ASAN

[lagmit, Aso].

Usa ka siyudad sa Sepela o ubos nga kayutaan sa Juda. Unang gipahat ngadto kang Juda, human niana kini gihatag ngadto kang Simeon, tungod kay ang teritoryo sa Juda dako ra kaayo. (Jos 15:42; 19:​7, 9; 1Cr 4:32) Gikan kanila gipasa kini ngadto sa Levihanong banay sa mga Kohatnon. (1Cr 6:​54, 59) Ang 1 Samuel 30:30 naghisgot sa “Borasan” ingong usa sa mga siyudad nianang maong rehiyon nga gipadad-an ni David ug mga inagaw human sa iyang kadaogan batok sa mga Amalekanhon, ug kini gihunahuna sa pipila nga mao ra usab ang Asan. Sa Josue 21:16 gipakita ang talaan sa mga siyudad nga gihatag ngadto sa mga Kohatnon, nga katumbas nianang sa 1 Cronicas 6:​59, apan ang “Ain” maoy makaplagan diha sa talaan sa Josue inay ang Asan. Nagkomento bahin sa teksto, ang Soncino Books of the Bible (London, 1950) nagsugyot nga ang kompletong ngalan sa siyudad lagmit maoy Ain-asan.

Gituohan sa daghan nga ang Asan mao ang Khirbet ʽAsan, nga nahimutang nga mga 2.5 km (1.5 mi) sa AK sa modernong Beer-seba, tupad sa Nahal ʽAsan. Gisugyot ni Yohanan Aharoni nga ang Asan mao ang Tel Bet Mirsham, 25 km (16 mi) sa AAS sa Beer-seba.