PANAW

Ang pulong nga “panaw” sagad gigamit sa Bibliya aron sa pagpaila sa katibuk-ang distansiya nga maabot. (Gen 31:23; Ex 3:18; Num 10:33; 33:8) Ang distansiya nga maabot sa usa ka adlaw nagdepende sa kon unsang matanga sa transportasyon nga gamiton ug sa mga kahimtang nga masinatian ug sa matang sa dapit nga agian sa magpapanaw. Ang aberids nga panaw sa kamad-an sa usa ka adlaw lagmit maoy 32 km (20 mi) o kapin pa. Apan ang usa ka “adlawng igpapahulay nga panaw” mas menos pa gayod. (Mat 24:20) Ang Buhat 1:12 nagpakita nga usa ka “adlawng igpapahulay nga panaw” ang distansiya sa Jerusalem gikan sa Bukid sa mga Olibo. Lagmit tungod sa pagkalkulo pinasukad sa duha ka magkalahing dapit nga sukaranan, kausa gihatag ni Josephus kini nga distansiya ingong lima ka estadio (925 m; 3,034 p) ug sa laing higayon ingong unom ka estadio (1,110 m; 3,640 p). Ang rabbinikong mga tinubdan, pinasukad sa Josue 3:​4, nagpakita nga ang usa ka “adlawng igpapahulay nga panaw” maoy 2,000 ka maniko (890 m; 2,920 p).