Obushoborozi bw’embwa bw’okuhunahuna

Abari kucondoza bakagamba ngu embwa nizibasa kukoresa obushoborozi bwazo bw’okuhunahuna rero zimanya emyaka y’ezindi mbwa, oku zihangirwe, n’embera zazo. Embwa nibabasa n’okuzimanyiza rero bazikoresa omu kurondesa ebisasi, ninga shi ebitaburabwonko. Nk’oku abantu bari kubasa kukoresa amisho gabo bakamanya ebiri hihi yabo, embwa na zo nizibasa kubimanya ziri kukoresa obushoborozi bwazo bw’okuhunahuna. Nizikoresa enyindo zazo omu kuhurira.

Manya ebi: Obushoborozi bw’embwa bw’okuhunahuna nibukira obushoborozi bwitu bw’okuhumurirwa emirundi myingi. Nk’oku byagambirwe na yunivasiti emwe y’omuri Amerika, embwa nizibasa kuhurira ekintu ekiri hare munonga. Obwe rero embwa nebasa kumanya ku wata omu mizi mingi sukari nce munonga, nahu yakuba eri kwingana n’akagiko kace.”

Ahabw’enki turi kubasa kugamba ku obushoborozi bw’embwa bw’okuhunahuna buri kukira obushoborozi bwitu bw’okuhumurirwa?

• Enyindo y’embwa netura ejubire kandi eco nikituma yahurira akahoho k’akantu kona.

• Embwa eyine emyanya ibiri eri kurabamu omwika, n’okugamba ogu eri kukoresa eri kuhumeka ogundi egukoresa eri kuhunahuna. Embwa yaba eri kuhunahuna, omwika nigutora omu rubaju rw’enyindo eyi eri kukoresa omu kuhunahuna.

• Ekicweka c’enyindo ekiri kukwasa embwa kuhunahuna nikibasa kwingana na sikweya sentimita 130 ninga shi zikireho, konka ec’abantu co nikingana na sikweya sentimita 5 kusha.

• Embwa nebasa kuba eyine otucweka oturi kuyikwasa kuhunahuna, oturi kukira otw’abantu emirundi 50.

Ebyo byona nibikwasa embwa kutanisa empumuro z’ebintu byingi ebi yahunahuna. Ecokureberaho: Hariho abanyabwenge abagambire ku itwe turi kubasa kuhumurirwa supu, konka embwa yo nebasa n’okutanisa ebirungo ebirimu.

Abanyabwenge b’ekitongore ekiri kucondoza aha bya kansa, bakagamba ku obwonko bw’embwa n’enyindo zayo biri kukorera hamwe kandi “eco nikituma yaza omu nyamishwa ezine obushoborozi bwingi bw’okuhunahuna.” Abanyabwenge bakarebera ahari obwo bushoborozi bw’embwa, bakora ebyoma ebiri kubasa kumanya ahantu ahariho ebisasi, kukwata magendo, n’okushwijuma endwara nka kansa.

Nokigambaho enki? Mbenu shi obushoborozi bw’embwa bw’okuhunahuna bukabaho buri kuruga omu bindi bintu ninga bukahangwa?