsa ka grabe ang kagutom? Si Ezequiel, nga daw nakigsulti sa mga molupyo sa Jerusalem, miingon: “Kaonon sa mga amahan nga anaa sa imong taliwala ang ilang mga anak, ug kaonon sa mga anak ang ilang mga amahan.” Daghan ang mag-antos tungod sa “makamatay nga mga udyong sa gutom” ug “mohugo.”​—Ezeq. 4:17; 5:10, 16.

 6. (a) Unsang duha ka papel ang dungan nga gimostra ni Ezequiel? (b) Unsay gipasabot sa sugo sa Diyos nga ‘timbangon ug bahinbahinon ang buhok’?

⁶ Ang pagkalaglag sa Jerusalem ug sa katawhan niini. Niining bahina sa tagna, gidungan ni Ezequiel pagmostra ang duha ka papel. Una, iyang gimostra kon unsay himoon ni Jehova. Giingnan siya ni Jehova: “Pagkuhag hait nga espada aron magamit nimo ingong labaha sa tig-alot.” (Basaha ang Ezequiel 5:1, 2.) Ang kamot ni Ezequiel nga naggunit sa espada nagsimbolo sa kamot ni Jehova​—ang iyang paghukom—​nga gipahamtang pinaagi sa kasundalohan sa Babilonya. Ikaduha, gimostra ni Ezequiel ang maagoman sa mga Hudiyo. Giingnan siya ni Jehova: “Kiskisi ang imong ulo ug ang imong bungot.” Ang pagkiskis sa ulo ni Ezequiel nagsimbolo kon unsaon pag-atake ug pagpatay ang mga Hudiyo. Dugang pa, ang sugo nga ‘magkuhag timbangan ug bahinbahinon ang buhok’ nagpaila nga bug-os gyong ipahamtang ni Jehova ang iyang paghukom batok sa Jerusalem.

 7. Nganong giingnan ni Jehova si Ezequiel nga bahinon ang iyang buhok sa tulo ug lainlain ang iyang himoon sa kada bahin?

⁷ Nganong giingnan ni Jehova si Ezequiel nga bahinon ang iyang buhok sa tulo ug lainlain ang iyang himoon sa kada bahin? (Basaha ang Ezequiel 5:7-12.) Gisunog ni Ezequiel ang usa ka bahin sa iyang buhok sa “sulod sa siyudad” aron ipakita nga ang ubang molupyo sa Jerusalem mamatay sa siyudad. Gitagodtagod ni Ezequiel pinaagig espada ang usa pa ka bahin sa iyang buhok sa “tibuok palibot sa siyudad” aron ipakita nga ang ubang molupyo mamatay sa gawas sa siyudad. Iyang gisabwag sa hangin ang kataposang bahin sa iyang buhok aron ipakita nga ang ubang molupyo magkatibulaag sa ubang nasod, pero may “espada” nga ‘mogukod’ nila. Busa bisan asa pa mangadto ang mga mangikyas, dili sila magmalinawon.

 8. (a) Unsang paglaom ang gihatag sa tagna ni Ezequiel? (b) Sa unsang paagi natuman ang tagna bahin sa “pipila ka lugas”?

⁸ Pero ang tagna nga gimostra ni Ezequiel naghatag sab ug paglaom. Bahin sa buhok nga gikiskis ni Ezequiel, giingnan siya ni Jehova: “Pagkuha usab ug pipila ka lugas . . . ug ibutang kini diha sa mga pilo sa imong besti.” (Ezeq. 5:3) Kana nga sugo nagpaila nga sa mga Hudiyong magkatibulaag sa mga nasod, dunay diyutayng maluwas. Ang uban niadtong “pipila ka lugas” maapil sa mga destiyero nga mamalik sa Jerusalem human sa 70 ka tuig nga pagkabihag sa Babilonya. (Ezeq. 6:8, 9; 11:17) Natuman ba kanang tagnaa? Oo. Daghang katuigan human matapos ang pagkabihag sa Babilonya, si propetang Haggeo miingon nga ang uban sa nagkatibulaag nga mga Hudiyo namalik sa Jerusalem. Sila “ang mga tigulang nga nakakita sa kanhing balay,” ang templo ni Solomon. (Esd. 3:12; Hag. 2:1-3) Giseguro ni Jehova nga mapreserbar gyod ang putling pagsimba, sumala sa iyang gisaad. Ang dugang nga detalye niini nga pagpasig-uli hisgotan sa Kapitulo 9 niining publikasyona.​—Ezeq. 11:17-20.

9, 10. Unsang importanteng mga hitabo sa umaabot ang gipahinumdom kanato sa mga tagna ni Ezequiel?

⁹ Ang mga hitabo nga gimostra ni Ezequiel nagpahinumdom nato sa importanteng mga hitabo sa umaabot nga gitagna sa Pulong sa Diyos. Unsay pipila niini? Sama sa nahitabo sa karaang siyudad sa Jerusalem, si Jehova mogamit ug sekular nga mga puwersa sa paghimo sa butang nga wala damha​—ilang atakehon ang tanang bakak nga relihiyon sa yuta. (Pin. 17:16-18) Sama nga ang pagkalaglag sa Jerusalem maoy “talagsaong katalagman,” ang “dakong kasakitan” ug ang gubat sa Armagedon maoy mga hitabo nga “wala pa mahitabo sukad.”​—Ezeq. 5:9; 7:5; Mat. 24:21.

¹⁰ Ang Pulong sa Diyos nagpakita nga ang indibiduwal nga mga tigsuportar sa bakak nga relihiyon makaikyas sa umaabot nga kalaglagan sa relihiyosong mga institusyon. Sa kahadlok, sila moduyog sa tanang klase sa mga tawo sa pagpangitag katagoan. (Zac. 13:4-6; Pin. 6:15-17) Ang ilang kahimtang magpahinumdom nato sa nahitabo sa mga molupyo sa karaang Jerusalem nga nakaikyas sa kalaglagan niini ug gisabwag “sa hangin.” Sa ato nang nahisgotan sa parapo 7, bisag nakaikyas sila niadtong panahona, si Jehova mihulbot ug “espada sa paggukod” nila. (Ezeq. 5:2) Sa susama, walay tagoanan nga dangpan sa mga nakaikyas sa pag-atake sa relihiyon ang makapanalipod nila gikan sa espada ni Jehova. Sa Armagedon, sila patyon, apil sa tanang samag kanding nga mga tawo.​—Ezeq. 7:4; Mat. 25:33, 41, 46; Pin. 19:15, 18.

11, 12. (a) Kay nasabtan nato ang tagna ni Ezequiel bahin sa paglikos sa Jerusalem, unsay epekto niini sa atong panglantaw sa ministeryo karon? (b) Unsa unyay lagmit nga kausaban sa atong buluhatong pagsangyaw ug sa atong mensahe?

¹¹ Kay nasabtan nato ni nga tagna, unsay epekto niini sa atong panglantaw sa ministeryo ug sa pagkadinalian niini? Gisilsil gyod niini kanato nga kinahanglan natong himoon ang atong labing maarangan aron tabangan ang mga tawo nga mahimong alagad ni Jehova. Ngano? Kay ang nabiling panahon sa paghimog mga tinun-an sa tanang kanasoran mubo na lang. (Mat. 28:19, 20; Ezeq. 33:14-16) Dihang ang “sungkod” (sekular nga mga puwersa) magsugod na pag-atake sa relihiyon, dili na ta magsangyaw ug mensahe sa kaluwasan. (Ezeq. 7:10) Kon bahin sa pagsangyaw sa maayong balita, kita “maamang,” sama nga dihay higayon sa ministeryo ni Ezequiel nga siya naamang, o mihunong sa pagsangyaw sa iyang mensahe. (Ezeq. 3:26, 27; 33:21, 22) Tinuod, human malaglag ang bakak nga relihiyon, ang mga tawo mahimong desperado sa ‘pagpangitag panan-awon sa usa ka propeta,’ pero walay makaluwas nga instruksiyon nga ihatag kanila. (Ezeq. 7:26) Ang panahon nga makadawat sila niana nga instruksiyon ug mahimong tinun-an sa Kristo natapos na.

¹² Pero ang atong buluhaton sa pagsangyaw dili mahunong. Ngano? Kay sa dakong kasakitan, lagmit magsangyaw na tag mensahe sa paghukom nga samag hampak nga ulan nga yelo. Kini nga mensahe klarong magpaila nga duol na ang kataposan sa daotang kalibotan.​—Pin. 16:21.

13. Nganong giingnan ni Jehova si Ezequiel nga mohigda sa iyang wala nga kilid ug dayon sa iyang tuo?

¹³ Gawas pa sa pagtagna kon sa unsang paagi malaglag ang Jerusalem, gimostra sab ni Ezequiel kon kanus-a kini mahitabo. Giingnan ni Jehova si Ezequiel nga mohigda sa iyang wala nga kilid sa 390 ka adlaw ug sa iyang tuo sa 40 ka adlaw. Ang matag adlaw nagsimbolog usa ka tuig. (Basaha ang Ezequiel 4:4-6; Num. 14:34) Kini nga pagmostra, nga lagmit gihimo ni Ezequiel pipila lang ka oras sa usa ka adlaw, nagtagna sa eksaktong tuig nga malaglag ang Jerusalem. Ang 390 ka tuig nga kasaypanan sa Israel dayag nga nagsugod sa 997 B.C.E., ang tuig nga nabahin sa duha ang 12 ka tribong gingharian. (1 Hari 12:12-20) Ang 40 ka tuig nga sala sa Juda lagmit nagsugod sa 647 B.C.E., ang tuig nga gitudlo si Jeremias ingong propeta ug gisugo nga mohatag ug klarong pasidaan sa gingharian sa Juda nga kini laglagon. (Jer. 1:1, 2, 17-19; 19:3, 4) Busa kining duha ka yugto sa panahon parehong matapos sa 607 B.C.E., ang mismong tuig nga napildi ug nalaglag ang Jerusalem, sumala sa gitagna ni Jehova.b

14. (a) Giunsa pagpakita ni Ezequiel ang iyang pagsalig nga tumanon ni Jehova ang iyang gitagna sa eksaktong panahon? (b) Unsay mahitabo una pa malaglag ang Jerusalem?

¹⁴ Dihang nadawat ni Ezequiel ang tagna bahin sa 390 ka adlaw ug 40 ka adlaw, tingali wala pa siya mahibalo kon unsa gyong tuiga malaglag ang Jerusalem. Bisan pa niana, sa mga tuig una pa kini malaglag, balikbalik niyang gipasidan-an ang mga Hudiyo nga moabot na ang paghukom ni Jehova. Siya miingon: ‘Ang kataposan anaa karon kaninyo.’ (Basaha ang Ezequiel 7:3, 5-10.) Segurado si Ezequiel nga tumanon gyod ni Jehova ang iyang gitagna sa eksaktong panahon. (Isa. 46:10) Gitagna sab sa propeta kon unsay mahitabo una pa malaglag ang Jerusalem: “Moabot unya ang patongpatong nga katalagman.” Kini nga mga hitabo moresultag pagkahugno sa tanang institusyon sa katilingban, relihiyon, ug gobyerno.​—Ezeq. 7:11-13, 25-27.

15. Unsang mga bahina sa tagna ni Ezequiel ang nagsugod pagkatuman sa 609 B.C.E.?

¹⁵ Mga pipila ka tuig human isangyaw ni Ezequiel ang kalaglagan sa Jerusalem, kining tagnaa nagsugod pagkatuman. Sa 609 B.C.E., nahibaloan ni Ezequiel nga nagsugod na ang pag-atake batok sa Jerusalem. Niadtong panahona, gipatingog ang trompeta aron tigomon ang mga molupyo sa pagdepensa sa siyudad, pero sumala sa gitagna ni Ezequiel, ‘walay usa nga miadto sa gubat.’ (Ezeq. 7:14) Ang mga molupyo sa Jerusalem wala magtigom aron depensahan ang siyudad batok sa misulong nga mga Babilonyanhon. Tingali nagtuo ang ubang Hudiyo nga luwason sila ni Jehova. Gihimo na niya kini kaniadto sa dihang misulong ang mga Asiryanhon aron sakopon ang Jerusalem ug gilaglag sa anghel ni Jehova ang kadaghanan sa ilang kasundalohan. (2 Hari 19:32) Pero niining panahona, walay anghel nga mitabang. Wala madugay, ang gilikosang siyudad nahisamag “kaldero” nga gitak-ang “sa kalayo” ug ang mga molupyo niini natanggong nga morag “mga hiniwang karne” sulod sa kaldero. (Ezeq. 24:1-10) Human mag-antos sulod sa 18 ka bulan nga paglikos, ang Jerusalem nalaglag.

16. Unsaon nato pagpakita karon nga nagsalig ta nga tumanon ni Jehova ang iyang gitagna sa eksaktong panahon?

¹⁶ Unsay atong makat-onan niining bahina sa tagna ni Ezequiel? Konektado ba ni sa mensahe sa atong ministeryo ug sa reaksiyon sa atong ginasangyawan? Si Jehova nagtakda nag panahon kon kanus-a laglagon ang bakak nga relihiyon​—ug tumanon gyod niya kana sa eksaktong panahon. (2 Ped. 3:9, 10; Pin. 7:1-3) Wala ta mahibalo sa eksaktong petsa niana. Pero sama kang Ezequiel, kita padayong nagtuman sa sugo ni Jehova nga balikbalik nga pasidan-an ang katawhan: ‘Ang kataposan anaa karon kaninyo.’ Nganong kinahanglan nato kanang balikbalikon? Ang rason parehas sa rason kon nganong kinahanglang himoon kana ni Ezequiel.c Kadaghanan sa mga tawo nga iyang gisultihan sa tagna sa Diyos bahin sa kalaglagan sa Jerusalem wala motuo. (Ezeq. 12:27, 28) Apan sa ulahi, gipakita sa ubang Hudiyong mga destiyero sa Babilonya nga duna silay matarong nga kasingkasing, ug sila namalik sa ilang yutang natawhan. (Isa. 49:8) Sa susama, daghan karon ang dili motuo nga matapos kining kalibotana. (2 Ped. 3:3, 4) Bisan pa niana, hangtod nga may kahigayonan pa ang katawhan sa pagdawat sa mensahe sa Diyos, gusto natong tabangan ang mga tawo nga nangita sa kamatuoran aron ilang masubay ang dalan sa kinabuhi.​—Mat. 7:13, 14; 2 Cor. 6:2.

17. Unsang mga kahimtang ug hitabo ang atong masaksihan unya sa dakong kasakitan?

¹⁷ Ang tagna ni Ezequiel nagpahinumdom sab kanato nga dihang mahitabo na ang pag-atake batok sa bakak nga relihiyon, ang mga membro sa mga simbahan dili “moadto sa gubat” sa pagdepensa sa ilang relihiyon. Hinuon, dihang maamgohan nila nga ang ilang pagsinggit ug “Ginoo, Ginoo” aron mangayog tabang dili tubagon, ang ilang “kamot manghuyhoy” ug sila ‘mangurog pag-ayo.’ (Ezeq. 7:3, 14, 17, 18; Mat. 7:21-23) Unsa pay ilang buhaton? (Basaha ang Ezequiel 7:19-21.) Si Jehova miingon: “Isalibay nila sa kadalanan ang ilang plata.” Kining mga pulonga nga nagtumong sa mga molupyo sa karaang Jerusalem tin-awng nagpakita kon unsay mahitabo sa dakong kasakitan. Nianang panahona, maamgohan sa mga tawo nga ang ilang kuwarta dili makaluwas nila sa umaabot nga katalagman.

18. Unsang leksiyon ang atong makat-onan sa tagna ni Ezequiel kon bahin sa paghimog mga prayoridad?

¹⁸ Unsay imong nakitang leksiyon para nato niining bahina sa tagna ni Ezequiel? Kinahanglan gyod tang maghimog hustong mga prayoridad. Hunahunaa kini: Human makaamgo ang mga molupyo sa Jerusalem nga ang ilang siyudad ug ang ilang kinabuhi hapit nang malaglag ug ang ilang materyal nga mga butang dili makaluwas kanila, diha pa lang sila nag-usab sa ilang mga prayoridad. Ilang gisalibay ang ilang mga kabtangan ug misugod sa pagpangitag ‘panan-awon sa usa ka propeta’​—pero ang ilang pagbag-o ulahi na kaayo. (Ezeq. 7:26) Apan lahi ta, kay nahibalo na ta pag-ayo nga duol na ang kalaglagan niining daotang kalibotan. Busa tungod sa atong pagtuo sa mga saad sa Diyos, kita naghimog hustong mga prayoridad. Tungod niana, naningkamot gyod ta sa pagtigom ug espirituwal nga mga bahandi, nga dili mawad-ag bili ug dili gyod isalibay sa “kadalanan.”​—Basaha ang Mateo 6:19-21, 24.

19. Unsay epekto kanato karon sa mga tagna ni Ezequiel?

¹⁹ Ingong sumaryo, unsay epekto kanato karon sa mga tagna ni Ezequiel bahin sa kalaglagan sa Jerusalem? Kini nagpahinumdom kanato nga mubo na lang ang nabiling panahon sa pagtabang sa uban nga mahimong alagad sa Diyos. Busa ginahimo nato ang atong labing maarangan sa paghimog mga tinun-an kay kini dinalian. Kita malipay pag-ayo dihang ang mga tawo nga nangita sa kamatuoran mosimba na sa atong Amahan, si Jehova. Apan bisan ngadto sa mga tawong wala mohimo niana, kita padayong naghatag sa pasidaan nga gihatag ni Ezequiel sa mga tawo sa iyang panahon: ‘Ang kataposan anaa karon kaninyo.’ (Ezeq. 3:19, 21; 7:3) Samtang ato kanang ginahimo, determinado ta nga padayong mosalig kang Jehova ug unahon ang putling pagsimba ug himoon kining pinakaimportante sa atong kinabuhi.​—Sal. 52:7, 8; Prov. 11:28; Mat. 6:33.