Kinsa o Unsa ang mga Anghel?
Tubag sa Bibliya
Ang mga anghel mas gamhanan kay sa tawo. (2 Pedro 2:11) Naa sila sa langit, usa ka dapit nga mas labaw kay sa pisikal nga uniberso. (1 Hari 8:27; Juan 6:38) Busa gitawag sab sila nga mga espiritu.—1 Hari 22:21; Salmo 18:10.
Kinsay naghimo sa mga anghel?
Gihimo sa Diyos ang mga anghel pinaagi kang Jesus, kinsa gitawag sa Bibliya nga “panganay sa tanang kalalangan.” Gihisgotan sa Bibliya kon giunsa paggamit sa Diyos si Jesus sa paglalang. Kini nag-ingon: “Pinaagi [kang Jesus] gilalang ang tanang ubang butang sa langit ug sa yuta, ang mga butang nga makita ug ang mga butang nga dili-makita,” apil ang mga anghel. (Colosas 1:13-17) Wala sila himoa aron magminyo o manganak. (Marcos 12:25) Busa, kini nga “mga anak sa matuod nga Diyos” gitagsatagsa paghimo.—Job 1:6.
Sa wala pa ang yuta, gilalang na ang mga anghel. “Misinggit [sila] sa pagdayeg” dihang gihimo sa Diyos ang yuta.—Job 38:4-7.
Unsa ka daghan ang mga anghel?
Walay gisulti ang Bibliya kon pila gyod sila ka buok, pero nag-ingon kini nga daghan kaayo sila. Pananglitan, nakita ni apostol Juan sa usa ka panan-awon ang milyonmilyong anghel.—Pinadayag 5:11.
Lainlain ba silag ngalan ug kinaiya?
Oo. Gihisgotan sa Bibliya ang ngalan sa duha ka anghel: Miguel ug Gabriel. (Daniel 12:1; Lucas 1:26)a Ang ubang anghel miingon nga duna silay ngalan, pero wala nila kini isulti.—Genesis 32:29; Maghuhukom 13:17, 18.
Lainlaig kinaiya ang mga anghel. Naa silay paagi sa pagpakig-estorya. (1 Corinto 13:1) Naa silay katakos sa paghunahuna ug sa pagpahayag ug mga pagdayeg sa Diyos. (Lucas 2:13, 14) May kagawasan pod sila sa pagpili sa maayo o sa daotan. Makita nato kana dihang ang pipila nila midapig kang Satanas nga Yawa sa pagrebelde batok sa Diyos.—Mateo 25:41; 2 Pedro 2:4.
Lainlain bag ranggo ang mga anghel?
Oo. Ang kinalabwan sa gahom ug awtoridad mao ang arkanghel. Siya si Miguel. (Judas 9; Pinadayag 12:7) Sa laing bahin, ang mga serapin maoy mga anghel nga tag-as ug ranggo, nga nagbarog duol sa trono ni Jehova. (Isaias 6:2, 6) Ang mga kerubin tag-as pod ug ranggo ug dunay espesyal nga mga asaynment. Pananglitan, sila ang gipabantay sa entrada sa garden sa Eden human palayasa si Adan ug Eva gikan didto.—Genesis 3:23, 24.
Ang mga anghel ba motabang sa mga tawo?
Oo, gigamit sa Diyos ang iyang matinumanong mga anghel para tabangan ang mga tawo karon.
Ang mga anghel gigamit sa Diyos aron giyahan ang iyang mga alagad sa pagsangyaw sa maayong balita sa Gingharian sa Diyos. (Pinadayag 14:6, 7) Tungod niana, nakabenepisyo kadtong nagsangyaw ug kadtong naminaw sa maayong balita.—Buhat 8:26, 27.
Ang mga anghel nagtabang sa Kristohanong kongregasyon aron dili kini maimpluwensiyahan sa daotang mga tawo.—Mateo 13:49.
Ang mga anghel naggiya ug nanalipod sa mga matinumanon sa Diyos.—Salmo 34:7; 91:10, 11; Hebreohanon 1:7, 14.
Sa dili madugay, ang mga anghel motabang kang Jesu-Kristo sa pagwagtang sa mga daotan aron dili na maglisod ang mga tawo.—2 Tesalonica 1:6-8.
Kada usa ba nato dunay guardian angel?
Tinuod, ang mga anghel nag-atiman sa espirituwalidad sa mga alagad sa Diyos. Pero wala kana magpasabot nga nag-asayn ang Diyos ug guardian angel para sa matag Kristohanon.b (Mateo 18:10) Dili sa tanang pagsulay o tentasyon nga panalipdan sa mga anghel ang alagad sa Diyos. Gipakita sa Bibliya nga ang Diyos sagad “magtaganag kalingkawasan” gikan sa mga pagsulay pinaagi sa pagtaganag kaalam ug kusog aron makalahutay.—1 Corinto 10:12, 13; Santiago 1:2-5.
Sayop nga mga ideya bahin sa mga anghel
Sayop nga ideya: Buotan ang tanang anghel.
Ang tinuod: Ang Bibliya naghisgot ug “daotang mga puwersa nga espirituhanon” ug “mga manulonda nga nakasala.” (Efeso 6:12; 2 Pedro 2:4) Sila maoy mga demonyo nga midapig kang Satanas sa pagrebelde batok sa Diyos.
Sayop nga ideya: Imortal ang mga anghel.
Ang tinuod: Ang daotang mga anghel, apil si Satanas nga Yawa, pagalaglagon.—Judas 6.
Sayop nga ideya: Ang mga tawo mahimong anghel inigkamatay.
Ang tinuod: Ang mga anghel gilalang gyod sa Diyos. Dili sila mga tawong namatay unya gibanhaw. (Colosas 1:16) Ang mga tawo nga banhawon ngadto sa langit hatagan sa Diyos ug imortal nga kinabuhi. (1 Corinto 15:53, 54) Mas labaw pa sila unya kay sa mga anghel.—1 Corinto 6:3.
Sayop nga ideya: Ang mga anghel gihimo aron mag-alagad sa tawo.
Ang tinuod: Ang sugo sa Diyos ang ilang sundon, dili ang atua. (Salmo 103:20, 21) Bisan si Jesus miingon nga sa Diyos siya mangayog tabang, dili sa mga anghel.—Mateo 26:53.
Sayop nga ideya: Makaampo ta sa mga anghel alang sa tabang.
Ang tinuod: Ang pag-ampo maoy bahin sa atong pagsimba, ug si Jehova nga Diyos lang ang angayng simbahon. (Pinadayag 19:10) Sa Diyos lang ta angayng mag-ampo, pinaagi kang Jesus.—Juan 14:6.
a Ang ubang hubad sa Bibliya naggamit sa terminong “Lucifer” sa Isaias 14:12. Gituohan sa uban nga mao kana ang ngalan sa anghel nga nahimong Satanas nga Yawa. Pero ang Hebreohanong pulong niini nagkahulogan ug ‘usa nga nagasidlak.’ Gipakita sa palibot nga mga teksto nga dili si Satanas ang gitumong niining terminoha. Kini nagtumong sa gingharian sa Babilonya nga gilaglag sa Diyos tungod sa pagkagarboso niini. (Isaias 14:4, 13-20) Ang ekspresyong ‘usa nga nagasidlak’ gigamit sa pagtamay sa nagun-ob nga gingharian sa Babilonya.
b Para sa uban, ang asoy bahin sa pagkagawas ni Pedro sa prisohan nagpamatuod nga si Pedro dunay guardian angel. (Buhat 12:6-16) Pero, dihang ang mga tinun-an naghisgot bahin sa anghel o manulonda ni Pedro, posible nga nagtuo lang sila nga miabot ang usa ka anghel nga nagsilbing mensahero ni Pedro, ug dili si Pedro mismo.