DRAKMA

Usa ka Gregong sensilyo nga plata nga gigamit pa gihapon sa unang siglo K.P. (Luc 15:​8, 9) Ang Attic nga drakma adunay hulagway sa ulo sa diyosa nga si Atena diha sa usa ka bahin ug usa ka bukaw sa pikas nga bahin. Sa panahon sa yutan-ong ministeryo ni Jesus, lagmit mius-os ang bili sa drakma ngadto sa mga 3.4 g ug busa karong adlawa mokantidad ug $0.65. Sa unang siglo K.P. giisip sa mga Grego nga ang drakma katumbas sa denario, apan opisyal nga gikalkulo sa Romanhong gobyerno ang kantidad sa drakma ingong tres-kuwarto lamang sa usa ka denario. Ang mga Hudiyo nagbayad ug tinuig nga buhis sa templo nga duha ka drakma (usa ka didrakma).​—Mat 17:24.

Ang Gregong drakma nga plata dili angayng pakasaypon nga mao ang bulawang “drakma” (dar·kemohnʹ) sa Hebreohanong Kasulatan, usa ka sensilyo nga sagad katumbas sa Persianhong darik (8.4 g; $94.50 sumala sa kantidad karon).​—Esd 2:69; Neh 7:70-72.