GADARANHON
[Taga- (Iya sa) Gadara].
Ang ngalan nagtumong sa mga molupyo sa usa ka dapit diin gihinginlan ni Kristo Jesus ang mga demonyo gikan sa duha ka tawo. Sumala sa giisip nga labing maayong ebidensiya sa manuskrito nga mabatonan, si Mateo sa orihinal migamit sa “yuta sa mga Gadaranhon,” samtang si Marcos ug Lucas, sa pag-asoy niini nga hitabo, migamit sa “yuta sa mga Gerasanhon.”—Mat 8:28; Mar 5:1; Luc 8:26.
Ang duha ka yuta gipakita nga nahimutang “sa pikas nga bahin,” nga mao, sa S nga kiliran sa Dagat sa Galilea. Ang terminong “yuta sa mga Gadaranhon” lagmit nagtumong sa distrito palibot sa siyudad sa Gadara (modernong Umm Qeis), nga nahimutang mga 10 km (6 mi) sa HS sa Dagat sa Galilea. Sagad makita sa mga sensilyo sa Gadara ang hulagway sa usa ka barko, nga nagpakitang ang teritoryo niini lagmit miabot sa Dagat sa Galilea ug busa mahimong naglakip sa usa ka bahin sa “yuta sa mga Gerasanhon,” dapit sa S niana nga dagat. Ang uban naglangkit sa “yuta sa mga Gerasanhon” sa rehiyon nga naglibot sa Kursi, usa ka lungsod nga giila ni Origen ug Eusebius ingong Gergesa. Kini anaa sa S nga kabaybayonan sa Dagat sa Galilea, nga mga 20 km (12 mi) sa A sa Gadara. Haom kini sa geograpikanhong mga detalye sa asoy. Ang uban naglangkit niini sa dakong distrito nga ang sentro mao ang siyudad sa Gerasa (Jarash) nga mga 55 km (34 mi) sa HHS sa Dagat sa Galilea ug nagsugyot nga kini miabot sa S niana nga lanaw ug naglakip sa “yuta sa mga Gadaranhon.” Sa bisan unsa nga kahimtang, ang asoy ni Mateo dili gayod mosumpaki sa mga asoy ni Marcos ug Lucas.
Duol sa wala-hinganling siyudad sa yuta sa mga Gadaranhon, nahibalag ni Jesu-Kristo ang duha ka tawong gigamhan-sa-demonyo nga talagsaon ang kabangis. Kini sila nagpuyo taliwala sa mga lubnganan, nga mao, ang mga lubnganan nga gikubkob diha sa mga bato o ang kinaiyanhong mga langob nga gihimong mga lubnganan. Si Jesus, sa paghingilin sa mga demonyo, nagtugot kanila nga mosulod sa dakong panon sa mga baboy nga mihaguros pagdulhog ngadto sa pangpang ug nangalumos sa Dagat sa Galilea. Nakapabalaka kaayo kini sa lokal nga mga molupyo mao nga sila mihangyo kang Jesus nga mopahawa gikan sa maong dapit.—Mat 8:28-34.
Bisan tuod si Mateo naghisgot ug duha ka tawo, si Marcos (5:2) ug Lucas (8:27) naghatag ug pagtagad sa usa lamang ka tawo, sa walay duhaduha tungod kay mas talagsaon ang iyang kahimtang. Lagmit nga siya mas bangis ug nag-antos nga mas dugay ilalom sa gahom sa demonyo kay sa iyang kauban; apan human niana tingali siya lamang ang buot mokuyog sa Anak sa Diyos. Wala siya tugoti ni Jesus nga mokuyog, hinunoa gisugo siya nga imantala ang gibuhat sa Diyos kaniya.
Lahi kini sa sagad nga isugo ni Jesus nga dili imantala ang iyang mga milagro. Inay tinguhaon ang mapasiatabong publisidad ug nga mohinapos ang mga tawo pinasukad sa makapahinganghang mga taho, lagmit nga buot ni Jesus nga ang mga tawo mohukom pinasukad sa malig-ong ebidensiya nga siya mao gayod ang Kristo. Nagtuman usab kini sa matagnaong mga pulong nga gisulti pinaagi ni Isaias: “Siya dili makiglantugi, ni mosinggit, ni adunay makadungog sa iyang tingog diha sa halapad nga kadalanan.” (Mat 12:15-21; Isa 42:1-4) Bisan pa niana, kining lahi nga instruksiyon ngadto sa kanhi gigamhan-sa-demonyo maoy nahiangay. Siya makapamatuod taliwala sa katawhan nga limitado lamang ang kontak sa Anak sa Diyos, ilabina tungod kay si Jesus gihangyo nga mobiya. Ang presensiya sa maong tawo magpamatuod bahin sa gahom ni Jesus sa pagbuhat ug maayo, nga mopanghimakak sa bisan unsang dili-maayong taho nga lagmit gipakaylap tungod sa pagkamatay sa panon sa mga baboy.—Mar 5:1-20; Luc 8:26-39; tan-awa ang BABOY.