TABON SA PAGPASIG-ULI
Ang tabon sa arka sa pakigsaad, nga sa atubangan niini ang hataas nga saserdote magwisik sa dugo sa mga halad-sa-sala panahon sa Adlaw sa Pagtabon-sa-Sala.
Ang mga hubad sa Bibliya naghubad sa lainlaing paagi sa Hebreohanong termino nga kap·poʹreth ingong “lingkoranan sa kaluoy” (KJ, RS, Yg), “pagpasig-uli” (AT, Dy), “tabon” (Le), “tabon sa arka” (JP), o “tabon,” “tabon sa pagpasig-uli” (NW). Ang Hebreohanong termino naggikan sa usa ka lintunganayng berbo nga nagkahulogang “tabon,” “pagtabon (sa sala).”
Ingon sa gisugo ni Jehova kang Moises, ang artesano nga si Bezalel naghimo ug usa ka tabon nga ginama sa lunsayng bulawan alang sa sagradong kahon o arka sa pakigsaad, 2.5 ka maniko (111 sm; 44 pul.) ang gitas-on ug 1.5 ka maniko (67 sm; 26 pul.) ang gilapdon. Gitungtongan kini ug duha ka bulawan nga mga kerubin, usa sa isigkakilid sa tabon, ug ang ilang mga pako gibukhad pataas, nga nagsalipod sa tabon. Ang mga nawong sa kerubin nag-atubang sa tabon. Ang Arka gibutang diha sa Labing Balaan nga lawak sa tabernakulo.—Ex 25:17-21; 37:1, 6-9.
Sa Adlaw sa Pagtabon-sa-Sala (yohm hak·kip·pu·rimʹ, nga nagkahulogang “adlaw sa mga pagtabon o mga pagpasig-uli” [Lev 23:27, 28]), ang hataas nga saserdote mosulod sa Labing Balaan ug ang bahin sa dugo sa torong baka iyang iwisik sa atubangan sa tabon (sa sidlakan nga kiliran) ug ingon usab niini ang iyang himoon maylabot sa dugo sa kanding. (Lev 16:14, 15) Busa ang bulawan nga tabon sa Arka hinungdanon kaayo maylabot sa tipikal nga pagpasig-uli (pagtabon) sa mga sala.
Gikan sa taliwala sa duha ka kerubin sa ibabaw sa tabon sa pagpasig-uli, ang Diyos mamulong sa dihang buot siyang makigsulti kang Moises o sa hataas nga saserdote. (Ex 25:22; Num 7:89; itandi ang Lev 10:8-10; Num 27:18-21.) Si Jehova miingon nga siya magpakita pinaagi sa usa ka panganod sa ibabaw sa tabon sa Arka. Kini nga panganod dayag nga midan-ag o misidlak, nga naghatag ug kahayag sa Labing Balaan nga lawak.—Lev 16:2; itandi ang Sal 80:1.
Sa 1 Cronicas 28:11 ang Labing Balaan, ang kinasulorang lawak sa templo, gitawag ingong “ang balay sa kap·poʹreth.” Niini nga teksto ang Hebreohanong pulong dayag nga wala gamita ingong nagtumong lamang sa usa ka taklob, o tabon, sa usa ka kahon, apan gigamit kini sa linain nga paagi maylabot sa pagtabon sa mga sala. Busa, kini nga ekspresyon gihubad nga “ang balay sa pagtabon-sa-sala” (Yg), “ang balay sa pagpasig-uli” (AT), ‘ang balay sa tabon sa pagpasig-uli’ (NW).
Simboliko. Sa Hebreohanon 9:5 ang Gregong pulong nga hi·la·steʹri·on, “pagpasig-uli,” gigamit alang sa tabon sa Arka. Diha sa larawan o hulad, ang presensiya sa Diyos gihawasan diha sa taliwala sa duha ka kerubin ibabaw sa tabon sa pagpasig-uli. (Lev 16:2; Ex 25:22) Ang inspiradong magsusulat sa basahon sa Mga Hebreohanon nagpunting nga kining mga butanga maoy simboliko. Maingon nga ang hataas nga saserdote sa Adlaw sa Pagtabon-sa-Sala misulod sa Labing Balaan dala ang dugo sa hayop nga gihalad, mao man usab si Kristo nagdala sa bili sa iyang halad, dili sa atubangan sa usa ka literal nga tabon sa pagpasig-uli, kondili sa atubangan sa mismong presensiya ni Jehova nga Diyos didto sa langit.—Lev 16:15; Heb 9:11-14, 24-28.