PAGPANGAON

Kasagaran kini maoy mga okasyon sa malipayong panag-ubanay nga nakahatag usab ug espirituwal nga kaayohan taliwala sa karaang mga Hebreohanon ug sa ulahi sa unang mga Kristohanon. Ang mga pagpangaon maoy mga kahigayonan usab sa pagpakitag gugma ug pagkamaabiabihon ngadto sa uban. Mopatim-awng naandan sa mga Hebreohanon ug sa unang mga Kristohanon nga mag-ampo sa dili pa mangaon.​—1Sa 9:13; Buh 27:35; 1Ti 4:​1, 3; tan-awa ang PAGKAMAABIABIHON; PANIHAPON SA GINOO; KOMBIRA SA GUGMA.

Lagmit nga ang mga Israelinhon kaduha mokaon matag adlaw, usa sa buntag ug usa sa gabii human sa trabaho sa tibuok adlaw. (Itandi ang Ru 3:​2, 3, 7; 1Ha 17:6.) Bisan tuod daghan ang mamahaw diha sa ilang balay, ang uban, lakip ang mga mangingisda nga naghago sa tibuok gabii, lagmit magbalon na lang sa dihang motrabaho. Ang mga mangingisda mahimong magpreparar usab ug pamahaw gikan sa ilang nakuhang mga isda.​—Itandi ang Mar 8:14; Ju 21:​12, 15.

Apan adunay ebidensiya nga isilbi usab ang paniudto, bisan tuod tingali diyutay lang nga pagkaon ang idalit. (Buh 10:​9, 10) Lagmit nga niining taknaa ang mga tawo nga nagtrabaho sa uma mopahulay ug mokaon ug diyutay.​—Itandi ang Ru 2:14.

Sagad ang mga babaye mao ang mosilbi sa pagkaon. (Ju 12:1-3) Apan usahay sila modungan pagkaon sa mga lalaki. (1Sa 1:​4, 5; Job 1:4) Sa mga adunahan ug ilabina sa mga harianon nga mga panimalay, ang mga sulugoon mao ang mosilbi sa pagkaon panahon sa pagpangaon. Ang mga tigsilbi sa lamesa ni Haring Solomon nagsul-ob ug espesyal nga mga besti.​—1Ha 10:​4, 5; 2Cr 9:​3, 4.

Ang mga ilimnon sagad nga isilbi sa tagsatagsa ka kopa, apan ang pagkaon sagad nga ibutang diha sa komon nga bandihado. Ang mangaon tingali magkinamot o kaha mogamit ug pirasong tinapay nga maoy ikutsara sa pipila ka pagkaon.​—Mar 14:20; Ju 13:​25, 26; tan-awa usab ang Pr 26:15.

Ang mga posisyon sa mga tawong mangaon mahimong maghirag o maglingkod. (Gen 18:4; 27:19; Huk 19:6; Luc 9:14) Ang usa ka linilok gikan sa palasyo sa Asiryanhon nga si Haring Ashurbanipal naghulagway kaniya nga naghirag sa usa ka lingkoranan ug ang iyang rayna naglingkod sa usa ka habog nga lingkoranan samtang nangaon sa usa ka kombira. Mopatim-awng naandan usab sa mga Persianhon ang paghirag diha sa mga lingkoranan panahon sa pagpangaon. (Est 7:8) Ang mga lamesa ug mga higdaanan o kaha mga lingkoranan tingali gigamit sa pipila ka Israelinhon sa panahon ni Ezequiel.​—Eze 23:41.

Panahon sa Yutan-ong Ministeryo ni Jesus. Sa unang siglo K.P. maoy batasan sa mga Hebreohanon nga manghunaw sa dili pa mokaon. Nahimo kining rituwal sa mga eskriba ug mga Pariseo.​—Mar 7:1-8; tan-awa ang PAGHUGAS SA MGA KAMOT, PAGHUNAW.

Sa mga bangkete o dagkong mga kombira sa panahon sa yutan-ong ministeryo ni Jesus, ang mga lingkoranan ibutang diha sa tulo ka kiliran sa lamesa. Ang ikaupat nga kiliran walay lingkoranan aron kadtong magsilbi sa pagkaon makaduol sa lamesa. Usahay upat o lima ka tawo ang molingkod sa usa ka lingkoranan, apan sagad tulo lang ang molingkod. Ang mangaon sagad nga manukod pinaagi sa ilang wala nga siko, lagmit diha sa usa ka gamayng unlan, samtang ang ilang mga nawong mag-atubang sa lamesa. Sagad nga ang tuong kamot maoy ikab-ot sa pagkaon. Ang labing dungganong dapit diha sa lingkoranan mao ang gilingkoran sa usa ka tawo diin walay naglingkod sa iyang luyo. Ang paglingkod sa usa ka tawo duol sa “sabakan” sa laing tawo nga naghirag sa kan-anan nagpasabot nga siya anaa sa iyang atubangan ug nagpasabot usab nga siya nakabaton sa iyang pag-uyon. (Ju 13:23) Ang usa ka tawo nga may kauban nga naghirag duol sa iyang sabakan sayon rang makahinabi kaniya labot sa kompidensiyal nga mga butang.

Ang naandang tulo ka puwesto sa matag lingkoranan magpaila kon ang usa ka tawo aduna bay taas, tungatunga, o kaha ubos nga posisyon diha sa lingkoranan. Sa dihang ubay-ubayng mga lingkoranan ang gamiton, ang usa nga naglingkod sa ubos nga puwesto sa lingkoranan nga kinalay-an sa tagbalayng nag-abiabi mao ang usa nga may kinaubsang posisyon sa pagpangaon.​—Itandi ang Mat 23:6; Luc 14:7-11.

Sa pipila ka malipayong okasyon, ang dakong kombira o bangkete lagmit nga adunay usa ka tagdumala (Ju 2:9) ug tingali dihay mga kalingawan sama sa ‘pagpatugtog ug musika ug panagsayaw.’​—Luc 15:25.

Tukmang Panglantaw sa mga Pagpangaon. Kabubut-on sa Diyos nga malipay ang tawo sa pagkaon ug sa ilimnon. (Ecc 2:24) Apan ang paghinobra niini maoy dulumtanan kaniya. (Pr 23:​20, 21; Ecc 10:17; Rom 13:13; 1Pe 4:3; tan-awa ang PAGKAHUBOG; ULITAN.) Sanglit ang mga pagpangaon sa kasarangang paagi makapalipay gayod, ang kahimtang sa usa ka tawo nga malipayon ug kasingkasing gipakasama sa pagkombira kanunay. (Pr 15:15) Dugang pa, kon ang mga nangaon adunay gugma sa usag usa, kini makaamot sa kalipay sa pagpangaon. Ang proverbio nag-ingon: “Mas maayo pa ang pagkaong utanon diin anaay gugma kay sa pinatambok nga torong baka nga inubanan sa pagdumot.”​—Pr 15:17.

Mahulagwayong Paggamit. Ang pagkaon uban sa usa ka tawo nagpaila nga adunay panaghigala ug pakigdait tali kanilang duha. Busa ang usa ka tawo nga kanunayng nakapribilehiyo sa pagkaon diha sa lamesa sa hari maoy usa gayod ka tawong pinaboran ug suod kaayo sa hari. (1Ha 2:7) Kini nga relasyon gisaad ni Jesus sa iyang matinumanong mga tinun-an sa dihang iyang giingnan sila nga sila mokaon ug moinom uban kaniya sa iyang Gingharian.​—Luc 22:28-30; tan-awa usab ang Luc 13:29; Pin 19:9.

Mahitabo unya ang usa ka “dakong panihapon” sa dihang laglagon sa Diyos kadtong nagasupak kaniya. Kini nga panihapon maoy alang sa mga langgam nga mokaon sa patayng mga lawas sa mga pinatay. (Pin 19:15-18) Ang dakong kombira alang sa tanang mga katawhan nga gihisgotan sa Isaias 25:6 maoy usa ka lahi kaayong pagpangaon.