EKICWEKA C’OKWEGA 11
Oku Ebyahandikirwe biri kutukwasa kwehanganira ebizibu
‘Ruhanga Mukama w’okugumisiriza.’—ROM 15:5.
ECESHONGORO CA 94 Okusiima Ekigambo kya Ruhanga
EMPINYEa
1. Ni biha bizibu ebi abahereza ba Yehova bari kubugana?
MBEHI hine ekizibu ekigumire eki oyine? Omukristo mugenzi wawe nabasa kukushobeza. (Yak 3:2) Abu muri kukora hamwe ninga abu muri kwega hamwe nibabasa kukushwaza ahabw’okuhereza Yehova. (1 Pet 4:3, 4) Ninga shi abanyabuzare bawe nibabasa kukuzibira kuza omu nterane ninga shi kuburira. (Mat 10:35, 36) Ekizibu cakushasha munonga nobasa kuhurira ohwiremu amani. Ekizibu eki ori kubugana oku cakuba kiri kona nobasa kwesiga ku Yehova ari kubasa kukuha obwenge n’amani g’okucehanganira.
2. Tukuratize ebiri omu Barooma 15:4, twashoma Ekigambo ca Ruhanga nikitugasira kita?
2 Omu Kigambo ca Yehova, akagamba oku abantu abatahikirire bagenzire bari kwehanganira ebigezo. Ahabw’enki? Ni ahabw’okugira ngu tubegereho. Ni yo nshonga Yehova yakoresize entumwa Pawulo ngu abihandike. (Shoma omu Barooma 15:4.) Okushoma ezo nkuru nikituma twahumurizibwa kandi tugira amasiko. Konka kugira ngu tugasirwe tushemerire kukora ekirengire aha kushoma Bibuli kusha. Tushemerire kwikiriza ngu Ebyahandikirwe bihindure ebitekateko byitu kandi bitukore aha mutima. Ni enki eki turi kubasa kukora twaba turi kwenda obuhabuzi twabugana ekizibu kigumire? Nitubasa kukora ebi bintu bina: (1) Okushaba, (2) Okutera akashushani, (3) Okutekateka, n’ (4) Okuta omu nkora. Reka tushwijume ebiri kukwata ahari ebyo bintu kimwe aha kindi.b Bwanyima nitwija kukoresa ebyo bintu omu kwega aha byahikire aha Mugabe Dawudi n’aha ntumwa Pawulo.
1. OKUSHABA
Mbere y’okushoma Bibuli, shaba Yehova akukwase kureba oku ebi waza kushoma birakugasire (Reba paragurafu ya 3)
3. Ni enki eki oshemerire kukora mbere y’okushoma Bibuli, kandi ahabw’enki?
3 (1) Okushaba. Mbere y’okushoma Bibuli, shaba Yehova akukwase kureba oku ebi waza kushoma birakugasire. Ecokureberaho: Waba ori kuronda obuhabuzi bw’okwehanganira ekizibu, shaba Yehova akukwase kumanya emisinge y’omu Kigambo ceye eyi ori kubasa kugenderaho.—Fil 4:6, 7; Yak 1:5.
2. OKUTERA AKASHUSHANI
Gezaho kweta omu mwanya g’omuntu ori kugambwa omu nkuru (Reba paragurafu ya 4)
4. Ni enki ekiri kubasa kukukwasa kushoborocerwa ge enkuru y’omuri Bibuli?
4 (2) Okutera akashushani. Yehova akatuha obushoborozi oburi kutangaza bw’okutera akashushani. Kugira ngu oshoborocerwe enkuru y’omuri Bibuli, gezaho kutera akashushani oyerebe ori ahu byaberire. Gezaho kureba ebintu ebi omuntu ori kugambwaho yabire ari kureba kandi oyehurire nk’oku na we yabire ari kwehurira.
3. OKUTEKATEKA
Ta omutima aha bi ori kushoma n’aha ku biri kukukwataho (Reba paragurafu ya 5)
5. Okutekateka nikimanyisa ki, kandi shi ni bata oku ori kubasa kutekateka?
5 (3) Okutekateka. Okutekateka nikimanyisa kuta omutima aha bi ori kushoma kandi okamanya n’oku biri kukukwataho. Nikikukwasa kubuganisa ebitekateko rero oshoborocerwa ge eki wayegaho. Okushoma Bibuli otatekateke aha bi washoma ni nk’okuteka ebyokurya otatemu ebirungo. Okutekateka ni nk’okuta ebirungo byona omu byokurya kugira ngu binure. Kugira ngu otekateke, oshemerire kwebuza ebi bibuzo kandi okabigarukamu: ‘Ni enki eki omuntu ori kugambwa omuri eyi nkuru yakozire ngu ayeyambe? Ni bata oku Yehova yamukwasize? Ni bata oku ebi nashoma biri kubasa kunkwasa kwehanganira ebizibu?’
4. OKUTA OMU NKORA
Koresa ebi ori kwega kugira ngu okore ensharamu ndungi, otunge obusinge bwingi kandi ogumye okwikiriza kwawe (Reba paragurafu ya 6)
6. Ahabw’enki tushemerire kuta omu nkora ebi turi kwega?
6 (4) Okuta omu nkora. Yesu akagamba ngu twaba tutari kuta omu nkora ebi turi kwega, nituba turi nk’omuntu ori kombeka enju aha mushenyi. Nakora munonga konka naba nayeruhiza busha. Ahabw’enki? Ni ahabw’okuba ihunga ry’amani ryayija rikatera eyo nju nehika eri kushenyuka. (Mat 7:24-27) Ni co kimwe washaba, okatera akashushani kandi okatekateka aha bi wayega konka otabite omu nkora noba ori kweruhiza busha. Okwikiriza kwitu kwagezibwa ninga shi tukahiganisibwa, nituhika turi kucweka entege. Konka twayeyegesa kandi tukata omu nkora ebi twayega nitukora ensharamu ndungi, tugire obusinge bwingi kandi tugira okwikiriza kugumire. (Isa 48:17, 18) Reka turebe oku turi kubasa kukuratiza ezo ntambwe ina twaba turi kweyegesa ebyahikire aha Mugabe Dawudi.
NI ENKI EKI TURI KUBASA KWEGERA AHA MUGABE DAWUDI?
7. Ni eha nkuru y’omuri Bibuli eyi twaza kushwijuma?
7 Mbehi omunyabuzare wawe ninga munywani wawe yarakukorire ebintu bibi ebiri kukushasha? Caba kiri kisyoya, noyija kugasirwa washwijuma enkuru ya mutabani wa Dawudi ori kwetwa Abusalomu owagerizeho kwiba obugabe bw’ishe.—2 Sam 15:5-14, 31; 18:6-14.
8. Ni enki eki tushemerire kukora kugira ngu Yehova atukwase?
8 (1) Okushaba. Mbere y’okushoma enkuru y’omuri Bibuli, shaba Yehova omugambire oku ori kwehurira aha ku bakutwarize kubi. (Zab 6:6-9) Mugambire byona otari kumushereka. Mushabe akukwase kubona emisinge erakukwase kwehanganira embera zigumire ezi ori kurabamu.
9. Ni enki ecabire ahagati ya Dawudi na Abusalomu?
9 (2) Okutera akashushani. Tekateka aha byabireho kandi otere akashushani orebe oku byakwasire ahari Dawudi. Abusalomu mutabani wa Dawudi akakora emyaka myingi kugira ngu abantu bamukunde. (2 Sam 15: 7)Abusalomu ku yarebire buri obwire burungi akatuma entasi omuri Isirayeli yona kugira ngu batebekanise abantu bamwikirize ngu abe omutegeki wabo. Nambwenu akabihabiha Ahisofeli munywani wa Dawudi kandi omuhi w’obwenge weye ngu ayekwatanise na we omu kugoma. Abusalomu akegira omugabe, kandi yagezaho kwita Dawudi owabire arwire munonga omuri obwo bwire. (Zab 41:1-9) Dawudi akamanya eyo nama rero yahunga, yaruga omuri Yerusalemu. Bwanyima engabo za Abusalomu zikarwana n’eza Dawudi. Eza Abusalomu zikasingwa kandi Abasalomu mutabani wa Dawudi akitwa.
10. Ni biha bintu ebi Dawudi yabire ari kubasa kukora?
10 Tekateka aha ku Dawudi yabire ari kwehurira ebyo byona ku byabire nibimuhikaho. Akaba nakunda Abusalomu kandi akaba nayesiga Ahisofeli. Konka bombi bakamurugamu. Bakamukorera ebintu ebyamushashire munonga kandi bagezaho n’okumwita. Ebyo bikaba nibibasa kutuma Dawudi atayesiga abandi banywani beye, ari kutekateka ngu na bo bekwatanisize na Abusalomu. Akaba nabasa kwetekatekaho wenka, ninga shi agezaho kuhunga ari wenka. Nambwenu akaba nabasa kwemereza omutima munonga. Konka omuri ebyo byona tihine eki Dawudi yakozire. Ahobwe akehanganira ebyo bigezo bigumire. Ni enki ecamukwasize?
11. Ni enki eki Dawudi yakozire omu bigezo ebi yabugine?
11 (3) Okutekateka. Ni eha misinge eyi ori kubasa kwegera aha nkuru ya Dawudi? Garukamu ekibuzo ekiri kugira ngu, “Ni enki eki Dawudi yakozire ngu ayeyambe?” Dawudi taratinire munonga ninga shi ngu akore ensharamu mbi z’ahonaho. Kandi taratinire munonga ngu kitume atagira eki yakora. Omu mwanya gw’eco akashaba Yehova ngu amukwase. Nambwenu akashaba banywani beye obuyambi. Kandi akahika ari kuta omu nkora ensharamu ezi yabire yakora. N’obu ebi bakorire Dawudi byamushashire tararekire kwesiga abandi, kandi tarabangire. Akagumizamu kwesiga Yehova n’abanywani beye.
12. Ni bata oku Yehova yakwasize Dawudi?
12 Ni bata oku Yehova yakwasize Dawudi? Wacondoza nomanya ku Yehova yahire Dawudi amani g’okwehanganira eco kigezo. (Zab 3:1-8) Yehova akaha Dawudi omugisha omu nsharamu ezi yakozire. Kandi akaha amani banywani ba Dawudi b’abesigwa obu babire bari kurwana ngu barinde omugabe wabo.
13. Tukuratize ebiri omuri Matayo 18:15-17, ni bata oku ori kubasa kutoreza Dawudi hagira omuntu owakukorera ebintu ebiri kushasha?
13 (4) Okuta omu nkora. Yebuze ngu, ‘Ni bata oku ndi kubasa kutoreza Dawudi?’ Oshemerire kugira eki wakora juba kugira ngu otereze ebizibu. Okuratize embera, nobasa kuta omu nkora obuhabuzi bwa Yesu oburi omuri Matayo ekicweka ca 18 ahonaho. (Shoma omuri Matayo 18:15-17.) Konka toshemerire kuhika ori kukora ensharamu ocayine ekiniga. Oshemerire kushaba Yehova kugira ngu akuhe omutima oguturize n’okugira obwenge bw’okugira eki wakora. Otarireka kugumizamu kwesiga banywani bawe. Ahobwe guma oyetegwire kwikiriza obuyambi bwabo. (Enf 17:17) Ekiri kukira byona, kuratira obuhabuzi obu Yehova ari kukuha omu Kigambo ceye.—Enf 3:5, 6.
NI ENKI EKI ORI KUBASA KWEGERA AHARI PAWULO?
14. Ni ziha mbera eziri kubasa kutuma wata omutima ahari 2 Timoseo 1:12-16; 4:6-11, 17-22?
14 Mbehi abanyabuzare bawe nibakuhiganisa? Mbehi otwire omu ihanga ahu omurimo gw’Abahamya ba Yehova gwayemerezibwe? Caba kiri kisyoya, nogarukamu amani washoma ebiri omuri 2 Timoseo 1:12-16, na 2 Timoseo 4:6-11, 17-22.c Pawulo akahandika ebyo Byahandikirwe obu yabire ari omu kihome.
15. Ni enki eki ori kubasa kushaba Yehova?
15 (1) Okushaba. Mbere y’okushoma ebyo byahandikirwe, shaba Yehova omugambire ekizibu cawe n’oku ori kwehurira. Mugambire byona otari kumushereka. Shaba Yehova akukwase kutunga emisinge eri omu nkuru ya Pawulo erakukwase kumanya ec’okukora omu bigezo ebi ori kubugana.
16. Ni enki ecahikire ahari Pawulo?
16 (2) Okutera akashushani. Yete omu mwanya gwa Pawulo. Ari omu nkomo omu kihome omuri Roma. Akaba yaragire omu kihome mbere y’aho, konka ahari obu bwire namanya ngu ni ow’okwitwa. Bamwe omu banywani beye bakamwehaguraho kandi aruhire munonga.—2 Tim 1:15.
17. Ni biha bintu ebi Pawulo yabire ari kubasa kukora?
17 Pawulo akaba nabasa kuguma atire omutima aha bya kare, ari kutekateka ngu kuri yakozire ensharamu ndungi akaba atarije kusibwa. Akaba nabasa kwitirwa ekiniga abashija b’omuri Asia abamuhemukire kandi areka kwesiga abandi banywani beye. Konka Pawulo tihine eki yakozire omuri ebyo byona. Ahabw’enki yagumire ayine amasiko?
18. Ni biha bintu ebi Pawulo yakozire obu yabire ari kuraba omu bigezo?
18 (3) Okutekateka. Garukamu eki kibuzo ekiri kugira ngu, “Ni enki eki Pawulo yakozire ngu ayeyambe?” N’obu Pawulo yabire ari kumanya ku yabire arije kwitwa juba, konka tarebirwe ku kuhereza Yehova kiri ec’omugasho. Kandi akagumizamu kutekateka oku aragaruremu abandi amani. Akarondera obuyambi ahari Yehova birabire omu kushaba burijo. (2 Tim 1:3) Omu mwanya g’okuta omutima aha bamuhemukire, akereka okusima ahabw’obuyambi obu banywani beye b’abesigwa bamuhire. Nambwenu Pawulo akagumizamu kweyegesa Ekigambo ca Ruhanga. (2 Tim 3:16, 17; 4:13) Ekiri kukira byona, akagumizamu kwesiga ku Yehova na Yesu bari kumukunda. Tibaramuhemukire kandi akaba nayesiga atari kubanganisa ku babire barije kumuhemba ahabw’okuguma ari omwesigwa.
19. Ni bata oku Yehova yakwasize Pawulo?
19 Yehova akaba yagambire Pawulo ku yabire arahiganisibwe ahabw’okuba ari Omukristo. (Byak 21:11-13) Ni bata oku Yehova yakwasize Pawulo? Akagarukamu eshara za Pawulo kandi yamugumya. (2 Tim 4:17) Pawulo akagambirwa ku yabire arije kutunga ekihembo eki yakorire n’amani. Nambwenu Yehova akakoresa banywani ba Pawulo kugira ngu bamuhe obuyambi obu yabire ari kwetenga.
20. Tukuratize ebiri omu Barooma 8:38, 39, ni bata oku turi kubasa kutoreza Pawulo?
20 (4) Okuta omu nkora. Yebuze ngu, ‘Ni bata oku ndi kubasa kutoreza Pawulo?’ Nka Pawulo n’itwe tushemerire kumanya ku turije kuhiganisibwa ahabw’okwikiriza kwitu. (Mak 10:29, 30) Kugira ngu tugume turi abesigwa twaba turi kuraba omu bigezo tushemerire kushaba Yehova kandi tukeyegesa Bibuli burijo. Kandi burijo tushemerire kwijuka ku ekintu c’omugasho eki tushemerire kukora ari okuhisa Yehova ekitinisa. Tushemerire kwesiga tutari kubanganisa ku Yehova atarituhemukaho na kace, kandi ku hatariho ekintu na kimwe ekirije kutuma atagumizamu kutukunda.—Shoma omu Barooma 8:38, 39; Heb 13:5, 6.
YEGERA AHA BYOKUREBERAHO BY’OMURI BIBULI
21. Ni enki ecakwasize Aya na Hector kusingura ebizibu ebi babire bari kubugana?
21 Ebyokureberaho by’omuri Bibuli nibibasa kutukwasa kwehanganira embera zona ezi twakuba turimu. Ecokureberaho: Aya omupayoniya w’omuri Japani, akagamba ku enkuru ya Yona yamukwasize kuhwa obwoba bw’okuburira omu misho ga bona. Hector, omunyeto w’omuri Indonesia owu abazire beye batari kuhereza Yehova, ecokureberaho ca Ruusi kikatuma yayega ebiri kukwata ahari Yehova n’okumuhereza.
22. Ni enki ekiri kubasa kukukwasa kugasirwa omu nkuru z’omuri Bibuli n’omu bicweka ebiri aha mutwe oguri kugira ngu, “Toreza okwikiriza kwabo”?
22 Ni nkahe ahu ori kubasa kwiha ebyokureberaho by’omuri Bibuli ebiri kubasa kukugumya? Za vidiyo zitu, durama z’amaraka, n’ebicweka by’ahari intaneti ebyine omutwe oguri kugira ngu, “Toreza okwikiriza kwabo,” nibikukwasa kushoborocerwa enkuru z’omuri Bibuli.d Mbere y’okureba, kuhurikiza ninga shi kushoma enkuru y’omuri Bibuli, shaba Yehova akukwase kubonamu ebintu by’omugasho ebi ori kubasa kuta omu nkora. Yete omu mwanya g’omuntu ori kugambwa omuri eyo nkuru. Tekateka aha bi abo bahereza ba Yehova bakozire n’oku Yehova yabakwasize kusingura ebizibu. Ta omu nkora ebi wayega. Sima Yehova ahabw’obuyambi obu ari kukuha. Kandi yereka ku nosima ahabw’obuyambi obu ori kutunga ori kugaruramu abandi amani kandi ori kubashagika.
23. Tukuratize ebiri omuri Isaaya 41:10, 13, ni enki eki Yehova ari kuturaganisa?
23 Omuri egi nsi eri kutegekwa na Sitaane harimu akabi kingi, kandi obumwe netuma twayemereza omutima munonga. (2 Tim 3:1) Konka titushemerire kuhwamu amani ninga shi ngu tutine. Yehova namanya ebizibu ebi turi kurabamu. Ku turi kugwa naturaganisa ku arije kuturamira n’omukono gweye gwa buryo. (Shoma omuri Isaaya 41:10, 13.) Nitwesiga tutari kubanganisa ku Yehova arituha obuyambi bweye, kandi ku Bibuli erituha amani agu turi kwetenga omu kwehanganira ebizibu ebi turi kubugana.
ECESHONGORO CA 96 Ekitabo kya Ruhanga eky’Omuhendo
a Enkuru nyingi z’omuri Bibuli nizereka ku Ruhanga ari kukunda abahereza beye kandi ku ari kubakwasa kwehanganira ebigezo. Eki kicweka caza kukukwasa kumanya oku ori kubasa kweyegesa Bibuli kandi ebi wayega bikakugasira.
b Oburyo bw’okweyegesa oburi omuri eki kicweka ni bumwe omu buryo bwingi obu ori kubasa kukoresa. Obundi buryo buri omu kitabo c’okucondorezamu c’Abahamya ba Yehova aha mutwe oguri kugira ngu: “Bibuli” n’aha katwe kace akari kugira ngu “Okushoma n’okushoborocerwa Bibuli.”
c Mutashoma ebyo byahandikirwe muri omu cegeso c’Omunara g’Omurinzi omu kibina.
d Reba ekicweka ekiri kugira ngu, “Toreza okwikiriza kwabo—Abashija n’abakazi abari kugambwa omuri Bibuli” ahari jw.org. (Za ahari ENYEGESA ZA BIBULI > OKWIKIRIZA RUHANGA.)