Néún Jon Áeúin Taropwe

2 Ámi nei kana mi áchengicheng, úa makkeei ekkeei mettóch ngenikemi pwe oute féri tipis. Iwe nge, iká emén a féri tipis, a wor emén chón álillis* a nóm ren ewe Sam, i Jises Kraist, ewe chón pwúng. 2 Me i ewe asoren chásefál fán iten ach kewe tipis, nge esap chék fán iten ach kewe tipis, pwe pwal fán iten tipisin aramasen fénúfan unus. 3 Iká sia sópweeló le álleasochisi an kewe allúk, a ánnetatá pwe sia silei i. 4 Ewe emén mi apasa, “Úa silei i,” nge ese álleasochisi an kewe allúk, i emén chón chofona, me ewe enlet ese nóm lón letipan. 5 Nge are emén a álleasochisi án Kraist kapas, iwe, epwe leteló pwe i a enletin tongei Kot. Ren ei sia silei pwe sia tipeeúfengen me i. 6 Ewe emén mi apasa pwe a nónnóm lón an tipeeú ngeni i, epwe fókkun sópweeló le manaweni ewe manaw Jises a manaweni.

7 Ámi mi áchengicheng, ei allúk úa makkeei ngenikemi esap eú allúk mi fé, nge eú allúk minen lóóm a fen nóm remi seni me lepoputáán. Ena allúk minen lóóm, ina ewe kapas oua fen rong. 8 Iwe, úa pwal makkeei ngenikemi eú allúk mi fé, eú allúk i a álleasochisi me ámi oua pwal álleasochisi, pún iei, ewe kiroch a móróló nge ewe enletin saram a fen tittin.

9 Emén mi apasa pwe a nóm lón saram nge a oput pwiin, i a chúen nóm lón kiroch. 10 Emén mi tongei pwiin a chék nónnóm lón saram, ese wor och mettóch epwe chepetek ren. 11 Nge emén mi oput pwiin, i a nóm lón kiroch me a feffetál lón kiroch, me ese silei ia epwe feiló ie pún kiroch a ochuunna mesan.

12 Ámi nei kana mi áchengicheng, úa mak ngenikemi pokiten ámi kewe tipis a fen musoló fán ásengesin itan. 13 Ámi sam kana, úa mak ngenikemi pokiten oua fen silei i, ewe mi nóm seni me lepoputáán. Ámi alúwél kana, úa mak ngenikemi pokiten oua okkufu ewe mi ngaw. Ámi naw kana, úa mak ngenikemi pokiten oua silei ewe Sam. 14 Ámi sam kana, úa mak ngenikemi pokiten oua fen silei i, ewe mi nóm seni me lepoputáán. Ámi alúwél kana, úa mak ngenikemi pokiten oua péchékkúl me án Kot kapas a nónnóm lón ámi me oua okkufu ewe mi ngaw.

15 Ousap tongei fénúfan are ekkewe mettóch mi nóm lón fénúfan. Iká emén a tongei fénúfan, iwe i ese tongei ewe Sam. 16 Pún meinisin ekkewe mettóch mi nóm lón fénúfan—mochenian futuk me mochenian lemaas me sikesik wóón pisek—rese pop seni ewe Sam, nge ra pop seni ei fénúfan. 17 Pwal och, fénúfan epwe móróló me masouan meinisin minne aramas ra mocheniaiti repwe pwal móróló, nge ié mi féri letipen Kot epwe nónnóm tori feilfeiló chék.

18 Ámi nei kana mi áchengicheng, iei ewe sáingoon awa. Oua fen rong pwe ewe chón ú ngeni Kraist epwe feito, pwal mwo nge iei a chómmóng ekkewe chón ú ngeni Kraist ra pwá, ina minne sia silei pwe iei ewe sáingoon awa. 19 Ra towu senikich pún esap iir chón ach kúmi. Pún iká iir chón ach kúmi, iwe repwe chék nómotiw rech. Nge ra towu pwe epwe tongeni pwá pwe esap meinisin chókkewe mi nóm, iir chón ach kúmi. 20 Ámi oua fen kepit me ren ewe Kot mi Pin, me ámi meinisin a wor ámi sile. 21 Úa mak ngenikemi, esap pokiten ámi ouse silei ewe enlet, nge pokiten oua silei, me pokiten ese wor och mi chofona a pop seni ewe enlet.

22 Ié ewe chón chofona? Esap ewe emén mi amam pwe Jises i ewe Kraist? Iei i ewe chón ú ngeni Kraist, ewe mi amam ewe Sam me ewe Naw. 23 Ié a amam ewe Naw, ese wor an riri ngeni ewe Sam. Nge ié a apasa pwe a lúkú ewe Naw, a pwal wor an riri ngeni ewe Sam. 24 Nge ren ámi, a lamot epwe chék nónnóm remi met oua rong seni me lepoputáán. Iká minne oua rong seni lepoputáán a nónnóm remi, iwe pwal ámi oupwe nónnóm lón ámi tipeeúfengen me ewe Naw me ewe Sam. 25 Pwal och, iei met a pwisin pwonei ngenikich—ewe manaw esemuch.

26 Úa makkeei ngenikemi ekkeei mettóch ussun chókkewe mi sótun otupukemiiló. 27 Nge ámi, pokiten Kot a fen filikemiitá me ren an we ngún mi fel me ena ngún mi fel a nónnóm remi, iwe ese lamot án emén epwe pwal asukulakemi. Nge Kot a áeá ena ngún mi fel le asukula ngenikemi mettóch meinisin. A enlet me ese wor chofona lón. Iwe, oupwe nónnóm lón ámi tipeeúfengen me i, ussun met ena ngún mi fel a fen áiti ngenikemi. 28 Iwe, ámi nei kana mi áchengicheng, oupwe nónnóm lón ámi tipeeúfengen me i, pún atun epwe pwááló sipwe tongeni pwora le fós me sisap op seni fán sáw atun an waroto. 29 Iká oua silei pwe Jises* emén mi pwúng, oua pwal silei pwe meinisin chókkewe mi féfféri minne mi pwúng ra up seni Kot.