Ngeni Ekkewe Chón Rom
14 Oupwe etiwa ewe aramas mi apwangapwang lón an lúkú, nge ousap apwúngú i ren minne a eáni ekiek wóón mettóch.* 2 Emén mi péchékkúl an lúkú a mwéngé mettóch meinisin, nge emén mi apwangapwang an lúkú a chék mwéngé mwéngéén atake. 3 Emén mi mwéngé sókkun mwéngé meinisin esap netiw wóón emén mi chék mwéngé mwéngéén atake, nge ewe mi chék mwéngé mwéngéén atake esap apwúngú ewe mi mwéngé sókkun mwéngé meinisin, pún Kot a fen etiwa i. 4 En ié pwe kopwe apwúngú néún emén chón angang? I esap noum chón angang nge néún Kot, i néún we masta. A wor an pwúúng le filaatá iká minne a féri a pwúng are mwáál. Ren enletin, pokiten Jiowa* a álisi, i a tongeni úéch mwen mesan.
5 Emén aramas a apwúngaló eú rán pwe epwe lap seni ekkewe ekkóch rán, pwal emén a apwúngaló eú rán pwe epwe ussun chék meinisin ekkewe ekkóch rán. Emén me emén epwe unusen lúkúlúk wóón minne a apwúngaló. 6 Ewe emén mi ekieki pwe eú rán a aúchea, a ina ussun pwe epwe asamolu Jiowa.* Ewe emén mi mwéngé sókkun mwéngé meinisin, a ina ussun pwe epwe asamolu Jiowa* pún a kilisou ngeni i.* Ewe emén mi chék mwéngé mwéngéén atake, a ina ussun pwe epwe asamolu Jiowa* pún a pwal kilisou ngeni i.* 7 Ren enletin, ese wor emén me leich mi manaw fán iten chék pwisin kich, me ese wor emén a máló fán iten chék pwisin kich. 8 Pún iká sia manaw, sia manaw fán iten Jiowa,* me iká sia máló, sia máló fán iten Jiowa.* Ina minne, iká sia manaw me iká sia máló, kich néún Jiowa.* 9 Ewe popun Kraist a máló me a manawsefálitá, pwe epwe Samol wóón ekkewe mi máló me ekkewe mi manaw.
10 Nge pwata ka apwúngú pwiium we? Are pwata ka pwal netiw wóón pwiium we? Pún kich meinisin sipwe útá mwen án Kot we leenien móótun apwúng. 11 Pún a makketiw: “Jiowa* a apasa, ‘Enlet mwo manawei, iteiten pwásuk meinisin repwe fotopwásuk ngeniei, me iteiten chénmwéngé meinisin repwe mwareitiei me apasa pwe ngang Kot.’ ” 12 Iwe, Kot epwe apwúngú emén me emén kich me ren ach féffér.
13 Ina minne, sisap chúen apwúngú emén me emén, nge sipwe fen tipeppós ach sisap isettiw eú minen chepetek are eú minen eppet ngeni emén pwiich. 14 Úa silei me úa lúkúlúk lón ewe Samol Jises pwe ese wor och mettóch a pwisin limengaw, lúkún chék iká emén a ekieki pwe och mettóch a limengaw, iwe a limengaw me ren. 15 Iká ka efisi án pwiium we epwe chepetek pokiten mwéngé, kese chúen feffetál lón tong. Ren ónomw mwéngé, kosap angawaaló* ena emén Kraist a máló fán itan. 16 Ina minne, ousap féri met oua lúkú pwe mi múrinné iká epwe efisi án ekkewe ekkóch repwe apasa minne mi ngaw fán itemi. 17 Pún ewe Mwúún Kot ese wewe ngeni mwéngé are ún, nge a wewe ngeni minne mi pwúng me kinamwe me pwapwa ren ngún mi fel. 18 Pún ié a slave ngeni Kraist lón ei esin napanap a ketiw me ren Kot, me aramas repwe tipeeú ngeni i.
19 Iei minne, sipwe achocho ngeni ekkewe mettóch mi efisatá kinamwe me ekkewe mettóch mi apéchékkúlatá emén me emén. 20 Kopwe úkútiw le ataieló án Kot we angang pokiten chék mwéngé. Pwúngún, mettóch meinisin ra liméch, nge epwe efeiengaw ngeni* emén an epwe mwéngé iká epwe efisatá chepetek. 21 Epwe kon múrinné iká kosap ochooch futuk are ún wain are féri och mettóch epwe áchepeteki pwiium we. 22 Ewe lúkú ka eáni, kopwe apwénúetá lón pwisin manawom mwen mesen Kot. A pwapwa ewe aramas ese apwúngú pwisin i ren met a filaatá le féri. 23 Nge iká a wor an tipemwárámwár, i a fen kúna apwúng iká a mwéngé, pokiten an mwéngé ese lóngólóng wóón lúkú. Ren enletin, mettóch meinisin rese lóngólóng wóón lúkú, ina tipis.