DAPAWONG TANOM

Usa ka matang sa mga tanom nga giringgiringon ug mga dahon nga kasagarang napuno sa makatunok nga mga balhibo nga may katol nga duga. Kon masaghiran, ang tumoy sa mga balhibo niini mabali, ug ang talinis nga mga tumoy motusok sa panit, maong ang duga mosulod sa samad. Labing menos upat ka matang sa dapawong mga tanom ang nailhan sa Palestina, ug ang labing komon niini mao ang dapawong tanom sa Roma (Urtica pilulifera), nga moabot sa gitas-ong 1.8 m (6 p) ug makaplagan ilabina diha sa gun-ob nga mga dapit.

Ang Hebreohanong mga termino nga cha·rulʹ (Pr 24:31; Sof 2:9) ug qim·mohsʹ (Isa 34:13; Os 9:6) nagtumong sa mga tanom nga motubo diha sa giabandonar nga mga kaumahan ug sa mga gun-ob nga dapit. Sa Job 30:​7, ang paghisgot sa cha·rulʹ nagpasabot sa tag-as nga mga tanom. Ang laing Hebreohanong pulong nga sir·padhʹ (“sampinit,” KJ; “dapawong tanom,” Ro; NW) gitugbang sa mirto.​—Isa 55:13.

Sa Proverbio 24:31 ang usa ka porma sa pulong nga qim·mohsʹ (“mga kudyapa,” AT; “mga tunok,” KJ; “mga bunglayon,” NW) giisip sa pipila nga katumbas sa cha·rulʹ. Busa ang pipila ka eskolar naghunahuna nga ang qim·mohsʹ nagtumong sa mga bunglayon sa katibuk-an; ang uban nagtuo nga ang cha·rulʹ tingali maoy usa ka komon nga pagtawag sa kupongkupong. Ang paghubad sa cha·rulʹ ingong “dapawong tanom” diha sa Job 30:7 gikuwestiyon usab sa pipila tungod kay ang mga tawo dili man sa kinabubut-on mopasilong ilalom sa dapawong mga tanom. Apan, sa walay tubig nga rehiyon ang mga tawo tingali mopahimulos sa landong sa tag-as nga dapawong mga tanom o tungod sa kagutom, manguha niining tanoma aron kaonon. Busa haom ra ang hubad.