Me ren Mattu

24 Atun Jises epwele ló seni ewe imwenfel, néún kewe chón káé ra feito ren pwe repwe ápwár ngeni ewe imwenfel. 2 Lón an pélúweni a ereniir: “Ouse kúna meinisin ekkeei mettóch? Enlet úa erenikemi, esap fókkun chúen wor eféú faw ikeei ie epwe nóm wóón eféú faw nge esap toropasetiw.”

3 Atun a mómmóót wóón ewe Chukun Olif, ekkewe chón káé ra etto ren nge iir chék, me apasa: “Erenikem ineet ekkeei mettóch repwe fis, me met esissillen óm nónnóm* me sópwólóón ótóten ei fénúfan?”*

4 Lón án Jises pélúweni a ereniir: “Oupwe túmúnú pwe esap wor emén epwe otupukemi, 5 pún chómmóng repwe feito fán ásengesin itei, me apasa, ‘Ngang ewe Kraist,’ me epwe otupwaaló chómmóng. 6 Lupwen oupwe rong akúrangen maun me pwóróusen maun ousap niwokkus, pún ekkeei mettóch repwe fókkun fis, nge esap mwo tori ewe sópwólóón.

7 “Pún fénú me fénú repwe maunfengen lefiler, me mwú epwe ú ngeni mwú, me epwe wor nafangawen mwéngé me chechchechin fénú ekis meinisin. 8 Ekkeei mettóch, ra pwáári pwe a poputá ewe riáfféú.*

9 “Mwirin, aramas repwe eriáfféwúmwáálikemi me repwe nikemiiló, me oupwe kúna koput seni aramasen ekkewe mwú meinisin fán ásengesin itei. 10 Mwirin, chómmóng repwe pwal chepetek me repwe afangemá emén me emén leir me oput emén me emén leir. 11 Chómmóng soufós chofona repwe útá me otupwaaló chómmóng, 12 me pokiten lallapólóón féfféringaw, lape ngeni aramas epwe patapateló ar tong. 13 Nge ewe emén mi likiitú* tori sópwólóón epwe kúna manaw. 14 Me ei kapas allim ussun ewe Mwú epwe afalafalfeil wóón unusen fénúfan pwe epwe eú minen pwáraatá ngeni aramasen mwú meinisin, iwe mwirin ewe sópwólóón epwe war.

15 “Ina minne, ussun alon Kot me ren néún we soufós Taniel, oupwe kúna me lón ewe leeni mi pin ewe mettóch mi ánnioput mi atai mettóch meinisin, (a lamot ewe chón állea epwe állea fán mirit), 16 lón ena atun chókkewe mi nóm lón Jutia repwele poputá le sútá wóón ekkewe chuuk. 17 Emén aramas mi nóm asen ewe imw, esap tétiw an epwe angei och mettóch me lón imwan, 18 me ewe aramas mi nóm lón tánipi esap liwin an epwe angei úfan úféúfen lúkún. 19 Riáfféú ngeni ekkewe fefin mi pwopwo me chókkewe mi oupwu ménúkol lón ekkena rán! 20 Oupwe ikkiótek pwe ámi sú esap fis lón fansoun affééú are pwal lón ewe ránin Sapat, 21 pún epwe wor riáfféú mi lapalap ussun an ese mwo fis seni lepoputáán fénúfan tori ikenái, me esap pwal fissefál. 22 Ren enletin, iká esap mwochomwocholó ekkena rán, esap wor emén aramas epwe kúna manaw. Nge fán iten ekkewe mi filitá, ekkena rán repwe mwochomwocholó.

23 “Iwe iká emén a erenikemi, ‘Nengeni! Ewe Kraist a nóm ikeei,’ are, ‘Ikenan!’ ousap lúkú. 24 Pún Kraist chofona me soufós chofona repwe pwáátá me repwe féri chómmóng esissil me manaman pwe repwe otupu pwal mwo nge ekkewe mi kefilitá, iká mi tufich. 25 Nengeni! Úa éúréúrakemi. 26 Ina minne, iká aramas ra erenikemi, ‘Nengeni! I a nóm lón ewe fénúapé,’ ousap feiló ikena, ‘Nengeni! I a nóm lón eú leeni mi monomonoló,’ ousap lúkú ena. 27 Ussun chék án inefi a fiiwu seni éétiw me saramoló ngeni notou, epwe ina ussun án ewe Néún aramas nónnóm.* 28 Ia a wor somá ie, ikena ekkewe ikel repwe kochufengen ie.

29 “Mwirin chék ewe riáfféú lón ekkena rán, ewe akkar epwe rocholó, ewe maram esap ttin, me ekkewe fúú repwe turutiw seni láng, me ekkewe mettóch fán láng repwe chechchech. 30 Mwirin, esissillen ewe Néún aramas epwe pwá lón láng, me meinisin einang wóón fénúfan repwe awata pwisin iir fán letipeta, me repwe kúna án ewe Néún aramas feffeito lón kuchuun láng fán an manaman me ling mi lapalap. 31 Me i epwe tiinaawu néún kewe chónláng fán ttikin rappwa mi léúwommóng, me repwe ionfengeni néún kewe mi kefilitá seni ekkewe rúáánú ásepwál, seni ewe epek lesopwun láng tori lesopwun me ewe epek.

32 “Iei oupwe káé seni ei kapas áwewe ussun ewe irá fiik: Atun chék palan kewe ra kerán pwúk me chéén kewe ra fasar, iwe oua silei pwe a arapoto fansoun pwichikkar. 33 Iei ussun pwal ámi, atun oua kúna meinisin ekkeei mettóch, oupwe silei pwe i a arapoto ppen ekkewe asam. 34 Enlet úa erenikemi pwe ei táppin aramas resap fókkun máló tori án meinisin ekkeei mettóch repwe fis. 35 Láng me fénúfan repwe móróló, nge ái kewe kapas resap fókkun móróló.

36 “Ren ena rán me kulók ese wor emén a silei, esap pwal ekkewe chónláng lón láng esap pwal ewe Naw, nge ewe chék Sam. 37 Pún ussun chék lón ránin Noa we, epwe pwal ina ussun ren án ewe Néún aramas nónnóm.* 38 Pún ussun ekkewe aramas lón ekkewe rán me mwen ewe Noter, ra mwémmwéngé me úkkún, mwán ra pwúpwúlú me fefin ra akkapwúpwúlú, tori ewe rán Noa a tolong lón ewe waimw, 39 me rese áfánni minne a fiffis tori án ewe Noter a war me uweiireló meinisin, epwe pwal ina ussun ren án ewe Néún aramas nónnóm. 40 Iwe, rúúemén mwán repwe nóm lón tánipi, Kot epwe angealó emén me likitaaló ewe pwal emén. 41 Rúúemén fefin repwe úsúús féún wiich wóón eú leenien úsúús, Kot epwe angealó emén me likitaaló ewe pwal emén. 42 Iei minne, oupwe mammasa, pún ouse silei menni rán ámi we Samol epwe waroto lón.

43 “Nge oupwe chechchemeni eú mettóch: Iká ewe chón imw a silei menni kulók lepwin ewe chón solá epwe war lón, epwe chék nenneló me esap mut ngeni an epwe tolong lón imwan we. 44 Ren ei popun, pwal ámi oupwe ammólnakemiitá, pún ewe Néún aramas epwe war lón ewe kulók ousap ekieki pwe ina ewe atun.

45 “Ié wesewesen ewe chón angang mi túppwél me tipáchem, ewe néún we masta a ewisa ngeni an epwe túmúnú néún kewe chón angang, epwe ngeniir ener mwéngé lón fansoun mi fich? 46 A pwapwa ena chón angang iká néún we masta a waroto nge a kúna an féri ena! 47 Enlet úa erenikemi, i epwe ewisa ngeni an epwe túmúnú meinisin pisekin kewe.

48 “Nge iká ena chón angang a ngaw me a apasa lón letipan, ‘Nei we masta a mmangoto,’ 49 me a poputá le awata chienan kewe chón angang me eti ekkewe mi únnúpuch le mwéngé me ún, 50 ewe mastaan ena chón angang epwe war lón ewe rán esap ekieki ngeni me lón ewe kulók esap silei, 51 me i epwe fókkun eriáfféwú* me epwe oturaalong lón leenien ekkewe chón likótuputup. Me ikenan epwe kechiw me akkarúngi ie.