KAGAWASAN

Sanglit si Jehova nga Diyos mao ang Labing Gamhanan, ang Soberanong Magmamando sa uniberso, ug ang Maglalalang sa tanang butang, siya lamang ang may bug-os, walay-kinutobang kagawasan. (Gen 17:1; Jer 10:​7, 10; Dan 4:​34, 35; Pin 4:11) Ang tanan gawas kaniya kinahanglang molihok ug mobuhat sulod sa mga limitasyon sa katakos nga gihatag kanila ug magpasakop sa iyang unibersohanong mga balaod. (Isa 45:9; Rom 9:​20, 21) Pananglitan, tagda ang grabidad, ug ang mga balaod labot sa kemikal nga mga reaksiyon, ang gahom sa adlaw, ug ang pagtubo; ang moral nga mga balaod; ang mga katungod ug mga gibuhat sa uban nga makaapekto sa kagawasan sa usa ka tawo. Busa ang kagawasan nga nabatonan sa tanang linalang sa Diyos maoy usa ka relatibong kagawasan.

Adunay kalainan tali sa limitadong kagawasan ug sa pagkaulipon. Ang kagawasan nga sulod sa hinatag-sa-Diyos nga mga limitasyon mohatag ug kalipay; ang pagkaulipon ngadto sa mga linalang, sa pagkadili-hingpit, sa mga kahuyangon, o sa sayop nga mga ideolohiya mohatag ug kapit-osan ug kagul-anan. Ang kagawasan lahi usab sa pagkinaugalingon, sa ato pa, ang pagsalikway sa mga balaod sa Diyos ug ang paghukom alang sa kaugalingon kon unsay matarong ug kon unsay daotan. Kana motultol sa pagpanghilabot sa mga katungod sa uban ug magpahinabog kasamok, ingon sa makita sa mga epekto sa independente, mabuotbuotong espiritu nga gipasiugda sa Halas ngadto kang Adan ug Eva didto sa Eden. (Gen 3:​4, 6, 11-19) Ang matuod nga kagawasan gikontrol sa balaod, nga mao, ang balaod sa Diyos, nga niana ang indibiduwal bug-os makapahayag sa tukma, makapalig-on, ug mapuslanong paagi, ug moila sa mga katungod sa uban, nga makaamot sa kalipay sa tanan.​—Sal 144:15; Luc 11:28; San 1:25.

Ang Diyos sa Kagawasan. Si Jehova maoy Diyos sa kagawasan. Siya nagpagawas sa nasod sa Israel gikan sa pagkaulipon sa Ehipto. Iyang gisultihan sila nga kon sila mosunod sa iyang kasugoan sila mahigawas sa kakabos. (Deu 15:​4, 5) Si David naghisgot sa “pagkawalay-kabalaka,” o kagawasan sa kabalaka, sulod sa puloy-anang mga torre sa Jerusalem. (Sal 122:​6, 7) Bisan pa niana, ang Balaod nagtaganag probisyon nga kon ang usa ka tawo mahimong kabos mahimo niyang ibaligya ang iyang kaugalingon ingong ulipon aron makatagana sa mga panginahanglan sa iyang kaugalingon ug sa iyang pamilya. Apan ang Balaod naghatag ug kagawasan niini nga Hebreohanon sa ikapitong tuig sa iyang pagkaulipon. (Ex 21:2) Sa Tinghugyaw (nga saulogon sa matag 50 ka tuig), ang kagawasan imantala diha sa yuta ngadto sa tanang molupyo niini. Ang matag Hebreohanong ulipon hatagag kagawasan, ug ang matag tawo pabalikon ngadto sa iyang yutang panulondon.​—Lev 25:10-19.

Ang Kagawasan nga Miabot Pinaagi ni Kristo. Si apostol Pablo naghisgot sa panginahanglan sa katawhan nga mapahigawas gikan sa “pagkaulipon sa pagkadunot.” (Rom 8:21) Gisultihan ni Jesu-Kristo ang mga Hudiyo nga mituo kaniya: “Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.” Alang niadtong naghunahuna nga sila nakabaton ug kagawasan tungod kay sila unodnong mga kaliwat ni Abraham, iyang gipasiugda nga sila maoy mga ulipon sa sala, ug siya miingon: “Busa kon ang Anak magpagawas kaninyo, kamo tinuod nga mahigawas.”​—Ju 8:31-36; itandi ang Rom 6:​18, 22.

Ang Kristohanon Gregong Kasulatan naghisgot sa mga sumusunod ni Kristo ingong napahigawas. Gipakita ni Pablo nga sila “mga anak, dili sa usa ka sulugoong babaye, kondili sa babayeng gawasnon” (Gal 4:31), nga iyang gitawag ingong “ang Jerusalem sa itaas.” (Gal 4:26) Dayon siya nagtambag: “Alang sa maong kagawasan [o, “Uban sa iyang kagawasan,” ftn sa Rbi8] si Kristo nagpagawas kanato. Busa barog nga malig-on, ug ayaw tugoting kamo mabilanggo pag-usab sa yugo sa pagkaulipon.” (Gal 5:1) Nianang panahona ang mga tawo nga nagpakaaron-ingnong mga Kristohanon nakig-uban sa mga kongregasyon sa Galacia. Sila naningkamot sa pag-agni sa mga Kristohanon sa Galacia sa pagsalikway sa ilang kagawasan diha kang Kristo pinaagi sa pagpanlimbasog nga mabatonan ang pagkamatarong pinaagi sa mga buhat sa Balaod, inay nga pinaagi sa pagtuo diha kang Kristo. Si Pablo nagpasidaan nga tungod niana sila mangahulog gikan sa dili-takos nga kalulot ni Kristo.​—Gal 5:2-6; 6:​12, 13.

Ang kagawasan nga napahimuslan sa unang mga Kristohanon gikan sa pagkaulipon sa sala ug kamatayon ug gikan sa kahadlok (“Kay kita wala hatagi sa Diyos ug espiritu sa katalaw, kondili sa gahom ug sa gugma ug sa maayong panghunahuna”) gipakita pinaagi sa pagkawalay-lipudlipod ug sa kagawasan sa pagsulti sa mga apostoles sa pagmantala sa maayong balita. (2Ti 1:7; Buh 4:13; Flp 1:18-20) Ilang giila kini nga kagawasan sa pagsulti bahin sa Kristo ingong bililhong kabtangan, usa nga kinahanglang ugmaron, ampingan, ug mentinahon aron madawat ang pag-uyon sa Diyos. Haom usab kini nga iampo.​—1Ti 3:13; Heb 3:6; Efe 6:18-20.

Tukmang Paggamit sa Kristohanong Kagawasan. Ang inspiradong Kristohanong mga magsusulat, nga nagpabili sa katuyoan sa Diyos sa paghatag sa dili-takos nga kalulot pinaagi ni Kristo (“Kamo, dayag, gitawag alang sa kagawasan, mga igsoon”), sublisubling nagtambag sa mga Kristohanon sa pag-amping sa ilang kagawasan ug sa dili pagtugot o pag-abuso sa maong kagawasan ingong kahigayonan sa pagpatuyang sa mga buhat sa unod (Gal 5:13) o ingong takoban sa pagkadaotan. (1Pe 2:16) Si Santiago naghisgot bahin sa ‘pagsud-ong pag-ayo sa hingpit nga balaod nga iya sa kagawasan’ ug nagpunting nga ang usa ka dili-malimtanong tigpaminaw, apan nagpadayon ingong usa ka magtutuman, magmalipayon.​—San 1:25.

Gipahimuslan ni apostol Pablo ang kagawasan nga iyang nabatonan pinaagi ni Kristo apan wala mogamit sa iyang kagawasan aron sa pagpahimuot sa iyang kaugalingon o wala mogamit niini aron pasakitan ang uban. Diha sa iyang sulat ngadto sa kongregasyon sa Corinto, iyang gipakita nga dili niya pasakitan ang tanlag sa ubang tawo pinaagi sa pagbuhat sa usa ka butang nga sumala sa Kasulatan siya adunay kagawasan apan mahimong kuwestiyonon sa uban nga kulang ug kahibalo, kansang tanlag mahimong masakitan tungod sa mga buhat ni Pablo. Iyang gihatag ingong pananglitan ang pagkaon ug karne nga gihalad atubangan sa usa ka idolo sa wala pa kini ibaligya sa tiyanggihan. Ang pagkaon sa maong karne mahimong mag-aghat sa usa ka tawo nga huyang ug tanlag sa pagsaway sa hustong kagawasan ni Pablo labot sa iyang gibuhat ug sa ingon maghukom kang Pablo, nga maoy usa ka butang nga sayop. Busa, si Pablo miingon: “Nganong ang akong kagawasan hukman man pinaagi sa tanlag sa laing tawo? Kon ako nagaambit uban ang pagpasalamat, nganong ako pasipalahan ug sulti mahitungod nianang akong gipasalamatan?” Bisan pa niana, ang apostol determinado sa paggamit sa iyang kagawasan sa makapalig-on, dili sa makadaot nga paagi.​—1Co 10:23-33.

Ang Pagpakigbugno sa mga Kristohanon ug ang Paglaom sa Katawhan. Gipakita ni Pablo nga adunay kapeligrohan sa kagawasan sa mga Kristohanon sa pagkaagi nga, samtang “ang balaod nianang espiritu nga naghatag ug kinabuhi nga nahiusa kang Kristo Jesus nagpagawas na kaninyo gikan sa balaod sa sala ug sa kamatayon” (Rom 8:​1, 2), ang balaod sa sala ug kamatayon nga nagalihok diha sa lawas sa mga Kristohanon nakigbugno aron ang usa maulipon pag-usab. Busa ang mga Kristohanon kinahanglang magpunting sa ilang hunahuna sa mga butang nga iya sa espiritu aron magmadaogon.​—Rom 7:21-25; 8:5-8.

Human hisgoti ang pagpakigbugno sa mga Kristohanon, si Pablo nagpadayon sa paghisgot bahin sa kaubang mga manununod ni Kristo ingong “mga anak sa Diyos.” Dayon iyang gihisgotan ang uban sa katawhan ingong “ang kalalangan” ug gipresentar ang kahibulongang katuyoan sa Diyos “aron nga ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.”​—Rom 8:12-21.

Mahulagwayong Paggamit. Sa dihang si Job, sa iyang pag-antos, nangandoy nga mahigawas pinaagi sa kamatayon, iyang gipakasama ang kamatayon sa usa ka kagawasan alang niadtong nag-antos. Dayag nga iyang gihisgotan ang malisod nga kinabuhi sa mga ulipon, nga nag-ingon: “[Diha sa kamatayon] ang ulipon gipahigawas na gikan sa iyang agalon.”​—Job 3:19; itandi ang mga bersikulo 21 ug 22.