Mbehi ekigambo ‘Erisho kurihwa erindi’ nikimanyisa ki?

Ecogukarukamu c’omuri Bibuli

Ekiragiro c’erisho kurihwa Erindi’ kikaba kiri kimwe omu biragiro ebi Musa yahire Abisirayeli kandi Yesu akakigambaho omuri toku yeye y’aha rushozi. (Matayo 5:38; Okuruga 21:24, 25; Eky’Ebiragiro 19:21) Eco kiragiro kikaba nikimanyisa ngu waza kuhana omuntu okozire ekibi, eco kihano kibe kiri kwingana n’enshobe eyi akozire.a

Nambwenu eco kiragiro kikaba nikitebwa omu nkora omuntu yahutaza ondijo. Ebiragiro bikagamba aha muntu ori kukikora ari kubyenda ati: ‘Obuhuta burihwe obundi, erisho ririhwe erindi, erino ririhwe erindi nk’oku omuntu ariba aremize ondijo na we abe ari ko yayihurwa.’—Abaleevi 24:20.

Ni eha ntego y’ekiragiro c’‘erisho kurihwa erindi’?

Ekiragiro c’‘erisho kurihwa erindi’ kikaba kitari kuha abantu obugabe bw’okwehorera. Kikaba nikituma abaramuzi b’omuri Isirayeli baha abantu abakozire enshobi ebihano ebibashemerire bitashambire konka nambwenu bitorobi.

Nambwenu eco kiragiro kikatebwaho kugira ngu kimaremu amani omuntu wena owabire ari kwenda kutwariza ondijo kubi ari kubyenda. ‘Abarisigaraho baryabihurira, batine; okuruga aho tibarigaruka kukorera omuri imwe ekibi nk’eco.’—Eky’Ebiragiro 19:20.

Mbehi Abakristo bashemerire kukuratiza eco kiragiro?

Ingaha, eco kiragiro tikiri kukwata aha Bakristo. Ni kimwe omu biragiro bya Musa ebyarugireho ahabw’ekitambo ca Yesu.—Abarooma 10:4.

N’obu kiri kisyoya, eco kiragiro nicereka oku Ruhanga ari kutekateka. Ecokureberaho: Nicereka ku Yehova ari kureba oburinganiza nk’obw’omugasho. (Zaaburi 89:14) Nambwenu nicereka eki oburinganiza kiri kumanyisa, ni okugamba ku abari kukora ebibi bashemerire kutunga ebihano ebibashemerire.—Yeremia 30:11.

Emitekatecere etahikire eyi abantu bine aha kiragiro c’‘erisho kurihwa erindi’

Ekiragiro c’‘erisho kurihwa erindi’ kikaba kirimu obwisi.

Amazima: Eco kiragiro kikaba kitari kuha abantu obugabe bw’okuhanisa abantu obugomi ninga shi kubaha ebihano ebiremerire. Ahobwe abaramuzi ku babakuratiraga ge eco kiragiro, bakaba nibahana omuntu bakuratize embera ezi arimu kandi bareba yaba koko akozire eco kibi ari kubyenda. (Okuruga 21:28-30; Okubara 35:22-25) Eco kiragiro kikaba nikituma abantu batarengesereza omu kuhana.

Emitekatecere etahikire: Eco kiragiro kikaba nikituma abantu bayehorera.

Amazima: Ekindi kiragiro ca Musa kikaba nikigira kiti: ‘Otarihora abantu b’omu ihanga ryawe n’obu kwakuba okubagirira enzika.’ (Abaleevi 19:18) Eco kiragiro kikaba kitari kutuma abantu bayehorera, ahobwe kikaba nikituma bayesiga Ruhanga n’abu yabire atireho ngu bahane enkozi z’ebibi.—Eky’Ebiragiro 32:35.

Yesu akahabura ababire bakineho emitekatecere etahikire

Yesu akaba namanya ku bamwe omu bantu babire bacengire kubi ekiregiro c’‘erisho kurihwa erindi.’ Akabahabura obu yagizire ngu: ‘Mukahurira ku cagambirwe ngu: “Erisho riryarihwa erindi kandi erino riryarihwa arino.” Konka nyowe nimbagambira nti otarirwana n’omuntu mubi. Omuntu wena orikukutera oruhi rw’omushaya gwa buryo omuhindurire orwa bumosho.’—Matayo 5:38, 39.

Yijuka ku Yesu yagambire ngu: ‘Mukahurira ku cagambirwe ngu.’ Hanuya Yesu nabasa kuba yabire ari kugamba bamwe omu bebembezi b’Abayudaya ababire bari kwegesa ku abantu bari kubasa kwehorera. Hariho omunyabwenge omu bya Bibuli ori kwetwa Adam Clarke owagambire ati: “Oku kiri kurebeka, Abayudaya bakaba bahindwire eco kiragiro [erisho kurihwa erindi] nk’orwekwaso rw’okwehorera kandi eco kikaba nikituma bakora ebintu bibi munonga.” Ahabw’okuba abebembezi b’edini babire nibashagika eby’okwehorera kikaba nikituma abantu bakwata ekiragiro c’‘erisho kurihwa erindi’ omu buryo butari bwo.—Mako 7:13.

Konka Yesu we akagamba ku rukundo ari co kiragiro kikuru omu biragiro byona bya Ruhanga. Akagamba ati: ‘Kunda [Yehova] Ruhanga wawe n’omutima gwawe gona, n’amagara gawe gona, n’obwenge bwawe bwona. Eki ni co kiragiro kikuru kandi ec’okubanza. Eca kabiri ekiri kukishusha n’eki: Kunda mutahi wawe nk’oku oyekunda. Omu biragiro ebi byombi Ebiragiro byona ni eby’abahanuzi ni mwo bikomoka.’ (Matayo 22:37-40) Yesu akereka ku ecabire kirije kwereka abakurasi beye b’amazima atari okwehorera ahobwe ku ari kurundo.—Yohaana 13:34, 35.

a Eco kiragiro nambwenu ekiri kwetwa lex talionis omu rurimi rw’Oruratini nambwenu kikaba nikishangwa omu biragiro by’abantu b’omu bwire bwa kare.