PAGPUTOL

Sa Israel, sa dihang gamiton kini nga pulong ingong usa ka silot tungod sa paglapas sa Balaod, kini nagkahulogang pagpatay. Ang pipila ka rabbinikong mga eskolar nagtuo nga nagtumong lamang kini sa pagpalagpot gikan sa kongregasyon sa Israel, bisan tuod nga magkalahi kaayo ang ilang mga opinyon.

Pinaagi sa pagsusi sa mga teksto sa Kasulatan nga naghisgot sa mga sala nga pahamtangan niini nga silot, matino nga kini naghisgot sa silot nga kamatayon, nga gipahamtang sa mga awtoridad sa Israel o sa Diyos mismo. Ang mga salaod nga ang silot mao ang pagputol maoy mga salaod nga grabe kaayo. Kini naglakip sa pagkawalay-tahod kang Jehova (ang Diyos ug Hari sa Israel), idolatriya, paghalad ug bata, espiritismo, pagpasipala sa sagradong mga butang, ug sa dulumtanang mga buhat sama sa insesto o pag-unay, pakigsekso sa hayop, ug sodomiya. Sa ubang mga kahimtang ang silot nga kamatayon espesipikong gihisgotan maylabot sa sala nga ang silot maoy ‘pagputol.’​—Ex 31:14; Lev 7:27; 18:​6, 22, 23, 29; 20:3-6; 22:​3, 4, 9; 23:28-30; Num 4:​15, 18, 20; 15:​30, 31; tan-awa usab ang Ex 30:31-33, 38.

Dayag nga diha sa hunahuna sa magsusulat sa sulat ngadto sa mga Hebreohanon ang gihisgotan sa Numeros 15:30: “Ang kalag nga magabuhat ug butang nga tinuyo . . . kanang kalaga kinahanglang pagaputlon gikan sa taliwala sa iyang katawhan,” sa dihang siya miingon: “Ang tawo nga wala manumbaling sa balaod ni Moises mamatay sa walay kokaluoy, pinasikad sa pagpamatuod sa duha o tulo.” (Heb 10:28) Gigamit ni Jesus kini nga ekspresyon sa dihang gipahayag ang silot batok sa simbolikong “mga kanding”: “Kini sila mamahawa ngadto sa walay kataposang kalaglagan [Gr., koʹla·sin; sa literal, “pagputol; pagpul-ong”], apan ang mga matarong ngadto sa kinabuhing walay kataposan.” (Mat 25:46) Dinhi, ang pagtandi maoy tali sa kinabuhi ug kamatayon.