Mga Leksiyon Gikan sa Panan-awon ni Ezequiel Bahin sa Templo

Ang templo sa panan-awon nahimutang sa “habog kaayo nga bukid” (1). Gituboy ba nato ang putling pagsimba, nga gihimo kining pinakaunang prayoridad sa atong kinabuhi?

Ang paril (2), nga naglibot sa lapad nga luna (3) diin anaa sa tunga ang templo, nagpahinumdom nato nga dili gyod nato angayng tugotan ang bisan unsa nga makahugaw sa atong pagsimba kang Jehova. Kon ang mga butang nga “dili balaan”​—ang adlaw-adlawng mga kalihokan nga dili konektado sa espirituwal nga mga butang​—angayng ipalayo gikan sa putling pagsimba, labaw na gyod nga angayng ipalayo sa magsisimba ni Jehova ang iyang kaugalingon sa hugaw o imoral nga mga buhat!​—Ezeq. 42:20.

Dihay tubig nga midagayday gikan sa sangtuwaryo sa templo, nga midako ingong suba ug naghatag ug kinabuhi sa yuta ug nakapatabunok niini (4). Kini nga mga panalangin hisgotan sa Kapitulo 19 niini nga publikasyon.

Ang habog nga gawas nga mga ganghaan (5) ug sulod nga mga ganghaan (9) nagpahinumdom nato nga si Jehova dunay taas nga mga sukdanan sa panggawi para sa tanang makigbahin sa putling pagsimba. Matikdi nga ang gawas ug sulod nga mga ganghaan susama ug katibuk-ang sukod. Haom kana, kay parehas lang ang matarong nga mga kinahanglanon ni Jehova sa tanan niyang alagad, bisag unsa pay ilang katungdanan o pribilehiyo.

Ang mga lawak-kan-anan (8) nagpahinumdom nato nga sa karaang panahon, ang mga tawo makaambit ug kaon sa pipila sa mga halad nga ilang gidala sa templo, nga daw nangaon sila uban ni Jehova. Lahi kini sa espirituwal nga templo diin nag-alagad ang mga Kristohanon karon, kay ang “usa ka halad” gitanyag na. (Heb. 10:12) Pero kita nagatanyag gihapon sa atong halad sa pagdayeg.​—Heb. 13:15.

Tingali maglisod ka sa paghunahuna sa tanang detalyadong sukod diha sa panan-awon. Pero kini nagtudlo natog importanteng punto: Nagpasalig ni nato nga ang katuyoan ni Jehova sa pagpasig-uli sa putling pagsimba seguradong matuman, sama sa maong mga sukod nga sakto kaayo ug dili mausab. Bisag walay gihisgotan si Ezequiel nga nakakita siyag tawo sa iyang panan-awon, iyang gisulat ang bug-at nga tambag ni Jehova para sa mga saserdote, pangulo, ug katawhan. Ang tanang alagad sa Diyos angayng mosunod sa Iyang matarong nga mga sukdanan.