Ié Ekkewe Chónláng me Met Ra Kan Féri?

Jiowa a mochen ach sipwe káé usun an we famili lón láng. Ekkewe chónláng ra kapachelong lón an na famili, me ra iteni “nöün Kot.” (Hiop 38:7) Met Paipel a apasa usun ekkewe chónláng? Met wiser? Meinisin chónláng iir chón án Kot we famili?

1. Ié ekkewe chónláng?

Jiowa a féri ekkewe chónláng mwen an féri fénúfan. Sise tongeni kúner, me ra nóm láng. (Ipru 1:14) A wor fite million chónláng me ra sókkofesen wóón en me napanaper. (Pwärätä 5:11) Ra “aleasochisi [án Jiowa] kapas” me “aüselinga alon.” (Kölfel 103:20) Lón fansoun lóóm, fán ekkóch Jiowa a néúnéú chónláng ar repwe uwei pwóróus me álisi me seláni néún kewe aramas. Lón ei fansoun, ekkewe chónláng ra emmweni ekkewe Chón Kraist ngeni chókkewe mi mochen káé usun Kot.

2. Ié Satan me néún kewe timon?

Ekkóch chónláng rese tuppwél ngeni Jiowa. Ewe áeménún chónláng mi ú ngeni Kot a “iteni Tefil are Satan, a atupu unusen chon fanüfan.” (Pwärätä 12:9) Satan a mochen nemeni ekkewe ekkóch, ina popun a otupu Atam me Efa ar repwe álleasolapa Jiowa, nge mwirin a pwal otupu ekkóch chónláng. Ekkena chónláng mi ú ngeni Kot ra iteni timon. Jiowa a allúkú ar repwe kóturutiw seni láng ngeni fénúfan, me repwe ninniiló.​—Álleani Pwärätä 12:9, 12.

3. Ifa usun Satan me ekkewe timon ra sótun otupukich?

Satan me ekkewe timon ra otupu chómmóng aramas ren ar áeá angangen roong, ina eú mettóch mi ngaw aramas ra kan féri ren ar sótun fós ngeni ekkewe mi máló. Áwewe chék, ekkóch ra kútta álillis seni ekkewe chón pwee wóón fúú, souesissil, souoesini, me sourong. Nge ekkóch ra kút ar sáfei mi fiti angangen roong. Aramas ra pwal tupuló le lúkú pwe ra tongeni fós ngeni ekkewe mi máló. Nge iei met Jiowa a eáni éúréúr: “Kosap feila ren watawa ika ren sourong, kosap angei ar öüröür.” (Lifitikos 19:31) A éúréúrakich ach sipwe túmúnúkich seni Satan me ekkewe timon. Iir chón oputa Kot, me ra mochen efeiengawakich.

KÚTTAFICHI

4. Ekkewe chónláng ra álisi aramas le káé usun Jiowa

Néún Kot kewe chónláng rese wisen afalafal ngeni aramas. Nge ra emmweni chókkewe mi fel ngeni Jiowa ngeni chókkewe mi mochen káé usun i. Álleani Pwärätä 14:6, 7, me mwirin pwóróusfengen wóón ekkeei kapas eis:

• Pwata a lamot ngenikich án ekkewe chónláng álillis lón ach angangen afalafal?

• Ka péchékkúletá ren óm silei pwe ekkewe chónláng ra tongeni emmwenuk ngeni chókkewe mi mochen káé ewe enlet? Pwata?

5. Túmúnuk seni angangen roong

Satan me ekkewe timon ra oputa Jiowa me ra pwal oputakich. Álleani Lukas 9:38-42, me mwirin pwóróusfengen wóón ei kapas eis:

• Met ekkewe timon ra féri ngeni aramas?

Sise mochen mut ngeni ekkewe timon ar repwe etipetipakich. Álleani Tuteronomi 18:10-12, me mwirin pwóróusfengen wóón ekkeei kapas eis:

• Ifa usun ekkewe timon ra sótun etipetipakich me fós ngenikich? Met sókkun féfférún angangen roong a chéú lón leeniom?

• Met meefiom, mi pwúng án Jiowa allúk usun angangen roong? Pwata?

Fichi ei VIDEO, me mwirin pwóróusfengen wóón ekkeei kapas eis.

VIDEO: “Oppose the Devil” (5:02)

• Met meefiom, mi efeiengaw ewe nánáán eppet néún Palesa we nengngin a néúnéú? Pwata?

• Met a lamot án Palesa epwe féri pwe epwe túmúnúúr seni ekkewe timon?

Chón Kraist mi enlet ra kan úkkú ngeni ekkewe timon. Álleani Föför 19:19 me 1 Korint 10:21, me mwirin pwóróusfengen wóón ei kapas eis:

• Pwata a lamot ach sipwe péútaaló meinisin pisekich kewe mi riri ngeni angangen roong?

6. Ka tongeni win lón óm fiu ngeni Satan me néún kewe timon

Ekkewe timon ra nóm fán nemenien Satan. Nge ekkewe chónláng mi tuppwél ra nóm fán emmwenien ewe meilapen chónláng, Mikael, ina i Jesus. Ifa úkúkún manamanen Mikael? Álleani Pwärätä 12:7-9, me mwirin pwóróusfengen wóón ekkeei kapas eis:

• Ién lein Mikael me néún kewe chónláng, me Satan me néún kewe timon ra kon péchékkúl?

• Óm lúkú nge néún Jesus kewe chón káé repwe niweiti Satan me néún kewe timon?

Ka tongeni win lón óm fiu ngeni Satan me néún kewe timon. Álleani James 4:7, me mwirin pwóróusfengen wóón ei kapas eis:

• Ifa usun ka tongeni túmúnuk seni Satan me ekkewe timon?

MENLAPAN

Ekkewe chónláng mi tuppwél ra álisikich. Satan me néún kewe timon ra oputa Jiowa, me ra áeá angangen roong le otupu aramas.

Enniwili

• Ifa usun néún Jiowa kewe chónláng ra álisi aramas le káé usun i?

• Ié Satan me néún kewe timon?

• Pwata a lamot ach sipwe unusen ttiisenikich angangen roong?

PWAL EKKÓCH PWÓRÓUS

Ppii ika pwata sia silei pwe Jesus i ewe meilapen chónláng itan Mikael.

“Who Is the Archangel Michael?” (Web article)

Álleani ekkewe pisekin ánnet mi pwári pwe ewe Tefil, i wesewesen emén.

“Is the Devil Real?” (Web article)

Álleani ifa usun emén fefin a unusen ngase seni an nóm fán nemenien ekkewe timon.

“She Found a Purpose in Life” (The Watchtower, July 1, 1993)

Ppii ifa usun Satan a áeá angangen roong le otupu aramas.

“The Truth About Magic, Sorcery, and Witchcraft” (The Road to Everlasting Life, part 5)