TIGPATIN-AW SA PANAN-AWON

Dayag nga usa ka tawo nga gitugahan sa Diyos sa pagsabot sa Iyang kabubut-on, usa nga adunay hait nga salabotan; usa kansang mga mata nabuksan, ingnon ta, aron makakita o makasabot sa mga butang nga wala mahibal-i sa mga tawo sa katibuk-an. Ang Hebreohanong pulong nga ro·ʼehʹ, nga gihubad nga “tigpatin-aw sa panan-awon,” naggikan sa lintunganayng pulong nga nagkahulogang “nakakita,” sa literal o sa mahulagwayong paagi. Ang tigpatin-aw sa panan-awon maoy usa ka tawo nga konsultahon sa uban alang sa maalamong tambag bahin sa mga problema nga nasugamakan. (1Sa 9:5-10) Ang Bibliya nagtawag kang Samuel (1Sa 9:​9, 11, 18, 19; 1Cr 9:22; 29:29), Zadok (2Sa 15:27), ug Hanani (2Cr 16:​7, 10) ingong mga tigpatin-aw sa panan-awon.

Ang mga terminong “tigpatin-aw sa panan-awon,” “manalagna,” ug “bisyonaryo” magkaamgid kaayo diha sa Kasulatan. Apan ang kalainan tingali tali niini nga mga termino mao nga ang “tigpatin-aw sa panan-awon” mahimong dunay kalambigitan sa katakos sa pag-ila, ang “bisyonaryo” ngadto sa paagi nga niana ipahibalo ang katuyoan sa Diyos, ug ang “manalagna” ngadto sa pagpamulong o sa pagmantala sa kabubut-on sa Diyos. Si Samuel, Natan, ug Gad gitawag nga mga manalagna (1Sa 3:20; 2Sa 7:2; 24:11), apan ang 1 Cronicas 29:29 nagpakita sa kalainan tali sa tulo ka termino sa dihang kini nag-ingon, “lakip sa mga pulong ni Samuel nga tigpatin-aw sa panan-awon ug lakip sa mga pulong ni Natan nga manalagna ug lakip sa mga pulong ni Gad nga bisyonaryo.”

Ang 1 Samuel 9:9 nag-ingon: “Ang manalagna karon gitawag man nga tigpatin-aw sa panan-awon sa unang panahon.” Lagmit tungod kini kay sa hinapos sa mga adlaw sa mga Maghuhukom ug panahon sa paghari sa mga hari sa Israel (nga nagsugod sa mga adlaw ni Samuel) ang manalagna ingong publikong tigmantala sa kabubut-on sa Diyos mao ang nahimong prominente. Si Samuel sagad gitawag nga una sa linya sa mga tawo nga gitawag nga “mga manalagna.”​—Buh 3:24; 13:20; tan-awa ang MANALAGNA.