Motuo Lang Kon Dunay Makita

“Ang usa ka agnostiko naghunahuna nga imposibleng mahibaloan ang kamatuoran bahin sa Diyos ug sa umaabot nga kinabuhi—mga butang nga gitudlo sa Kristiyanidad ug sa ubang mga relihiyon. Apan, kon posible man kining mahibaloan, sa pagkakaron kini imposible pa.”—PILOSOPO NGA SI BERTRAND RUSSELL, 1953.

ANG tawong nagmugna sa pulong “agnostiko” mao si Thomas Huxley, nga usa ka siyentipiko nga nagtuon bahin sa mga mananap. Siya natawo sa 1825, ug siya kadungan ni Charles Darwin ug tigpaluyo sa teoriya sa ebolusyon. Sa 1863, si Huxley misulat nga wala siyay makitang ebidensiya nga adunay Diyos nga “nagmahal ug nagtagad kanato sama sa pangangkon sa mga Kristohanon.”

Daghan karon ang mouyon sa opinyon nianang inila nga mga tawo, nga nag-ingon nga sila motuo lamang kon dunay makita. Tingali moingon sila nga binuang ang pagtuo nga naglungtad ang usa ka persona o butang kon wala kay makitang ebidensiya niana.

Apan, nag-ingon ba ang Bibliya nga kinahanglan kitang motuo nga adunay Diyos bisag walay ebidensiya niana? Wala gayod. Gipakita sa Bibliya nga dili maalamon—kabuangan pa gani—kon ang usa basta na lang motuo sa giingon sa mga tawo bisag walay ebidensiya niana. Kini nag-ingon: “Si bisan kinsa nga walay kasinatian motuo sa tagsatagsa ka pulong, apan ang usa nga maalamon magapalandong sa iyang mga lakang.”—Proverbio 14:15.

Nan, komosta ang pagtuo nga adunay Diyos? May ebidensiya ba gayod nga adunay Diyos ug nga siya nagmahal ug nagtagad kanato?

Gipadayag ang mga Hiyas sa Diyos

Samtang siya nakigsulti sa usa ka pundok sa edukadong mga tawo sa Atenas, ang magsusulat sa Bibliya nga si Pablo miingon nga ang Diyos mao ang “naghimo sa kalibotan ug sa tanang butang diha niini.” Giingnan niya ang iyang maduhaduhaong mamiminaw nga ang Diyos interesado gayod sa mga tawo. Gani, “siya dili halayo gikan sa matag usa kanato.”—Buhat 17:24-27.

Nganong kombinsido man si Pablo nga adunay Diyos ug nga Siya interesado sa mga tawo? Gipadayag ni Pablo ang usa ka rason sa dihang gisulatan niya ang mga Kristohanon sa siyudad sa Roma. Siya miingon bahin sa Diyos: “Ang iyang dili-makita nga mga hiyas . . . tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.”—Roma 1:20.

Hisgotan sa sunod nga mga panid ang tulo ka hiyas sa Diyos nga tatawng makita diha sa mga butang nga iyang gilalang. Samtang imong susihon ang maong mga pananglitan, suknaa ang imong kaugalingon, ‘Unsay epekto niini kanako?’

[Blurb sa panid 3]

Ang Bibliya wala mag-ingon nga kinahanglan kitang motuo nga adunay Diyos bisag walay ebidensiya niana