Me ren Mattu

26 Iwe, lupwen Jises a wes le apasa ekkeei mettóch meinisin, a ereni néún kewe chón káé: 2 “Ámi oua silei pwe ruu rán seni iei ewe Pasofer epwele fis, me repwe atolonga ewe Néún aramas lepéún ekkewe ekkóch pwe epwe ninniiló wóón ewe irá.”

3 Iwe, ekkewe souasor mi lap me ekkewe néúwisin Jus ra chufengen ren imwen ewe souasor mi lapalap itan Kaifas, 4 me ra pwúngúpwúngfengen ar repwe turufi* Jises ren ar rawei me nieló i. 5 Nge ra erá: “Esap atun ewe ránin chulap, pwe ete fis osukosuk lein ekkewe aramas.”

6 Lupwen Jises a nóm Petani lón imwen Simon, ewe mi piin úri keinepan, 7 emén fefin a feito ren fán eú rumeen* lémmis mi mémmóng, me a poputá le ninatiw wóón mékúran atun an mwéngé.* 8 Atun ekkewe chón káé ra kúna ei ra song me apasa: “Pwata a asolapa? 9 Pún a tongeni fen améméló ren watteen moni me ngeni ekkewe mi wéúngaw.” 10 Jises a silei ei, iwe a apasa ngeniir: “Pwata oua aosukosuka ei fefin? I a féri minne mi múrinné ngeniei. 11 Pún ekkewe mi wéúngaw ra nónnóm remi fansoun meinisin, nge ngang úsapw nónnóm remi fansoun meinisin. 12 Atun neminnei a epiti ngeni inisi ei lémmis, a féri pwe epwe ammólnaeitá ngeni peiás. 13 Enlet úa erenikemi, ese lifilifil ia ei kapas allim a afalafalfeil ie wóón unusen fénúfan, minne ei fefin a féri aramas repwe pwal silei pwe minen áchechcheman.”

14 Mwirin, emén me lein ekkewe Engol me Rúúemén, ewe mi iteni Jutas Iskariot, a feiló ren ekkewe souasor mi lap, 15 me apasa: “Met oupwe ngeniei pwe úpwe afangemá i ngenikemi?” Ra pwon pwe repwe ngeni 30 féún silifer. 16 Iwe, seni ena atun, a kan kakkatol menni atun a fich an epwe afangemá i.

17 Lón ewe áeúin ránin Pilawa Ese Lefen, ekkewe chón káé ra feito ren Jises, me apasa: “Ia ka mochen ám áúpwe ammólnatá ie pwe kopwe mwéngé ewe Pasofer?” 18 A apasa: “Oupwe feiló lón ewe telinimw ren enan mwán úa sissilei me ereni, ‘Ewe Sense a apasa: “Ái fansoun mi kefililó a arapoto. Ám me nei kewe chón káé áúpwe féri ewe Pasofer lón imwom ei.” ’ ” 19 Iwe, ekkewe chón káé ra féri met Jises a allúkú ngeniir me ra ammólnatá fán iten ewe Pasofer.

20 Lupwen a lekunioletiw, a móót* órun ewe cheepel ren ekkewe 12 chón káé. 21 Atun ra mwémmwéngé, a apasa: “Enlet úa erenikemi pwe emén me leimi epwe afangemáei.” 22 Ra fókkun letipechou ren ei, iwe, emén me emén a poputá le ereni: “Samol, esap ngang ena, iká met?” 23 Lón an pélúweni a apasa: “Ewe emén mi fitiei le ottukaalong péún lón ewe sepi, ina i ewe epwe afangemáei. 24 Pwúngún, ewe Néún aramas epwele máló, ussun chék met a fen makketiw ussun i. Nge feiengaw ngeni ena aramas ewe Néún aramas epwe afangemá me ren! Epwe fen éch iká ena aramas esap uputiw.” 25 Jutas, ewe epwele afangemá i, a pélúweni: “Rappai, esap ngang ena, iká met?” Jises a ereni: “Ka pwisin apasa.”

26 Iwe, atun ra chúen mwéngé, Jises a angei ewe pilawa, mwirin an eáni eú iótek, a kinikisietiw me ngeni ekkewe chón káé, a erá: “Oupwe angei me mwéngé. Ei a wewe ngeni inisi.” 27 Iwe a angei eú kap, a apasa an kilisou ngeni Kot, me ngeniir, a apasa: “Oupwe ún seni, ámi meinisin, 28 pún ei a wewe ngeni chchaai, ‘chchaan ewe pwonen etipeeú,’ ewe epwe niniiló fán ásengesin chómmóng pwe omusomusen tipis. 29 Nge úa erenikemi: Úsapw fókkun chúen únsefál ei wain tori ewe rán lupwen úpwe etikemi le ún ewe mineféén wain lón Mwúún Semei we.” 30 Sáingolóón, mwirin ar eáni kélún mwareiti Kot, ra feiló ngeni ewe Chukun Olif.

31 Mwirin Jises a ereniir: “Ámi meinisin oupwe chepetek lón ei pwinin pokiten minne epwele fis ngeniei, pún a makketiw: ‘Úpwe nieló ewe chón mmasen siip, me ewe mwichen siip repwe parasfeil.’ 32 Nge mwirin ái manawetá, úpwe akkomwoló mwemi lón Kalili.” 33 Nge Piter a pélúweni, a ereni: “Ikáámwo meinisin ekkewe ekkóch repwe chepetek ren met epwele fis ngonuk, ngang úsapw fókkun chepetek!” 34 Jises a ereni: “Enlet úa erenuk, lón ei pwinin mwen án emén chukó epwe kékké, kopwe amam ngang fán úlúngát.” 35 Piter a ereni: “Ikáámwo úpwe fituk le máló, úsapw fókkun amam en.” Meinisin ekkewe ekkóch chón káé ra pwal erá ena.

36 Mwirin, Jises a etiir le ló ngeni ewe leeni itan Ketsemeni, me a ereni ekkewe chón káé: “Oupwe móót ikeei atun úpwe ló ikenan me iótek.” 37 Me a luki Piter me néún Sepeti kewe rúúemén, a poputá le meefi letipeta me a fókkun lólilen. 38 Mwirin a ereniir: “Úa fókkun letipeta, arap ngeni úpwe máló ren. Oupwe nóm ikeei me etiei le mammasa.” 39 Me a feiló ekis towaw, a fotopwásuk me chapetiw lepwúl, me iótek: “Semei, iká mi tufich, amwo ei kap epwe ló seniei. Nge esap ái mochen epwe fis, nge óm mochen epwe fis.”

40 A liwiniti ekkewe chón káé me kúner pwe ra méúr, me a ereni Piter: “Ouse mwo nge tongeni etiei le mammasa lón eú chék awa? 41 Oupwe chék mammasa me sópweeló le iótek pwe ousap tolong lón sóssót. Ewer, ewe letip a mochen* féri nge ewe futuk a apwangapwang.” 42 Oruuen atun, a pwal ló me iótek: “Semei, iká ese tufich ái úsapw únúmi ei kap, iwe letipom epwele chék pwénúetá.” 43 A pwal liwinto me kúner pwe ra méúr, pwe meser kewe ra choutiw. 44 Iwe a likitiireló, a feiló me iótek lón aúlúngátin fansoun, a pwal enniwilisefáli met a fen apasa. 45 Mwirin, a liwiniti ekkewe chón káé me ereniir: “Lón ei esin fansoun, oua annut me asésé! Nengeni! A arapoto ewe kulók án ewe Néún aramas epwele kúna afangemá me lepéún ekkewe chón tipis. 46 Oupwe pwáátá, sia ló. Nengeni! Ewe chón afangemáei a arapoto.” 47 Atun a chúen fóffós, nengeni! Jutas, emén me lein ekkewe Engol me Rúúemén, a feito me eú watteen mwichen aramas ra fiti fán néúr ketilas me wokur, ra tiitiito me ren ekkewe souasor mi lap me néúwisin Jus.

48 Iei ewe chón afangemá a fen ngeniir eú esissil, a apasa: “Ewe emén úpwe kisi, ina i ewe oupwe aresini.” 49 Me a fetál weneweneto ngeni Jises, a apasa: “Lepong allim, Rappai!” me kisi i. 50 Nge Jises a ereni: “Ifa ewe popun ka feito?” Mwirin ra feiliiti Jises me turufi me aresini. 51 Nge nengeni! emén me lein chókkewe mi fiti Jises a úttawu néún we ketilas me pékúoló selingen ewe chón angang, néún ewe souasor mi lapalap. 52 Mwirin, Jises a ereni: “Kopwe eliwini noum ketilas ngeni leenian, pún meinisin chókkewe mi néúnéú ketilas repwe máló ren ketilas. 53 Are ka ekieki pwe úse tongeni tingor ngeni Semei an epwe aworato rei lón ei fansoun fitengeréú chónláng?* 54 Iká ina, ifa ussun epwe pwénúetá ewe Taropwe mi Pin, ewe mi apasa pwe a lamot epwe fis iei ussun?” 55 Lón ena kulók Jises a ereni ewe mwichen aramas: “Oua feito fán ketilas me wok pwe oupwe aresiniei ussun emén chón solá? Iteiten rán úa kan mómmóót lón ewe imwenfel me asukul, nge ouse aresiniei. 56 Nge meinisin ekkeei ra fis pwe epwe pwénúetá makkeien* ekkewe soufós.” Mwirin, meinisin ekkewe chón káé ra likitaaló i me súló.

57 Chókkewe mi aresini Jises ra uwealó i ngeni Kaifas ewe souasor mi lapalap, ikewe ekkewe soumak me néúwisin Jus ra chufengen ie. 58 Nge Piter a tattapweló mwirin me towaw, tori ren imwen ewe souasor mi lapalap, mwirin an tolong lón, a móttiw ren ekkewe chón angangen ewe imw pwe epwe kúna met mwirilóón.

59 Iei ekkewe souasor mi lap me unusen án chón Jus we mwichen soukapwúng mi tekia, ra kúkkútta chókkewe repwe tipimwáál ngeni Jises ren an epwe ninniiló. 60 Inaamwo iká a chómmóng chón pwáraatá mi chofona ra etto, nge rese kúna och. Mwirin rúúemén ra etto 61 me apasa: “Ei mwán a erá, ‘Úa tongeni ataietiw ewe imwenfelin Kot me aúetá lón úlúngát rán.’ ” 62 Ren ena, ewe souasor mi lapalap a útá me ereni: “Ese wor met kopwe pélúwen ngeniir? Kese rong met ei ekkeei mwán ra etipisuk wóón?” 63 Nge Jises a chék fanafaneló. Iei minne ewe souasor mi lapalap a ereni: “Kopwe kapas enlet, iká kese, ka chofona ngeni ewe Kot mi manaw. En ewe Kraist, ewe Néún Kot?” 64 Jises a ereni: “En pwisin ka apasa. Nge úa erenikemi: Seni iei oupwe kúna ewe Néún aramas an mómmóót peliefichin ewe Kot mi Manaman me feffeito lón ekkewe kuchuun láng.” 65 Mwirin, ewe souasor mi lapalap a kamwei úfan we úféúfen lúkún, me apasa: “I a eáni kapas mi ésúfélúngaw ngeni Kot! Pwal met lamoten epwe wor chón pwáraatá? Nengeni! Iei oua rong an kapas mi ésúfélúngaw ngeni Kot. 66 Met meefiemi?” Ra pélúweni: “A fich ngeni an epwe máló.” 67 Iwe, ra attufa wóón mesan me éfénú i. Ekkóch ra pésapei, 68 me apasa: “En Kraist, iká en emén soufós, iwe, erenikem iká ié a awatók?”

69 Iei Piter a mómmóót lúkún ren ewe imw, me emén chón angang fépwúl a feito ren me apasa: “Pwal en ka fiti Jises ewe re Kalili, iká met?” 70 Nge a amam mwen meser meinisin, a apasa: “Úse silei met ena ka fós ussun.” 71 Lupwen a feiliwu arapakkan ewe ttit, pwal emén fépwúl a kúna i me a ereni chókkewe ikena: “Ei mwán chienen Jises ewe re Nasaret.” 72 A pwal amam fiti ékképél: “Úse sissilei ewe mwán!” 73 Ekiseló mwirin, chókkewe mi ú fetál ra feito me ereni Piter: “Pwúngún, en pwal emén leir, pún ren enletin, ka pwá ren óm kapas.”* 74 Mwirin, a poputá le ékképél me apasa pwe i epwe anúmamaw iká esap apasa ewe enlet: “Úse sissilei ewe mwán!” Me mwittir chék emén chukó a kékké. 75 Me Piter a chemeni alon Jises ei: “Mwen án emén chukó epwe kékké, kopwe amam ngang fán úlúngát.” Iwe, a towu lúkún me kechiw pokiten a fókkun letipechou.